‘ಅವಿವಾಹಿತ ಯುವತಿಯು ಮದುವೆಯಾಗಿ ಬೇರೆ ಊರಿಗೆ ಹೋಗಬಹುದೆಂಬ ಕಾರಣ ನೀಡಿ, ಆಕೆಗೆ ಸರ್ಕಾರಿ ಉದ್ಯೋಗ ನೀಡಲು ನಿರಾಕರಿಸಿದ್ದ ಕಂದಾಯ ಇಲಾಖೆಯ ಮಾಮ್ಲತ್ದಾರ್ (ಅಧಿಕಾರಿ)ಯನ್ನು ಗುಜರಾತ್ ಹೈಕೋರ್ಟ್ ತರಾಟೆಗೆ ತೆಗೆದುಕೊಂಡಿದೆ. ಯುವತಿಯನ್ನು ಉದ್ಯೋಗಕ್ಕೆ ಕಡೆಗಣಿಸಿ ಮಾಡಲಾಗಿದ್ದ ನೇಮಕಾತಿಯನ್ನು ಹೈಕೋರ್ಟ್ ರದ್ದುಗೊಳಿಸಿದೆ.
ಗುಜರಾತ್‌ನ ದಾಹೋದ್ ಜಿಲ್ಲೆಯ ಝಾಲೋದ್ ತಾಲೂಕಿನಲ್ಲಿ ಅಡ್ಮಿನಿಸ್ಟ್ರೇಟರ್-ಕಮ್-ಕುಕ್ (ಆಡಳಿತಾಧಿಕಾರಿ ಮತ್ತು ಅಡುಗೆಯವರು) ಹುದ್ದೆಗೆ ಮೆರಿಟ್ ಆಧಾರದಲ್ಲಿ ನೇಮಕಾತಿಗೆ ಅರ್ಜಿ ಆಹ್ವಾನಿಸಲಾಗಿತ್ತು. ಈ ಹುದ್ದೆಗೆ ಮೆರಿಟ್‌ನಲ್ಲಿ 1ನೇ ಸ್ಥಾನ ಪಡೆದಿದ್ದ ಯುವತಿಯೊಬ್ಬರು ಅರ್ಜಿ ಸಲ್ಲಿಸಿದ್ದರು. ಆದರೆ, ಅವರಿಗೆ ಉದ್ಯೋಗ ನಿರಾಕರಿಸಿದ್ದ ಮಾಮ್ಲತ್ದಾರ್, 4ನೇ ಸ್ಥಾನ ಪಡೆದಿದ್ದ ಯುವಕನೊಬ್ಬನಿಗೆ ಉದ್ಯೋಗ ನೀಡಿದ್ದರು.
ಉದ್ಯೋಗದಿಂದ ವಂಚಿತರಾದ ಯುವತಿ ಹೈಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿದ್ದರು. “ತಾನು ಪದವಿಯಲ್ಲಿ ಹೆಚ್ಚಿನ ಅಂಕಗಳನ್ನು ಹೊಂದಿದ್ದು, ನಾನು 1ನೇ ಸ್ಥಾನ ಪಡೆದಿದ್ದೇನೆ. ಆದರೆ, ಮೆರಿಟ್ ಪಟ್ಟಿಯಲ್ಲಿ ನನ್ನನ್ನು 6ನೇ ಸ್ಥಾನದಲ್ಲಿ ಇರಿಸಲಾಗಿದೆ. ಜೊತೆಗೆ, ಕೇವಲ ‘ಪಾಸು’ ಎಂದಷ್ಟೇ ನಮೂದಿಸಲಾಗಿದೆ. ಆ ಮೂಲಕ, ನನಗೆ ಅನ್ಯಾಯ ಮಾಡಲಾಗಿದೆ” ಎಂದು ಆರೋಪಿಸಿದ್ದರು.
ಅರ್ಜಿಯ ವಿಚಾರಣೆ ನಡೆಸಿರುವ ನ್ಯಾಯಮೂರ್ತಿ ಮೌಲಿಕ್ ಜೆ. ಶೆಲಾಟ್ ಅವರ ಪೀಠ, “ಈ ಆಯ್ಕೆ ಪ್ರಕ್ರಿಯೆಯು ‘ಸಂಪೂರ್ಣ ಪಕ್ಷಪಾತ’ದಿಂದ ಕೂಡಿದೆ. ಸಂವಿಧಾನದ 14 ಮತ್ತು 16ನೇ ವಿಧಿಗಳ ಉಲ್ಲಂಘನೆಯಾಗಿದೆ. ಮಾತ್ರವಲ್ಲ, ಉತ್ತಮ ಅಂಕಗಳನ್ನು ಪಡೆದಿದ್ದ ಅಭ್ಯರ್ಥಿಗಳನ್ನು ಬಿಟ್ಟು, ಕಡಿಮೆ ಅಂಕ ಪಡೆದವರಿಗೆ ಕೆಲಸ ನೀಡಲು ಅಧಿಕಾರಿ ನೀಡಿದ್ದ ಕಾರಣಗಳು ಅತ್ಯಂತ ಅಸಂಬದ್ಧವಾಗಿವೆ” ಎಂದು ಹೇಳಿದೆ. ಅಧಿಕಾರಿ ಮಾಡಿದ್ದ ನೇಮಕಾತಿಯನ್ನು ರದ್ದುಗೊಳಿಸಿದೆ.
