2022ರಿಂದ 2026ರ ಅವಧಿಯಲ್ಲಿ ಚುನಾವಣೆ ಗೆದ್ದ ಬಳಿಕ ಒಟ್ಟು 111 ಹಾಲಿ ಸಂಸದರು ಮತ್ತು ಶಾಸಕರು ಪಕ್ಷ ಬದಲಿಸಿದ್ದಾರೆ ಎಂದು ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ (ADR) ಮತ್ತು ನ್ಯಾಷನಲ್ ಎಲೆಕ್ಷನ್ ವಾಚ್ (NEW) ನಡೆಸಿದ ವಿಶ್ಲೇಷಣಾ ವರದಿ ತಿಳಿಸಿದೆ.
ಸೆಪ್ಟೆಂಬರ್ 24ರಂದು ಬಿಡುಗಡೆಯಾದ ಈ ವರದಿಯಲ್ಲಿ 26 ಲೋಕಸಭಾ ಸದಸ್ಯರು, 7 ರಾಜ್ಯಸಭಾ ಸದಸ್ಯರು ಮತ್ತು 78 ಶಾಸಕರು ಸೇರಿದ್ದಾರೆ. 2022ರಿಂದ 2026ರ ಅವಧಿಯಲ್ಲಿ ನಡೆದ ಚುನಾವಣೆಗಳು ಮತ್ತು ಉಪಚುನಾವಣೆಗಳನ್ನು ಆಧರಿಸಿ ಈ ವರದಿಯನ್ನು ಸಿದ್ಧಪಡಿಸಲಾಗಿದೆ.
ಒಟ್ಟು 17 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಪಕ್ಷಾಂತರಗಳು ನಡೆದಿವೆ. ನಾಗಾಲ್ಯಾಂಡ್ನಲ್ಲಿ ಅತಿ ಹೆಚ್ಚು 32 ಪ್ರಕರಣಗಳು ದಾಖಲಾಗಿವೆ. ನಂತರ ಪಶ್ಚಿಮ ಬಂಗಾಳದಲ್ಲಿ 20, ತೆಲಂಗಾಣದಲ್ಲಿ 9, ಗೋವಾ ಮತ್ತು ಪಂಜಾಬ್ನಲ್ಲಿ ತಲಾ 8 ಪ್ರಕರಣಗಳಿವೆ. ಮಹಾರಾಷ್ಟ್ರ ಮತ್ತು ಮೇಘಾಲಯದಲ್ಲಿ ತಲಾ 6, ಮಣಿಪುರದಲ್ಲಿ 5 ಪ್ರಕರಣಗಳು ದಾಖಲಾಗಿವೆ. ಅರುಣಾಚಲ ಪ್ರದೇಶ ಮತ್ತು ಗುಜರಾತ್ನಲ್ಲಿ ತಲಾ 4, ಹಿಮಾಚಲ ಪ್ರದೇಶ ಮತ್ತು ರಾಜಸ್ಥಾನದಲ್ಲಿ ತಲಾ 2 ಪ್ರಕರಣಗಳಿವೆ. ಕರ್ನಾಟಕ, ಮಧ್ಯಪ್ರದೇಶ, ಸಿಕ್ಕಿಂ, ಉತ್ತರ ಪ್ರದೇಶ ಮತ್ತು ದೆಹಲಿಯಲ್ಲಿ ತಲಾ 1 ಪ್ರಕರಣ ದಾಖಲಾಗಿದೆ.
