ಪ್ರಸ್ತುತ ಯುವಜನತೆ ಎದುರಿಸುತ್ತಿರುವ ನಿರುದ್ಯೋಗ, ಭ್ರಷ್ಟಾಚಾರ, ಮೂಲಭೂತವಾದ ಸೇರಿದಂತೆ ಇತರ ಗಂಭೀರ ಸಮಸ್ಯೆಗಳು ಉಲ್ಬಣಗೊಳ್ಳಲು ಮುಖ್ಯ ಕಾರಣ ನಾವೆಲ್ಲರೂ ಭಗತ್ ಸಿಂಗ್ರನ್ನು ಸರಿಯಾಗಿ ಅಧ್ಯಯನ ಮಾಡದಿರುವುದು. ಇನ್ನು ಮುಂದೆಯಾದರೂ ಅವರ ಚಿಂತನೆಯನ್ನು ಅಧ್ಯಯನ ಮಾಡಿ, ಮೈಗೂಡಿಸಿಕೊಳ್ಳಬೇಕು ಎಂದು ಕರ್ನಾಟಕ ಪ್ರಾಂತ ಕೃಷಿ ಕೂಲಿಕಾರರ ಸಂಘದ ಜಿಲ್ಲಾ ಮುಖಂಡ ಬಾಲು ರಾಠೋಡ್ ಹೇಳಿದರು.
ಗದಗ ಜಿಲ್ಲೆಯ ಗಜೇಂದ್ರಗಡ ಪಟ್ಟಣದಲ್ಲಿ ಎಸ್ಎಫ್ಐ ತಾಲೂಕ ಸಮಿತಿ ನೇತೃತ್ವದಲ್ಲಿ ಸಂಘದ ಕಚೇರಿಯಲ್ಲಿ ಕ್ರಾಂತಿಕಾರಿ ಭಗತ್ ಸಿಂಗ್ ರವರ 120ನೇ ಜಯಂತಿಯ ಸಂದರ್ಭದಲ್ಲಿ ಮಾತನಾಡಿದ ಅವರು, “ನಿಜವಾದ ದೇಶಪ್ರೇಮ ಎಂದರೆ ಭಗತ್ ಸಿಂಗರದ್ದು. ಅವರ ಸ್ವಾತಂತ್ರ್ಯ ಹೋರಾಟದಲ್ಲಿದ್ದ ಪೂರ್ಣ ಸ್ವಾತಂತ್ರ್ಯದ ಪರಿಕಲ್ಪನೆ ಸ್ವಾತಂತ್ರ್ಯ ಗಳಿಸಿ ಏಳು ದಶಕಗಳು ಕಳೆದರೂ ಇನ್ನೂ ಸಂಪೂರ್ಣವಾಗಿ ಗಳಿಸಲು ಸಾಧ್ಯವಾಗಿಲ್ಲ. ಎಲ್ಲರಿಗೂ ಶಿಕ್ಷಣ, ಉದ್ಯೋಗ, ಆರೋಗ್ಯ, ಆಶ್ರಯ ಮತ್ತು ನೆಮ್ಮದಿಯಿಂದ ಬದುಕುವ ವಾತಾವರಣ ನಿರ್ಮಿಸುವ ಸ್ವಾತಂತ್ರ್ಯದ ಆಶಯ ಇಂದಿಗೂ ನನಸಾಗದೆ ಉಳಿದಿದೆ” ಎಂದು ಅವರು ತಿಳಿಸಿದರು.
“ಇಂದಿನ ಯುವಜನರಿಗೆ ಸಿನಿಮಾ ನಟ-ನಟಿಯರು, ರಾಜಕಾರಣಿಗಳು, ಬಂಡವಾಳಗಾರರು ಅಥವಾ ಸೆಲೆಬ್ರಿಟಿಗಳು ಆದರ್ಶವಾಗುತ್ತಾರೆ. ಆದರೆ ನಿಜವಾಗಿಯೂ ಯುವಜನರಿಗೆ ಆದರ್ಶವಾಗಬೇಕಿರುವುದು ಭಗತ್ ಸಿಂಗ್ರಂತಹ ದೇಶಪ್ರೇಮಿಗಳು. ಅವರು ಎತ್ತಿದ ಸಮಾಜವಾದ ಚಿರಾಯುವಾಗಲಿ, ಸಾಮ್ರಾಜ್ಯಶಾಹಿ ನಾಶವಾಗಲಿ (Up Up Socialism, Down Down Capitalism) ಎಂಬ ಕೂಗನ್ನು ಇಂದಿನ ಯುವಜನತೆ ಮತ್ತೆ ಮೊಳಗಿಸಬೇಕಿದೆ” ಎಂದು ಬಾಲು ರಾಠೋಡ್ ಒತ್ತಿ ಹೇಳಿದರು.
ಭಗತ್ ಸಿಂಗ್ ಕೇವಲ 23 ವರ್ಷಗಳ ಕಾಲ (ಸೆಪ್ಟೆಂಬರ್ 27, 1907 ರಿಂದ ಮಾರ್ಚ್ 23, 1931) ಬದುಕಿದ್ದರೂ, ಅವರ ಹೋರಾಟದ ಹಾದಿ, ದೇಶಕ್ಕಾಗಿ ಚಿಕ್ಕ ವಯಸ್ಸಿನಲ್ಲಿಯೇ ಪ್ರಾಣತ್ಯಾಗ ಮಾಡಿದ ಧೈರ್ಯ ಹಾಗೂ ಅಳವಾದ ಅಧ್ಯಯನ ಜಗತ್ತಿನ ಎಲ್ಲಾ ಯುವಜನರಿಗೆ ಆದರ್ಶನೀಯವಾಗಿದೆ ಎಂದು ಅಭಿಪ್ರಾಯಿಸಿದರು.
ಕಾರ್ಯಕ್ರಮದಲ್ಲಿ ಸಿಐಟಿಯು ಜಿಲ್ಲಾ ಸಂಚಾಲಕ ಮಹೇಶ್ ಹಿರೇಮಠ, ಬಿಸಿ ಊಟ ನೌಕರ ರಾಜ್ಯ ಮುಖಂಡ ಲಕ್ಷ್ಮೀದೇವಿ, ಎಸ್ಎಫ್ಐ ತಾಲೂಕು ಅಧ್ಯಕ್ಷ ಅನಿಲ್ ರಾಠೋಡ್, ತನುಜಾ ರಾಯಬಾಗಿ, ಶರಣು ಮಾಟರಂಗಿ, ಮಾಂತೇಶ್ ಮಾದರ, ರವಿ ಮಾದಿ, ಪ್ರೇಮಕುಮಾರ್ ರಾಠೋಡ್, ರಮೇಶ್ ಬಡಿಗೇರ್, ವಿಜಯ್ ಚೌಹಾನ್ ಮುಂತಾದವರು ಭಾಗವಹಿಸಿದ್ದರು.
