ಬೆಂಗಳೂರಿನ ಕೆ.ಆರ್ ಪುರಂ ಮತ್ತು ಕೆಐಎ (ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ) ನಡುವಿನ ಮೆಟ್ರೋ ಮಾರ್ಗ ಕಾಮಗಾರಿ ಭರದಿಂದ ಸಾಗುತ್ತಿದೆ. ಚಿಕ್ಕಜಾಲ ಬಳಿ ಎರಡು ಜೊತೆ ಯು-ಗ್ರಿಡರ್‌ಗಳನ್ನು (ಮೆಟ್ರೋ ಕಂಬಿಗಳನ್ನು ಅಳವಡಿಸುವ ಕಾಂಕ್ರೀಟ್ ಬೆಡ್‌ಗಳು) ಅಳವಡಿಸಲಾಗಿದೆ ಎಂದು ಬಿಎಂಆರ್ಸಿಎಲ್ ಹೇಳಿದೆ.
“ಸಿಲ್ಕ್‌ ಬೋರ್ಡ್‌ ಮತ್ತು ಕೆಐಎ ನಡುವೆ ಎರಡು ಹಂತಗಳಲ್ಲಿ ಕಾಮಗಾರಿ ನಡೆಯುತ್ತಿದೆ. ಮೊದಲ ಹಂತದಲ್ಲಿ ಸಿಲ್ಕ್‌ ಬೋರ್ಡ್‌ನಿಂದ ಕೆ.ಆರ್ ಪುರಂವರೆಗೆ ಹಾಗೂ ಎರಡನೇ ಹಂತದಲ್ಲಿ ಕೆ.ಆರ್ ಪುರಂನಿಂದ ಕೆಐಎ ನಿಲ್ದಾಣ ಕಾಮಗಾರಿ ನಡೆಯುತ್ತಿದೆ. ಪ್ಯಾಕೇಜ್-3ರಲ್ಲಿ ಎರಡನೇ ಹಂತದ 15.01 ಕಿ.ಮೀ ಕಾಮಗಾರಿ ಪ್ರಗತಿಯಲ್ಲಿದೆ. ಪ್ಯಾಕೇಜ್-3ರಲ್ಲಿ ಒಟ್ಟು 784 ಯು-ಗ್ರಿಡರ್‌ಗಳನ್ನು ಅಳವಡಿಸಲಾಗುತ್ತಿದೆ” ಎಂದು ಬಿಎಂಆರ್ಸಿಎಲ್ ಮುಖ್ಯ ಎಂಜಿನಿಯರ್ ಡಿ.ಸಿ.ನಟರಾಜ್ ತಿಳಿಸಿದ್ದಾರೆ.
“ಪ್ರತಿ ಮೆಟ್ರೋ ಗ್ರಿಡರ್‌ಗಳು 28 ಮೀಟರ್ ಉದ್ದ ಇವೆ. ಏಪ್ರಿಲ್ 14ರಂದು ಬೆಳಿಗ್ಗೆ 5ಗಂಟೆಗೆ ಮೊದಲ ಹಂತದ ಕಾಮಗಾರಿ ಪೂರ್ಣಗೊಂಡಿದೆ. ಮೊದಲ ಹಂತದ ಕಾಮಗಾರಿಯ ಅನುಭದಿಂದ ಎರಡನೇ ಹಂತದ ಕಾಮಗಾರಿಯನ್ನು ನಡೆಸಲಾಗುತ್ತಿದೆ” ಎಂದು ತಿಳಿಸಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಬೆಂಗಳೂರು | ತಂಬಾಕು ಮಾರಾಟಕ್ಕೆ ಪ್ರತ್ಯೇಕ ಪರವಾನಗಿ ಕಡ್ಡಾಯ : ಬಿಬಿಎಂಪಿ
ಮೆಟ್ರೋ ಪಿಲ್ಲರ್ ಕಾಮಗಾರಿಗೆ ಅಗತ್ಯವಿರುವ 2,172 ಪಿಲ್ಲರ್‌ಗಳ ಪೈಕಿ 1,619 ಪಿಲ್ಲರ್ ನಿರ್ಮಾಣ ಕಾಮಗಾರಿ ಪೂರ್ಣಗೊಂಡಿದೆ. 489 ಪಿಲ್ಲರ್‌ಗಳಲ್ಲಿ 244 ಪಿಲ್ಲರ್‌ಗಳ ಕ್ಯಾಪ್ ಮಾಡಲಾಗಿದೆ, 195 ಪಿಲ್ಲರ್‌ಗಳು ಸಿದ್ಧವಾಗಿವೆ. ಕೆ.ಆರ್ ಪುರಂ – ಕೆಐಎ ಮೆಟ್ರೋ ಮಾರ್ಗವನ್ನು ಜೂನ್‌ 2026ರ ವೇಳೆಗೆ ಮುಗಿಸಲು ಗಡುವು ನಿಗದಿಯಾಗಿದೆ ಎಂದು ಅವರು ಹೇಳಿದ್ದಾರೆ.
