2027ರ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಗೆ ತಮ್ಮ ಪಕ್ಷವು ಬ್ರಾಹ್ಮಣ ನಾಯಕರನ್ನು ಅಭ್ಯರ್ಥಿಗಳಾಗಿ ಕಣಕ್ಕಿಳಿಸಲು ಪ್ರಾರಂಭಿಸಿದ ನಂತರ ಪ್ರತಿಪಕ್ಷಗಳು, ವಿಶೇಷವಾಗಿ ಸಮಾಜವಾದಿ ಪಕ್ಷ (ಎಸ್ಪಿ) ಆತಂಕಕ್ಕೊಳಗಾಗಿದೆ ಎಂದು ಬಹುಜನ ಸಮಾಜ ಪಕ್ಷದ (BSP) ಅಧ್ಯಕ್ಷೆ ಮಾಯಾವತಿ ಹೇಳಿದ್ದಾರೆ. ಹಾಗೆಯೇ ಬ್ರಾಹ್ಮಣರು ಸೇರಿದಂತೆ ಮೇಲ್ಜಾತಿಯವರು ಬಿಎಸ್ಪಿ ಆಡಳಿತದಲ್ಲಿ ಮಾತ್ರವೇ ಸುರಕ್ಷಿತವಾಗಿರಲು ಸಾಧ್ಯ ಎಂದು ಮಾಯಾವತಿ ಹೇಳಿಕೊಂಡಿದ್ದಾರೆ.
ಈ ಬಗ್ಗೆ ಎಕ್ಸ್ನಲ್ಲಿ ಪೋಸ್ಟ್ ಮಾಡಿದ ಮಾಯಾವತಿ, “2007ರ ಚುನಾವಣೆಯಲ್ಲಿ ಬಿಎಸ್ಪಿ ಬ್ರಾಹ್ಮಣ ಸಮುದಾಯದ ಬೆಂಬಲದೊಂದಿಗೆ ಸಂಪೂರ್ಣ ಬಹುಮತವನ್ನು ಗಳಿಸಿತು. ಈ ಬಾರಿಯೂ ಬ್ರಾಹ್ಮಣರ ಬೆಂಬಲ ದೊರೆಯುತ್ತಿದೆ. ಇದರಿಂದಾಗಿ ಪ್ರತಿಪಕ್ಷಗಳಿಗೆ ಆತಂಕವಾಗುವುದು ಸಹಜ” ಎಂದು ಮಾಯಾವತಿ ಹೇಳಿದ್ದಾರೆ.
ಇದನ್ನೂ ಓದಿ: ಯುಪಿ ಚುನಾವಣೆಗೆ ಮುನ್ನ ಬಿಎಸ್ಪಿ ಚುರುಕು: ಬೃಹತ್ ರ್ಯಾಲಿಗೆ ಮಾಯಾವತಿ ಸಜ್ಜು
“ಉತ್ತರ ಪ್ರದೇಶದಂತಹ ಜನನಿಬಿಡ ರಾಜ್ಯದಲ್ಲಿ, ಮೇಲ್ಜಾತಿಗಳ ನಿರ್ದಿಷ್ಟವಾಗಿ ಬ್ರಾಹ್ಮಣ ಸಮುದಾಯದ ಹಿತಾಸಕ್ತಿಗಳನ್ನು ಬಿಎಸ್ಪಿ ಆಡಳಿತ ಮಾತ್ರ ರಕ್ಷಿಸಿದೆ ಎಂಬುದನ್ನು ವ್ಯಾಪಕವಾಗಿ ಒಪ್ಪಿಕೊಳ್ಳಲಾಗುವ ವಿಷಯ. ಪಕ್ಷವು ಸರ್ವಜನ ಹಿತ, ಸರ್ವಜನ ಸಂತೋಷ ತತ್ವ ಹೊಂದಿದೆ. ಸರ್ಕಾರವನ್ನು ರಚಿಸಿದ ನಂತರ, ಈ ಸಮುದಾಯವು ಪ್ರತಿ ಹಂತದಲ್ಲೂ ಅಪಾರ ಗೌರವ ಮತ್ತು ಪೂರ್ಣ ಭಾಗವಹಿಸುವಿಕೆ ಪಡೆಯುವಂತೆ ಬಿಎಸ್ಪಿ ನೋಡಿಕೊಂಡಿದೆ. ಆದರೆ ಇತರ ಪಕ್ಷಗಳ ಸರ್ಕಾರಗಳ ಅಡಿಯಲ್ಲಿ, ಬ್ರಾಹ್ಮಣರನ್ನು ನಿರ್ಲಕ್ಷ್ಯ ಮಾಡಲಾಗಿದೆ. ಬ್ರಾಹ್ಮಣರು ಅಸುರಕ್ಷಿತ ಮತ್ತು ವಂಚಿತರಾಗಿದ್ದಾರೆ” ಎಂದು ತಿಳಿಸಿದ್ದಾರೆ.
