ಯಾವ ಸಮಾಜ ಪ್ರಶ್ನಿಸುವುದನ್ನು ನಿಲ್ಲಿಸುತ್ತದೆಯೋ ಅದು ಸುಲಭವಾಗಿ ಸರ್ವಾಧಿಕಾರಕ್ಕೆ ಬಲಿಯಾಗುತ್ತದೆ. ಅಜ್ಞಾನ, ಭಯ ಮತ್ತು ಪ್ರಶ್ನಿಸದ ನಂಬಿಕೆಗಳ ವಾತಾವರಣದಲ್ಲಿ ಸ್ವೇಚ್ಛಾಚಾರದ ಅಧಿಕಾರವು ವೃದ್ಧಿಸುತ್ತದೆ ಎಂದು ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿ ಉಜ್ಜಲ್ ಭುಯಾನ್ ಎಚ್ಚರಿಸಿದ್ದಾರೆ.
ಮೇಘಾಲಯದ ವಿಜ್ಞಾನ ಮತ್ತು ತಂತ್ರಜ್ಞಾನ ವಿಶ್ವವಿದ್ಯಾಲಯದ (USTM) 12ನೇ ಘಟಿಕೋತ್ಸವದಲ್ಲಿ ಶನಿವಾರ ಘಟಿಕೋತ್ಸವ ಭಾಷಣ ಮಾಡಿದ ಅವರು, ‘ವೈಜ್ಞಾನಿಕ ಮನೋಭಾವವು ಕಾನೂನಿನ ಆಡಳಿತಕ್ಕೆ ಬುನಾದಿ ಹಾಕುತ್ತದೆ’ ಎಂದು ಪ್ರತಿಪಾದಿಸಿದರು.
“ಯಾವುದೇ ಪುರಾವೆಗಳಿಲ್ಲದ ಹೇಳಿಕೆಗಳನ್ನು ಒಪ್ಪಿಕೊಳ್ಳುವ ಸಮಾಜವು ಮೂಢನಂಬಿಕೆಗಳಿಗೆ ಮತ್ತು ತಪ್ಪು ಮಾಹಿತಿಗಳಿಗೆ ಸುಲಭವಾಗಿ ತುತ್ತಾಗುತ್ತದೆ. ಪ್ರಶ್ನೆಗಳನ್ನು ಕೇಳಲು ಹೆದರುವ ಸಮಾಜವು ಸರ್ವಾಧಿಕಾರಕ್ಕೆ ತುತ್ತಾಗುವ ಅಪಾಯವಿರುತ್ತದೆ. ಹಾಗೆಯೇ, ಸಂಪ್ರದಾಯಗಳನ್ನು ಪ್ರಶ್ನಾತೀತ ಎಂದು ಭಾವಿಸುವ ಸಮಾಜವು ತನ್ನಲ್ಲಿನ ಅನ್ಯಾಯದ ಆಚರಣೆಗಳನ್ನು ಸರಿಪಡಿಸಿಕೊಳ್ಳಲು ವಿಫಲವಾಗುತ್ತದೆ” ಎಂದು ಅವರು ಅಭಿಪ್ರಾಯಪಟ್ಟರು.
ಸಂವಿಧಾನದ 51ಎ ವಿಧಿಯನ್ನು ಉಲ್ಲೇಖಿಸಿದ ಅವರು, ವೈಜ್ಞಾನಿಕ ಮನೋಭಾವವನ್ನು ಬೆಳೆಸಿಕೊಳ್ಳುವುದು ಪ್ರತಿಯೊಬ್ಬ ನಾಗರಿಕನ ಮೂಲಭೂತ ಕರ್ತವ್ಯವಾಗಿದೆ ಎಂದರು. “ಇದಕ್ಕಾಗಿ ಪ್ರಯೋಗಾಲಯಗಳಿಗೆ ಹೋಗಬೇಕಿಲ್ಲ ಅಥವಾ ವಿಜ್ಞಾನಿಯೇ ಆಗಬೇಕಿಲ್ಲ. ತಾರ್ಕಿಕವಾಗಿ ಆಲೋಚಿಸುವ ಸಾಮರ್ಥ್ಯವಿದ್ದರೆ ಸಾಕು; ನೀವು ಆಲೋಚಿಸುವುದು ಮತ್ತು ಮಾತನಾಡುವುದು ವಿವೇಚನೆಯಿಂದ ಕೂಡಿರಬೇಕು” ಎಂದು ಕಿವಿಮಾತು ಹೇಳಿದರು. “ವಿಜ್ಞಾನ ಮತ್ತು ಕಾನೂನು ಎರಡೂ ಪುರಾವೆ ಮತ್ತು ತಾರ್ಕಿಕತೆಯನ್ನು ಆಧರಿಸಿವೆ. ಊಳಿಗಮಾನ್ಯ ಹಾಗೂ ಜಾತಿ ಆಧಾರಿತ ಸಮಾಜವನ್ನು ಆಧುನಿಕ ಸಮಾಜವನ್ನಾಗಿ ಪರಿವರ್ತಿಸುವ ಸಾಂವಿಧಾನಿಕ ಪಯಣದಲ್ಲಿ ಇವೆರಡೂ ಪಾಲುದಾರರಾಗಿವೆ” ಎಂದರು.
