“ನಾಡೋಜ ಡಾ. ಚನ್ನವೀರ ಕಣವಿ ಕನ್ನಡ ಕಾವ್ಯಲೋಕದ ಮುಕಟಮಣಿಯಾಗಿ ಕನ್ನಡ ಸಾರಸ್ವತಲೋಕವನ್ನು ಶ್ರೀಮಂತಗೊಳಿಸಿದರು. ಧಾರವಾಡದ ಸಾಂಸ್ಕೃತಿಕ ಹಿರಿಮೆ ಹೆಚ್ಚಿಸಿದವರಲ್ಲಿ ಅವರು ಒಬ್ಬರು” ಎಂದು ಹಿರಿಯ ಸಾಹಿತಿ ನಾಡೋಜ ಡಾ.ಕುಂ.ವೀರಭದ್ರಪ್ಪ ಅಭಿಪ್ರಾಯಪಟ್ಟರು.
ಧಾರವಾಡ ಪಟ್ಟಣದ ಕರ್ನಾಟಕ ವಿದ್ಯಾವರ್ಧಕ ಸಂಘದ ಡಾ.ರಾ.ಹ.ದೇಶಪಾಂಡೆ ಸಭಾ ಭವನದಲ್ಲಿ ನಾಡೋಜ ಡಾ. ಚನ್ನವೀರ ಕಣವಿ ಮತ್ತು ಶ್ರೀಮತಿ ಶಾಂತಾದೇವಿ ಕಣವಿ ದತ್ತಿ ಅಂಗವಾಗಿ ಕನ್ನಡ ಯುವ ಲೇಖಕರಿಗಾಗಿ ಆಯೋಜಿಸಿದ್ದ ಕಾವ್ಯ ಮತ್ತು ಕಥೆ ಸ್ಪರ್ಧೆಯ ಬಹುಮಾನ ವಿತರಣಾ ಸಮಾರಂಭದಲ್ಲಿ `ಕಣವಿ ದಂಪತಿಗಳು’ ವಿಷಯ ಕುರಿತು ಮಾತನಾಡಿದರು.
“ಡಾ. ಚನ್ನವೀರ ಕಣವಿಯವರದು ಶಿಸ್ತುಬದ್ಧ ಜೀವನ, ಮಂದ ಹಾಸವೆ ಅವರ ಜೀವನದ ವಿಶೇಷತೆ. ಅವರಲ್ಲಿದ್ದ ಕೌಟುಂಬಿಕ ನಿಷ್ಠೆ ಅಪಾರವಾದುದು. ಕಣವಿಯವರ ಬಾಳಸಂಗಾತಿಯಾಗಿ ಶಾಂತಾದೇವಿಯವರು ಅವರ ಶ್ರೇಯಸ್ಸಿಗೆ ಕಾರಣರಾದವರಾಗಿದ್ದರು. ಕಣವಿಯವರು ಎಲ್ಲಾ ಮಕ್ಕಳಿಗೆ ಒಳ್ಳೆಯ ಸಂಸ್ಕಾರ ನೀಡಿದ್ದರಿಂದ ಅವರೆಲ್ಲರೂ ವಿವಿಧ ಕ್ಷೇತ್ರದಲ್ಲಿ ಸಾಧನೆ ಮಾಡಲು ಸಾಧ್ಯವಾಯಿತು” ಎಂದರು.
“೧೯೫೦ ದಶಕದಲ್ಲಿ ಸಾಹಿತಿಗಳು, ಕವಿಗಳು ಪಟ್ಟ ಪಾಡುಗಳು ಅನೇಕ. ಆದರೆ ಈಗಿನ ತಲೆಮಾರಿನ ಯುವ ಲೇಖಕರಿಗೆ ಅಂತಹ ಕಷ್ಟಗಳಿಲ್ಲ. ಯುವ ಲೇಖಕರಿಗೆ ಪ್ರತಿಭೆಯೆ ‘ಗಾಡ್ ಫಾದರ್’ ಆಗಬೇಕು. ಲೇಖಕರು ಕಷ್ಟಪಟ್ಟಷ್ಟು ಅವರಿಂದ ಉತ್ಕೃಷ್ಟ ಸಾಹಿತ್ಯ ರಚನೆ ಸಾಧ್ಯ. ಕಣವಿಯವರು ಬರೆದ ಸಾವಿರಾರು ಕಾವ್ಯಗಳಲ್ಲಿ ಉತ್ಕೃಷ್ಟತೆ ಇದೆ. ಬಹುಮಾನ ಬಾರದ ಕಾವ್ಯ ಹಾಗೂ ಕಥೆಗಳು ಅಲಕ್ಷಿಸದೆ ಅವೂ ಸಹ ಓದುವಂತಾಗಬೇಕು” ಎಂದು ಹೇಳಿದರು.