“ಇದಲ್ಲದೆ ಸಾಮಾಜಿಕ ಸಹೋದರತ್ವದ ಆಧಾರದಲ್ಲಿ ಬಿಎಸ್ಪಿಯೊಂದಿಗೆ ಹೊಂದಾಣಿಕೆ ಮಾಡಿಕೊಳ್ಳುವ ಇಚ್ಛೆಯಿಂದಾಗಿ ಬ್ರಾಹ್ಮಣ ಅಭ್ಯರ್ಥಿಗಳನ್ನು ಕಣಕ್ಕಿಳಿಸುವ ಪ್ರಕ್ರಿಯೆಯು ಮುಂದುವರಿಯುತ್ತದೆ. ಬಿಎಸ್ಪಿಯ ‘ಉಕ್ಕಿನ ಮಹಿಳೆ’ ನಾಯಕತ್ವದಲ್ಲಿ ಬ್ರಾಹ್ಮಣರು ಅಪಾರ ನಂಬಿಕೆ ಇಟ್ಟುಕೊಂಡಿದ್ದಾರೆ. ಬಿಎಸ್ಪಿ ಸರ್ಕಾರವನ್ನು ರಚಿಸಿದರೆ ಬ್ರಾಹ್ಮಣರಿಗೆ ಮತ್ತೆ ಎಲ್ಲ ಹಂತಗಳಲ್ಲಿ ಸರಿಯಾದ ಗೌರವ ಸಿಗಲಿದೆ ಎಂಬ ವಿಶ್ವಾಸವನ್ನು ಅವರು ಹೊಂದಿದ್ದಾರೆ” ಎಂದಿದ್ದಾರೆ.
“ಹೆಚ್ಚುವರಿಯಾಗಿ, ಕ್ಷತ್ರಿಯರು ಮತ್ತು ವೈಶ್ಯರಂತಹ ಇತರ ಮೇಲ್ಜಾತಿಯ ಸಮುದಾಯಗಳ ಸದಸ್ಯರನ್ನು ಬಿಎಸ್ಪಿ ಕಣಕ್ಕಿಳಿಸಲಿದೆ. ಇದಕ್ಕಾಗಿ ಎಲ್ಲ ಹಂತಗಳಲ್ಲಿ ಸಿದ್ಧತೆಗಳು ಸಕ್ರಿಯವಾಗಿ ನಡೆಯುತ್ತಿವೆ. ಇತರ ಪಕ್ಷಗಳಿಗಿಂತ ಭಿನ್ನವಾಗಿ, ಬಿಎಸ್ಪಿ ಆಯ್ದ ಕೆಲವರಿಗೆ ‘ಲಾಲಿಪಾಪ್ಗಳನ್ನು’ ಹಂಚುವ ಕಿರಿದಾದ, ಸ್ವಾರ್ಥಪರ ರಾಜಕೀಯದಲ್ಲಿ ತೊಡಗುವುದಿಲ್ಲ. ಬದಲಾಗಿ, ಇಡೀ ಸಮಾಜದ ಹಿತಾಸಕ್ತಿ ಮತ್ತು ಕಲ್ಯಾಣಕ್ಕಾಗಿ ಕಾಳಜಿಯನ್ನು ತನ್ನ ಸಾಂವಿಧಾನಿಕ ಕರ್ತವ್ಯವೆಂದು ಪರಿಗಣಿಸುತ್ತದೆ” ಎಂದೂ ಹೇಳಿದ್ದಾರೆ.
