ಪಶ್ಚಿಮ ಬಂಗಾಳದ ನಂದಿಗ್ರಾಮ ಮತ್ತು ರೆಜಿನಗರ ವಿಧಾನಸಭಾ ಉಪಚುನಾವಣೆಗಳಲ್ಲಿ ಬಿಜೆಪಿ ಗೆಲುವು ಸಾಧಿಸಿದೆ. ತಮಿಳುನಾಡಿನ ಧಾರಾಪುರಂನಲ್ಲಿ ತಮಿಳಗ ವೆಟ್ರಿ ಕಳಗಂ (ಟಿವಿಕೆ) ಜಯಗಳಿಸಿದ್ದು, ಮಧುರಾಂತಕಂನಲ್ಲೂ ಮುನ್ನಡೆ ಕಾಯ್ದುಕೊಂಡಿದೆ.
ಪುದುಚೇರಿಯಲ್ಲಿ ಆಡಳಿತಾರೂಢ ಎಐಎನ್‌ಆರ್‌ಸಿ ಜಯಗಳಿಸಿದೆ. ಅಸ್ಸಾಂನ ನಗಾಂವ್ ಲೋಕಸಭಾ ಕ್ಷೇತ್ರದಲ್ಲಿ ಬಿಜೆಪಿ ಮುನ್ನಡೆಯಲ್ಲಿದೆ. ಅಕ್ಟೋಬರ್ 6ರಂದು ನಡೆದ ಐದು ವಿಧಾನಸಭಾ ಕ್ಷೇತ್ರಗಳು ಹಾಗೂ ಒಂದು ಲೋಕಸಭಾ ಕ್ಷೇತ್ರಕ್ಕೆ ಉಪಚುನಾವಣೆ ನಡೆದಿತ್ತು.
ನಂದಿಗ್ರಾಮದಲ್ಲಿ ಬಿಜೆಪಿಯ ಹಸಿ ರಾಣಿ ರಥ್, ಕಾಂಗ್ರೆಸ್‌ನ ಮಿಲನ್ ಪ್ರಧಾನ್ ಅವರನ್ನು ದಾಖಲೆಯ 1,22,753 ಮತಗಳ ಅಂತರದಿಂದ ಸೋಲಿಸಿದರು. ರಥ್ 1,64,427 ಮತಗಳನ್ನು ಪಡೆದರೆ, ಪ್ರಧಾನ್‌ಗೆ 41,674 ಮತಗಳು ಬಂದವು. ರಥ್ ಅವರು ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರ ಹತ್ಯೆಗೀಡಾದ ಆಪ್ತ ಸಹಾಯಕ ಚಂದ್ರನಾಥ್ ರಥ್ ಅವರ ತಾಯಿ. ಅಧಿಕಾರಿ ಭವಾನಿಪುರ ಕ್ಷೇತ್ರವನ್ನು ಉಳಿಸಿಕೊಂಡು ನಂದಿಗ್ರಾಮಕ್ಕೆ ರಾಜೀನಾಮೆ ನೀಡಿದ್ದರಿಂದ ಉಪಚುನಾವಣೆ ನಡೆದಿತ್ತು.
ಮುಸ್ಲಿಂ ಮತದಾರರು ಹೆಚ್ಚಿನ ಸಂಖ್ಯೆಯಲ್ಲಿರುವ ರೆಜಿನಗರದಲ್ಲಿ ಬಿಜೆಪಿಯ ಶಂಖರವ್ ಸರ್ಕಾರ್ 75,816 ಮತಗಳ ಅಂತರದಿಂದ ಗೆದ್ದರು. ಸರ್ಕಾರ್ 1,29,914 ಮತಗಳನ್ನು ಪಡೆದರೆ, ಆಮ್ ಜನತಾ ಉನ್ನಯನ್ ಪಕ್ಷದ ಗೋಲಾಮ್ ನಬಿ ಆಜಾದ್ 54,098 ಮತಗಳನ್ನು ಗಳಿಸಿದರು. ಬಿಜೆಪಿಗೆ ಶೇ 63.14ರಷ್ಟು ಮತಗಳು ದೊರೆತಿವೆ.
