ಭಾಲ್ಕಿ ತಾಲೂಕಿನ ನುದನೂರು ಗ್ರಾಮದಲ್ಲಿ ಭೀಮರಾಜ್ ಸೇನೆ ಹಾಗೂ ಗ್ರಾಮಸ್ಥರ ಸಹಯೋಗದಲ್ಲಿ 5ನೇ ವರ್ಷದ ವರ್ಷಾವಾಸ ಕಾರ್ಯಕ್ರಮವನ್ನು ನ.8ರಂದು ಸಂಭ್ರಮದಿಂದ ಜರುಗಿತು.
ಭೀಮರಾಜ್ ಸೇನೆಯ ರಾಷ್ಟ್ರೀಯ ಅಧ್ಯಕ್ಷ ರಾಜೇಶ್ ಕಾಂಬಳೆ ಮಾತನಾಡಿ, “ಬಡ ಹೆಣ್ಣುಮಕ್ಕಳ ಶಿಕ್ಷಣಕ್ಕೆ ಆದ್ಯತೆ ನೀಡಬೇಕು. ಹೆಣ್ಣುಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯ ತಡೆಗಟ್ಟಲು ಸಮಾಜದಲ್ಲಿ ಜಾಗೃತಿ ಮೂಡಿಸಬೇಕು. ಮಕ್ಕಳನ್ನು ಮೊಬೈಲ್ ಬಳಕೆಯಿಂದ ದೂರವಿಟ್ಟು ಶಿಕ್ಷಣದ ಕಡೆಗೆ ಗಮನಹರಿಸುವಂತೆ ಪೋಷಕರು ನೋಡಿಕೊಳ್ಳಬೇಕು. ಪ್ರತಿಯೊಂದು ಕುಟುಂಬದಿಂದ ಕನಿಷ್ಠ ಒಬ್ಬರಾದರೂ ಸಮಾಜ ಸೇವೆಯಲ್ಲಿ ತೊಡಗಿಸಿಕೊಳ್ಳಬೇಕು” ಎಂದು ಕರೆ ನೀಡಿದರು.
ರಾಜ್ಯ ಅಧ್ಯಕ್ಷ ಶಿವಕುಮಾರ್ ಕಮಲಾಪುರೆ ಮಾತನಾಡಿ, “ಸಾಮಾಜಿಕ ಪರಿವರ್ತನೆಗೆ ಸಮಾಜದ ಒಗ್ಗಟ್ಟು ಅತ್ಯಗತ್ಯ. ದಲಿತ ಸಮಾಜದಲ್ಲಿ ಒಗ್ಗಟ್ಟಿನ ಕೊರತೆಯಿಂದ ಅಭಿವೃದ್ಧಿಗೆ ಹಿನ್ನಡೆಯಾಗುತ್ತಿದೆ. ಪರಸ್ಪರ ದ್ವೇಷ, ಅಸೂಯೆ ಬೆಳೆಸಿಕೊಳ್ಳದೆ, ನಮ್ಮನ್ನು ನಾವು ಅರಿತುಕೊಂಡು ಸಂಘಟಿತರಾಗಿ ಮುನ್ನಡೆದಾಗ ಮಾತ್ರ ಸಮಾಜದ ವಿಕಾಸ ಸಾಧ್ಯ” ಎಂದು ಹೇಳಿದರು.
ಸಹ ಶಿಕ್ಷಕ ಮಂಜುನಾಥ ದುಬಲಗುಂಡಿ ಅವರು ಗೌತಮ ಬುದ್ಧರ ವಿಚಾರಧಾರೆ ಹಾಗೂ ವರ್ಷಾವಾಸ ಕಾರ್ಯಕ್ರಮದ ಮಹತ್ವ ತಿಳಿಸಿದ ಅವರು, ಆಷಾಢ ಮಾಸದಲ್ಲಿ ಭಿಕ್ಷುಗಳು ಒಂದೆಡೆ ಸೇರಿ ಧ್ಯಾನ, ದಮ್ಮ ಹಾಗೂ ಬುದ್ಧರ ತತ್ವಗಳ ಕುರಿತು ಚರ್ಚಿಸುವ ಮೂಲಕ ಆಧ್ಯಾತ್ಮಿಕ ಮತ್ತು ಸಾಮಾಜಿಕ ಅರಿವು ಬೆಳೆಸಿಕೊಳ್ಳುತ್ತಾರೆ ಎಂದು ತಿಳಿಸಿದರು.
ಕಾರ್ಯಕ್ರಮದ ದಿವ್ಯ ಸಾನಿಧ್ಯವನ್ನು ಆಣದೂರು ವೈಶಾಲಿನಗರ ಸಂಘರಕ್ಷಿತ ಭಂತೆ ವಹಿಸಿದ್ದರು. ನಾಗಾರ್ಜುನ ಪೂಜಾರಿ ಉದ್ಘಾಟಿಸಿದರು. ಮಹಿಳಾ ಘಟಕದ ಅಧ್ಯಕ್ಷೆ ಸುಶೀಲಮ್ಮ ಗೋಖಲೆ, ಗ್ರಾಮ ಘಟಕದ ಅಧ್ಯಕ್ಷ ಅಶೋಕ್ ಪೂಜಾರಿ ಹಾಗೂ ಪ್ರಮುಖರಾದ ರಘು ಕಾಂಬಳೆ, ಪ್ರಹ್ಲಾದ, ಸುಧಾಕರ್ ಶರೀಕರ್, ಗಣಪತಿರಾವ್, ಪ್ರಜ್ವಲ್ ಶರೀಕ, ಅಂಬಿಕಾ, ರೇಣುಕಾ ಧನೂರ್, ಶಿವಲೀಲಾ, ರಾಜ್ಯಶ್ರೀ, ಸಕ್ಕುಬಾಯಿ, ಸುಧಾಕರ್ ಶರೀಕರ್ ಹಾಗೂ ಸುನಿಲ್ ಶರೀಕರ್ ಪ್ರಮುಖ ದಾನಿಗಳಾಗಿ ನೆರವು ನೀಡಿದರು.
ಕಾಶಿನಾಥ್ ಜೋಳದಪ್ಪ, ವಿಶ್ವನಾಥ್ ಪೂಜಾರಿ, ಶಿವರಾಜ್ ಜೋಳದಪ್ಪ, ಬಕ್ಕಪ್ಪ ಹಾಗೂ ನಾಗಾರ್ಜುನ ಪೂಜಾರಿ ಸೇರಿದಂತೆ ಭಜನಾ ತಂಡದವರು, ಗ್ರಾಮದ ಹಿರಿಯರು, ಮುಖಂಡರು, ಬೌದ್ಧ ಉಪಾಸಕ-ಉಪಾಸಕಿಯರು ಭಾಗವಹಿಸಿದ್ದರು.
ಇದನ್ನೂ ಓದಿ : ಬೀದರ್ | ಪ್ರತಿ ಟನ್‌ ಕಬ್ಬಿಗೆ ₹4,000 ಬೆಂಬಲ ಬೆಲೆ ನಿಗದಿಪಡಿಸಿ: ಮಾಜಿ ಸಚಿವ ಬಂಡೆಪ್ಪ ಖಾಶೆಂಪುರ್
