ಅಸ್ಸಾಂನಲ್ಲಿ ಏಪ್ರಿಲ್ 9ರಂದು ಮತದಾನ ನಡೆಯಲಿದೆ. ರಾಜಕೀಯ ಪಕ್ಷಗಳ ಚುನಾವಣಾ ಸಿದ್ದತೆಗಳು ಬಿರುಸು ಪಡೆದಿವೆ. ಪ್ರಚಾರ ಭರಾಟೆ ಹೆಚ್ಚಾಗಿದೆ. ಇದೇ ಸಮಯದಲ್ಲಿ, ಕಾಂಗ್ರೆಸ್ ನಾನಾ ರೀತಿಯ ಬಿಕ್ಕಟ್ಟನ್ನು ಎದುರಿಸುತ್ತಿದೆ. ಮುಖ್ಯವಾಗಿ, ಪಕ್ಷದ ಪ್ರಬಲ ಮತ್ತು ಪ್ರಮುಖ ನಾಯಕರು ಕೈ ಪಾಳಯ ತೊರೆದು, ಕೇಸರಿ ಪಡೆ ಸೇರುತ್ತಿದ್ದಾರೆ. ಈ ಪಕ್ಷಾಂತರವು ಕಾಂಗ್ರೆಸ್‌ಗೆ ಸಂಕಷ್ಟ ತಂದೊಡ್ಡಿದೆ.
ಇತ್ತೀಚೆಗೆ, ಕಾಂಗ್ರೆಸ್ ನಾಯಕರಾದ ಭೂಪೇನ್ ಬೋರಾ ಮತ್ತು ಪ್ರದ್ಯುತ್ ಬೊರ್ಡೊಲೋಯ್ ಅವರು ಪಕ್ಷ ತೊರೆದು, ಕೋಮುವಾದಿ ಪಕ್ಷ ಬಿಜೆಪಿ ಸೇರಿದ್ದಾರೆ. ಜೊತೆಗೆ, ಐವರು ಶಾಸಕರೂ ಬಿಜೆಪಿ ಪಾಲಾಗಿದ್ದಾರೆ. ಈ ವಲಸೆ ತಡೆಯಲು ಪಕ್ಷದ ಹಿರಿಯ ನಾಯಕರಿಗೆ ಸಾಧ್ಯವಾಗುತ್ತಿಲ್ಲ. ಮುಖ್ಯವಾಗಿ, ಅಸ್ಸಾಂ ಚುನಾವಣೆಯ ಉಸ್ತುವಾರಿ ಹೊತ್ತಿರುವ ಪ್ರಿಯಾಂಕಾ ಗಾಂಧಿ ಮತ್ತು ಅವರ ಸಹವರ್ತಿ ಡಿ.ಕೆ ಶಿವಕುಮಾರ್ ಹೈರಾಣಾಗಿದ್ದಾರೆ. ಈ ವಲಸೆಗೆ ಅನೇಕರು ರಾಜ್ಯ ಘಟಕದ ಅಧ್ಯಕ್ಷರನ್ನು ದೂರುತ್ತಿದ್ದರೆ, ಇನ್ನೂ ಕೆಲವರು ಪ್ರಿಯಾಂಕಾ ಗಾಂಧಿ ಅವರ ಉಸ್ತುವಾರಿಯಲ್ಲೇ ಇಂತಹ ಘಟನೆಗಳು ಸಂಭವಿಸುತ್ತಿರುವುದೇಕೆ ಎಂದು ಆಶ್ಚರ್ಯ ವ್ಯಕ್ತಪಡಿಸುತ್ತಿದ್ದಾರೆ.
ಆದರೆ, ಪ್ರಿಯಾಂಕಾ ಗಾಂಧಿ ಅವರ ಆಪ್ತರು, ಪ್ರಿಯಾಂಕಾ ಕೇವಲ ‘ಸ್ಕ್ರೀನಿಂಗ್ ಕಮಿಟಿ’ಯ (ಅಭ್ಯರ್ಥಿಗಳ ಆಯ್ಕೆ ಸಮಿತಿ) ಅಧ್ಯಕ್ಷರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಅವರ ಪಾತ್ರವು ಕೇವಲ ಅಭ್ಯರ್ಥಿಗಳ ಆಯ್ಕೆಗೆ ಸೀಮಿತವಾಗಿದೆ ಎನ್ನುತ್ತಿದ್ದಾರೆ.
