ಹುಲಸೂರ ತಾಲೂಕು ಬರ ಘೋಷಣೆಗೆ ಆಗ್ರಹಿಸಿ ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ ನೇತ್ರತ್ವದಲ್ಲಿ ಹುಲಸೂರ ಪಟ್ಟಣದ ತಹಸಿಲ್‌ ಕಚೇರಿ ಎದುರು ನಡೆಯುತ್ತಿದ್ದ ಅಹೋರಾತ್ರಿ ಧರಣಿ ಸತ್ಯಾಗ್ರಹ ಸೋಮವಾರ ಸಂಜೆ 7 ಗಂಟೆ ಸುಮಾರಿಗೆ ಕೊನೆಗೊಂಡಿತು.
ಹುಲಸೂರ ತಾಲ್ಲೂಕನ್ನು ಬರಪೀಡಿತ ತಾಲ್ಲೂಕು ಎಂದು ಘೋಷಿಸುವಂತೆ ಆಗ್ರಹಿಸಿ ನಡೆಯುತ್ತಿದ್ದ ಅಹೋರಾತ್ರಿ ಧರಣಿ ಸತ್ಯಾಗ್ರಹ ಸೋಮವಾರ 6 ದಿನಕ್ಕೆ ಕಾಲಿಟ್ಟಿತ್ತು. ಬಸವಕಲ್ಯಾಣ ಶಾಸಕ ಶರಣು ಸಲಗರ ಅವರು ಸೋಮವಾರ ಭೇಟಿ ನೀಡಿ ಹುಲಸೂರ ತಾಲೂಕು ಬರ ಘೋಷಣೆಯ ರೈತರ ಬೇಡಿಕೆ ಈಡೇರಿಕೆಗೆ ಸರ್ಕಾರದ ಮಟ್ಟದಲ್ಲಿ ಒತ್ತಡ ಹೇರುವ ಭರವಸೆ ನೀಡಿದ ಬಳಿಕ ರೈತರು ಧರಣಿ ಹಿಂಪಡೆದರು.
ಸೋಮವಾರ ರೈತ ಮುಖಂಡರು ಹೋರಾಟದ ಮುಂದಿನ ರೂಪುರೇಷೆಗಳ ಬಗ್ಗೆ ಸಭೆ ನಡೆಸಿದರು. ಬಳಿಕ ಹುಲಸೂರ ಶಿವಾನಂದ ಸ್ವಾಮೀಜಿ, ತಡೋಳದ ರಾಜೇಶ್ವರ ಶಿವಚಾರ್ಯ ಸ್ವಾಮೀಜಿ ಹಾಗೂ ಶಾಸಕ ಶರಣು ಸಲಗರ ಧರಣಿ ಸ್ಥಳಕ್ಕೆ ಆಗಮಿಸಿ ರೈತರ ಮನವೋಲಿಸಿದ ಬಳಿಕ ರೈತರು ಹಣ್ಣು ಸೇವಿಸಿ ಧರಣಿ ಕೈಬಿಟ್ಟರು.
ಶಾಸಕ ಶರಣು ಸಲಗರ ಮಾತನಾಡಿ, “ಹುಲಸೂರ ತಾಲೂಕಿನಲ್ಲಿ ಮಳೆ ಅಭಾವದಿಂದ ಬೆಳೆ ಸಂಪೂರ್ಣವಾಗಿ ಒಣಗುತ್ತಿದೆ. ಬರ ಘೋಷಣೆ ಸಂಬಂಧ ಈಗಾಗಲೇ ಸಿಎಂ, ಡಿಸಿಎಂ ಹಾಗೂ ಸರ್ಕಾರದ ಉನ್ನತ ಮಟ್ಟದ ಅಧಿಕಾರಿಗಳಿಗೆ ಭೇಟಿಯಾಗಿ ಬರ ಘೋಷಿಸುವಂತೆ ಮನವರಿಕೆ ಮಾಡಿದ್ದೇನೆ. ಶೀಘ್ರದಲ್ಲಿ ಬರ ಘೋಷಣೆಯಾಗುವ ಸಾಧ್ಯತೆಯೂ ಇದೆ. ಈ ಬಗ್ಗೆ ಜಿಲ್ಲಾ ಉಸ್ತುವಾರಿ ಸಚಿವ ಈಶ್ವರ ಖಂಡ್ರೆ ಹಾಗೂ ಸರ್ಕಾರದ ಉನ್ನತ ಮಟ್ಟದ ಅಧಿಕಾರಿಗಳಿಗೆ ಮತ್ತೊಮ್ಮೆ ಮಾತನಾಡಿ ತಿಳಿಸುವೆ. ನಿಮ್ಮ ಹೋರಾಟದ ಜವಾಬ್ದಾರಿ ನಾನು ಪಡೆಯುವೆ, ನೀವು ಧರಣಿ ಸತ್ಯಾಗ್ರಹ ಹಿಂಪಡೆಯಬೇಕು” ಎಂದು ರೈತರಿಗೆ ಭರವಸೆ ನೀಡಿದರು.
