ರಾಜ್ಯದಲ್ಲಿ ಪ್ರಗತಿಯಲ್ಲಿರುವ ‘ವಿಶೇಷ ಸಮಗ್ರ ಮತದಾರರ ಪಟ್ಟಿ ಪರಿಷ್ಕರಣೆ’ (SIR) ಪ್ರಕ್ರಿಯೆಯಡಿ ಲಕ್ಷಾಂತರ ಅರ್ಹ ಮತದಾರರ ಹಕ್ಕುಗಳನ್ನು ಕಸಿಯುವ ಆತಂಕ ಎದುರಾಗಿದೆ. ಕೇವಲ ಬೆಂಗಳೂರು ನಗರದಲ್ಲೇ ಶೇಕಡ 48.41ರಷ್ಟು, ಅಂದರೆ ಇಬ್ಬರಲ್ಲಿ ಒಬ್ಬ ಮತದಾರರನ್ನು ಆಗಸ್ಟ್ 17ರ ಒಳಗಾಗಿ ಪಟ್ಟಿಯಿಂದ ತೆಗೆದುಹಾಕುವ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ‘ನಾಗರಿಕ ಮತ ಕಾವಲು ಸಮಿತಿ’ ಗಂಭೀರ ಆರೋಪ ಮಾಡಿದೆ.
ಈ ಅವ್ಯವಸ್ಥೆಗೆ ರಾಜ್ಯದ ಮುಖ್ಯ ಚುನಾವಣಾಧಿಕಾರಿಗಳ ಕಚೇರಿಯೇ ನೇರ ಹೊಣೆ ಎಂದು ಆರೋಪಿಸಿರುವ ಸಮಿತಿಯು, ಚುನಾವಣಾ ಆಯೋಗ ಬಿಡುಗಡೆ ಮಾಡಿರುವ ದೈನಂದಿನ ವರದಿಯ ಅಂಕಿ-ಅಂಶಗಳನ್ನು ಉಲ್ಲೇಖಿಸಿ, ಈ ಪ್ರಕ್ರಿಯೆಯು ಸಂಪೂರ್ಣ ಅವೈಜ್ಞಾನಿಕವಾಗಿದೆ ಎಂದು ದೂರಿದೆ.
ಮತದಾರರ ಮೇಲೆ ‘ಅನುಮಾನ’ದ ನೆರಳು
ಸಾಮಾನ್ಯವಾಗಿ ಜನಸಂಖ್ಯೆಗೆ ಅನುಗುಣವಾಗಿ ಮತದಾರರ ಪಟ್ಟಿ ಸ್ಥಿರವಾಗಿರುತ್ತದೆ. ಪಟ್ಟಿಯಿಂದ ಒಂದು ಹೆಸರನ್ನು ಕೈಬಿಡಬೇಕಾದರೂ ಸೂಕ್ತ ಕಾರಣ ನೀಡಬೇಕು. ಆದರೆ, ಪ್ರಸ್ತುತ ಸಿಇಒ ವಿ. ಅನ್ಬುಕುಮಾರ್ ಅವರ ನೇತೃತ್ವದಲ್ಲಿ ನಡೆಯುತ್ತಿರುವ ಪರಿಷ್ಕರಣೆಯಲ್ಲಿ ಪ್ರತಿಯೊಬ್ಬ ನಾಗರಿಕನನ್ನೂ ಅನುಮಾನದಿಂದ ನೋಡಲಾಗುತ್ತಿದ್ದು, ಪಟ್ಟಿಯಲ್ಲಿ ಉಳಿಯಲು ಬಿಗಿಯಾದ 4 ಕಠಿಣ ಹಂತಗಳನ್ನು ದಾಟುವಂತೆ ಒತ್ತಾಯಿಸಲಾಗುತ್ತಿದೆ ಎಂದು ಸಮಿತಿ ಹೇಳಿದೆ. ಆ ಹಂತಗಳು ಹೀಗಿವೆ:
ಬಿಎಲ್ಒಗಳು ನೋಂದಾಯಿತ ವಿಳಾಸದಲ್ಲಿ ಮತದಾರರನ್ನು ಖುದ್ದಾಗಿ ಪತ್ತೆಹಚ್ಚಿ, ಎನ್ಯುಮರೇಷನ್ ಫಾರಂ ಡಿಜಿಟಲೀಕರಿಸಬೇಕು.