ತಮ್ಮ ಪಾಂಡಿತ್ಯದಿಂದಾಗಿ ಈಶಾನ್ಯ ಭಾರತದ ‘ಶಶಿ ತರೂರ್’ ಎಂದೇ ಕರೆಯಲ್ಪಡುವ ಪ್ರದ್ಯುತ್ ಬೊರ್ಡೊಲೋಯ್ ಅವರು ನಿನ್ನೆ ತಮ್ಮ ಲೋಕಸಭಾ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ್ದು, ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿ ಟಿಕೆಟ್‌ನಿಂದ ಸ್ಪರ್ಧಿಸಲು ಸಜ್ಜಾಗಿದ್ದಾರೆ. ಹಾಲಿ ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ಅವರು ಈ ಹಿಂದೆ ಕಾಂಗ್ರೆಸ್ ತೊರೆದ ನಂತರ ಬಿಜೆಪಿಯತ್ತ ಮುಖ ಮಾಡಿದ ಕಾಂಗ್ರೆಸ್ ನಾಯಕರ ಪಟ್ಟಿಗೆ ಬೊರ್ಡೊಲೋಯ್ ಕೂಡ ಸೇರಿಕೊಂಡಿದ್ದಾರೆ.
ತಮ್ಮ ನಿರ್ಧಾರವು ಚುನಾವಣೆಗೆ ಸಂಬಂಧಿಸಿದಲ್ಲ. ಬದಲಾಗಿ ಪಕ್ಷದೊಳಗೆ ನಡೆಯುತ್ತಿರುವ ನಿರಂತರ ಅವಮಾನಗಳು ಮತ್ತು ಹಂತ ಹಂತವಾಗಿ ಉಂಟಾದ ಮನಸ್ತಾಪದ ಫಲವೆಂದು ಬೊರ್ಡೊಲೋಯ್ ಹೇಳಿಕೊಂಡಿದ್ದಾರೆ. ಆದರೆ, ಟಿಕೆಟ್ ಹಂಚಿಕೆಯೇ ಈ ನಿರ್ಧಾರಕ್ಕೆ ಪ್ರಮುಖ ಕಾರಣ ಎಂಬ ಮಾತುಗಳು ಕಾಂಗ್ರೆಸ್‌ನಲ್ಲಿ ಕೇಳಿಬರುತ್ತಿವೆ.
ಈ ಚುನಾವಣೆಯಲ್ಲಿ ಭೂಗತ ಲೋಕದ ಎಮ್ದಾದುಲ್ ಇಸ್ಲಾಂ ಎಂಬಾತನೊಂದಿಗೆ ಸಂಪರ್ಕಹೊಂದಿರವ ಆರೋಪ ಎದುರಿಸುತ್ತಿರುವ ಶಾಸಕ ಆಸಿಫ್ ಮೊಹಮ್ಮದ್ ನಜರ್ ಅವರಿಗೆ ಕಾಂಗ್ರೆಸ್ ಮತ್ತೆ ಟಿಕೆಟ್ ನೀಡಲು ನಿರ್ಧರಿಸಿದ್ದರಿಂದ ಬೊರ್ಡೊಲೋಯ್ ಪಕ್ಷ ತೊರೆದಿದ್ದಾರೆ ಎಂದು ಹೇಳಲಾಗುತ್ತಿದೆ.
2025ರ ಏಪ್ರಿಲ್‌ನಲ್ಲಿ ತಮ್ಮ ಮೇಲೆ ನಡೆದ ಕೊಲೆ ಯತ್ನದ ದಾಳಿಯಲ್ಲಿ ಈ ಎಮ್ದಾದುಲ್ ಇಸ್ಲಾಂ ಭಾಗಿಯಾಗಿದ್ದ. ಆತ ಜಾಮೀನಿನ ಮೇಲೆ ಹೊರಬಂದಾಗ ಆತನನ್ನು ನಜರ್ ಸನ್ಮಾನಿಸಿದ್ದರು. ಹಲವು ಬಾರಿ ಗೌರವ್ ಗೊಗೊಯ್ ಅವರ ಸಮ್ಮುಖದಲ್ಲೂ ಈತ ಕಾಣಿಸಿಕೊಂಡಿದ್ದನೆಂದು ಬೊರ್ಡೊಲೋಯ್ ಆರೋಪಿಸಿದ್ದಾರೆ.
