“ರಾಜಕೀಯದಿಂದ ನಿಧಾನವಾಗಿ ಹಿಂದೆ ಸರಿದು ನನ್ನ ಬದುಕನ್ನು ಹಿಂತಿರುಗಿ ನೋಡಿದಾಗ, ಇಟಲಿಯ ಪುಟ್ಟ ಪಟ್ಟಣದ ಸರಳ ಬಾಲ್ಯದಿಂದ ಹಿಡಿದು ರಾಜೀವ್ ಗಾಂಧಿ ಪತ್ನಿಯಾಗಿ, ಇಂದಿರಾ ಗಾಂಧಿ ಸೊಸೆಯಾಗಿ ಭಾರತದಲ್ಲಿ ಕಳೆದ ಸಂಕೀರ್ಣ ವರ್ಷಗಳವರೆಗೆ ಪ್ರೀತಿ ಮತ್ತು ನಿಷ್ಠೆಯ ಎಳೆಯೊಂದು ನನ್ನ ಕಥೆಯನ್ನು ವ್ಯಾಖ್ಯಾನಿಸುತ್ತಾ ಹೋಯಿತು”
‘ಹೃದಯವಿದ್ರಾವಕ ನೋವು ಮತ್ತು ಆಘಾತಗಳೇ ನನ್ನನ್ನು ರಾಜಕೀಯ ಕ್ಷೇತ್ರಕ್ಕೆ ಅನಿವಾರ್ಯವಾಗಿ ನೂಕಿದವು’ ಎಂದು ಕಾಂಗ್ರೆಸ್‌ನ ಹಿರಿಯ ನಾಯಕಿ ಸೋನಿಯಾ ಗಾಂಧಿ ತಮ್ಮ ಮುಂಬರುವ ಆತ್ಮಕಥೆಯಲ್ಲಿ ಬಿಚ್ಚಿಟ್ಟಿದ್ದಾರೆ. ನೆಹರು-ಗಾಂಧಿ ಮನೆತನದ ಸೊಸೆಯಾಗಿ ಅವರು ಅನುಭವಿಸಿದ ಸಂತೋಷ, ದುರಂತಗಳು ಹಾಗೂ ಹಲವು ಕುತೂಹಲಕಾರಿ ಸಂಗತಿಗಳನ್ನು ಒಳಗೊಂಡ ಅವರ ಬಹುನಿರೀಕ್ಷಿತ ಆತ್ಮಕಥೆ ‘ಬಿಲಾಂಗಿಂಗ್: ಎ ಜರ್ನಿ ಆಫ್ ಲವ್’ (Belonging: A Journey of Love) ಇದೇ ನವೆಂಬರ್ 10ರಂದು ಮಾರುಕಟ್ಟೆಗೆ ಬಿಡುಗಡೆಯಾಗಲಿದೆ.
ಟೋನಿ ಮಾರಿಸನ್ ಮತ್ತು ಕಜುವೊ ಇಶಿಗುರೊ ಅವರಂತಹ ಖ್ಯಾತ ಸಾಹಿತಿಗಳ ಕೃತಿಗಳನ್ನು ಪ್ರಕಟಿಸಿರುವ ‘ಪೆಂಗ್ವಿನ್ ರಾಂಡಮ್ ಹೌಸ್’ನ ಪ್ರತಿಷ್ಠಿತ ಅಂಗಸಂಸ್ಥೆಯಾದ ‘ಆಲ್ಫ್ರೆಡ್ ಎ. ಕ್ನಾಫ್’ (Alfred A. Knopf) ಈ ಪುಸ್ತಕವನ್ನು ಜಾಗತಿಕವಾಗಿ ಹೊರತರುತ್ತಿದೆ. ಅತಿ ದೀರ್ಘಕಾಲ ಕಾಂಗ್ರೆಸ್ ಅಧ್ಯಕ್ಷೆಯಾಗಿ ಸೇವೆ ಸಲ್ಲಿಸಿದ ಹೆಗ್ಗಳಿಕೆ ಹೊಂದಿರುವ 79 ವರ್ಷದ ಸೋನಿಯಾ ಗಾಂಧಿ ಅವರ ಬದುಕಿನ ಮಹತ್ವದ ಘಟ್ಟಗಳನ್ನು ಈ ಪುಸ್ತಕವು ಅತ್ಯಂತ ಸುದೀರ್ಘವಾಗಿ ಹಾಗೂ ನೈಜವಾಗಿ ಕಟ್ಟಿಕೊಡಲಿದೆ.
