‘ಎಸ್‌ಐಆರ್’ (SIR) ಪ್ರಕ್ರಿಯೆಯ ನಂತರವೂ ರಾಜಧಾನಿ ಬೆಂಗಳೂರಿನ ಅಂತಿಮ ಮತದಾರರ ಪಟ್ಟಿಯಲ್ಲಿ ಭಾರೀ ಪ್ರಮಾದಗಳು ಎದುರಾಗಿದ್ದು, ಮತದಾರರ ಹೆಸರು ಹಾಗೂ ಸಂಬಂಧಿಕರ ವಿವರಗಳ ಜಾಗದಲ್ಲಿ ವಿಲಕ್ಷಣ ಅಕ್ಷರಗಳು, ಚಿಹ್ನೆಗಳು ಮತ್ತು ತಪ್ಪು ಮಾಹಿತಿ ಮುದ್ರಣಗೊಂಡಿದೆ. ‘XXX’, ‘??????K’ ದಿಂದ ಹಿಡಿದು ಕೇವಲ ಒಂದು ಅಕ್ಷರ, ಇಮೇಲ್ ಐಡಿ ಹಾಗೂ ‘…’ ಹೀಗೆ ನಾನಾ ರೀತಿಯ ಗೊಂದಲಮಯ ನಮೂದುಗಳು ಪಟ್ಟಿಯಲ್ಲಿ ರಾರಾಜಿಸುತ್ತಿದ್ದು, ಬೆಂಗಳೂರಿನಲ್ಲಿಯೇ ಕನಿಷ್ಠ 1,000ಕ್ಕೂ ಹೆಚ್ಚು ಇಂತಹ ದೋಷಗಳಿರುವುದನ್ನು ‘ದಿ ಹಿಂದೂ‘(The Hindu) ವರದಿ ಮಾಡಿದೆ.
ಅರ್ಥವಾಗದ ಅಕ್ಷರಗಳು, ಅಳಿದುಹೋದ ಹೆಸರುಗಳು
ಕೆಲವು ಮತಗಟ್ಟೆಗಳ ವ್ಯಾಪ್ತಿಯಲ್ಲಿ ಸತತವಾಗಿ ಹಲವು ಮತದಾರರ ಹಾಗೂ ಅವರ ಸಂಬಂಧಿಕರ ಹೆಸರುಗಳ ಜಾಗದಲ್ಲಿ ಅರ್ಥವಾಗದ ಅಕ್ಷರಗಳು ಮತ್ತು ಚಿಹ್ನೆಗಳು ದಾಖಲಾಗಿವೆ. ಉದಾಹರಣೆಗೆ, ದಾಸರಹಳ್ಳಿ ವಿಧಾನಸಭಾ ಕ್ಷೇತ್ರದ 425 ಮತದಾರರಿರುವ ಮತಗಟ್ಟೆ ಸಂಖ್ಯೆ 324ರಲ್ಲಿ, ಕ್ರಮಸಂಖ್ಯೆ 4 ರಿಂದ 7, 143ರಿಂದ 150 ಸೇರಿದಂತೆ ಹಲವು ಸತತ ನಮೂದುಗಳು ಗೊಂದಲಮಯವಾಗಿವೆ. ಇಲ್ಲಿ ಮತದಾರರೊಬ್ಬರ ಹೆಸರಿನ ಜಾಗದಲ್ಲಿ “µ¢µÌèÌ” ಹಾಗೂ ಸಂಬಂಧಿಕರ ಹೆಸರಿನ ಜಾಗದಲ್ಲಿ “Ï¢µÈèÈ” ಎಂದು ಮುದ್ರಣಗೊಂಡಿದೆ. ಇಂತಹ ದೋಷಗಳಿಂದಾಗಿ ಪಟ್ಟಿಯಲ್ಲಿ ಮತದಾರರನ್ನು ಗುರುತಿಸುವುದೇ ಅಸಾಧ್ಯವಾಗಿದೆ.