ಮತದಾರರ ಅಥವಾ ಪೋಷಕರ ಹೆಸರು 2002ರ ಕೊನೆಯ ‘ಇಂಟೆನ್ಸಿವ್ ರಿವಿಷನ್’ ಪಟ್ಟಿಯೊಂದಿಗೆ ಮ್ಯಾಪಿಂಗ್ ಆಗಬೇಕು.
ಪೂರಕ ದಾಖಲೆಗಳು ಮತದಾರರ ಸ್ವಂತ ಹೆಸರಿನಲ್ಲೇ ಇರಬೇಕು ಮತ್ತು ಅದು ಅಧಿಕಾರಿಯ ಪರಿಶೀಲನಾ ಮಾನದಂಡ ಪೂರೈಸಬೇಕು.
ನಿಜವಾದ ದಾಖಲೆಗಳಿದ್ದರೂ, ಕಾಗುಣಿತ ಅಥವಾ ಲಿಪ್ಯಂತರದ (Spelling/Transliteration) ಸಣ್ಣ ವ್ಯತ್ಯಾಸವಿದ್ದರೂ ದೆಹಲಿ ನಿಯಂತ್ರಣದಲ್ಲಿರುವ ಸಾಫ್ಟ್ವೇರ್ ‘ಲಾಜಿಕಲ್ ಡಿಸ್ಕ್ರಿಪೆನ್ಸಿ’ (Logical Discrepancy) ನೆಪವೊಡ್ಡಿ ಹೆಸರುಗಳನ್ನು ತಿರಸ್ಕರಿಸುತ್ತಿದೆ.
ಗಣಿತಕ್ಕೇ ಸವಾಲು ಹಾಕಿದ ಆಯೋಗದ ಲೆಕ್ಕ!
ಆಗಸ್ಟ್ 3, 2026ರಂದು ಸಿಇಒ ಕಚೇರಿ ಹೊರಡಿಸಿದ ದೈನಂದಿನ ಪ್ರಕಟಣೆಯಂತೆ (ಸಂಖ್ಯೆ: DPAR 172 ChuMaPa 2026), ರಾಜ್ಯದ ಒಟ್ಟು 5.54 ಕೋಟಿ ಮತದಾರರಲ್ಲಿ 1.10 ಕೋಟಿಗೂ ಹೆಚ್ಚು (ಶೇ 19.95) ಹೆಸರುಗಳನ್ನು ‘ಎಎಸ್ಡಿಡಿಒ’ (ಗೈರು, ಸ್ಥಳಾಂತರ, ಮೃತ, ನಕಲಿ ಹಾಗೂ ಇತರೆ) ಪಟ್ಟಿಗೆ ಸೇರಿಸಲಾಗಿದೆ. ಇದು ಆಯೋಗದ ದೋಷಪೂರಿತ ಲೆಕ್ಕಾಚಾರಕ್ಕೆ ಸಾಕ್ಷಿ ಎಂದು ಸಮಿತಿ ವಿಶ್ಲೇಷಿಸಿದೆ.
2024ರ ಲೋಕಸಭಾ ಚುನಾವಣೆಯಲ್ಲಿ ಬೆಂಗಳೂರಿನ 28 ಕ್ಷೇತ್ರಗಳಲ್ಲಿ 98.43 ಲಕ್ಷ ಮತದಾರರಿದ್ದರು. ಈ ಪೈಕಿ 52.47 ಲಕ್ಷಕ್ಕೂ ಹೆಚ್ಚು (ಶೇ 53.3) ಜನರು ಹಕ್ಕು ಚಲಾಯಿಸಿದ್ದರು. ಈಗಿನ ಪರಿಷ್ಕರಣಾ ಅಂಕಿ-ಅಂಶಗಳ ಅನ್ವಯ ನೋಡಿದರೆ (ಶೇ 48ರಷ್ಟು ಕಡಿತ), ಬೆಂಗಳೂರಿನಲ್ಲಿ ಕೇವಲ 50 ಲಕ್ಷ ಮತದಾರರು ಮಾತ್ರ ಉಳಿಯಲಿದ್ದಾರೆ. ಅಂದರೆ, ಕಳೆದ ಚುನಾವಣೆಯಲ್ಲಿ ಮತ ಹಾಕಿದವರಿಗಿಂತಲೂ ಕಡಿಮೆ ಜನ ಈಗ ಬೆಂಗಳೂರಿನಲ್ಲಿದ್ದಾರೆ ಎಂದಾಗುತ್ತದೆ. ಈ ಲೆಕ್ಕಾಚಾರ ನಿಜವಾದರೆ, 2024ರಲ್ಲಿ ನಡೆದದ್ದು ಶೇ 54ರಷ್ಟು ಮತದಾನವಲ್ಲ, ಬದಲಿಗೆ ಶೇ 105ರಷ್ಟು ಮತದಾನವೇ ಎಂದು ಸಮಿತಿ ಆಯೋಗವನ್ನು ಪ್ರಶ್ನಿಸಿದೆ.
