ಅನುಕಂಪದ ಆಧಾರದ ಮೇಲಿನ ಸರ್ಕಾರಿ ನೌಕರಿ ಹಾಗೂ ಆಸ್ತಿಗಾಗಿ ಹೆತ್ತ ತಾಯಿಯನ್ನೇ ಸುಪಾರಿ ಕೊಟ್ಟು ಹತ್ಯೆ ಮಾಡಿಸಿದ್ದ ಜೈಪುರದ 23 ವರ್ಷದ ಯುವತಿ ಆಯುಶಿ ಶರ್ಮಾ ಪ್ರಕರಣ ಇದೀಗ ಹೊಸ ತಿರುವು ಪಡೆದುಕೊಂಡಿದೆ. ಇತ್ತೀಚೆಗಷ್ಟೇ ತಾಯಿಯ ಕೊಲೆ ಪ್ರಕರಣದಲ್ಲಿ ಪೊಲೀಸರಿಂದ ಬಂಧನಕ್ಕೊಳಗಾಗಿರುವ ಮಗಳು, ಕಳೆದ ವರ್ಷ ತನ್ನ ತಂದೆಯನ್ನೂ ಕೊಲೆ ಮಾಡಿದ್ದಾಳೆ ಎಂಬ ಗಂಭೀರ ಆರೋಪ ಇದೀಗ ಕೇಳಿಬಂದಿದ್ದು, ಪ್ರಕರಣ ಮತ್ತಷ್ಟು ಕಗ್ಗಂಟಾಗಿದೆ.
ಕಳೆದ ಜುಲೈ 3ರಂದು ಜೈಪುರದ ಪ್ರತಾಪ್ ನಗರ ಪ್ರದೇಶದಲ್ಲಿ 45 ವರ್ಷದ ನೀರಜ್ ಶರ್ಮಾ ಎಂಬುವವರು ತಮ್ಮ ಮಗನನ್ನು ಕೋಚಿಂಗ್ ಸೆಂಟರ್‌ಗೆ ಬಿಟ್ಟು ಬರುತ್ತಿದ್ದಾಗ, ಗಂಟೆಗೆ 130 ಕಿ.ಮೀ ವೇಗದಲ್ಲಿ ಬಂದ ಸ್ಕಾರ್ಪಿಯೋ ಕಾರೊಂದು ಅವರಿಗೆ ಡಿಕ್ಕಿ ಹೊಡೆದಿತ್ತು. ಡಿಕ್ಕಿಯ ರಭಸಕ್ಕೆ ಸುಮಾರು 100 ಅಡಿ ದೂರಕ್ಕೆ ಎಸೆಯಲ್ಪಟ್ಟಿದ್ದ ನೀರಜ್ ಸ್ಥಳದಲ್ಲೇ ಮೃತಪಟ್ಟಿದ್ದರು. ಮೇಲ್ನೋಟಕ್ಕೆ ಇದೊಂದು ರಸ್ತೆ ಅಪಘಾತದಂತೆ ಕಂಡರೂ, ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಇದೊಂದು ವ್ಯವಸ್ಥಿತ ಕೊಲೆ ಎಂಬುದು ಪೊಲೀಸರಿಗೆ ಖಚಿತವಾಗಿತ್ತು.
