“ಜಂತರ್ ಮಂತರ್ ನಲ್ಲಿ ವಿದ್ಯಾರ್ಥಿಗಳು ನೀಟ್ ಪ್ರಶ್ನೆ ಪತ್ರಿಕೆ ಸೋರಿಕೆ ವಿರುದ್ಧ ಯಾವುದಕ್ಕೂ ಹೆದರದೆ ಪ್ರತಿಭಟನೆ ನಡೆಸಿದರು. ಹಾಗೆಯೇ ನ್ಯಾಯಯುತ ಬೇಡಿಕೆಗಳಿಗೆ ಯಾವುದಕ್ಕೂ ಹೆದರುವ ಅವಶ್ಯಕತೆ ಇರುವುದಿಲ್ಲ. ಹೆದರದೆ ಹೋರಾಟ ಮಾಡಿದರೆ ನ್ಯಾಯ ಪಡೆಯಲು ಸಾಧ್ಯ. ವಿದ್ಯಾರ್ಥಿಗಳ ಐಕ್ಯ ಹೋರಾಟ, ದೇಶದ ವ್ಯವಸ್ಥೆ ಬದಲಾವಣೆ ತರಲು ಇತ್ತಿಚಿನ ಹೋರಾಟಗಳೆ ಸಾಕ್ಷಿ” ಎಂದು ಕರ್ನಾಟಕ ರಾಜ್ಯ ವಕೀಲರ ಪರಿಷತ್ ಸದಸ್ಯರಾದ ಬಸವರಾಜ ಕೋರಿಮಠ ಹೇಳಿದರು.
ಹಾವೇರಿ ನಗರದ ಸರ್ಕಾರಿ ನೌಕರರ ಭವನದಲ್ಲಿ ಇಂದು ಸರ್ವರಿಗೂ ಸಮಾನ ಗುಣಮಟ್ಟದ ಶಿಕ್ಷಣಕ್ಕಾಗಿ, ಪ್ರಜಾಪ್ರಭುತ್ವ ರಕ್ಷಣೆಗಾಗಿ, ಜಿಲ್ಲೆಯ ಸೌಹಾರ್ದತೆ ಹಾಗೂ ಸಮಗ್ರ ಅಭಿವೃದ್ಧಿಗಾಗಿ ಭಾರತ ವಿದ್ಯಾರ್ಥಿ ಫೆಡರೇಶನ್ (ಎಸ್ಎಫ್ಐ) ಹಾವೇರಿ ವಿದ್ಯಾರ್ಥಿಗಳ 9ನೇ ಜಿಲ್ಲಾ ಸಮ್ಮೇಳನವನ್ನು ಉದ್ಘಾಟಿಸಿ ಮಾತನಾಡಿದ ಅವರು ಮಾತನಾಡಿದರು.
“ನಮ್ಮನ್ನು ಆಳುವವರೆಲ್ಲ ದುಡ್ಡು ಇದ್ದವರು. ಅವರು ಶಿಕ್ಷಣ ಸಂಸ್ಥೆಗಳನ್ನು ಕಟ್ಟುವರು. ಸರಕಾರಿ ಶಾಲೆಗಳಿಗೆ ಗಮನ ಕೊಡದ ಹಾಗೆ ಮಾಡುವಂತಹ ಕಟ್ಟಡ ಕಟ್ಟುವರು. ಅವಾಗ ಬಡವರು ಕಲಿಯುವುದಕ್ಕೆ ಕಷ್ಟ ಪಡುವ ಪರಿಸ್ಥಿತಿ ನಿರ್ಮಾಣ ಆಗುತ್ತದೆ. ನಾವು ಕಾನೂನು ಪದವಿ ಕಲಿಯುವಾಗ ಶುಲ್ಕ ಕಡಿಮೆ ಇತ್ತು. ಆದರೆ ಈಗ ಜಿಲ್ಲೆಗಳಲ್ಲಿ ವಾರ್ಷಿಕ ಶುಲ್ಕ ಅರವತ್ತು ಸಾವಿರ ಇದೆ. ಬೆಂಗಳೂರಲ್ಲಿ ಒಂದು ಲಕ್ಷ ದಾಟಿದೆ. ಇಂತಹ ಪರಿಸ್ಥಿತಿಯಲ್ಲಿ ದುಡಿಯುವ ವರ್ಗದವರು ಮಕ್ಕಳು ಕಲಿಯುವುದಕ್ಕೆ ಆಗುತ್ತದೆಯೇ? ಈ ಕುರಿತು ವಿದ್ಯಾರ್ಥಿಗಳು ಯೋಚನೆ ಮಾಡಬೇಕು. ಇರುವ ಸಮಯವನ್ನು ನಮ್ಮ ಭವುಷ್ಯದಲ್ಲಿ ಹೇಗೆ ಸದುಪಯೋಗ ಮಾಡಬೇಕೆಂದು ಯೋಚಿಸಬೇಕು” ಎಂದು ವಿದ್ಯಾರ್ಥಿಗಳಿಗೆ ಸಲಹೆ ನೀಡಿದರು.