ಪಕ್ಷ ಬದಲಿಸಿದ 111 ಸಂಸದರು ಮತ್ತು ಶಾಸಕರ ಪೈಕಿ 32 ಮಂದಿ ನಾಗಾ ಪೀಪಲ್ಸ್ ಫ್ರಂಟ್ (NPF) ಸೇರಿದ್ದಾರೆ. ಇದು ಒಟ್ಟು ಸಂಖ್ಯೆಯ ಶೇ.29ರಷ್ಟಾಗಿದೆ. ಬಿಜೆಪಿಗೆ 29 ಮಂದಿ ಸೇರ್ಪಡೆಯಾಗಿದ್ದು, ಒಟ್ಟು ಪ್ರಕರಣಗಳ ಶೇ.26ರಷ್ಟಿದ್ದಾರೆ. ನ್ಯಾಷನಲಿಸ್ಟ್ ಸಿಟಿಜನ್ಸ್ ಪಾರ್ಟಿ ಆಫ್ ಇಂಡಿಯಾ (NCPI)ಗೆ 20 ಮಂದಿ ಸೇರಿದ್ದಾರೆ. ಕಾಂಗ್ರೆಸ್ಗೆ 9 ಮಂದಿ (ಶೇ.8), ಶಿವಸೇನೆಗೆ 8 ಮಂದಿ (ಶೇ.7), ಎನ್ಪಿಪಿಗೆ 6 ಮಂದಿ (ಶೇ.5) ಹಾಗೂ ಪೀಪಲ್ಸ್ ಪಾರ್ಟಿ ಆಫ್ ಅರುಣಾಚಲ (PPA)ಗೆ 4 ಮಂದಿ (ಶೇ.4) ಸೇರ್ಪಡೆಯಾಗಿದ್ದಾರೆ. ಎನ್ಪಿಎಫ್, ಬಿಜೆಪಿ ಮತ್ತು ಎನ್ಸಿಪಿಐಗೆ ಸೇರಿದವರ ಸಂಖ್ಯೆ ಒಟ್ಟು 81. ಅಂದರೆ 111 ಮಂದಿಯಲ್ಲಿ ಶೇ.73ರಷ್ಟು ಮಂದಿ ಈ ಮೂರು ಪಕ್ಷಗಳಿಗೆ ಸೇರಿದ್ದಾರೆ.
ನಾಗಾಲ್ಯಾಂಡ್ನಲ್ಲಿ ಎನ್ಡಿಪಿಪಿ ಮತ್ತು ಎನ್ಪಿಎಫ್ ನಡುವಿನ ರಾಜಕೀಯ ಪುನರ್ವ್ಯವಸ್ಥೆಯೇ ಎನ್ಪಿಎಫ್ಗೆ ಸೇರಿದವರ ಸಂಖ್ಯೆ ಹೆಚ್ಚಾಗಲು ಪ್ರಮುಖ ಕಾರಣ ಎಂದು ವಿಶ್ಲೇಷಿಸಲಾಗಿದೆ. ಪಕ್ಷ ವಿಲೀನ ಮತ್ತು ವೈಯಕ್ತಿಕ ಪಕ್ಷಾಂತರಗಳನ್ನು ಎಡಿಆರ್ ಪ್ರತ್ಯೇಕವಾಗಿ ಪರಿಗಣಿಸಿದೆ. ಆದ್ದರಿಂದ ಒಟ್ಟು ಅಂಕಿ-ಅಂಶಗಳನ್ನು ಅರ್ಥಮಾಡಿಕೊಳ್ಳುವಾಗ ಈ ವ್ಯತ್ಯಾಸ ಗಮನಿಸುವುದು ಮುಖ್ಯ ಎಂದು ವರದಿ ಹೇಳಿದೆ.
ಬಿಜೆಪಿಗೆ ಸೇರಿದ 29 ಮಂದಿ ಯಾರು?
