ವಿಜಯಪುರ ನಗರದ ಬಿ.ಎಲ್.ಡಿ.ಇ ಸಂಸ್ಥೆಯ ಶ್ರೀ ಬಿ.ಎಂ ಪಾಟೀಲ ಪಬ್ಲಿಕ್(ಸಿ.ಬಿ.ಎಸ್.ಇ) ಶಾಲೆಯಲ್ಲಿ ನಡೆದ ಮೂರು ದಿನಗಳ ಅಂತರಶಾಲಾ ಕ್ರೀಡಾಕೂಟ ಶುಕ್ರವಾರ ಮುಕ್ತಾಯವಾಯಿತು. ವಿಜಯಪುರ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳ ನಾನಾ ಶಿಕ್ಷಣ ಸಂಸ್ಥೆಗಳ ಸಿ.ಬಿ.ಎಸ್.ಇ ಮತ್ತು ಐ.ಸಿ.ಎಸ್.ಇ ಶಾಲಾ ತಂಡಗಳು ಈ ಕ್ರೀಡಾಕೂಟದಲ್ಲಿ ಪಾಲ್ಗೊಂಡಿದ್ದವು. ಬಾಸ್ಕೆಟ್ಬಾಲ್, ಥ್ರೋಬಾಲ್, ಫುಟ್ಬಾಲ್ ಹಾಗೂ ಕ್ರಿಕೆಟ್ ಪಂದ್ಯಗಳು ಈ ಕ್ರೀಡಾಕೂಟದಲ್ಲಿ ನಡೆದವು.
ಸಮಾರೋಪ ಸಮಾರಂಭದಲ್ಲಿ ಪಾಲ್ಗೊಂಡ ಅಂತಾರಾಷ್ಟ್ರೀಯ ಯೋಗ ತರಬೇತುದಾರ ಮಡಿವಾಳಪ್ಪ ದೊಡಮನಿ, ಬಿ.ಎಲ್.ಡಿ.ಇ. ಸಂಸ್ಥೆಯ ದೈಹಿಕ ಶಿಕ್ಷಣ ನಿರ್ದೇಶಕ ಎಸ್.ಎಸ್ ಕೋರಿ, ಶಾಲೆಯ ಪ್ರಭಾರಿ ಪ್ರಾಚಾರ್ಯೆ ವಸುಧಾ ನಾರ್ವೇಕರ ಹಾಗೂ ಹಿರಿಯ ಸಂಯೋಜಕಿ ದೀಪಾ ಜಂಬೂರೆ ವಿಜೇತ ತಂಡಗಳಿಗೆ ಬಹುಮಾನ ವಿತರಿಸಿದರು.
ಈ ಪಂದ್ಯಾವಳಿಯಲ್ಲಿ ವಿಜೇತರಾದ ತಂಡಗಳ ಮಾಹಿತಿ ಇಲ್ಲಿದೆ .
- ಬಾಸ್ಕೆಟ್ಬಾಲ್ ಬಾಲಕಿಯರ ವಿಭಾಗ : ಶ್ರೀ ಬಿ. ಎಂ. ಪಾಟೀಲ್ ಪಬ್ಲಿಕ್ ಸ್ಕೂಲ್(ಸಿ.ಬಿ.ಎಸ್.ಸಿ) ವಿಜಯಪುರ ಪ್ರಥಮ ಸ್ಥಾನ, ಲೊಯೋಲ ಪಬ್ಲಿಕ್ ಸ್ಕೂಲ್(ಸಿ.ಬಿ.ಎಸ್.ಸಿ) ಸಿಂದಗಿ ದ್ವಿತೀಯ ಸ್ಥಾನ.
- ಬಾಸ್ಕೆಟ್ಬಾಲ್ ಬಾಲಕರ ವಿಭಾಗ : ಲೊಯೋಲ ಪಬ್ಲಿಕ್ ಸ್ಕೂಲ್(ಸಿ.ಬಿ.ಎಸ್.ಸಿ) ಸಿಂದಗಿ ಪ್ರಥಮ ಸ್ಥಾನ, ಶ್ರೀ ಬಿ.ಎಂ. ಪಾಟೀಲ್ ಪಬ್ಲಿಕ್ ಸ್ಕೂಲ್ (ಸಿ.ಬಿ.ಎಸ್.ಸಿ) ವಿಜಯಪುರ ದ್ವಿತೀಯ ಸ್ಥಾನ.
- ಥ್ರೋಬಾಲ್ : ಶಾರದಾ ಪಬ್ಲಿಕ್ ಸ್ಕೂಲ್ (ಸಿ.ಬಿ.ಎಸ್.ಸಿ) ವಿಜಯಪುರ ಪ್ರಥಮ ಸ್ಥಾನ, ಶ್ರೀ ಬಿ. ಎಂ. ಪಾಟೀಲ್ ಪಬ್ಲಿಕ್ ಸ್ಕೂಲ್ (ಸಿ.ಬಿ.ಎಸ್.ಸಿ) ವಿಜಯಪುರ ದ್ವಿತೀಯ ಸ್ಥಾನ.
