ಉತ್ತರ ಪ್ರದೇಶದಲ್ಲಿ 2027ರ ಆರಂಭದಲ್ಲಿ ವಿಧಾನಸಭೆ ಚುನಾವಣೆ ನಡೆಯಲಿದೆ. ಈ ಚುನಾವಣೆಗೆ ಈಗಲೇ ಬಹುಜನ ಸಮಾಜ ಪಕ್ಷ (ಬಿಎಸ್ಪಿ) ಸಜ್ಜಾಗುತ್ತಿದೆ. ಮಾಯಾವತಿಯವರು ಈಗಿನಿಂದಲೇ ಪಕ್ಷದ ಸಂಘಟನೆ ಮತ್ತು ಕಾರ್ಯಕರ್ತರನ್ನು ಒಟ್ಟುಗೂಡಿಸುತ್ತಿದ್ದು, ಪಕ್ಷದ ಕಾರ್ಯ ಚಟುವಟಿಕೆ ಚುರುಕುಗೊಳಿಸುತ್ತಿದ್ದಾರೆ. ಇದೇ ತಿಂಗಳು ಜೂನ್ 22ರಂದು ಬೃಹತ್ ರ್ಯಾಲಿ ನಡೆಸಲು ಮಾಯಾವತಿ ಸಿದ್ಧರಾಗಿದ್ದಾರೆ.
ಈ ಬಾರಿ ಮಾಯಾವತಿಯವರು ತಮ್ಮ ಹಳೆಯ ಸೂತ್ರವಾದ ದಲಿತ, ಬ್ರಾಹ್ಮಣ ಮತ್ತು ಮುಸ್ಲಿಂ ಮತದಾರರನ್ನು ಒಟ್ಟುಗೂಡಿಸುವ ಕಡೆಗೆ ಮತ್ತೆ ಒಲವು ತೋರುತ್ತಿದ್ದಾರೆ. ಫೈಜಾಬಾದ್ ರ್ಯಾಲಿಯು ಈ ಸಮೀಕರಣವನ್ನು ಗಟ್ಟಿಗೊಳಿಸುವ ನಿಟ್ಟಿನಲ್ಲಿ ಪ್ರಮುಖ ಹೆಜ್ಜೆಯಂತೆ ಕಾಣುತ್ತಿದೆ.
ಇದನ್ನು ಓದಿದ್ದೀರಾ? ಬಿಎಸ್ಪಿ ರಾಷ್ಟ್ರ ಘಟಕದ ಅಧ್ಯಕ್ಷೆಯಾಗಿ ಮಾಯಾವತಿ ಮರು ಆಯ್ಕೆ
ಉತ್ತರ ಪ್ರದೇಶದಲ್ಲಿ ಬಿಜೆಪಿ ನೇತೃತ್ವದ ಎನ್ಡಿಎ ಮತ್ತು ಎಸ್ಪಿ-ಕಾಂಗ್ರೆಸ್ನ ಇಂಡಿಯಾ ಮೈತ್ರಿಕೂಟದ ನಡುವೆ ನೇರ ಹಣಾಹಣಿ ಏರ್ಪಟ್ಟಿರುವಾಗ, ಬಿಎಸ್ಪಿ ಒಂಟಿಯಾಗಿ ಕಣಕ್ಕಿಳಿಯು ಸಾಧ್ಯತೆಯಿದೆ. ಇದರಿಂದಾಗಿ ಉತ್ತರ ಪ್ರದೇಶದಲ್ಲಿ ತ್ರಿಕೋನ ಸ್ಪರ್ಧೆ ಏರ್ಪಡಬಹುದು. ಇದು ಕೆಲವು ಕ್ಷೇತ್ರಗಳಲ್ಲಿ ಮತ ವಿಭಜನೆಯಾಗಿ ಬಿಎಸ್ಪಿಗೆ ಗೆಲುವಿನ ಅವಕಾಶ ತಂದುಕೊಡಬಹುದು ಎಂಬುದು ಮಾಯಾವತಿ ಲೆಕ್ಕಾಚಾರ.