ಬಿಜೆಪಿಗೆ ಸೇರಿದ 29 ಮಂದಿಯಲ್ಲಿ 7 ರಾಜ್ಯಸಭಾ ಸದಸ್ಯರು ಮತ್ತು 22 ಶಾಸಕರು ಇದ್ದಾರೆ. ಈ 7 ರಾಜ್ಯಸಭಾ ಸದಸ್ಯರೂ ಆಮ್ ಆದ್ಮಿ ಪಕ್ಷದಿಂದ (AAP) ಆಯ್ಕೆಯಾಗಿದ್ದರು. ಸ್ವಾತಿ ಮಾಲಿವಾಲ್, ಅಶೋಕ್ ಮಿತ್ತಲ್, ಹರ್ಭಜನ್ ಸಿಂಗ್, ರಾಘವ್ ಚಡ್ಡಾ, ಸಂದೀಪ್ ಕುಮಾರ್ ಪಾಠಕ್, ವಿಕ್ರಮಜಿತ್ ಸಿಂಗ್ ಸಾಹ್ನಿ ಮತ್ತು ರಾಜಿಂದರ್ ಗುಪ್ತಾ ಅವರು 2026ರ ಏಪ್ರಿಲ್ನಲ್ಲಿ ಬಿಜೆಪಿಗೆ ಸೇರಿದರು. ಬಿಜೆಪಿಗೆ ಸೇರಿದ ಶಾಸಕರಲ್ಲಿ ಗೋವಾದ 8 ಕಾಂಗ್ರೆಸ್ ಶಾಸಕರು, ಗುಜರಾತ್ನ 4 ಕಾಂಗ್ರೆಸ್ ಶಾಸಕರು ಮತ್ತು ಹಿಮಾಚಲ ಪ್ರದೇಶದ ಇಬ್ಬರು ಕಾಂಗ್ರೆಸ್ ಶಾಸಕರಿದ್ದಾರೆ.
ಜೊತೆಗೆ ಮಣಿಪುರದ ಜೆಡಿಯುಗೆ ಸೇರಿದ 5 ಶಾಸಕರು ಬಿಜೆಪಿ ಸೇರಿಕೊಂಡಿದ್ದಾರೆ. ಉತ್ತರ ಪ್ರದೇಶದ ಸಮಾಜವಾದಿ ಪಕ್ಷದ ಶಾಸಕ ಮನೋಜ್ ಕುಮಾರ್ ಪಾಂಡೆ, ಮಧ್ಯಪ್ರದೇಶದ ಕಾಂಗ್ರೆಸ್ ಶಾಸಕ ನಿರ್ಮಲಾ ಸಪ್ರೆ ಮತ್ತು ಕರ್ನಾಟಕದ ಶಾಸಕ ಜಿ. ಜನಾರ್ದನ ರೆಡ್ಡಿ ಅವರ ಹೆಸರೂ ಈ ಪಟ್ಟಿಯಲ್ಲಿದೆ. ಜನಾರ್ದನ ರೆಡ್ಡಿ ಅವರ ಕಲ್ಯಾಣ ರಾಜ್ಯ ಪ್ರಗತಿ ಪಕ್ಷ (KRPP) ಬಿಜೆಪಿಯೊಂದಿಗೆ ವಿಲೀನಗೊಂಡಿದೆ.
ಗುಜರಾತ್ನ ಕಾಂಗ್ರೆಸ್ ಶಾಸಕರಾದ ಸಿ.ಜೆ. ಚಾವ್ಡಾ, ಅರ್ಜುನ್ ಮೊಧ್ವಾಡಿಯಾ, ಅರವಿಂದ್ ಲದಾನಿ ಮತ್ತು ಚಿರಾಗ್ ಪಟೇಲ್ ಅವರು ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿ ಬಿಜೆಪಿಗೆ ಸೇರಿದರು. ನಂತರ ನಡೆದ ಉಪಚುನಾವಣೆಯಲ್ಲಿ ಅವರು ಸ್ಪರ್ಧಿಸಿ ಗೆದ್ದಿದ್ದಾರೆ.