ಸಂಬಂಧಿಕರ ಹೆಸರಿನ ಬದಲು ‘Husband Husband’
ಮತದಾರರ ಸಂಬಂಧಿಕರ ಹೆಸರಿನ ಕಾಲಂನಲ್ಲೂ ಎಡವಟ್ಟಾಗಿದೆ. ಅನೇಕ ಕಡೆ ಈ ಕಾಲಂ ಖಾಲಿ ಬಿಡಲಾಗಿದೆ ಅಥವಾ ‘NA’, ‘None’ ಎಂದು ಬರೆಯಲಾಗಿದೆ. ಮಹದೇವಪುರ ಕ್ಷೇತ್ರದಲ್ಲಿ ಕೇವಲ ‘S’ ಅಥವಾ ‘B’ ಎಂಬ ಒಂದೇ ಅಕ್ಷರವನ್ನು ನಮೂದಿಸಲಾಗಿದೆ. ಚಾಮರಾಜಪೇಟೆಯ ಅಬ್ದುಲ್ ಸಲಾಮ್ ಎಂಬುವವರ ಸಂಬಂಧಿಕರ ಹೆಸರಿನ ಜಾಗದಲ್ಲಿ ‘Wife’ (ಪತ್ನಿ) ಎಂದಿದ್ದರೆ, ದಾಸರಹಳ್ಳಿಯ ಕವಿತಾ ಎಂಬುವವರ ನಮೂದಿನಲ್ಲಿ ಇಂಗ್ಲಿಷ್ ಹಾಗೂ ಕನ್ನಡ ಅಕ್ಷರಗಳು ಬೆರೆತುಹೋಗಿದ್ದು, ಸಂಬಂಧಿಕರ ಹೆಸರಿನ ಜಾಗದಲ್ಲಿ ‘Husband Husband’ ಎಂದು ವಿಚಿತ್ರವಾಗಿ ದಾಖಲಾಗಿದೆ!
ಹೆಸರಿನ ಜಾಗದಲ್ಲಿ ಇಮೇಲ್, ದಿನಾಂಕ ಪ್ರಕಟ!
ಹೆಸರಿನ ಜಾಗದಲ್ಲಿ ಇಮೇಲ್ ಐಡಿ ಹಾಗೂ ದಿನಾಂಕಗಳು ನಮೂದಾಗಿರುವುದು ಮತ್ತೊಂದು ಅಚ್ಚರಿ. ಯಲಹಂಕ ಕ್ಷೇತ್ರದ ಮತಗಟ್ಟೆ 332ರಲ್ಲಿ ಸಂಬಂಧಿಕರ ಹೆಸರಿನ ಜಾಗದಲ್ಲಿ “[email protected]” ಎಂದು ಮುದ್ರಿಸಲಾಗಿದೆ. ಬಿಬಿಎಂಪಿ ದಕ್ಷಿಣ ವಲಯದ ನಮೂದೊಂದರಲ್ಲಿ “Syed Apsar KZW1566785” ಎಂದು ಗುರುತಿನ ಚೀಟಿ ಸಂಖ್ಯೆ ಬೆರೆತುಹೋಗಿದ್ದರೆ, 50 ವರ್ಷದ ವ್ಯಕ್ತಿಯೊಬ್ಬರ ಹೆಸರು “Channapa Gowda Patil 01/06/1974” ಎಂದು ಪ್ರಕಟವಾಗಿದೆ. ಮತ್ತೊಂದೆಡೆ 44 ವರ್ಷದ ಮಹಿಳೆಯ ಹೆಸರು “??????K” ಎಂದು ದಾಖಲಾಗಿದೆ.