ಇಟಲಿಯ ಪುಟ್ಟ ಪಟ್ಟಣವೊಂದರಲ್ಲಿ ಜನಿಸಿದ ಅವರು, ಉನ್ನತ ವ್ಯಾಸಂಗಕ್ಕಾಗಿ ಕೇಂಬ್ರಿಡ್ಜ್‌ಗೆ ತೆರಳಿದ್ದರು. ಅಲ್ಲಿ ಓದುತ್ತಿದ್ದಾಗ ಜವಾಹರಲಾಲ್ ನೆಹರು ಅವರ ಮೊಮ್ಮಗ ಹಾಗೂ ಇಂದಿರಾಗಾಂಧಿ ಅವರ ಪುತ್ರ ರಾಜೀವ್ ಗಾಂಧಿಯವರ ಪರಿಚಯವಾಗಿ, ಅದು ಪ್ರೇಮಾಂಕುರಕ್ಕೆ ತಿರುಗಿತ್ತು. ಆನಂತರ ನೆಹರು-ಗಾಂಧಿ ಕುಟುಂಬದ ಸೊಸೆಯಾಗಿ ಸಾರ್ವಜನಿಕ ಬದುಕಿಗೆ ಬರುವವರೆಗೂ ತಾವು ತಮ್ಮ ಖಾಸಗಿತನವನ್ನು ಅತ್ಯಂತ ಕಟ್ಟುನಿಟ್ಟಾಗಿ ಕಾಯ್ದುಕೊಂಡಿದ್ದಾಗಿ ಅವರು ಈ ಕೃತಿಯಲ್ಲಿ ಹೇಳಿಕೊಂಡಿದ್ದಾರೆ.
1984ರಲ್ಲಿ ಅತ್ತೆ ಇಂದಿರಾಗಾಂಧಿ ಹತ್ಯೆಯಾದಾಗ ಅವರ ಬದುಕು ಸಂಪೂರ್ಣ ಅನಿರೀಕ್ಷಿತ ತಿರುವು ಪಡೆಯಿತು. ಆ ಆಘಾತಕಾರಿ ಘಟನೆಯ ಬಳಿಕ ಪ್ರಧಾನಿಯಾದ ಪತಿ ರಾಜೀವ್ ಗಾಂಧಿ ಕೂಡ ಕೇವಲ ಏಳು ವರ್ಷಗಳ ನಂತರ ಭೀಕರವಾಗಿ ಹತ್ಯೆಗೀಡಾದರು. ಇಂತಹ ಘೋರ ದುರಂತಗಳು, ಅರಗಿಸಿಕೊಳ್ಳಲಾಗದ ನೋವುಗಳು ತಮ್ಮನ್ನು ಖಾಸಗಿ ಬದುಕಿನಿಂದ ಸಾರ್ವಜನಿಕ ಮತ್ತು ರಾಜಕೀಯ ಜೀವನದತ್ತ ಹೇಗೆ ದೂಡಿದವು ಎಂಬುದನ್ನು ಕೃತಿಯಲ್ಲಿ ವಿವರಿಸಿದ್ದಾರೆ.