ನ್ಯಾಯಾಲಯದಲ್ಲಿ ಕೆಳ ಹಂತದ ಗುಮಾಸ್ತೆಯಾಗಿ (ಎಲ್‌ಡಿಸಿ) ಕೆಲಸ ಮಾಡುತ್ತಿದ್ದ ನೀರಜ್ ಅವರ ಕೊಲೆಗೆ, ಅವರ ಸ್ವಂತ ಮಗಳಾದ ಆಯುಷಿ ಶರ್ಮಾ 7 ಲಕ್ಷ ರೂ. ಸುಪಾರಿ ನೀಡಿದ್ದಳು ಎಂಬ ಆಘಾತಕಾರಿ ಸತ್ಯ ತನಿಖೆಯಿಂದ ಬಯಲಾಗಿತ್ತು. ತನ್ನ ಚಿಕ್ಕಪ್ಪ ಮೋಹನ್ ಸ್ವರೂಪ್ ಮತ್ತು ಸಂಬಂಧಿ ಬಲರಾಮ್ (ಈತ ಪರಾರಿಯಾಗಿದ್ದಾನೆ) ಜೊತೆ ಸೇರಿ ಈ ಸಂಚು ರೂಪಿಸಿದ್ದ ಆಯುಷಿ ಹಾಗೂ ಸುಪಾರಿ ಹಂತಕ ಹೇಮಂತ್ ಶರ್ಮಾ ಸೇರಿದಂತೆ ಒಟ್ಟು ಏಳು ಜನರನ್ನು ಪೊಲೀಸರು ಈವರೆಗೆ ಬಂಧಿಸಿದ್ದಾರೆ.
ನೀರಜ್ ಶರ್ಮಾ ಅವರ ಪತಿ, ಕೋರ್ಟ್ ಮಾಸ್ಟರ್ ಆಗಿದ್ದ ವಿಜಯ್ ಶರ್ಮಾ ಕಳೆದ ವರ್ಷವಷ್ಟೇ ಮೃತಪಟ್ಟಿದ್ದರು. ಅವರ ಸಾವಿನ ನಂತರ ಅನುಕಂಪದ ಆಧಾರದ ಮೇಲೆ ಆ ಸರ್ಕಾರಿ ನೌಕರಿಯು ಪತ್ನಿ ನೀರಜ್ ಅವರಿಗೆ ಒಲಿದಿತ್ತು. ಆದರೆ, ಆ ಕೆಲಸ ತನಗೆ ಸಿಗಬೇಕಿತ್ತು ಎಂದು ಮಗಳು ಆಯುಷಿ ಪಟ್ಟು ಹಿಡಿದಿದ್ದಳು. ಇದೇ ವಿಚಾರವಾಗಿ ತಾಯಿ-ಮಗಳ ನಡುವೆ ಆಸ್ತಿ ವಿವಾದವೂ ನಡೆಯುತ್ತಿತ್ತು. ಹೀಗಾಗಿ, ತಾಯಿಯನ್ನು ಮುಗಿಸಿದರೆ ಕೆಲಸ ಮತ್ತು ಆಸ್ತಿ ಎರಡೂ ತನಗೇ ದಕ್ಕುತ್ತದೆ ಎಂಬ ದುರಾಸೆಯಿಂದ ಆಕೆ ಈ ಭೀಕರ ಕೃತ್ಯವೆಸಗಿದ್ದಳು.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಹೆಣ್ಣುಮಕ್ಕಳ ಸುರಕ್ಷತೆ ಕೇವಲ ರಾಜಕೀಯ ಭಾಷಣದ ಸರಕಾಗದಿರಲಿ
ತಾಯಿಯ ಕೊಲೆ ಪ್ರಕರಣದ ತನಿಖೆ ನಡೆಯುತ್ತಿರುವಾಗಲೇ, ನೀರಜ್ ಅವರ ಸಹೋದರ (ಆಯುಷಿಯ ಸೋದರಮಾವ) ರಾಕೇಶ್ ಶರ್ಮಾ ಅವರು ಪೊಲೀಸರಿಗೆ ಮತ್ತು ನ್ಯಾಯಾಲಯಕ್ಕೆ ಮತ್ತೊಂದು ದೂರು ನೀಡಿದ್ದಾರೆ. 2025ರ ಏಪ್ರಿಲ್‌ನಲ್ಲಿ ಮೃತಪಟ್ಟಿದ್ದ ಆಯುಷಿಯ ತಂದೆ ವಿಜಯ್ ಶರ್ಮಾ ಅವರ ಸಾವು ಸಹಜವಾಗಿರಲಿಲ್ಲ, ಅದರಲ್ಲಿಯೂ ಆಯುಷಿ ಮತ್ತು ಆಕೆಯ ಸಂಬಂಧಿ ಬಲರಾಮ್ ಕೈವಾಡವಿದೆ ಎಂದು ದೂರಿನಲ್ಲಿ ಆರೋಪಿಸಿದ್ದಾರೆ.