ಪ್ರಿಯಾಂಕಾ ಗಾಂಧಿ ಅಧ್ಯಕ್ಷತೆಯಲ್ಲಿ ನಡೆದ ಸ್ಕ್ರೀನಿಂಗ್ ಕಮಿಟಿ ಸಭೆಯಲ್ಲಿ ನಜರ್ ಅವರಿಗೆ ಟಿಕೆಟ್ ನೀಡುವುದನ್ನು ತಾವು ವಿರೋಧಿಸಿದ್ದರೂ, ನಜರ್‌ಗೆ ಟಿಕೆಟ್ ನೀಡಿದರೆ ತಾವು ರಾಜೀನಾಮೆ ನೀಡುತ್ತೇನೆಂದು ಹೇಳದ್ದರ ಹೊರತಾಗಿಯೂ ದೆಹಲಿಯಲ್ಲಿ ನಡೆದ ಸಭೆಯಲ್ಲಿ ತಮ್ಮ ಆಕ್ಷೇಪಗಳನ್ನು ತಿರಸ್ಕರಿಸಲಾಗಿದೆ. ತಮಗಾದ ಈ ಅವಮಾನದಿಂದಲೇ ತಾವು ಪಕ್ಷ ತೊರೆಯಲು ಕಾರಣವಾಯಿತು ಎಂದು ಬೋರ್ಡೊಲೋಯ್ ಪ್ರತಿಪಾದಿಸಿದ್ದಾರೆ.
ಕಾಂಗ್ರೆಸ್ ಮೂಲಗಳ ಪ್ರಕಾರ, ಪ್ರಿಯಾಂಕಾ ಗಾಂಧಿ ಅವರು ಸಮಿತಿಯ ಅಧ್ಯಕ್ಷರಾಗಿ ತಮ್ಮ ಕೆಲಸವನ್ನು ಸಮರ್ಥವಾಗಿ ನಿರ್ವಹಿಸಿದ್ದಾರೆ. ಈಗಾಗಲೇ ಪ್ರದ್ಯುತ್ ಬೊರ್ಡೊಲೋಯ್ ಅವರ ಪುತ್ರನಿಗೂ ಟಿಕೆಟ್ ನೀಡಲಾಗಿದ್ದು, ಬಹುತೇಕ ಅಭ್ಯರ್ಥಿಗಳ ಹೆಸರುಗಳನ್ನು ಘೋಷಿಸಲಾಗಿದೆ. ಬೊರ್ಡೊಲೋಯ್ ಅವರ ನಿರ್ಧಾರವು ‘ದುರದೃಷ್ಟಕರ’ ಎಂದು ಗೌರವ್ ಗೊಗೊಯ್ ಕರೆದಿದ್ದಾರೆ.
ಈ ಲೇಖನ ಓದಿದ್ದೀರಾ?: LPG ಹೊತ್ತು ಭಾರತಕ್ಕೆ ಬಂದ ‘ಶಿವಾಲಿಕ್’ ಹಡಗು; ತಣಿಯುವುದೇ ಕೊರತೆ-ಆತಂಕ?
“ಕಾಂಗ್ರೆಸ್ ಅವರಿಗೆ ಎಲ್ಲವನ್ನೂ ನೀಡಿದೆ. ಎರಡು ವರ್ಷಗಳ ಹಿಂದಷ್ಟೇ ಅವರಿಗೆ ನಾಗಾಂವ್ ಲೋಕಸಭಾ ಟಿಕೆಟ್ ನೀಡಲಾಗಿತ್ತು. ಈಗ ಅವರ ಕುಟುಂಬದ ಸದಸ್ಯರಿಗೂ ವಿಧಾನಸಭಾ ಚುನಾವಣೆಯಲ್ಲಿ ಸ್ಪರ್ಧಿಸಲು ಅವಕಾಶ ನೀಡಲಾಗಿದೆ. ಆದರೆ, ಅವರು ಹಿಮಂತ ಬಿಸ್ವ ಶರ್ಮಾ ಅವರೇ ಮುಖ್ಯಮಂತ್ರಿಯಾಗಿ ಮುಂದುವರಿಯಬೇಕೆಂದು ಬಯಸಿದ್ದಾರೆ. ಅದು ಅವರ ನಿರ್ಧಾರ,” ಎಂದು ಕಿಡಿಕಾರಿದ್ದಾರೆ.