ಆಯೋಗದ ಅಂಕಿ-ಅಂಶ (ASDDO ಪಟ್ಟಿಯ ವರ್ಗೀಕರಣ):
ರಾಜ್ಯದಲ್ಲಿ ಗುರುತಿಸಲಾಗಿರುವ 1.10 ಕೋಟಿ ಅನುಮಾನಾಸ್ಪದ/ಸ್ಥಳಾಂತರಗೊಂಡವರ ವಿವರ ಇಲ್ಲಿದೆ:
ಶಾಶ್ವತವಾಗಿ ಸ್ಥಳಾಂತರಗೊಂಡವರು (Shifted): 66,23,832 (ಒಟ್ಟು ಮತದಾರರ ಶೇ 11.95 | ASDDO ಪಟ್ಟಿಯಲ್ಲಿ ಶೇ 59.9)
ಮೃತರು (Dead): 16,21,446 (ಶೇ 2.93 | ASDDO ಪಟ್ಟಿಯಲ್ಲಿ ಶೇ 14.7)
ಗೈರು / ಪತ್ತೆಯಾಗದವರು (Absent): 16,18,630 (ಶೇ 2.92 | ASDDO ಪಟ್ಟಿಯಲ್ಲಿ ಶೇ 14.6)
ನಕಲಿ / ಈಗಾಗಲೇ ನೋಂದಾಯಿತರು (Duplicate): 6,78,213 (ಶೇ 1.22 | ASDDO ಪಟ್ಟಿಯಲ್ಲಿ ಶೇ 6.1)
ಇತರೆ (Other): 5,17,167 (ಶೇ 0.93 | ASDDO ಪಟ್ಟಿಯಲ್ಲಿ ಶೇ 4.7)
ವಲಸೆ ಲೆಕ್ಕಾಚಾರದಲ್ಲಿ ಭಾರಿ ವ್ಯತ್ಯಾಸ
ಬೆಂಗಳೂರು ವೇಗವಾಗಿ ಬೆಳೆಯುತ್ತಿರುವ ನಗರವಾಗಿದ್ದು, ಪ್ರತಿವರ್ಷ 3 ರಿಂದ 4 ಲಕ್ಷ ಜನರು ನಗರ ಸೇರುತ್ತಿದ್ದಾರೆ. 2022ರಿಂದ ಬಾಡಿಗೆ ದರಗಳು ಶೇ 40ರಷ್ಟು ಏರಿಕೆಯಾಗಿವೆ. ಅನೌಪಚಾರಿಕ ಕಾರ್ಮಿಕರ ಸಂಖ್ಯೆ ಹೆಚ್ಚಿರುವ ಕಾರಣಕ್ಕಾಗಿಯೇ ಸರ್ಕಾರ ‘ಗಿಗ್ ವರ್ಕರ್ಸ್ ಕಲ್ಯಾಣ ಕಾಯ್ದೆ-2025’ ಜಾರಿಗೆ ತಂದಿದೆ.