ಹುಲಸೂರ ತಾಲೂಕು ರೈತ ಸಂಘದ ಕಾರ್ಯದರ್ಶಿ ರಾಜಕುಮಾರ ನಿಡೋದೆ ಮಾತನಾಡಿ, “ಹುಲಸೂರ ತಾಲೂಕು ಬರಪೀಡಿತ ಘೋಷಣೆಗೆ ಆಗ್ರಹಿಸಿ 6 ದಿನಗಳಿಂದ ನಡೆಯುತ್ತಿರುವ ಧರಣಿ ಸ್ಥಳಕ್ಕೆ ಸೋಮವಾರ ಶಾಸಕ ಶರಣು ಸಲಗರ ಹಾಗೂ ತಡೋಳಾ, ಹುಲಸೂರ ಮಠದ ಶ್ರೀಗಳು ಭೇಟಿ ನೀಡಿ ಧರಣಿ ಕೈಬಿಡುವಂತೆ ಮನವಿ ಮಾಡಿದರು. ಸೆ.17 ಒಳಗಾಗಿ ಬರ ಘೋಷಣೆ ಆಗುವ ಸಾಧ್ಯತೆ ಇದೆ. ಬರ ಘೋಷಣೆಗೆ ಸೆ.27ರ ಗಡವು ನೀಡೋಣ, ಆಗಲೂ ಬರ ಘೋಷಿಸದಿದ್ದರೆ ತಮ್ಮ ನೇತ್ರತ್ವದಲ್ಲಿ ಸಭೆ ನಡೆಸಿ ಧರಣಿ ಮತ್ತೆ ಆರಂಭಿಸೋಣ ಎಂದು ಭರವಸೆ ನೀಡಿದ ಹಿನ್ನೆಲೆ ಧರಣಿ ಅಂತ್ಯಗೊಳಿಸಲಾಗಿದೆ” ಎಂದು ಹೇಳಿದರು.
ಇದನ್ನೂ ಓದಿ : ಪ್ರಾದೇಶಿಕ ಅಸಮತೋಲನ ನಿವಾರಣೆಗೆ ಸೆ.17ರಂದು ಕಲಬುರಗಿಯಲ್ಲಿ ಸಂಕಲ್ಪ ಸಮಾವೇಶ
ಈ ಸಂದರ್ಭದಲ್ಲಿ ಕರ್ನಾಟಕ ರಾಜ್ಯ ರೈತ ಸಂಘದ ಜಿಲ್ಲಾಧ್ಯಕ್ಷ ಮಲ್ಲಿಕಾರ್ಜುನ ಸ್ವಾಮಿ, ತಾಲೂಕು ಅಧ್ಯಕ್ಷ ಬಸವರಾಜ ಚೌವರೆ, ನವಕಲ್ಯಾಣ ಕರ್ನಾಟಕ ಮಹಾಸಭಾ ಕಾರ್ಯದರ್ಶಿ ಡಾ.ಶಂಕರಗೌಡ ಸೇರಿದಂತೆ ರೈತ ಸಂಘದ ಪ್ರಮುಖರಾದ ಸುನೀಲ್ ಭುಜಂಗೆ, ಖಾಸೀಂ ಅಲಿ, ಸೋಮನಾಥ ನಂದಗೆ, ರಮೇಶ್ ಗೋಕುಳೆ, ನಾಗನಾಥ ತೋಗರಗೆ, ಜಗನ್ನಾಥ ಬಡದಾಳೆ, ಶಿವಕುಮಾರ ಕನ್ನಾಡೆ, ಮಡಿವಾಳಪ್ಪ ಖಪಲೆ, ಹೈದಾರ್ ಸಾಬ್ ನೀಲಂಗೆ, ಶಿವಕುಮಾರ ಧನ್ನೂರೆ, ನೂರ್ ಅಹಮದ್, ಇಬ್ರಾಹಿಂ ಕೋತವಾಲ್, ಸಿದ್ದು ಬೀರಗೆ, ಬಸವರಾಜ ಆದ್ಯಾಪ್ಪಾ, ಅಪ್ಪಾರಾವ ಖಂಡಾಳೆ, ಉಮೇಶ ತೋಟಾದ, ಬಬನ ಸೇರಿದಂತೆ ಅನೇಕರಿದ್ದರು.