ನಾಗಾಲ್ಯಾಂಡ್ನಲ್ಲಿ ದಾಖಲಾಗಿರುವ 32 ಪ್ರಕರಣಗಳೂ ಶಾಸಕರಿಗೆ ಸಂಬಂಧಿಸಿದವು. ಈ ಪ್ರಕರಣಗಳು ಹೆಚ್ಚಾಗಿ ಎನ್ಡಿಪಿಪಿ ಮತ್ತು ಎನ್ಪಿಎಫ್ ನಡುವಿನ ರಾಜಕೀಯ ಪುನರ್ವ್ಯವಸ್ಥೆಗೆ ಸಂಬಂಧಿಸಿವೆ. ಪಕ್ಷ ಬದಲಿಸಿದವರಲ್ಲಿ 25 ಮಂದಿ ಮೂಲತಃ ಎನ್ಡಿಪಿಪಿಯಿಂದ ಆಯ್ಕೆಯಾಗಿದ್ದರು. ಒಟ್ಟು 32 ಮಂದಿ ಎನ್ಪಿಎಫ್ಗೆ ಸೇರಿದ್ದಾರೆ.
ಪಶ್ಚಿಮ ಬಂಗಾಳದಲ್ಲಿ 20 ಪ್ರಕರಣಗಳು ದಾಖಲಾಗಿದ್ದು, ಈ 20 ಮಂದಿಯೂ ಮೊದಲು ಎಐಟಿಸಿ (AITC) ಟಿಕೆಟ್ನಲ್ಲಿ ಆಯ್ಕೆಯಾಗಿದ್ದರು. ನಂತರ ಅವರು ಎನ್ಸಿಪಿಐಗೆ ಸೇರಿದ್ದಾರೆ. ಈ ಲೋಕಸಭಾ ಸದಸ್ಯರು ತಮ್ಮ ಪಕ್ಷ ಎನ್ಸಿಪಿಐನೊಂದಿಗೆ ವಿಲೀನವಾಗಿದೆ ಎಂದು ಹೇಳಿಕೊಂಡಿದ್ದಾರೆ. ಆದರೆ ಈ ವಿಚಾರ ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರ ಮುಂದೆ ಇನ್ನೂ ಬಾಕಿಯಿದೆ.
ತೆಲಂಗಾಣದಲ್ಲಿ 9 ಪ್ರಕರಣಗಳು ನಡೆದಿದ್ದು, ಎಲ್ಲರೂ ಬಿಆರ್ಎಸ್ನಿಂದ ಆಯ್ಕೆಯಾಗಿದ್ದ ಶಾಸಕರು. ಇವರಲ್ಲಿ ಕಾಂಗ್ರೆಸ್ ಪಕ್ಷವೇ ಹೆಚ್ಚಿನ ಶಾಸಕರನ್ನು ತನ್ನತ್ತ ಸೆಳೆದಿದೆ. ಗೋವಾದಲ್ಲಿ ಕಾಂಗ್ರೆಸ್ನ 8 ಶಾಸಕರು ಬಿಜೆಪಿಗೆ ಸೇರಿದ್ದಾರೆ. ಪಂಜಾಬ್ನಲ್ಲಿ 8 ಪ್ರಕರಣಗಳಿದ್ದು, ಅದರಲ್ಲಿ 6 ರಾಜ್ಯಸಭಾ ಸದಸ್ಯರು ಮತ್ತು 2 ಶಾಸಕರು ಇದ್ದಾರೆ.
ಮಹಾರಾಷ್ಟ್ರದ 6 ಲೋಕಸಭಾ ಸದಸ್ಯರು ಶಿವಸೇನೆ (ಉದ್ಧವ್ ಬಾಳಾಸಾಹೇಬ್ ಠಾಕ್ರೆ) ಪಕ್ಷದಿಂದ ಆಯ್ಕೆಯಾಗಿದ್ದು, ನಂತರ ಏಕನಾಥ್ ಶಿಂಧೆ ನೇತೃತ್ವದ ಶಿವಸೇನೆಗೆ ತೆರಳಿದ್ದಾರೆ. ಮೇಘಾಲಯದಲ್ಲಿ 6 ಶಾಸಕರ ಪ್ರಕರಣಗಳು ನಡೆದಿದ್ದರೆ, ಮಣಿಪುರದಲ್ಲಿ 5 ಪ್ರಕರಣಗಳು ದಾಖಲಾಗಿವೆ.