ತಮಿಳುನಾಡಿನ ಧಾರಾಪುರಂನಲ್ಲಿ ಟಿವಿಕೆಯ ಪಿ. ಸತ್ಯಭಾಮಾ, ಡಿಎಂಕೆಯ ಎಸ್. ಸುಗಣ್ಯಾ ಅವರನ್ನು 9,471 ಮತಗಳಿಂದ ಸೋಲಿಸಿದರು. ಸತ್ಯಭಾಮಾ 66,841 ಮತ್ತು ಸುಗಣ್ಯಾ 57,370 ಮತಗಳನ್ನು ಪಡೆದರು. ಎಐಎಡಿಎಂಕೆಯ ಬಾನುಮತಿ 45,280 ಮತಗಳೊಂದಿಗೆ ಮೂರನೇ ಸ್ಥಾನದಲ್ಲಿದ್ದರು. ಮಧುರಾಂತಕಂನಲ್ಲಿ ಟಿವಿಕೆಯ ಮರಗತಂ ಕುಮಾರವೇಲ್, ಡಿಎಂಕೆಯ ಐ. ಪರಂತಾಮನ್ ವಿರುದ್ಧ 20,000ಕ್ಕೂ ಹೆಚ್ಚು ಮತಗಳ ಮುನ್ನಡೆ ಸಾಧಿಸಿದರು.
ಪುದುಚೇರಿಯ ತಟ್ಟಾಂಚಾವಡಿಯಲ್ಲಿ ಎಐಎನ್‌ಆರ್‌ಸಿಯ ಅಶೋಕ್ ಆನಂದ್ 8,482 ಮತಗಳ ಅಂತರದಿಂದ ಜಯಗಳಿಸಿದರು. ಅವರಿಗೆ 13,358 ಮತಗಳು ಬಂದಿದ್ದು, ಕಾಂಗ್ರೆಸ್‌ನ ಇ. ವಿನಾಯಗಂ 4,876 ಮತಗಳನ್ನು ಪಡೆದರು. ಬಿಜೆಪಿ ಮತ್ತು ಎಐಎಡಿಎಂಕೆ ಆನಂದ್ ಅವರನ್ನು ಬೆಂಬಲಿಸಿದ್ದವು. ಮುಖ್ಯಮಂತ್ರಿ ಎನ್. ರಂಗಸಾಮಿ ಈ ಕ್ಷೇತ್ರಕ್ಕೆ ರಾಜೀನಾಮೆ ನೀಡಿದ್ದರಿಂದ ಉಪಚುನಾವಣೆ ನಡೆದಿತ್ತು.
ಅಸ್ಸಾಂನ ನಗಾಂವ್ ಲೋಕಸಭಾ ಕ್ಷೇತ್ರದಲ್ಲಿ ಸಂಜೆ 5.20ಕ್ಕೆ ಬಿಜೆಪಿಯ ದೇವಾಶಿಷ್ ಶರ್ಮಾ 1,76,391 ಮತಗಳ ಮುನ್ನಡೆಯಲ್ಲಿದ್ದರು. ಶರ್ಮಾ 6,61,259 ಮತ್ತು ಎಐಯುಡಿಎಫ್‌ನ ಬದ್ರುದ್ದೀನ್ ಅಜ್ಮಲ್ 4,84,868 ಮತಗಳನ್ನು ಪಡೆದಿದ್ದರು. ಕಾಂಗ್ರೆಸ್‌ನ ಸಿಬಮೋನಿ ಬೋರಾ 1,17,060 ಮತಗಳೊಂದಿಗೆ ಮೂರನೇ ಸ್ಥಾನದಲ್ಲಿದ್ದರು. ಮತಎಣಿಕೆ ಮುಂದುವರಿದಿದ್ದು, ಅಂತಿಮ ಫಲಿತಾಂಶ ಘೋಷಣೆಯಾಗಿರಲಿಲ್ಲ.