ಸಾಹಿತಿ ಡಾ. ಜಿ. ಎಂ. ಹೆಗಡೆ ಅವರು ಕಣವಿ ಹಾಗೂ ಶಿವರುದ್ರಪ್ಪನವರ ಸ್ನೇಹ ಕುರಿತು ಮಾತನಾಡಿ, “ಡಾ. ಚನ್ನವೀರ ಕಣವಿ ನಾಲ್ಕು ದಶಕಗಳಕಾಲ ಕಾವ್ಯ ಕೃಷಿ ಮಾಡಿದ್ದಾರೆ. ಜಿ. ಎಸ್. ಶಿವರುದ್ರಪ್ಪ ಹಾಗೂ ಡಾ. ಚನ್ನವೀರ ಕಣವಿ ಸಮಕಾಲಿನರಾಗಿದ್ದರೂ ಅವರಿಬ್ಬರ ಕಾವ್ಯ ರಚನಾ ಶೈಲಿ ವಿಭಿನ್ನವಾಗಿತ್ತು. ಅವರಿಬ್ಬರ ಸ್ನೇಹ ಒಂದೇ ನಾಣ್ಯದ ಎರಡು ಮುಖಗಳಿದ್ದಂತೆ. ಕಣವಿಯವರು ಧಾರವಾಡದ ಸಾಂಸ್ಕೃತಿಕ ವಾತಾವರಣದಲ್ಲಿ ಬೆಳೆದು ಬಂದಿದ್ದರಿಂದ ಉತ್ಕೃಷ್ಠ ಕಾವ್ಯ ರಚನೆ ಸಾಧ್ಯವಾಯಿತು. ಚನ್ನವೀರ ಕಣವಿ ಹಾಗೂ ಜಿ.ಎಸ್. ಶಿವರುದ್ರಪ್ಪ ಇಬ್ಬರೂ ತಾವು ಬರೆದ ಕಾವ್ಯ ಕುರಿತು ಚರ್ಚಿಸುತ್ತಿದ್ದುದು ವಿಶೇಷ” ಎಂದರು.
ಸ್ಪರ್ಧೆಗೆ ಬಂದ ಕಾವ್ಯ ಕುರಿತು ಡಾ. ಎಂ. ಡಿ. ಒಕ್ಕುಂದ ಹಾಗೂ ಕಥಾ ಸ್ಪರ್ಧೆಗೆ ಬಂದ ಕಥೆಗಳ ಕುರಿತು ಶ್ರೀಧರ ಗಸ್ತಿ ಮಾತನಾಡಿದರು. ಡಾ. ಸುಮಿತ್ರಾ ಕಾಡದೇವರಮಠ ಕಣವಿಯವರ ಕವಿತೆ ಕುರಿತು ಹಾಡಿದರು.
ಸಂಘದ ಅಧ್ಯಕ್ಷರು ಚಂದ್ರಕಾಂತ ಗು. ಬೆಲ್ಲದ ಅವರು ಅಧ್ಯಕ್ಷತೆ ವಹಿಸಿದ್ದರು. ವೇದಿಕೆಯಲ್ಲಿ ಡಾ. ಶಿವಾನಂದ ಕಣವಿ ಉಪಸ್ಥಿತರಿದ್ದರು.
ನಾಡೋಜ ಚೆನ್ನವೀರ ಕಣವಿ ಕಾವ್ಯ ಸ್ಪರ್ಧೆಯಲ್ಲಿ ಪ್ರಥಮ:ಮಣಿಕಂಠ ಗೊದಮನಿ ಮತ್ತು ರೈಹಾನಾ ಕೊಯ್ಲತ್ತಡ್ಕಮನೆ, ದ್ವಿತೀಯ : ಯಶಸ್ವಿನಿ ಎಂ. ಎನ್., ತೃತೀಯ : ಸುರೇಶ ಹಳ್ಳಿ ಮತ್ತು ಶ್ರೀಮತಿ ಶಾಂತಾದೇವಿ ಕಣವಿ ಕಥಾ ಸ್ಪರ್ಧೆಯಲ್ಲಿ ಪ್ರಥಮ : ಶ್ರೀಮತಿ ವಿದ್ಯಾಶ್ರೀ ಹಡಪದ, ಶ್ರೀಮತಿ ಶರೀಫಾ ಬೇಗಂ, ದ್ವಿತೀಯ : ಶ್ರೀ ಶಿವಕುಮಾರ ಚೆನ್ನಪ್ಪನವರ, ತೃತೀಯ : ಪೃಥ್ವಿರಾಜ್ ಟಿ. ಬಿ, ಬಹುಮಾನ ವಿಜೇತರಾದವರಿಗೆ ಗಣ್ಯರು ಅಭಿನಂದಿಸಿ ಗೌರವಿಸಲಾಯಿತು.
ವೀರಣ್ಣ ಒಡ್ಡೀನ ಸ್ವಾಗತಿಸಿದರು, ಶಂಕರ ಹಲಗತ್ತಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಡಾ. ಶೈಲಜಾ ತ. ಅಮರಶೆಟ್ಟಿ ನಿರೂಪಿಸಿದರು. ಡಾ. ಜಿನದತ್ತ ಅ. ಹಡಗಲಿ ವಂದಿಸಿದರು. ಕಾರ್ಯಕ್ರಮದಲ್ಲಿ ಪ್ರೊ. ಧನವಂತ ಹಾಜವಗೋಳ, ಪ್ರೊ. ಶಶಿಧರ ತೋಡಕರ, ಪ್ರೊ. ಮಾಲತಿ ಪಟ್ಟಣಶೆಟ್ಟಿ, ಶ್ರೀಮತಿ ಸುಜಾತಾ ಹಡಗಲಿ, ಪ್ರೊ. ಬಸಯ್ಯ ಶಿರೋಳ, ಶ್ರೀಮತಿ ಅನುರಾಧಾ ಸವದತ್ತಿ, ರವಿಶಂಕರ ಹಕಾರಿ, ಚಂದ್ರಮೌಳಿ ಕಣವಿ, ಕರಣಪ್ರಸಾದ ಕಣವಿ, ರಂಜನಾ ಗೋಧಿ ಸೇರಿದಂತೆ ಕಣವಿ ಪರಿವಾರದವರು ಇದ್ದರು.