ಎನ್ಡಿಪಿಪಿ, ಎಐಟಿಸಿ ಮತ್ತು ಕಾಂಗ್ರೆಸ್ನಿಂದ ಹೆಚ್ಚು ಮಂದಿ ಹೊರಗೆ
ಪಕ್ಷ ತೊರೆದ ಸಂಸದರು ಮತ್ತು ಶಾಸಕರ ಸಂಖ್ಯೆಯಲ್ಲಿ ಎನ್ಡಿಪಿಪಿ ಮೊದಲ ಸ್ಥಾನದಲ್ಲಿದೆ. ಎನ್ಡಿಪಿಪಿಯಿಂದ 25 ಮಂದಿ ಹೊರಬಂದಿದ್ದಾರೆ. ಎಐಟಿಸಿಯಿಂದ 20 ಮಂದಿ ಹೊರಬಂದಿದ್ದಾರೆ. ಕಾಂಗ್ರೆಸ್ನಿಂದ 19 ಮಂದಿ ಪಕ್ಷ ಬದಲಿಸಿದ್ದಾರೆ.
ಬಿಆರ್ಎಸ್ನಿಂದ 9 ಮಂದಿ, ಎಎಪಿ ಮತ್ತು ಎನ್ಸಿಪಿಯಿಂದ ತಲಾ 7 ಮಂದಿ, ಶಿವಸೇನೆ (ಉದ್ಧವ್ ಬಾಳಾಸಾಹೇಬ್ ಠಾಕ್ರೆ)ಯಿಂದ 6 ಮಂದಿ, ಜೆಡಿಯುನಿಂದ 5 ಮಂದಿ ಹಾಗೂ ಎನ್ಪಿಪಿಯಿಂದ 4 ಮಂದಿ ಪಕ್ಷದಿಂದ ಹೊರಬಂದಿದ್ದಾರೆ.
ಎಡಿಆರ್ 111 ಪ್ರಕರಣಗಳನ್ನು ಪಕ್ಷ ಬದಲಾದ ರೀತಿಯ ಆಧಾರದ ಮೇಲೆ ನಾಲ್ಕು ವಿಭಾಗಗಳಾಗಿ ವಿಂಗಡಿಸಿದೆ. ಮೊದಲ ವಿಭಾಗದಲ್ಲಿ ಶಾಸಕ ಅಥವಾ ಸಂಸದರು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡದೆ ನೇರವಾಗಿ ಒಂದು ಪಕ್ಷ ಬಿಟ್ಟು ಮತ್ತೊಂದು ಪಕ್ಷ ಸೇರುವ ಪ್ರಕರಣಗಳು ಸೇರಿವೆ. ಎರಡನೇ ವಿಭಾಗದಲ್ಲಿ ಪಕ್ಷ ವಿಲೀನ ಪ್ರಕರಣಗಳಿವೆ. ಅಂದರೆ ಮೂಲ ಪಕ್ಷ ಅಥವಾ ಅದರ ಶಾಸಕಾಂಗ ಪಕ್ಷದ ದೊಡ್ಡ ಭಾಗ ಮತ್ತೊಂದು ಪಕ್ಷದೊಂದಿಗೆ ಅಧಿಕೃತವಾಗಿ ವಿಲೀನವಾಗುವುದು. ನಾಗಾಲ್ಯಾಂಡ್ನ ಎನ್ಡಿಪಿಪಿ-ಎನ್ಪಿಎಫ್ ಪ್ರಕರಣ ಇದಕ್ಕೆ ಉದಾಹರಣೆ. ಮೂರನೇ ವಿಭಾಗದಲ್ಲಿ ಶಾಸಕ ಅಥವಾ ಸಂಸದರು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿ, ಮತ್ತೊಂದು ಪಕ್ಷ ಸೇರಿ, ನಂತರ ಉಪಚುನಾವಣೆಯಲ್ಲಿ ಸ್ಪರ್ಧಿಸಿ ಗೆಲ್ಲುವ ಪ್ರಕರಣಗಳು ಸೇರಿವೆ. ನಾಲ್ಕನೇ ವಿಭಾಗದಲ್ಲಿ ಸಂವಿಧಾನದ 10ನೇ ಪರಿಚ್ಛೇದದಡಿ ಅನರ್ಹಗೊಂಡ ಬಳಿಕ ಮತ್ತೊಂದು ಪಕ್ಷ ಸೇರಿ, ನಂತರ ಉಪಚುನಾವಣೆಯಲ್ಲಿ ಗೆಲ್ಲುವ ಪ್ರಕರಣಗಳು ಸೇರಿವೆ.
