ಮದುವೆಯೆಂದರೆ ಈಗಿನ ಜಮಾನದಲ್ಲಿ ಕೇಳಬೇಕಾ? ಅಬ್ಬರ, ಆಡಂಬರ, ಡಿಜೆ ಹೀಗೆ ಧಾಂ ಧೂಂ ಅಂತ ಮದುವೆ ಮಾಡಿಕೊಳ್ಳುವುದು ಪ್ರಸ್ತುತ ಜನರೇಷನ್‌ನಲ್ಲಿ ಸಾಮಾನ್ಯವಾಗಿದೆ. ಇಂತಹ ಸಂದರ್ಭದ ಮಧ್ಯೆ ಇಲ್ಲೊಂದು ಜೋಡಿ ಎಲ್ಲರನ್ನೂ ಬೆರಗುಗೊಳಿಸುವಂತೆ ಸಪ್ತಪದಿ ತುಳಿದು ಎಲ್ಲರಿಗೂ ಮಾದರಿಯಾಗಿದೆ. ಬಸವ ಜಯಂತಿಯಂದು ಜಗಜ್ಯೋತಿ ಬಸವೇಶ್ವರರು, ಅಹಿಂಸಾ ತತ್ವ ಸಾರಿದ ಬುದ್ಧ ಹಾಗೂ ವಿಧಾನ ಶಿಲ್ಪಿ ಡಾ. ಬಿ ಆರ್ ಅಂಬೇಡ್ಕರ್ ಆಶಯದಂತೆ ಸಂವಿಧಾನ ಸಾಕ್ಷಿಯಾಗಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟ ದಂಪತಿ ಎಲ್ಲರಿಗೂ ಮಾದರಿಯಾಗಿದ್ದಾರೆ.
ಬಸವ ಜಯಂತಿಯಂದು ವಚನ ಪಠಿಸಿ ಮದುವೆ
ವಿಜಯನಗರ ಜಿಲ್ಲೆಯ ಹೊಸಪೇಟೆ ತಾಲೂಕಿನ ಕಾರಿಗನೂರು ನಿವಾಸಿಗಳಾದ ಮಹಾಲಕ್ಷ್ಮೀ ಹಾಗೂ ತಿಮ್ಮರಾಜು ಪರಸ್ಪರ ಪ್ರೀತಿಸುತ್ತಿದ್ದರು. ಈಗ ಅವರ ಪ್ರೀತಿ ಮದುವೆಯ ಬಂಧಕ್ಕೆ ಕಾಲಿಟ್ಟಿದೆ. ಯುವ ಪೀಳಿಗೆಗೆ ಆದರ್ಶವಾಗಿರಬೇಕೆಂದು ಈ ಜೋಡಿ ಮಹಾನ್ ನಾಯಕರ ಭಾವಚಿತ್ರಗಳ ಮುಂದೆ ಪ್ರತಿಜ್ಞೆ ಮಾಡಿ ಹೊಸ ಜೀವನಕ್ಕೆ ಕಾಲಿಟ್ಟಿದ್ದಾರೆ.
ತಾಂಬೂಲ ಬದಲಾಗಿ ಪುಸ್ತಕಗಳ ವಿನಿಮಯ
ಹೊಸಪೇಟೆ ಬಳಿಯ ಚನ್ನಬಸಪ್ಪನ ಗುಡ್ಡದ ಬಳಿ ಇಷ್ಟಲಿಂಗ ಅಧ್ಯಯನ ಕೇಂದ್ರದಲ್ಲಿ ಮದುವೆ ಜರುಗಿದೆ. ಸಮಾಜ ಸೇವಕರೂ ಆಗಿರುವ ಡಾ. ಅಜಯ್ ಕುಮಾರ್ ಹಾಗೂ ತಂಡದ ಮಾರ್ಗದರ್ಶನದಲ್ಲಿ ನವಜೋಡಿ ಹೊಸಬಾಳಿಗೆ ಕಾಲಿಟ್ಟರು. ಎಲ್ಲ ಕಡೆಯೂ ತಾಂಬೂಲ ಕೊಡುವ ಸಂಪ್ರದಾಯವಿದೆ. ಆದರೆ ಈ ಮದುವೆಯಲ್ಲಿ ನವದಂಪತಿಯ ಸಂಬಂಧಿಕರಿಗೆ ಸಮಾಜ ಸುಧಾರಣೆಯ ಪುಸ್ತಕಗಳನ್ನು ಬುಟ್ಟಿಯಲ್ಲಿಟ್ಟು ವಿನಿಮಯ ಮಾಡಿಸಲಾಯಿತು. ಬುದ್ಧ, ಬಸವ, ಅಂಬೇಡ್ಕರ್ ಅವರ ಪುಸ್ತಕಗಳು ಆ ತಾಂಬೂಲದಲ್ಲಿದ್ದವು. ಇನ್ನೂ ವಿಶೇಷವೆಂದರೆ ಉಡಿ ತುಂಬುವ ಶಾಸ್ತ್ರದಲ್ಲಿ ಹೂ, ಹಣ್ಣು ಇಡುವ ಬದಲಿಗೆ ಮೌಲ್ಯಯುತ ಪುಸ್ತಕಗಳನ್ನು ಇಟ್ಟಿದ್ದು ಎಲ್ಲರ ಗಮನ ಸೆಳೆಯಿತು.