2024ರಲ್ಲಿ ಮಿದುಳಿನ ರಕ್ತಸ್ರಾವದಿಂದ ಬಳಲುತ್ತಿದ್ದ ವಿಜಯ್ ಶರ್ಮಾ ನಿಧಾನವಾಗಿ ಚೇತರಿಸಿಕೊಳ್ಳುತ್ತಿದ್ದರು. ಆದರೆ ಆಯುಷಿ ಅವರಿಗೆ ಸರಿಯಾದ ಚಿಕಿತ್ಸೆ ನೀಡದೆ, ಉತ್ತಮ ಚಿಕಿತ್ಸೆ ಕೊಡಿಸುವುದಾಗಿ ಹೇಳಿ ಮನೆಯಿಂದ ಕರೆದೊಯ್ದು, ಸುಮಾರು ಮೂರು ತಿಂಗಳ ಕಾಲ ಅವರ ಬಗ್ಗೆ ಯಾರಿಗೂ ಮಾಹಿತಿ ನೀಡದೆ ಅಡಗಿಸಿಟ್ಟಿದ್ದಳು. ಕೊನೆಗೆ ಜೈಪುರದ ಆಸ್ಪತ್ರೆಗೆ ದಾಖಲಿಸಿದಾಗ ಅವರ ದೇಹಕ್ಕೆ ಶೇ. 90ರಷ್ಟು ಹಾನಿಯಾಗಿತ್ತು ಎಂದು ವೈದ್ಯರು ತಿಳಿಸಿದ್ದರು. ಆನಂತರ ವಿಜಯ್ ಅವರನ್ನು ಮನೆಗೆ ಕರೆತಂದಾಗ ಅವರು ಮೃತಪಟ್ಟಿದ್ದರು ಎಂದು ದೂರಿನಲ್ಲಿ ವಿವರಿಸಲಾಗಿದೆ.
“ತಂದೆಗೆ ಅಳವಡಿಸಿದ್ದ ಫೀಡಿಂಗ್ ಟ್ಯೂಬ್ (ಆಹಾರದ ಕೊಳವೆ) ತೆಗೆದು ಆತನನ್ನು ಸಾಯಿಸಿದಂತೆ, ನಿನ್ನನ್ನೂ ಸಾಯಿಸುವುದು ಬಹಳ ಸುಲಭ” ಎಂದು ಆಯುಷಿ ಒಮ್ಮೆ ತನ್ನ ತಾಯಿಗೆ ಬೆದರಿಕೆ ಹಾಕಿದ್ದಳು ಎಂಬ ಅತ್ಯಂತ ಆಘಾತಕಾರಿ ಅಂಶವನ್ನೂ ರಾಕೇಶ್ ತಮ್ಮ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.
ಈ ಹೊಸ ದೂರಿನ ಹಿನ್ನೆಲೆಯಲ್ಲಿ ಜೈಪುರ ಪೊಲೀಸರು ವಿಜಯ್ ಶರ್ಮಾ ಅವರ ಸಾವಿನ ಕುರಿತೂ ಇದೀಗ ಮರುತನಿಖೆ ಆರಂಭಿಸಿದ್ದಾರೆ. ಒಂದೊಮ್ಮೆ ತಂದೆಯ ಸಾವಿನಲ್ಲೂ ಆಯುಷಿಯ ಪಾತ್ರ ಸಾಬೀತಾದರೆ, ಆಕೆಯ ಮೇಲೆ ಮತ್ತೊಂದು ಪ್ರತ್ಯೇಕ ಕೊಲೆ ಪ್ರಕರಣ ದಾಖಲಾಗುವ ಸಾಧ್ಯತೆಯಿದೆ.