ಇದನ್ನೂ ಓದಿ: ಪಕ್ಷಾಂತರಿಗಳಿಗೆ 20 ವರ್ಷಗಳ ನಿಷೇಧ ಹೇರಿ: ಕಪಿಲ್ ಸಿಬಲ್ ಪ್ರಸ್ತಾವನೆಗೆ ‘ಸಿಜೆಪಿ’ ಬೆಂಬಲ
ಇತ್ತೀಚಿನ ವರ್ಷಗಳಲ್ಲಿ ನಡೆದ ಕೆಲವು ಪಕ್ಷಾಂತರಗಳಿಂದ ಕೆಲವು ರಾಜ್ಯಗಳ ವಿಧಾನಸಭೆಗಳಲ್ಲಿ ಸರ್ಕಾರಗಳೇ ಪತನಗೊಂಡಿವೆ ಎಂದು ಎಡಿಆರ್ ತನ್ನ ವರದಿಯಲ್ಲಿ ಹೇಳಿದೆ.
ಎಡಿಆರ್ ಮತ್ತು NEW ಸಂಸ್ಥೆಗಳು ಸಂಬಂಧಿಸಿದ ಎಲ್ಲ ಪ್ರಕರಣಗಳನ್ನು ಗುರುತಿಸಿ ಪಟ್ಟಿಯಲ್ಲಿ ಸೇರಿಸಲು ಸಾಧ್ಯವಾದಷ್ಟು ಪ್ರಯತ್ನಿಸಿರುವುದಾಗಿ ಹೇಳಿವೆ. ಆದರೆ ಶಾಸಕರು ಮತ್ತು ಸಂಸದರು ಪಕ್ಷ ಬದಲಿಸುವ ಕುರಿತು ವ್ಯವಸ್ಥಿತವಾಗಿ ನಿರ್ವಹಿಸಲಾದ, ಸುಲಭವಾಗಿ ಲಭ್ಯವಿರುವ ಅಧಿಕೃತ ದಾಖಲೆಗಳು ಇಲ್ಲದಿರುವುದರಿಂದ, ವರದಿಯಲ್ಲಿರುವ ಪಟ್ಟಿ ಸಂಪೂರ್ಣವಾಗಿರದೇ ಇರಬಹುದು ಎಂದು ಎಚ್ಚರಿಸಿವೆ. ಹೀಗಾಗಿ ಇನ್ನೂ ಕೆಲವು ಪಕ್ಷಾಂತರ ಪ್ರಕರಣಗಳು ಈ ಪಟ್ಟಿಯಲ್ಲಿ ಸೇರದೇ ಇರುವ ಸಾಧ್ಯತೆಯಿದೆ.
ಇದಕ್ಕೂ ಮೊದಲು ಎಡಿಆರ್ 2021ರ ಸೆಪ್ಟೆಂಬರ್ 9ರಂದು ಸಂಸದರು ಮತ್ತು ಶಾಸಕರು ಪಕ್ಷ ಬದಲಿಸಿದ ಕುರಿತು ವರದಿ ಬಿಡುಗಡೆ ಮಾಡಿತ್ತು. ಆ ವರದಿಯಲ್ಲಿ 2014ರಿಂದ 2021ರವರೆಗಿನ ಅವಧಿಯ ಪಕ್ಷಾಂತರ ಪ್ರಕರಣಗಳನ್ನು ವಿಶ್ಲೇಷಿಸಲಾಗಿತ್ತು.