ಮುಖ್ಯಾತಿಥಿಗಳಾಗಿ ಆಗಮಿಸಿದ ಎಸ್ಎಫ್ಐ ರಾಜ್ಯ ಅಧ್ಯಕ್ಷರು ಶಿವಪ್ಪ ಅಂಬ್ಲೀಕಲ್ ಮಾತನಾಡಿ, “ಸರಕಾರಿ ಶಾಲೆಗಳನ್ನು ಮುಚ್ಚಿ, ಕೆಪಿಎಸ್ ಶಾಲೆಗಳನ್ನು ಆರಂಭ ಮಾಡಿದೆ. ಕಾರ್ಪೋರೇಟ್ ಮೂಲಕ ಹಣ ತಂದು ಕೆಪಿಎಸ್ ಶಾಲೆಗಳನ್ನು ನಡೆಸಬೇಕೆಂದು ಹೇಳುತ್ತಿದ್ದಾರೆ. ಶಿಕ್ಷಣವನ್ನು ಖಾಸಗೀಕರಣ ಮಾಡಲು ಹೋರಟಿದ್ದಾರೆ” ಎಂದು ಹೇಳಿದರು.
“ರಾಜ್ಯದಲ್ಲಿ ಒಂದು ಲಕ್ಷ ಶಿಕ್ಷಕರ ಹುದ್ದೆಗಳು ಖಾಲಿ ಇವೆ. ಹಾಸ್ಟೇಲ್ ಗಳಲ್ಲಿ ಸರಿಯಾದ ಮೆನು ಇಲ್ಲ. ಡೊನೇಷನ್ ಹಾವಳಿ ಹೆಚ್ಚಾಗಿವೆ. ಇಷ್ಟೆಲ್ಲ ಸಮಸ್ಯೆಗಳು ಇದ್ದರೂ ಸರಕಾರ ಸರಿಪಡಿಸಲು ಮುಂದಾಗುತ್ತಿಲ್ಲ” ಎಂದರು.
“ಈ ದೇಶದ ಸ್ವಾತಂತ್ರ ಹೋರಾಟಕ್ಕೆ ಭಗತ್ ಸಿಂಗ್ ಅವರಂತವರು ತ್ಯಾಗ ಮಾಡಿದವರು ನಮಗೆ ಸ್ಪೂರ್ತಿ ಆಗಬೇಕು. ಸಿನಿಮಾ ನಟರುಗಳಲ್ಲ. ನಮ್ಮ ಜಿಲ್ಲೆಯಲ್ಲಿ ಸರಕಾರಿ ಕಾನೂನು ಕಾಲೇಜು ಇಲ್ಲ. ನಾವೆಲ್ಲ ರೈತರ ಮಕ್ಕಳು. ತಂದೆ ತಾಯಿಗಳು ತಮ್ಮ ಮಕ್ಕಳನ್ನು ಕೂಲಿ ಮಾಡಿ ಕಲಿಸುತ್ತಿದ್ದಾರೆ. ಅವರ ಶ್ರಮಕ್ಕೆ ವಿದ್ಯಾರ್ಥಿಗಳು ಪ್ರತಿಫಲ ಕೊಡಬೇಕು” ಎಂದರು.