ಸಮಾಜವನ್ನು ‘ನಾವು’ ಮತ್ತು ‘ಅವರು’ ಎಂದು ವಿಭಜಿಸುವ ರಾಜಕೀಯ ಪ್ರವೃತ್ತಿಯ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಅವರು, ನಮ್ಮ ಸಂವಿಧಾನದ ಪೀಠಿಕೆಯು ‘ಭಾರತದ ಜನತೆಯಾದ ನಾವು’ ಎಂದು ಆರಂಭವಾಗುತ್ತದೆ ಎಂಬುದನ್ನು ನೆನಪಿಸಿದರು. “ಸಂವಿಧಾನವು ಕೇವಲ ಒಂದು ವರ್ಗವನ್ನು ಉದ್ದೇಶಿಸಿ ಮಾತನಾಡುವುದಿಲ್ಲ. ಅದು ಎಲ್ಲ ನಾಗರಿಕರನ್ನೂ ಸಮಾನವಾಗಿ ಕಾಣುತ್ತದೆ. ವೈವಿಧ್ಯತೆಯು ಸಾಂವಿಧಾನಿಕ ಆಶಯಕ್ಕೆ ತೊಡಕಲ್ಲ, ಬದಲಿಗೆ ಅದು ಏಕರೂಪತೆಯನ್ನು ಹೇರದೆ ಏಕತೆಯನ್ನು ಮರುಸ್ಥಾಪಿಸುತ್ತದೆ. ಇದನ್ನೇ ಡಾ. ಬಿ.ಆರ್. ಅಂಬೇಡ್ಕರ್ ಅವರು ಸಂವಿಧಾನದ ಹೃದಯ ಮತ್ತು ಆತ್ಮ (ಭ್ರಾತೃತ್ವ) ಎಂದು ಕರೆದಿದ್ದಾರೆ” ಎಂದು ಸ್ಮರಿಸಿದರು.
ವಿಶ್ವವಿದ್ಯಾಲಯಗಳು ಮುಕ್ತ ಚಿಂತನೆಯ ತಾಣಗಳಾಗಬೇಕು ಎಂಬ ಮಾಜಿ ರಾಷ್ಟ್ರಪತಿ ಪ್ರಣಬ್ ಮುಖರ್ಜಿ ಅವರ ಮಾತನ್ನು ಉಲ್ಲೇಖಿಸಿದ ನ್ಯಾ. ಭುಯಾನ್, ಆರ್ಥಿಕ ತಜ್ಞ ಅಮರ್ತ್ಯ ಸೇನ್ ಅವರ ಸಾಂಸ್ಥಿಕ ಮತ್ತು ಕಾರ್ಯಾತ್ಮಕ ಪ್ರಜಾಪ್ರಭುತ್ವದ ನಡುವಿನ ವ್ಯತ್ಯಾಸವನ್ನು ವಿವರಿಸಿದರು. “ಪ್ರಜಾಪ್ರಭುತ್ವ ಎಂದರೆ ಕೇವಲ ಚುನಾವಣೆಗಳಲ್ಲ. ಸಾರ್ವಜನಿಕ ಚರ್ಚೆಗಳು ಆರೋಗ್ಯಕರ ಪ್ರಜಾಪ್ರಭುತ್ವದ ಜೀವಾಳ. ಇದಕ್ಕೆ ಮಾಹಿತಿಯುಕ್ತ ನಾಗರಿಕರು ಅಗತ್ಯವಿದ್ದು, ಮಾಹಿತಿಯ ಮುಕ್ತ ಲಭ್ಯತೆಯೇ ಇದಕ್ಕೆ ಪ್ರಮುಖ ಕೀಲಿಯಾಗಿದೆ” ಎಂದು ತಿಳಿಸಿದರು.