ಮಂತ್ರಗಳ ಬದಲು ಸಂವಿಧಾನ ಪೀಠಿಕೆ, ವಚನ ಪಠಣ
ಸಾಮಾನ್ಯವಾಗಿ ಎಲ್ಲ ಮದುವೆಗಳಲ್ಲಿ ಮಂತ್ರಗಳ ಸದ್ದು ಜೋರಾಗಿರುತ್ತದೆ. ಆದರೆ ಇಲ್ಲಿ ಸಂವಿಧಾನದ ಪೀಠಿಕೆ ಓದಿಸಲಾಯಿತು. ಡಾ. ಅಜಯ್ ಕುಮಾರ್ ಅವರು ಬಸವಣ್ಣನವರ ವಚನಗಳನ್ನು ಓದಿಸಿ ಜೀವನದಲ್ಲಿ ಅಳವಡಿಸಿಕೊಳ್ಳುವಂತೆ ಮಾರ್ಗದರ್ಶನ ನೀಡಿದರು.
ಇದನ್ನೂ ಓದಿದ್ದೀರಾ? ವಿಜಯಪುರ | ಸಮಾಜದ ಮೈಲಿಗೆ ತೊಳೆಯಲು ಬಂದ ಕ್ರಾಂತಿಪುರುಷ ಬಸವಣ್ಣ: ಬಸವಲಿಂಗ ಸ್ವಾಮೀಜಿ
ಪರಸ್ಪರ ತಾಳಿ ಕಟ್ಟಿಸಿಕೊಂಡ ಜೋಡಿ
ಈ ಮದುವೆಯಲ್ಲಿ ಅಕ್ಷತೆ ಬದಲು ಸಂಗಾತಿಗಳ ಮೇಲೆ ಹೂ ಹಾಕಲಾಯಿತು. ಮದುವೆಯಲ್ಲಿ ನೆರೆದಿದ್ದ ಜನರೆಲ್ಲರೂ ನವದಂಪತಿಗೆ ಪುಷ್ಪಾರ್ಚನೆ ಮಾಡಿ ಆಶೀರ್ವದಿಸಿದರು. ವಧು ಮಹಾಲಕ್ಷ್ಮೀಯವರು ವರ ತಿಮ್ಮರಾಜುಗೆ ರುದ್ರಾಕ್ಷಿ ಸರ ಹಾಕಿದರು. ಬಳಿಕ ವರ, ವಧುವಿಗೆ ತಾಳಿ ಕಟ್ಟುವ ಮೂಲಕ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ಇದಾದ ನಂತರ ಒಬ್ಬರಿಗೊಬ್ಬರು ʼನೀನು ಹೇಳಿದಂತೆ ನಾನು ಕೇಳಬೇಕು. ನಾನು ಹೇಳಿದಂತೆ ನೀನು ಕೇಳಬೇಕುʼ ಎಂದು ತಮಗೆ ತಾವೇ ಪ್ರತಿಜ್ಞೆ ವಿಧಿಸಿಕೊಂಡರು. ಈ ಅಪರೂಪದ ಮದುವೆಯಲ್ಲಿ ನರೆದಿದ್ದ ವಧು-ವರನ ಸಂಬಂಧಿಕರು, ಆಪ್ತರು ಆದರ್ಶ ಮದುವೆ ಕಂಡು ಪುಳಕಿತಗೊಂಡರು.
ವಿಜಯಕುಮಾರ್ ಎಂ
ವಿಜಯನಗರ ಕೋಆರ್ಡಿನೇಟರ್‌