ಇನ್ನು ಲೋಕಸಭೆ ಚುನಾವಣೆಯ ನಂತರ ಕಾಂಗ್ರೆಸ್ ಮತ್ತು ಇತರ ಪಕ್ಷಗಳು ಬಿಎಸ್ಪಿಯೊಂದಿಗೆ ಮೈತ್ರಿಗಾಗಿ ತೆರೆಮರೆಯ ಪ್ರಯತ್ನ ನಡೆಸಿತ್ತು. ಆದರೆ ಮಾಯಾವತಿಯವರು ಮೈತ್ರಿ ನಿರಾಕರಿಸಿದ್ದರು. ಬಿಎಸ್ಪಿ ರಾಜ್ಯಾಧ್ಯಕ್ಷ ವಿಶ್ವನಾಥ್ ಪಾಲ್ ಅವರು “ನಮ್ಮ ಮೈತ್ರಿ ಕೇವಲ ಸಾಮಾನ್ಯ ಜನರೊಂದಿಗೆ ಮಾತ್ರ” ಎಂದು ಸ್ಪಷ್ಟಪಡಿಸಿದ್ದರು.
2014 ಮತ್ತು 2019ರಲ್ಲಿ ಬಿಎಸ್ಪಿ ಏಕಾಂಗಿಯಾಗಿ ಸ್ಪರ್ಧಿಸಿ ಯಾವುದೇ ಕ್ಷೇತ್ರದಲ್ಲಿ ಗೆದ್ದಿಲ್ಲ. 2015-2019ರಲ್ಲಿ ಎಸ್ಪಿ ಮೈತ್ರಿಯಲ್ಲಿ ಕಣಕ್ಕಿಳಿದಾಗ ಮಾತ್ರ ಬಿಎಸ್ಪಿ 10 ಕ್ಷೇತ್ರಗಳಲ್ಲಿ ಗೆಲುವು ಕಂಡಿತ್ತು. ಉತ್ತರ ಪ್ರದೇಶದಲ್ಲಿ ಬಿಎಸ್ಪಿಯ ಸಾಂಪ್ರದಾಯಿಕ ಮತ ಹಂಚಿಕೆ 2019ರಲ್ಲಿ ಶೇ. 19.3ರಷ್ಟಿತ್ತು. ಆದರೆ 2024ರ ವೇಳೆಗೆ ಅದು ಶೇ. 9.3ಕ್ಕೆ ಕುಸಿಯಿತು. ಅಂದರೆ ಅರ್ಧಕ್ಕಿಂತ ಹೆಚ್ಚು ಸಾಂಪ್ರದಾಯಿಕ ಮತಗಳು ಬೇರೆ ಪಕ್ಷಗಳಿಗೆ ವರ್ಗಾವಣೆಯಾದವು. ಆದ್ದರಿಂದ ಮಾಯಾವತಿ ಅವರಿಗೆ ಮುಂದಿನ ಚುನಾವಣೆ ತಮ್ಮ ಅಸ್ತಿತ್ವವನ್ನು ಉಳಿಸಿಕೊಳ್ಳುವ ಚುನಾವಣೆಯಾಗಲಿದೆ.
ಈ ನಿಟ್ಟಿನಲ್ಲಿ ಸತೀಶ್ ಚಂದ್ರ ಮಿಶ್ರಾ ಅವರಿಗೆ ಮತ್ತೆ ಬ್ರಾಹ್ಮಣ ಸಮುದಾಯವನ್ನು ತಲುಪುವ ಜವಾಬ್ದಾರಿ ನೀಡಲಾಗಿದೆ. ಪಕ್ಷದ ಏಕೈಕ ಶಾಸಕರಾದ ಉಮಾ ಶಂಕರ್ ಸಿಂಗ್ ಅವರಿಗೆ ರಜಪೂತ (ಠಾಕೂರ್) ಸಮುದಾಯದ ಬೆಂಬಲ ಗಳಿಸುವ ಹೊಣೆ ಹೊರಿಸಲಾಗಿದೆ. ಯುವ ನಾಯಕ ಆಕಾಶ್ ಆನಂದ್ ಅವರನ್ನೂ ಮುಂಚೂಣಿಗೆ ತಂದು ಯುವ ಮತದಾರರನ್ನು ಸೆಳೆಯುವ ಪ್ರಯತ್ನ ನಡೆಯುತ್ತಿದೆ.
