ಶಿಕ್ಷಕರು ಕೇವಲ ಪುಸ್ತಕದ ಜ್ಞಾನವನ್ನು ನೀಡುವವರಲ್ಲ, ನೈತಿಕ ಮೌಲ್ಯಗಳು, ಜೀವನದ ಪಾಠ ಹಾಗೂ ಉತ್ತಮ ಸಂಸ್ಕಾರವನ್ನು ಕಲಿಸುವ ಮೂಲಕ ವಿದ್ಯಾರ್ಥಿಗಳ ವ್ಯಕ್ತಿತ್ವ ರೂಪಿಸುವವರಾಗಿದ್ದಾರೆ ಎಂದು ಪ್ರಾಧ್ಯಾಪಕ ಡಾ.ಈಶ್ವರಯ್ಯ ಕೋಡಂಬಲ್ ಹೇಳಿದರು.
ಬೀದರ್ ನಗರದಲ್ಲಿ ರಾಷ್ಟ್ರೀಯ ಬಸವದಳ ಹಾಗೂ ಮಾತೆ ಮಹಾದೇವಿ ಬಸವ ಬಳಗದಿಂದ ಆಯೋಜಿಸಿದ್ದ ಮಾಸಿಕ ಬಸವ ಜ್ಯೋತಿ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿ, “ಶಿಕ್ಷಕರು ವಿದ್ಯಾರ್ಥಿಗಳಲ್ಲಿ ಮಾನವೀಯ ಮೌಲ್ಯಗಳನ್ನು ಬಿತ್ತುವ ಮುಖಾಂತರ ಉತ್ತಮ ಸಮಾಜ ನಿರ್ಮಾತೃರಾಗಿದ್ದಾರೆ. ಮಕ್ಕಳಲ್ಲಿ ಆತ್ಮಸ್ಥೈರ್ಯ ತುಂಬಿ ಜ್ಞಾನದತ್ತ ಕರೆದೊಯ್ಯುವ ದಾರಿದೀಪ ಶಿಕ್ಷಕನಾಗಿದ್ದಾನೆ” ಎಂದರು.
ಸಾನಿಧ್ಯ ವಹಿಸಿದ ಬಸವಕಲ್ಯಾಣದ ಗುಣತೀರ್ಥವಾಡಿಯ ಬಸವಪ್ರಭು ಸ್ವಾಮೀಜಿ ಮಾತನಾಡಿ, “ನಾವು ಕೇವಲ ಶಿಕ್ಷಕರ ದಿನ ಆಚರಿಸುತ್ತಿಲ್ಲ; ಬಸವಾದಿ ಶರಣರು ಸಾರಿದ ʼಅರಿವಿನ ದಿನʼ ಸ್ಮರಿಸುತ್ತಿದ್ದೇವೆ. ಗುರು ಕೇವಲ ಜ್ಞಾನ ನೀಡುವುದಲ್ಲದೆ, ಶಿಷ್ಯನೊಳಗಿನ ಮನುಷ್ಯತ್ವವನ್ನು ಎಚ್ಚರಿಸುವ ಕೆಲಸ ಮಾಡುತ್ತಾನೆ. ಶಿಷ್ಯನ ಸಾಧನೆಯ ಹಿಂದೆ ನಿಂತಿರುವ ಗುರುಗಳ ಪಾತ್ರವನ್ನು ಸಮಾಜ ಎಂದಿಗೂ ಮರೆಯಬಾರದು” ಎಂದರು.
ಜೆಸ್ಕಾಂ ಅಧಿಕಾರಿ ಮಲ್ಲಿಕಾರ್ಜುನ ಶೆಟಕಾರ ಪ್ರಾಸ್ತಾವಿಕ ಮಾತನಾಡಿ, “ಗುರುವು ಶಿಷ್ಯನ ಜೀವನದ ಅಡಿಪಾಯ. ಗುರುವಿನ ಹಿಂದೆ ನಿಂತು ದಾರಿ ತೋರಿಸಿದರೆ, ಶಿಷ್ಯ ಮುಂದೆ ಸಾಗಲು ಗುರಿ ಹೊಂದುತ್ತಾನೆ. ಪ್ರತಿಯೊಬ್ಬ ಯಶಸ್ವಿ ಸಾಧಕನ ಹಿಂದೆ ಗುರು ಇದ್ದೇ ಇರುತ್ತಾನೆ. ಬದುಕಿನಲ್ಲಿ ಜ್ಞಾನ ಧಾರೆಯೆರೆದ ಗುರುವಿನ ಋಣ ಯಾವತ್ತೂ ಮರೆಯಬಾರದು” ಎಂದರು.
ಇದನ್ನೂ ಓದಿ : ಬೀದರ್ | ವಿದ್ಯುತ್ ಸ್ಪರ್ಶಿಸಿ ವಿಬಿ-ಜಿ ರಾಮ್ ಜಿ ಕಾರ್ಮಿಕ ಮಹಿಳೆ ಸಾವು
ಕಾರ್ಯಕ್ರಮದಲ್ಲಿ ಶಿವಶಂಕರ ಟೋಕರೆ, ಜೆ.ಕೆ.ಸ್ವಾಮಿ, ರಾಜಕುಮಾರ ಸೇರಿದಂತೆ ಬಳಗದ ಸದಸ್ಯರು, ಬಸವಾನುಯಾಯಿಗಳು ಪಾಲ್ಗೊಂಡಿದ್ದರು.
ಸುಮಿತಾ ಸಂಗಶೆಟ್ಟಿ ಶಟಕಾರ ದಂಪತಿ ಬಸವಗುರು ಪೂಜೆ ನೆರವೇರಿಸಿದರು. ಸರ್ವ ಶಿಕ್ಷಕರಿಂದ ಧ್ವಜಾರೋಹಣ ನೆರವೇರಿಸಲಾಯಿತು. ಡಾ.ಸಂಗಶೆಟ್ಟಿ ಶಟಕಾರ, ಸುಲೋಚನಾ ಪಟ್ನೆ ವಚನ ಗಾಯನ ನಡೆಸಿಕೊಟ್ಟರು. ಪ್ರವೀಣ ಎಕಲಾರೆ ನಿರೂಪಿಸಿದರು. ಪ್ರಣವ ಶಟಕಾರ ವಂದಿಸಿದರು.