ರಾಜಕೀಯ ಪ್ರವೇಶದ ನಂತರ 2004ರಲ್ಲಿ ಕಾಂಗ್ರೆಸ್ ನೇತೃತ್ವದ ಮೈತ್ರಿಕೂಟ ಅಧಿಕಾರಕ್ಕೆ ಬಂದಾಗ, ಪಕ್ಷವು ಅತ್ಯುನ್ನತ ಪ್ರಧಾನಿ ಹುದ್ದೆಗೇರುವಂತೆ ತೀವ್ರ ಒತ್ತಾಯ ಮಾಡಿತ್ತು. ಆದರೆ, ಆ ಆಫರ್ ಅನ್ನು ನಿರಾಕರಿಸಲು ನೈಜ ಕಾರಣವೇನು ಮತ್ತು ಅಂದಿನ ರಾಜಕೀಯ ಸನ್ನಿವೇಶ ಹೇಗಿತ್ತು ಎಂಬುದನ್ನು ಸೋನಿಯಾ ಅವರು ಈ ಪುಸ್ತಕದಲ್ಲಿ ಯಾವುದೇ ಮುಚ್ಚುಮರೆಯಿಲ್ಲದೆ ಅತ್ಯಂತ ಪ್ರಾಮಾಣಿಕವಾಗಿ ಹಾಗೂ ಧೈರ್ಯದಿಂದ ಓದುಗರ ಮುಂದೆ ತೆರೆದಿಟ್ಟಿದ್ದಾರೆ.
“ನನ್ನ ಜೀವನದ ಬಗ್ಗೆ ಬರೆಯುವುದು ಸುಲಭದ ಮಾತಾಗಿರಲಿಲ್ಲ. ಇದುವರೆಗೆ ನನ್ನೊಳಗೆ ಮಾತ್ರ ಭದ್ರವಾಗಿ ಬಚ್ಚಿಟ್ಟುಕೊಂಡಿದ್ದ ಖಾಸಗಿ ಕ್ಷಣಗಳು ಹಾಗೂ ಅನುಭವಗಳನ್ನು ಹಂಚಿಕೊಳ್ಳುವುದು ಬಹುದೊಡ್ಡ ಸವಾಲಾಗಿತ್ತು” ಎಂದು ಅವರು ಹೇಳಿದ್ದಾರೆ. ತಮ್ಮ ಕುಟುಂಬದ ಬಗ್ಗೆ ಸಾಕಷ್ಟು ಬರೆಯಲಾಗಿದ್ದರೂ, ಅವರ ನೈಜ ಉದ್ದೇಶಗಳು ಹಾಗೂ ಮಾನವ ಸಹಜ ದೌರ್ಬಲ್ಯಗಳನ್ನು ಸರಿಯಾಗಿ ಅರ್ಥೈಸಲಾಗಿಲ್ಲ. ಈ ಕೃತಿಯು ಅವರ ಮಾನವೀಯತೆಗೆ ಸಲ್ಲಿಸುವ ನಮನವಾಗಿದ್ದು, ಆರು ದಶಕಗಳ ಭಾರತದ ಸಾಮಾಜಿಕ ಹಾಗೂ ರಾಜಕೀಯ ಬದಲಾವಣೆಗಳ ವಿಶಿಷ್ಟ ನೋಟವನ್ನು ನೀಡಲಿದೆ ಎಂದಿದ್ದಾರೆ.
“ರಾಜಕೀಯದಿಂದ ನಿಧಾನವಾಗಿ ಹಿಂದೆ ಸರಿದು ನನ್ನ ಬದುಕನ್ನು ಹಿಂತಿರುಗಿ ನೋಡಿದಾಗ, ಇಟಲಿಯ ಪುಟ್ಟ ಪಟ್ಟಣದ ಸರಳ ಬಾಲ್ಯದಿಂದ ಹಿಡಿದು ರಾಜೀವ್ ಗಾಂಧಿ ಪತ್ನಿಯಾಗಿ, ಇಂದಿರಾ ಗಾಂಧಿ ಸೊಸೆಯಾಗಿ ಭಾರತದಲ್ಲಿ ಕಳೆದ ಸಂಕೀರ್ಣ ವರ್ಷಗಳವರೆಗೆ ಪ್ರೀತಿ ಮತ್ತು ನಿಷ್ಠೆಯ ಎಳೆಯೊಂದು ನನ್ನ ಕಥೆಯನ್ನು ವ್ಯಾಖ್ಯಾನಿಸುತ್ತಾ ಹೋಯಿತು” ಎಂದು ಸೋನಿಯಾ ಗಾಂಧಿ ತಮ್ಮ ಬರವಣಿಗೆಯ ಸುಂದರ ಹಾಗೂ ಭಾವುಕ ಅನುಭವವನ್ನು ಹಂಚಿಕೊಂಡಿದ್ದಾರೆ.
