ದೆಹಲಿಯಲ್ಲಿ ದಿನದಿಂದ ದಿನಕ್ಕೆ ಗಂಭೀರ ಸ್ವರೂಪ ಪಡೆದುಕೊಳ್ಳುತ್ತಿರುವ ವಾಯು ಮಾಲಿನ್ಯ ಮತ್ತು ಹೊಗೆಯ ಬಿಕ್ಕಟ್ಟು ಎಎಪಿ ಮತ್ತು ಬಿಜೆಪಿ ನಡುವಿನ ರಾಜಕೀಯ ವಾಗ್ದಾಳಿಗೆ ಕಾರಣವಾಗಿದೆ. ದೆಹಲಿಯ ಹವಾಮಾನ ವೈಪರೀತ್ಯ ಮತ್ತು ಮಾಲಿನ್ಯಕ್ಕೆ ಪಂಜಾಬ್‌ನ ರೈತರು ಭತ್ತದ ಕಸವನ್ನು ಸುಡುವುದೇ ಕಾರಣವೆಂದು ಬಿಜೆಪಿ ನಾಯಕರು ನಿರಂತರ ಆರೋಪ ಮಾಡುತ್ತಿದ್ದಾರೆ. ಈ ಆರೋಪಕ್ಕೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಪಂಜಾಬ್‌ನ ಆಡಳಿತಾರೂಢ ಎಎಪಿ, “ದೆಹಲಿಯ ಪಕ್ಕದಲ್ಲೇ ಇರುವ, ಬಿಜೆಪಿ ಆಡಳಿತ ನಡೆಸುತ್ತಿರುವ ಹರಿಯಾಣದ ಹೊಗೆ ಪಾಕಿಸ್ತಾನಕ್ಕೆ ಹೋಗುತ್ತದೆಯೇ? ಪಂಜಾಬ್‌ನ ಹೊಗೆ ಮಾತ್ರ, ಹರಿಯಾಣವನ್ನು ದಾಟಿ ದೆಹಲಿಗೆ ಬರುತ್ತದೆಯೇ?” ಎಂದು ಕಿಡಿಕಾರಿದೆ.
ದೆಹಲಿ ಬಿಜೆಪಿ ನಾಯಕ ಕಪಿಲ್ ಮಿಶ್ರಾ ಸೇರಿದಂತೆ ಹಲವು ಬಿಜೆಪಿ ನಾಯಕರ ಆರೋಪಗಳನ್ನು ಟೀಕಿಸಿರುವ ಎಎಪಿ ನಾಯಕ, ಪಂಜಾಬ್ ಹಣಕಾಸು ಸಚಿವ ಹರ್‌ಪಾಲ್ ಸಿಂಗ್ ಚೀಮಾ, “ಬಿಜೆಪಿ ಪಂಜಾಬ್ ವಿರೋಧಿ ಮತ್ತು ರೈತ ವಿರೋಧಿ ಪಕ್ಷವಾಗಿದೆ. ಬಿಜೆಪಿ ನಾಯಕರು ಕೇವಲ ಪಂಜಾಬ್‌ನ ರೈತರನ್ನು ನಿಂದಿಸಲು ಮತ್ತು ರಾಜ್ಯಕ್ಕೆ ಮಸಿ ಬಳೆಯಲು ನೆಪಗಳನ್ನು ಹುಡುಕುತ್ತಿದ್ದಾರೆ” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
“ಪಂಜಾಬ್ ಮತ್ತು ದೆಹಲಿಯ ನಡುವೆ ಬರೋಬ್ಬರಿ 300 ಕಿಲೋಮೀಟರ್ ದೂರವಿವೆ. ಮಧ್ಯದಲ್ಲಿ ಹರಿಯಾಣ ರಾಜ್ಯವಿದೆ. ಪಂಜಾಬ್‌ನಿಂದ ಹೊರಡುವ ಹೊಗೆ ವಾಹನಗಳಲ್ಲಿ ಕುಳಿತು ದೆಹಲಿಗೆ ಹೋಗುತ್ತದೆಯೇ ಅಥವಾ ಚೀಲಗಳಲ್ಲಿ ತುಂಬಿ ದೆಹಲಿಗೆ ಕಳುಹಿಸಲಾಗುತ್ತದೆಯೇ?” ಎಂದು ವ್ಯಂಗ್ಯವಾಡಿದ್ದಾರೆ.
ಅಲ್ಲದೆ, “ಪಂಜಾಬ್‌ನ ಹೊಗೆ ದೆಹಲಿಗೆ ತಲುಪುತ್ತದೆ ಎಂದು ಆರೋಪಿಸುವ ಬಿಜೆಪಿ, ಮಧ್ಯದಲ್ಲಿರುವ ಹರಿಯಾಣದ ಮಾಲಿನ್ಯದ ಬಗ್ಗೆ ಏಕೆ ಮೌನವಾಗಿದೆ. ಬಿಜೆಪಿಯ ತರ್ಕದ ಪ್ರಕಾರ ಹರಿಯಾಣದ ಹೊಗೆ ಬಹುಶಃ ನೆರೆಯ ಪಾಕಿಸ್ತಾನದ ಕಡೆಗೆ ಹೋಗುತ್ತಿರಬೇಕು” ಎಂದು ಲೇವಡಿ ಮಾಡಿದ್ದಾರೆ.