ಅಧಿಕಾರಿಗಳ ಸ್ಪಷ್ಟನೆ ಮತ್ತು ತಾಂತ್ರಿಕ ದೋಷ
ಈ ಗೊಂದಲಗಳ ಬಗ್ಗೆ ಎಇಆರ್‌ಒ (AERO) ಮತ್ತು ಬಿಎಲ್‌ಒ (BLO) ಮೇಲ್ವಿಚಾರಕರನ್ನು ಸಂಪರ್ಕಿಸಿದಾಗ, ತಾವು ಈ ದೋಷಗಳ ಬಗ್ಗೆ ಪರಿಶೀಲಿಸುವುದಾಗಿ ತಿಳಿಸಿದ್ದಾರೆ. ಚುನಾವಣಾ ಅಧಿಕಾರಿಯೊಬ್ಬರು ಇದೊಂದು ಭಾಷಾಂತರ (Transliteration) ಮತ್ತು ಫಾಂಟ್ (Font) ಸಮಸ್ಯೆಯಿಂದಾದ ತಾಂತ್ರಿಕ ದೋಷ ಎಂದಿದ್ದಾರೆ. ಸಾಫ್ಟ್‌ವೇರ್‌ನಲ್ಲಿ ಫಾಂಟ್ ಬದಲಾದಾಗ ಅಕ್ಷರಗಳು ಈ ರೀತಿ ಚಿಹ್ನೆಗಳಾಗಿ ಬದಲಾಗುತ್ತವೆ ಎಂದು ಅವರು ವಿವರಿಸಿದ್ದಾರೆ.
”ಪಟ್ಟಿಯನ್ನು ಅಪ್‌ಲೋಡ್ ಮಾಡುವಾಗಲೇ ಸಾಫ್ಟ್‌ವೇರ್‌ನಲ್ಲಿ ಈ ರೀತಿಯ ಗೊಂದಲಗಳು ಕಾಣಿಸಿಕೊಂಡಿದ್ದವು. ಈ ಬಗ್ಗೆ ಮೇಲಧಿಕಾರಿಗಳ ಗಮನಕ್ಕೂ ತರಲಾಗಿತ್ತು. ಆದರೆ, ಅಂತಿಮ ಪಟ್ಟಿ ಬಿಡುಗಡೆಯಾಗುವಾಗ ಸಿಸ್ಟಮ್ ತಾನಾಗಿಯೇ ಇದನ್ನು ಸರಿಪಡಿಸಿಕೊಳ್ಳಲಿದೆ ಎಂದು ನಮಗೆ ಹೇಳಲಾಗಿತ್ತು. ಆದರೆ ಹಾಗಾಗದ ಕಾರಣ, ಇದೀಗ ದೋಷವಿರುವ ಮತದಾರರಿಗೆ ತಿದ್ದುಪಡಿಗಾಗಿ ‘ನಮೂನೆ 8’ (Form 8) ಸಲ್ಲಿಸುವಂತೆ ಸೂಚಿಸುತ್ತಿದ್ದೇವೆ” ಎಂದು ಬಿಎಲ್‌ಒಗಳು ಸ್ಪಷ್ಟಪಡಿಸಿದ್ದಾರೆ.
ಮತದಾರರ ಅಳಲು
ನಾವು ಸರಿಯಾದ ಮಾಹಿತಿಯನ್ನೇ ನೀಡಿದ್ದೆವು. ಕರಡು ಪಟ್ಟಿಯಲ್ಲಿ ದೋಷ ಕಂಡಾಗ ಅದು ತಾತ್ಕಾಲಿಕ ತಾಂತ್ರಿಕ ದೋಷವಿರಬಹುದು, ಅಂತಿಮ ಪಟ್ಟಿಯಲ್ಲಿ ಸರಿಹೋಗಬಹುದು ಎಂದು ಭಾವಿಸಿದ್ದೆವು. ಆದರೆ ಈಗ ಪಟ್ಟಿಯಲ್ಲಿ ನಮ್ಮ ಹೆಸರುಗಳನ್ನು ಓದಲು ಸಾಧ್ಯವಾಗುತ್ತಿಲ್ಲ, ಕೇವಲ ಮನೆ ಸಂಖ್ಯೆ ಆಧರಿಸಿ ನಮ್ಮ ಹೆಸರನ್ನು ಪತ್ತೆಹಚ್ಚಬೇಕಾದ ದುಸ್ಥಿತಿ ಬಂದಿದೆ ಎಂದು ಹಲವು ಮತದಾರರು ಅಳಲು ತೋಡಿಕೊಂಡಿದ್ದಾರೆ.
