ಕನಿಷ್ಠ ವೇತನ ಕಾಯ್ದೆ ಮತ್ತು ಕಾರ್ಮಿಕ ಕಲ್ಯಾಣ ನಿಯಮಗಳನ್ನು ಉಲ್ಲಂಘಿಸಲಾಗಿದೆ ಎಂದು ಆರೋಪಿಸಿ ಮೈಸೂರು, ಚಾಮರಾಜನಗರ ಮತ್ತು ಮಂಡ್ಯ ಜಿಲ್ಲೆಗಳ ಪ್ರದೇಶದ 483 ಕಾರ್ಮಿಕರು, ಕಳೆದ ಎರಡು ವರ್ಷಗಳಲ್ಲಿ ತಮ್ಮ ಉದ್ಯೋಗದಾತರ ವಿರುದ್ಧ ಕಾರ್ಮಿಕ ನ್ಯಾಯಾಲಯಗಳಲ್ಲಿ 783 ಪ್ರಕರಣಗಳನ್ನು ದಾಖಲಿಸಿದ್ದಾರೆ.
ಮೂರು ಜಿಲ್ಲೆಗಳು ಸೇರಿ ನೂರಾರು ಸಣ್ಣ ಮತ್ತು ಮಧ್ಯಮ ಪ್ರಮಾಣದ ಕೈಗಾರಿಕೆಗಳಲ್ಲಿ ಅಂದಾಜು ಐದರಿಂದ ಆರು ಲಕ್ಷ ಮಂದಿ ಕಾರ್ಮಿಕರನ್ನು ನೇಮಿಸಿಕೊಂಡಿವೆ. ಮೈಸೂರು ಜಿಲ್ಲೆಯಲ್ಲಿಯೇ ಹೆಬ್ಬಾಳ, ಮೆಟಗಳ್ಳಿ, ಹೂಟಗಳ್ಳಿ, ಹಿನಕಲ್, ಕಡಕೋಳ ಮತ್ತು ತಾಂಡವಪುರ ಸೇರಿದಂತೆ ಪ್ರಮುಖ ವಲಯಗಳಲ್ಲಿ 26,112 ಇಂತಹ ಕೈಗಾರಿಕಾ ಘಟಕಗಳಿವೆ. ಈ ಘಟಕಗಳು ನಾಲ್ಕು ಲಕ್ಷಕ್ಕೂ ಅಧಿಕ ಮಂದಿ ಕಾರ್ಮಿಕರಿಗೆ ನೇರ ಉದ್ಯೋಗವನ್ನು ಒದಗಿಸಿದರೆ, ಇನ್ನೂ ಮೂರು ಲಕ್ಷ ಮಂದಿ ಕಾರ್ಮಿಕರು ಹೊರಗುತ್ತಿಗೆ ವ್ಯವಸ್ಥೆಗಳ ಮೂಲಕ ತೊಡಗಿಸಿಕೊಂಡಿದ್ದಾರೆ.
ರಾಜ್ಯ ಸರ್ಕಾರ ಇತ್ತೀಚೆಗೆ ಕನಿಷ್ಠ ವೇತನ ಪರಿಷ್ಕರಣೆ ಮಾಡಿದ ಬಳಿಕ ಈ ವಿಷಯವು ಗಮನ ಸೆಳೆದಿದ್ದು, ಇದು ಕೌಶಲ್ಯರಹಿತ ಕಾರ್ಮಿಕರ ವೇತನವನ್ನು ಶೇ.60ರಷ್ಟು ಹೆಚ್ಚಿಸಿದೆ. ಪರಿಷ್ಕೃತ ರಚನೆಯಡಿಯಲ್ಲಿ, ಬೆಂಗಳೂರು ವಲಯಕ್ಕೆ ಕನಿಷ್ಠ ವೇತನವನ್ನು ತಿಂಗಳಿಗೆ 23,376 ರೂ., ಮೈಸೂರು ಸೇರಿದಂತೆ ಪುರಸಭೆ ನಿಗಮಗಳು ಮತ್ತು ನಗರ ಪುರಸಭೆಗಳ ಅಡಿಯಲ್ಲಿ ಬರುವ ನಗರಗಳು ಮತ್ತು ಪಟ್ಟಣಗಳಲ್ಲಿ ಕೆಲಸ ಮಾಡುವವರಿಗೆ ₹21,351 ಮತ್ತು ಸಣ್ಣ ಪಟ್ಟಣಗಳು ಹಾಗೂ ಗ್ರಾಮೀಣ ಪ್ರದೇಶಗಳಿಗೆ ₹19,318 ವೇತನ ನಿಗದಿಪಡಿಸಲಾಗಿದೆ.