“ಸರಕಾರಿ ಶಾಲೆಗಳನ್ನು ಉಳಿಸಲಿಕ್ಕೆ, ಶಿಕ್ಷಕರ ಹುದ್ದೆಗಳನ್ನು ನೇಮಕ ಮಾಡುವಂತೆ, ವಿದ್ಯಾರ್ಥಿಗಳಿಗೆ ಹಾಸ್ಟೇಲ್ ವ್ವವಸ್ಥೆ ಕಲ್ಪಿಸುವಂತೆ, ಡೋನೆಷನ್ ಹಾವಳಿ ವಿರುದ್ಧ ಇಂತಹ ವಿದ್ಯಾರ್ಥಿಗಳ ಹತ್ತಾರು ಸಮಸ್ಯೆಗಳ ಕುರಿತು ಎಸ್ಎಫ್ಐ ಹೋರಾಡುತ್ತಾ ಬಂದಿದೆ. ಹಾವೇರಿಯಲ್ಲಿ ವಿದ್ಯಾರ್ಥಿಗಳ ಸಮಸ್ಯೆಗಳ ಬಗ್ಗೆ ದೊಡ್ಡ ಮಟ್ಟದಲ್ಲಿ ಹೋರಾಟ ಮಾಡಲು ಎಲ್ಲರೂ ಕೈ ಜೋಡಿಸಬೇಕು” ಎಂದು ಕರೆ ನೀಡಿದರು.
ಸಮ್ಮೇಳನ ಉದ್ದೇಶಿಸಿ ಕರ್ನಾಟಕ ರಾಜ್ಯ ಅಲ್ಪ ಸಂಖ್ಯಾತರ ಆಯೋಗದ ಸದಸ್ಯರಾದ ಪರಿಮಳ ಜೈನ, ವಕೀಲರಾದ ನಾರಾಯಣ ಕಾಳೆ, ಎಸ್ಎಫ್ಐ ಮಾಜಿ ಜಿಲ್ಲಾಧ್ಯಕ್ಷೆ ರೇಣುಕಾ ಕಹಾರ, ಅಧ್ಯಕ್ಷತೆಯನ್ನು ವಹಿಸಿದ ಎಸ್ಎಫ್ಐ ಜಿಲ್ಲಾಧ್ಯಕ್ಷ ಬಸವರಾಜ ಎಸ್ ಮಾತನಾಡಿದರು.
ವೇದಿಕೆಯಲ್ಲಿ ಡಿವೈಎಫ್ಐ ರಾಜ್ಯ ಕಾರ್ಯದರ್ಶಿ ಬಸವರಾಜ ಪೂಜಾರ, ಹಿರಿಯ ಕಾರ್ಮಿಕ ಮುಖಂಡರಾದ ರುದ್ರಪ್ಪ ಜಾಬೀನ, ವಕೀಲರಾದ ರೆಹಾನ್ ಚನ್ನಪಟ್ಟಣ ಉಪಸ್ಥಿತರಿದ್ದರು. ಪ್ರಾಸ್ತಾವಿಕವಾಗಿ ಅರುಣ್ ಕುಮಾರ್ ನಗವತ, ಚೈತ್ರಾ ಕೊರವರ, ನಿರೂಪಿಸಿದರು. ಶೋಭಾ ದೇವರಮನೆ ಸ್ವಾಗತಿಸಿದರು, ದೀಪಾ ವಂದಿಸಿದರು. ವಿಠ್ಠಲ ಗೌಳಿ, ಹನುಮಂತಗೌಡ ಭರಮ್ಮಗೌಡರು, ನಿಂಗರಾಜ ಪೂಜಾರ, ವೀರನಗೌಡ, ವಿಕಾಸ ದುರಗಣ್ಣನವರ, ಗೌತಮ್ ಸಾವಕ್ಕನವರ, ರವಿ ಬಂಕಾಪುರ ಸೇರಿದಂತೆ ವಿವಿಧ ತಾಲ್ಲೂಕಿನ ಪ್ರತಿನಿಧಿಗಳು ಪಾಲ್ಗೊಂಡಿದ್ದರು.
