ಕೇಂದ್ರ ಸರ್ಕಾರ ಜಾರಿಗೆ ತಂದಿರುವ ಸಶಸ್ತ್ರ ಪಡೆಗಳ ‘ಅಗ್ನಿಪಥ್’ ನೇಮಕಾತಿ ಯೋಜನೆಯನ್ನು ತಕ್ಷಣವೇ ರದ್ದುಗೊಳಿಸಬೇಕು ಎಂದು ಕಾಂಗ್ರೆಸ್ ಆಗ್ರಹಿಸಿದೆ. ಈ ಯೋಜನೆಯು ಭಾರತದ ರಾಷ್ಟ್ರೀಯ ಭದ್ರತೆ ಮತ್ತು ಸೇನಾ ವ್ಯವಸ್ಥೆಯನ್ನು ತೀವ್ರವಾಗಿ ದುರ್ಬಲಗೊಳಿಸಿದೆ ಎಂದು ಕಾಂಗ್ರೆಸ್ ಗಂಭೀರವಾಗಿ ಆರೋಪಿಸಿದೆ.
ಕೇಂದ್ರ ಸರ್ಕಾರದ ಅಗ್ನಿಪಥ್ ಯೋಜನೆಯಿಂದಾಗಿ ಸೇನೆಗೆ ಸೇರ್ಪಡೆಯಾಗುವ ಯುವಕರ ಭವಿಷ್ಯ ಅನಿಶ್ಚಿತತೆಯಲ್ಲಿದೆ. ನಾಲ್ಕು ವರ್ಷಗಳ ಸೇವೆಯ ನಂತರ ಬಹುಪಾಲು ಯುವಕರು ಕೆಲಸವಿಲ್ಲದೆ ಹೊರಬರುವ ಪರಿಸ್ಥಿತಿ ನಿರ್ಮಾಣವಾಗುತ್ತಿದ್ದು, ಇದು ಸೇನೆಯಲ್ಲಿರುವ ವೃತ್ತಿಪರತೆ ಮತ್ತು ಬದ್ಧತೆಗೆ ಧಕ್ಕೆ ತರುತ್ತಿದೆ ಎಂದು ಕಾಂಗ್ರೆಸ್ ಅಭಿಪ್ರಾಯಪಟ್ಟಿದೆ.
ಇದನ್ನೂ ಓದಿ: ಯುವಜನರ ಭವಿಷ್ಯ ರೂಪಿಸುವ ‘ಬೆಂಗಳೂರು ಕೌಶಲ್ಯ ಶೃಂಗಸಭೆ 2026’ ನಾಳೆಯಿಂದ ಆರಂಭ
ಸೇನಾ ನಿಪುಣರು ಮತ್ತು ಪ್ರಮುಖ ಕಮಾಂಡರ್‌ಗಳು ಸೂಚಿಸುವಂತೆ, ಯುದ್ಧದ ಸಂದರ್ಭದಲ್ಲಿ ಸುದೀರ್ಘ ಅನುಭವ ಹಾಗೂ ಕಠಿಣ ತರಬೇತಿ ಹೊಂದಿದ ಸೈನಿಕರು ಅಗತ್ಯವಿರುತ್ತಾರೆ. ಆದರೆ 4 ವರ್ಷಗಳ ಅಲ್ಪಾವಧಿ ನೇಮಕಾತಿಯು ಸೇನೆಯ ಒಟ್ಟಾರೆ ಯುದ್ಧ ಸಜ್ಜುಗೊಳಿಸುವ ಸಾಮರ್ಥ್ಯ ಮತ್ತು ಆಂತರಿಕ ಬದ್ಧತೆಯನ್ನು ಕುಗ್ಗಿಸುತ್ತದೆ ಎಂದು ಕಾಂಗ್ರೆಸ್ ಕಳವಳ ವ್ಯಕ್ತಪಡಿಸಿದೆ.
4 ವರ್ಷಗಳ ಸೇವೆಯ ನಂತರ 75% ಯುವಕರನ್ನು ಯಾವುದೇ ಪಿಂಚಣಿ ಮತ್ತು ಖಾಯಂ ಉದ್ಯೋಗದ ಭರವಸೆಯಿಲ್ಲದೆ ಹೊರಕಳುಹಿಸಲಾಗುತ್ತದೆ. ಇದು ದೇಶ ಸೇವೆ ಮಾಡಲು ಬಯಸುವ ಲಕ್ಷಾಂತರ ಯುವಕರ ಭವಿಷ್ಯದ ಜೊತೆ ಚೆಲ್ಲಾಟವಾಡುವುದಾಗಿದೆ ಎಂದು ಕಾಂಗ್ರೆಸ್ ಪ್ರತಿಪಾದಿಸಿದೆ.
ಹಿಂದಿನ ಸಾಂಪ್ರದಾಯಿಕ ಮತ್ತು ಖಾಯಂ ನೇಮಕಾತಿ ಪ್ರಕ್ರಿಯೆಯನ್ನು ಸಶಸ್ತ್ರ ಪಡೆಗಳಲ್ಲಿ ತಕ್ಷಣವೇ ಪುನರಾರಂಭಿಸಬೇಕು. ಭೂಸೇನೆ, ನೌಕಾಪಡೆ ಮತ್ತು ವಾಯುಪಡೆಯಲ್ಲಿ ಖಾಲಿ ಇರುವ ಹುದ್ದೆಗಳಿಗೆ ನಿರಂತರ ಮತ್ತು ಪೂರ್ಣಪ್ರಮಾಣದ ಸೇನಾ ಶ್ರೇಣಿಯ ನೇಮಕಾತಿ ನಡೆಯಬೇಕು ಎಂದು ಕಾಂಗ್ರೆಸ್ ಒತ್ತಾಯಿಸಿದೆ.
ಯಾವುದೇ ಹೊಸ ನೇಮಕಾತಿ ಸುಧಾರಣೆಗಳನ್ನು ತರುವ ಮುನ್ನ ನಿವೃತ್ತ ಸೈನ್ಯಾಧಿಕಾರಿಗಳು, ರಕ್ಷಣಾ ತಜ್ಞರು ಮತ್ತು ಸಂಸದೀಯ ಸಮಿತಿಗಳ ಜೊತೆ ಮುಕ್ತವಾಗಿ ಚರ್ಚಿಸಿ ಹೊಸ ಮಾದರಿ ರೂಪಿಸಬೇಕೇ ಹೊರತು ಏಕಪಕ್ಷೀಯ ನಿರ್ಧಾರದಿಂದ ರಾಷ್ಟ್ರೀಯ ಭದ್ರತೆಯನ್ನು ಪಣಕ್ಕಿಡಬಾರದು ಎಂದು ಎಚ್ಚರಿಸಿದೆ.
ಅಗ್ನಿಪಥ್ ಯೋಜನೆಯು ಸಂಪೂರ್ಣವಾಗಿ ವಿಫಲವಾಗಿದ್ದು, ಅದನ್ನು ತಕ್ಷಣ ಹಿಂಪಡೆಯುವುದೇ ದೇಶಕ್ಕೆ ಮತ್ತು ನಮ್ಮ ರಕ್ಷಣಾ ಪಡೆಗಳಿಗೆ ಒಳಿತು ಎಂದು ಕಾಂಗ್ರೆಸ್ ಸ್ಪಷ್ಟಪಡಿಸಿದೆ.