“ಹಿಂದಿನ ಉದ್ಯಮಗಳ ನಿರ್ದಿಷ್ಟ ವೇತನ ವ್ಯವಸ್ಥೆಯನ್ನು ಬದಲಾಯಿಸಿ, ಏಕರೂಪದ ವೇತನ ನೀಡುವಂತೆ ಸರ್ಕಾರ ಮೇ ತಿಂಗಳಲ್ಲಿ ಅಧಿಸೂಚನೆಯನ್ನು ಹೊರಡಿಸಿತ್ತು. ಆದಾಗ್ಯೂ, ಕೈಗಾರಿಕಾ ಸಂಘಗಳು, ವಾಣಿಜ್ಯ ಮಂಡಳಿಗಳು ಮತ್ತು ಉದ್ಯೋಗದಾತರ ಸಂಸ್ಥೆಗಳು ಆಕ್ಷೇಪಣೆಗಳನ್ನು ವ್ಯಕ್ತಪಡಿಸಿದ ಬಳಿಕ, ಉದ್ಯೋಗದಾತರು ಹಾಗೂ ಕಾರ್ಮಿಕ ಸಂಘಗಳ ನಡುವೆ ವಿವಾದಗಳಿಗೆ ಕಾರಣವಾದ ನಂತರ ಪರಿಷ್ಕೃತ ವೇತನ ರಚನೆಯ ಅನುಷ್ಠಾನವು ಅಡೆತಡೆಗಳನ್ನು ಎದುರಿಸುತ್ತಿದೆ. ಹಿಂದಿನ ವೇತನ ಪದ್ಧತಿಯಲ್ಲೂ ಕೂಡ ಅನೇಕ ಕಾರ್ಮಿಕರು ತಿಂಗಳಿಗೆ ₹17,000ಕ್ಕಿಂತ ಕಡಿಮೆ ವೇತನ ಪಡೆಯುತ್ತಿದ್ದರು. ಜತೆಗೆ ನೌಕರರ ರಾಜ್ಯ ವಿಮೆ(ಇಎಸ್‌ಐ), ಭವಿಷ್ಯ ನಿಧಿ(ಪಿಎಫ್) ಮತ್ತು ಬೋನಸ್‌ನಂತಹ ಪ್ರಯೋಜನಗಳಿಂದ ವಂಚಿತರನ್ನಾಗಿ ಮಾಡಲಾಗಿದೆ” ಎಂದು ಕಾರ್ಮಿಕ ಸಂಘಗಳು ಆರೋಪಿಸುತ್ತವೆ.
ಈ ಸುದ್ದಿ ಓದಿದ್ದೀರಾ? ಹಾಸನ | ಮೆಕ್ಕೆಜೋಳ ಬೆಳೆ ರೈತರ ಸಂಕಷ್ಟ; ಶಾಸಕ ಸಿಮೆಂಟ್ ಮಂಜು
“ನೂರಾರು ಕಾರ್ಮಿಕರು ಪರಿಹಾರ ಕೋರಿ ಕಾರ್ಮಿಕ ನ್ಯಾಯಾಲಯಗಳನ್ನು ಸಂಪರ್ಕಿಸಿದ್ದಾರೆ. ಆದರೂ, ಬಹುತೇಕ ಕಾರ್ಮಿಕರು ತಮ್ಮ ಉದ್ಯೋಗ ಕಳೆದುಕೊಳ್ಳುವ ಭಯ, ಆರ್ಥಿಕ ಅಭದ್ರತೆ ಮತ್ತು ಉದ್ಯೋಗದಾತರು ಪ್ರತೀಕಾರ ತೀರಿಸಿಕೊಳ್ಳಬಹುದೆಂಬ ಭಯದಿಂದ ದೂರುಗಳನ್ನು ಸಲ್ಲಿಸದೇ ದೂರ ಉಳಿಯುತ್ತಿದ್ದಾರೆ. ಅಲ್ಲದೆ ಸಾಕಷ್ಟು ಸುರಕ್ಷತಾ ಕ್ರಮಗಳಿಲ್ಲದೆ ಕಾರ್ಮಿಕರಿಂದ ಎಂಟು ಗಂಟೆಗೂ ಅಧಿಕ ಸಮಯ ದುಡಿಸಿಕೊಳ್ಳಲಾಗುತ್ತಿದೆ” ಎಂದು ಸೆಂಟರ್ ಆಫ್ ಇಂಡಿಯನ್ ಟ್ರೇಡ್ ಯೂನಿಯನ್ಸ್(ಸಿಐಟಿಯು)ನ ಜಿಲ್ಲಾಧ್ಯಕ್ಷ ಜಿ ಜಯರಾಮ್ ಹೇಳಿದ್ದಾರೆ.
“ಕಾರ್ಮಿಕರು ಕನಿಷ್ಠ ವೇತನ ಕಾಯ್ದೆ, 1948ರ ಅಡಿಯಲ್ಲಿ ದೂರುಗಳನ್ನು ಸಲ್ಲಿಸಬಹುದು. ಇದರಿಂದಾಗಿ ಕಾರ್ಮಿಕ ಇಲಾಖೆಯು ಅವರಿಗೆ ನ್ಯಾಯ ಒದಗಿಸಲು ಸುಗಮವಾಗುತ್ತದೆ” ಎಂಬುದು ಕಾರ್ಮಿಕ ಇಲಾಖೆಯ ಸಹಾಯಕ ಆಯುಕ್ತ ಅಭಿಪ್ರಾಯವಾಗಿದೆ.