“ಯುವತಿಯನ್ನು ನೇಮಕ ಮಾಡದೇ ಇರುವುದಕ್ಕೆ ಅಧಿಕಾರಿ ನೀಡಿರುವ ‘ಆಕೆ ಮುಂದಿನ ದಿನಗಳಲ್ಲಿ ಮದುವೆಯಾಗಿ ಬೇರೆ ಹಳ್ಳಿಗೆ ಹೋಗಬಹುದು’ ಎಂಬ ಕಾರಣವನ್ನು ಸಮರ್ಥಿಸಲು ಯಾವುದೇ ಆಧಾರಗಳಿಲ್ಲ. ಇಂತಹ ಕಾರಣವು ಕೇವಲ ಸ್ವೇಚ್ಛಾಚಾರದ, ಕಲ್ಪಿತ ಮತ್ತು ಕ್ಷುಲ್ಲಕವಾಗಿದೆ. ಮಾತ್ರವಲ್ಲ, ಇದು ಭಾರತೀಯ ಸಂವಿಧಾನದ 14 ಮತ್ತು 16ನೇ ವಿಧಿಗಳ ನೇರ ಉಲ್ಲಂಘನೆಯೂ ಆಗಿದೆ” ಎಂದು ನ್ಯಾಯಾಲಯ ಹೇಳಿದೆ.
ಈ ಲೇಖನ ಓದಿದ್ದೀರಾ?: ಅಫ್ಘಾನ್-ಪಾಕ್ ಸಂಘರ್ಷ | ತಾನೇ ಹುಟ್ಟುಹಾಕಿದ ತಾಲಿಬಾನ್‌ ಜೊತೆ ಪಾಕ್ ಘರ್ಷಣೆ ಏಕೆ?
ಸಂವಿಧಾನದ 14ನೇ ವಿಧಿಯು ಕಾನೂನಿನ ಮುಂದೆ ಎಲ್ಲರಿಗೂ ಸಮಾನರು ಎಂದು ಹೇಳುತ್ತದೆ, 16ನೇ ವಿಧಿಯು ಸಾರ್ವಜನಿಕ ಉದ್ಯೋಗದ ವಿಷಯಗಳಲ್ಲಿ ಸಮಾನ ಅವಕಾಶವನ್ನು ಖಾತರಿಪಡಿಸುತ್ತದೆ.
“ಸದ್ಯಕ್ಕೆ ಅರ್ಜಿದಾರರ ನೇಮಕಾತಿಗೆ ಯಾವುದೇ ನೇರ ಆದೇಶ ನೀಡುವುದಿಲ್ಲ. ಬದಲಿಗೆ, ಅರ್ಜಿದಾರರ ಪದವಿ ಪ್ರಮಾಣಪತ್ರವನ್ನು ಸಂಬಂಧಪಟ್ಟ ವಿಶ್ವವಿದ್ಯಾಲಯದಿಂದ ಮರುಪರಿಶೀಲನೆ ನಡೆಸಬೇಕು. ಒಂದು ವೇಳೆ, ಅರ್ಜಿದಾರರ ಪ್ರಮಾಣಪತ್ರವು ಅಸಲಿ ಎಂದು ಕಂಡುಬಂದರೆ, ಅವರು 68% ರಷ್ಟು ಅಂಕ ಪಡೆದಿದ್ದರೆ, ಅರ್ಜಿದಾರರು ಮೆರಿಟ್ ಪಟ್ಟಿಯಲ್ಲಿ ಮೊದಲ ಸ್ಥಾನ ಪಡೆಯುತ್ತಾರೆ. ಆಗ ಅವರನ್ನೇ ಅಡ್ಮಿನಿಸ್ಟ್ರೇಟರ್-ಕಮ್-ಕುಕ್ ಹುದ್ದೆಗೆ ನೇಮಿಸಬೇಕು. ಪ್ರಮಾಣಪತ್ರವು ನಕಲಿ ಎಂದು ಸಾಬೀತಾದರೆ, ಅರ್ಜಿದಾರರಿಗೆ ಕೆಲಸ ನೀಡುವ ಪ್ರಶ್ನೆಯೇ ಉದ್ಭವಿಸುವುದಿಲ್ಲ. ಅಂತಹ ಸಂದರ್ಭದಲ್ಲಿ ಮೆರಿಟ್ ಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿರುವ ಅಭ್ಯರ್ಥಿಯನ್ನು ಪರಿಗಣಿಸಬೇಕು” ಎಂದು ಕೋರ್ಟ್ ಆದೇಶಿಸಿದೆ.