- ಫುಟ್ಬಾಲ್ : ತುಂಗಳ ಪಬ್ಲಿಕ್ ಸ್ಕೂಲ್ (ಸಿ.ಬಿ.ಎಸ್.ಸಿ) ವಿಜಯಪುರ ಪ್ರಥಮ ಸ್ಥಾನ, ಸಂಗನಬಸವ ಅಂತಾರಾಷ್ಟ್ರೀಯ ವಸತಿ ಶಾಲೆ (ಸಿ.ಬಿ.ಎಸ್.ಸಿ) ಕವಲಗಿ ದ್ವಿತೀಯ ಸ್ಥಾನ.
- ಕ್ರಿಕೆಟ್ : ಶಾರದಾ ಪಬ್ಲಿಕ್ ಸ್ಕೂಲ್ (ಸಿ.ಬಿ.ಎಸ್.ಸಿ) ವಿಜಯಪುರ ಪ್ರಥಮ ಸ್ಥಾನ, ಶ್ರೀ ಬಿ. ಎಂ. ಪಾಟೀಲ ಪಬ್ಲಿಕ್ ಸ್ಕೂಲ್(ಸಿ.ಬಿ.ಎಸ್.ಇ) ದ್ವಿತೀಯ ಸ್ಥಾನ.
ಮಡಿವಾಳಪ್ಪ ದೊಡಮನಿ ಮಾತನಾಡಿ, ಕ್ರೀಡಾಪಟುಗಳ ಸಾಧನೆಯಲ್ಲಿ ತರಬೇತುದಾರರ ಪಾತ್ರ ಮಹತ್ವದ್ದಾಗಿದೆ. ತರಬೇತುದಾರರ ಸೂಕ್ತ ಮಾರ್ಗದರ್ಶನ, ತಂತ್ರಗಾರಿಕೆ ಹಾಗೂ ತರಬೇತಿಯು ಸ್ಪರ್ಧಾಳುಗಳನ್ನು ಗೆಲುವಿನತ್ತ ಕೊಂಡೊಯ್ಯುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ ಎಂದು ಹೇಳಿದರು.
ಇದೇ ಸಂದರ್ಭದಲ್ಲಿ ಶಾಲೆಯ ಪ್ರಭಾರ ಪ್ರಾಚಾರ್ಯೆ ವಸುಧಾ ನಾರ್ವೇಕರ ಮಾತನಾಡಿ, ಕ್ರೀಡೆಯಲ್ಲಿ ಗೆಲುವು ಸಾಧನೆಯ ಸಂಕೇತವಾದರೆ, ಸೋಲು ಮುಂದಿನ ಯಶಸ್ಸಿಗೆ ದಾರಿದೀಪವಾಗಿದೆ. ಕ್ರೀಡೆಗಳು ವಿದ್ಯಾರ್ಥಿಗಳಲ್ಲಿ ಆತ್ಮವಿಶ್ವಾಸ, ನಾಯಕತ್ವ, ಶಿಸ್ತು, ಸಹನೆ, ಪರಸ್ಪರ ಗೌರವ ಹಾಗೂ ಸವಾಲುಗಳನ್ನು ಎದುರಿಸುವ ಸಾಮರ್ಥ್ಯವನ್ನು ಬೆಳೆಸುತ್ತವೆ. ಗೆದ್ದಾಗ ಅತಿಯಾಗಿ ಸಂಭ್ರಮಿಸದೆ, ಸೋತಾಗ ಎದೆಗುಂದದೆ ಮುಂದಿನ ಸಾಧನೆಯತ್ತ ಸಾಗಬೇಕು ಎಂದು ಹೇಳಿದರು.
ಶಾಲೆಯ ಹಿರಿಯ ಸಂಯೋಜಕಿ ದೀಪಾ ಜಂಬೂರೆ ಮಾತನಾಡಿ, ಕ್ರೀಡೆಗಳು ವಿದ್ಯಾರ್ಥಿಗಳು ದೈಹಿಕ ಮತ್ತು ಮಾನಸಿಕವಾಗಿ ಉತ್ತಮ ಆರೋಗ್ಯವನ್ನು ಹೊಂದಲು ಪ್ರೋತ್ಸಾಹ ನೀಡುತ್ತವೆ ಎಂದು ಹೇಳಿದರು.
ಶೋಭಾ ಬಗಲಿ ಮತ್ತು ಅರುಣಾ ಹೊನವಾಡ ನಿರೂಪಿಸಿದರು. ಮೀರ್ ದಾದಾ ನೂರೆನ್ ಸ್ವಾಗತಿಸಿದರು. ಪ್ರೀತಿ ಪವಾರ ವಂದಿಸಿದರು. ಶಾಲೆಯ ಮುಖ್ಯ ದೈಹಿಕ ಶಿಕ್ಷಕ ಸ್ಯಾಮಸನ್ ಸೌಜಾ, ದೈಹಿಕ ಶಿಕ್ಷಕರಾದ ಸುನೀತಾ ಪತ್ತಾರ ಮತ್ತು ಸಂಗಪ್ಪ ಅಲಮೇಲ, ಶಾಲೆ ಬೋಧಕ ಹಾಗೂ ಬೋಧಕರ ಹೊರತಾದ ಸಿಬ್ಬಂದಿ, ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.