ಬೊರ್ಡೊಲೋಯ್ ಅವರ ನಿರ್ಧಾರದ ಹಿಂದೆ ಜಾರಿ ನಿರ್ದೇಶನಾಲಯ (ಇಡಿ) ಮತ್ತು ಇತರ ಕೇಂದ್ರ ತನಿಖಾ ಸಂಸ್ಥೇಗಳ ಪಾತ್ರವಿರಬಹುದು ಎಂದು ಅವರು ಅನುಮಾನಿಸಿದ್ದಾರೆ.
ಇದೆಲ್ಲದರ ನಡುವೆ, ಕಾಂಗ್ರೆಸ್ಸಿಗರು ಬಿಜೆಪಿಗೆ ವಲಸೆ ಹೋಗುತ್ತಿರುವುದು ರಾಜ್ಯದಲ್ಲಿ ಕಾಂಗ್ರೆಸ್‌ಅನ್ನು ಮತ್ತಷ್ಟು ದುರ್ಬಲಗೊಳಿಸಿದಂತೆ ಕಾಣುತ್ತಿದೆ. ವಿಶೇಷವಾಗಿ ಬೊರ್ಡೊಲೋಯ್ ಮತ್ತು ಭೂಪೇನ್ ಬೋರಾ ಅವರು ಪ್ರಭಾವ ಹೊಂದಿದ್ದ ನಗಾವ್ ಮತ್ತು ಇತರ ಕ್ಷೇತ್ರಗಳಲ್ಲಿ ಪಕ್ಷದ ಪ್ರಭಾವ ಕಡಿಮೆಯಾಗುವ ಸಾಧ್ಯತೆಯಿದೆ.
ಆದರೆ, ಕಳೆದ ನಾಲ್ಕು ಅವಧಿಯಲ್ಲಿ ಆಡಳಿತದಿಂದ ದೂರ ಉಳಿದಿರುವ ಕಾಂಗ್ರೆಸ್, ಚುನಾವಣೆಯಲ್ಲಿ ಮತದಾರರ ಮನಸ್ಸನ್ನು ಗೆಲ್ಲಲು ಎದುರು ನೋಡುತ್ತಿದೆ. ಅದಕ್ಕಾಗಿ, ನಾನಾ ಭರವಸೆಗಳನ್ನು ನೀಡುತ್ತಿದೆ. ಸ್ಥಳೀಯ ಸಮಸ್ಯೆಗಳನ್ನು ಗುರುತಿಸಿ, ಪರಿಹರಿಸುವ ಆಶ್ವಾಸನೆಗಳ ಮಹಾಪೂರವನ್ನೇ ನೀಡುತ್ತಿದೆ. ಜೊತೆಗೆ, ರಾಜ್ಯದಲ್ಲಿ ಬಲವಾದ ಸಂಘಟನೆ ಕಾಂಗ್ರೆಸ್‌ಗಿದೆ. ಆದ್ದರಿಂದ, ಮತದಾರರಲ್ಲಿ ತನ್ನ ಬೆಂಬಲವನ್ನು ಉಳಿಸಿಕೊಳ್ಳಬಹುದು. ಆದಾಗ್ಯೂ, ಮತದಾರರು ಯಾರಿಗೆ ಅಧಿಕಾರ ನೀಡಲಿದ್ದಾರೆ ಎಂಬುದು ಏಪ್ರಿಲ್ 9 ಮತದಾನ ಮತ್ತು ಮೇ 4ರ ಫಲಿತಾಂಶದಲ್ಲಿ ಗೊತ್ತಾಗಲಿದೆ.