ಎಎಪಿ ಹಿರಿಯ ನಾಯಕ ಬಲ್ತೇಜ್ ಸಿಂಗ್ ಪನ್ನು ಅವರು ಸಹ ಬಿಜೆಪಿ ವಿರುದ್ಧ ತೀವ್ರ ಕಿಡಿಕಾರಿದ್ದಾರೆ. “ಭತ್ತದ ಕೊಯ್ಲು ಋತು ಆರಂಭವಾಗುವ ಮುನ್ನವೇ ಬಿಜೆಪಿ ನಾಯಕರು ಪಂಜಾಬ್‌ನ ಕೃಷಿ ಹೊಗೆಯ ಬಗ್ಗೆ ಹೇಳಿಕೆಗಳನ್ನು ನೀಡಲು ಪ್ರಾರಂಭಿಸಿದ್ದರು. ಪಂಜಾಬ್‌ನ ರೈತರನ್ನೇ ಈ ಮಾಲಿನ್ಯ ಬಿಕ್ಕಟ್ಟಿಗೆ ಹೊಣೆಗಾರರನ್ನಾಗಿ ಮಾಡಲು ಬಿಜೆಪಿ ಮೊದಲೇ ಯೋಜನೆ ರೂಪಿಸಿಕೊಂಡಂತಿದೆ” ಎಂದು ಆರೋಪಿಸಿದ್ದಾರೆ.
ಈ ಲೇಖನ ಓದಿದ್ದೀರಾ?: ಟ್ರಂಪ್ ತಿರಸ್ಕರಿಸಿದ ಯುವಜನರು; 2029ರಲ್ಲಿ ಭಾರತದ ಯುವ ಮತದಾರರ ರಾಜಕೀಯ ನಿಲುವು ಯಾವ ದಿಕ್ಕಿಗೆ?
“ಪಂಜಾಬ್‌ನಲ್ಲಿ ಕಸ ಸುಡುವ ಪ್ರಕರಣಗಳು ಹಿಂದಿನ ವರ್ಷಗಳಿಗೆ ಹೋಲಿಸಿದರೆ 90%ರಷ್ಟು ಕಡಿಮೆಯಾಗಿವೆ. ಇಷ್ಟಾಗಿಯೂ ಬಿಜೆಪಿ ನಾಯಕರು ನಿರಂತರವಾಗಿ ಪಂಜಾಬ್ ರೈತರನ್ನೇ ಅಪರಾಧಿಗಳನ್ನಾಗಿ ಬಿಂಬಿಸುತ್ತಿರುವುದು ಖಂಡನೀಯ” ಎಂದು ಅವರು ಹೇಳಿದ್ದಾರೆ.
ಇದೇ ವೇಳೆ ಕೃಷಿ ಕಾಯ್ದೆಗಳ ವಿರುದ್ಧ ನಡೆದ ಬೃಹತ್ ಹೋರಾಟವನ್ನು ನೆನಪಿಸಿದ ಪನ್ನು, “ದೆಹಲಿ ಗಡಿಗಳಲ್ಲಿ ಶಾಂತಿಯುತ ಪ್ರತಿಭಟನೆ ನಡೆಸುತ್ತಿದ್ದಾಗ ಜೀವ ಕಳೆದುಕೊಂಡ 750ಕ್ಕೂ ಹೆಚ್ಚು ರೈತರ ಕುಟುಂಬಗಳಿಗೆ ಬಿಜೆಪಿ ಸರ್ಕಾರ ಏನು ಮಾಡಿದೆ” ಎಂದು ನೇರ ಪ್ರಶ್ನೆ ಎಸೆದಿದ್ದಾರೆ.
“ಪಂಜಾಬ್‌ನಲ್ಲಿ ಭಗವಂತ್ ಮಾನ್ ನೇತೃತ್ವದ ಎಎಪಿ ಸರ್ಕಾರವು ಕೃಷಿ ತ್ಯಾಜ್ಯ ನಿರ್ವಹಣೆಗಾಗಿ ಕಳೆದ ಐದು ವರ್ಷಗಳಲ್ಲಿ ರೈತರಿಗೆ ಭಾರೀ ಪ್ರಮಾಣದ ಯಂತ್ರೋಪಕರಣಗಳನ್ನು ವಿತರಿಸಿದೆ. ಈ ಯಂತ್ರಗಳ ಸಹಾಯದಿಂದ ರೈತರು ಬೆಳೆ ತ್ಯಾಜ್ಯವನ್ನು ಸುಡದೆ ಭೂಮಿಯಲ್ಲೇ ಸಂಸ್ಕರಿಸುತ್ತಿದ್ದು, ಇದರಿಂದಾಗಿ ಪಂಜಾಬ್‌ನಲ್ಲಿ ಕಸ ಸುಡುವ ಪ್ರಕರಣಗಳು ಗಣನೀಯವಾಗಿ ಕುಸಿದಿವೆ. ರಾಜ್ಯ ಸರ್ಕಾರ ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಳ್ಳುತ್ತಿದ್ದರೂ, ಕೇಂದ್ರ ಹಾಗೂ ದೆಹಲಿ ಬಿಜೆಪಿ ನಾಯಕರು ತಮ್ಮ ರಾಜಕೀಯ ಲಾಭಕ್ಕಾಗಿ ಪಂಜಾಬ್ ಅನ್ನು ಬಲಿಪಶು ಮಾಡುತ್ತಿದ್ದಾರೆ” ಎಂದು ಎಎಪಿ ನಾಯಕರು ಪ್ರತಿಪಾದಿಸಿದ್ದಾರೆ.