ಆದರೆ, ಕಾರ್ಮಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಹೊರವಲಸೆ ಹೋಗುವ ಕಲ್ಯಾಣ ಕರ್ನಾಟಕದ ರಾಯಚೂರು, ಬಳ್ಳಾರಿ, ಯಾದಗಿರಿ ಮತ್ತು ಬೀದರ್ ಜಿಲ್ಲೆಗಳಲ್ಲಿ ಕಡಿತದ ಪ್ರಮಾಣ ಶೇ 16.5 ರಿಂದ 18.4ರಷ್ಟಿದೆ (ರಾಜ್ಯದ ಸರಾಸರಿ ಶೇ 19.95ಕ್ಕಿಂತ ಕಡಿಮೆ). ಅದೇ ಒಳವಲಸೆ ಹೆಚ್ಚಿರುವ ಬೆಂಗಳೂರಿನಲ್ಲಿ ಕಡಿತದ ದರ ಬರೋಬ್ಬರಿ ಶೇ 48.41 (ರಾಜ್ಯದ ಸರಾಸರಿಗಿಂತ ಎರಡು ಪಟ್ಟು ಹೆಚ್ಚು) ಇರುವುದು ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ. ಅಧಿಕಾರಿಗಳು ವಾಸಸ್ಥಳದಲ್ಲಿ ಮತದಾರರನ್ನು ಪತ್ತೆಹಚ್ಚಲು ವಿಫಲವಾಗಿ, ಸುಲಭವಾಗಿ ‘ಸ್ಥಳಾಂತರಗೊಂಡವರು’ ಎಂದು ತಪ್ಪಾಗಿ ನಮೂದಿಸುತ್ತಿದ್ದಾರೆಯೇ ಎಂಬ ಮೂಲಭೂತ ಪ್ರಶ್ನೆಯನ್ನು ಸಮಿತಿ ಎತ್ತಿದೆ.
ನಾಗರಿಕ ಸಮಿತಿಯ ಪ್ರಮುಖ ಒತ್ತಾಯಗಳು:
ಭಾನುವಾರ ವಿಶೇಷ ಬೂತ್ ಅಭಿಯಾನ: ಬೆಂಗಳೂರಿನ ಉದ್ಯೋಗಿಗಳು ಬೆಳಿಗ್ಗೆಯೇ ಕೆಲಸಕ್ಕೆ ತೆರಳಿ ತಡವಾಗಿ ಹಿಂದಿರುಗುವುದರಿಂದ, ಬಿಎಲ್ಒಗಳು ಭಾನುವಾರಗಳಂದು ಪೂರ್ವಯೋಜಿತ ಬೂತ್ ಸಭೆಗಳನ್ನು ನಡೆಸಿ ಎನ್ಯುಮರೇಷನ್ ಫಾರಂ ವಿತರಿಸಿ, ಸ್ವೀಕರಿಸಬೇಕು.
ಸ್ಥಳದಲ್ಲೇ ಫಾರಂ-8 ವಿತರಣೆ: ರಾಜ್ಯದೊಳಗೆ ಒಂದು ವಿಳಾಸದಿಂದ ಮತ್ತೊಂದು ವಿಳಾಸಕ್ಕೆ ಮನೆ ಬದಲಾಯಿಸಿದವರ ಹೆಸರನ್ನು ಕೈಬಿಡಬಾರದು. ವಾಸಿಸುತ್ತಿರುವ ಸ್ಥಳದಲ್ಲೇ ಅವರಿಗೆ ಎನ್ಯುಮರೇಷನ್ ಫಾರಂ ಹಾಗೂ ‘ಫಾರಂ ನಂಬರ್ 8’ ನೀಡಿ ಹೊಸ ವಿಳಾಸಕ್ಕೆ ಮತ ಸ್ಥಳಾಂತರಿಸಲು ಅವಕಾಶ ನೀಡಬೇಕು.
ಗಡುವು ವಿಸ್ತರಣೆ: ಕೇವಲ 10 ದಿನಗಳ ಕಣ್ಣೊರೆಸುವ ಗಡುವು ವಿಸ್ತರಣೆಯಿಂದ ಪ್ರಯೋಜನವಿಲ್ಲ. ಹೊಸ ತಂತ್ರಜ್ಞಾನ ಹಾಗೂ ಪಾರದರ್ಶಕತೆಯೊಂದಿಗೆ ಈ ಪ್ರಕ್ರಿಯೆಯನ್ನು ಸೆಪ್ಟೆಂಬರ್ ಕೊನೆಯ ವಾರದವರೆಗೆ ವಿಸ್ತರಿಸಬೇಕು.
