ಭಾರತದ ಮಾಜಿ ಪ್ರಧಾನಿ ಡಾ. ಮನಮೋಹನ್ ಸಿಂಗ್ ಅವರ ವ್ಯಕ್ತಿತ್ವ ಮತ್ತು ಅಧಿಕಾರದ ಕುರಿತಾದ ಗೌರವದ ಬಗ್ಗೆ ಮಾಜಿ ಮುಖ್ಯ ಚುನಾವಣಾ ಆಯುಕ್ತ (CEC) ಎಸ್ ವೈ ಖುರೇಷಿ ಅವರು ತಮ್ಮ ಹೊಸ ಪುಸ್ತಕದಲ್ಲಿ ಒಂದು ರೋಚಕ ಘಟನೆ ಹಂಚಿಕೊಂಡಿದ್ದಾರೆ.
2012ರ ಉತ್ತರ ಪ್ರದೇಶ ವಿಧಾನಸಭೆ ಚುನಾವಣೆ ಸಂದರ್ಭವನ್ನು ಖುರೇಷಿ ತಮ್ಮ ‘ಇಂಡಿಯಾ ಅಂಡ್ ಐ: ಎ ಹಂಡ್ರೆಡ್ ಮೆಮೊರೀಸ್, ನಾಟ್ ಎ ಮೆಮೋಯಿರ್’ ಪುಸ್ತಕದಲ್ಲಿ ದಾಖಲಿಸಿದ್ದಾರೆ.
ಏನದು ಘಟನೆ?
2012ರ ಉತ್ತರ ಪ್ರದೇಶ ಚುನಾವಣಾ ಪ್ರಚಾರದ ವೇಳೆ ಅಂದಿನ ಕೇಂದ್ರ ಸಚಿವ ಸಲ್ಮಾನ್ ಖುರ್ಶಿದ್ ಅವರು, “ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ಮುಸ್ಲಿಮರಿಗೆ ಉದ್ಯೋಗದಲ್ಲಿ ಮೀಸಲಾತಿಯನ್ನು ಶೇ. 4.5ರಿಂದ ಶೇ. 9ಕ್ಕೆ ಹೆಚ್ಚಿಸಲಾಗುವುದು” ಎಂದು ಭರವಸೆ ನೀಡಿದ್ದರು. ಇದು ಚುನಾವಣಾ ನೀತಿ ಸಂಹಿತೆಯ (MCC) ಉಲ್ಲಂಘನೆ ಎಂದು ಬಿಜೆಪಿ ದೂರು ನೀಡಿತು. 4 ದಿನಗಳ ವಿಚಾರಣೆಯ ನಂತರ, ಚುನಾವಣಾ ಆಯೋಗವು ಸಲ್ಮಾನ್ ಖುರ್ಶಿದ್ ಅವರನ್ನು ತೀವ್ರವಾಗಿ ಖಂಡಿಸಿತು. ಇದರಿಂದ ಅಸಮಾಧಾನಗೊಂಡಿದ್ದ ಕಾಂಗ್ರೆಸ್‌ನ ಕೆಲ ನಾಯಕರು, ಚುನಾವಣಾ ಆಯೋಗವು “ಅಹಂಕಾರಿ ಅಥವಾ ನಿರಂಕುಶವಾಗಿ” ವರ್ತಿಸುತ್ತಿದೆ ಎಂದು ಟೀಕಿಸಿದ್ದರು.
ಪ್ರಧಾನಿಯೊಂದಿಗಿನ ಆ ಭಾವುಕ ಸಂಭಾಷಣೆ ಚುನಾವಣಾ ಆಯೋಗದ ಘನತೆಯನ್ನು ಹಾಳುಮಾಡುವ ಇಂತಹ ಟೀಕೆಗಳಿಂದ ತೀವ್ರ ನೋವು ಅನುಭವಿಸಿದ್ದ ಎಸ್.ವೈ. ಖುರೇಷಿ, ಈ ವಿಷಯವನ್ನು ಪ್ರಧಾನಿ ಮನ್ಮೋಹನ್ ಸಿಂಗ್ ಅವರ ಗಮನಕ್ಕೆ ತರಲು ನಿರ್ಧರಿಸಿದರು. ಅಂದಿನ ಪ್ರಧಾನಿ ಮಾಧ್ಯಮ ಸಲಹೆಗಾರ ಹರೀಶ್ ಖರೆ ಮೂಲಕ ವಿಷಯವನ್ನು ತಲುಪಿಸಿದ ನಂತರ, ಮನ್ಮೋಹನ್ ಸಿಂಗ್ ಅವರು ತಕ್ಷಣ ಖುರೇಷಿ ಅವರನ್ನು ಭೇಟಿಯಾಗಲು ಕರೆದರು.
ಖುರೇಷಿ ಭೇಟಿಯಾದಾಗ, ಮಾಜಿ ಪ್ರಧಾನಿ ಆತಂಕದ ಧ್ವನಿಯಲ್ಲಿ ಹೀಗೆಂದರು: “ಹರೀಶ್ ಅವರು ನೀವು ಹೇಳಿದ ವಿಷಯಗಳನ್ನು ತಿಳಿಸಿದರು. ನಿಮ್ಮ ಮನಸ್ಸಿನಲ್ಲಿ ಅಂತಹ ಭಾವನೆ ಇದ್ದರೆ, ನಾನು ಆತ್ಮಹತ್ಯೆ ಮಾಡಿಕೊಳ್ಳುತ್ತೇನೆ.”
ಪ್ರಧಾನಿಯವರ ಈ ಮಾತಿನಿಂದ ದಂಗಾದ ಖುರೇಷಿ, “ಸರ್, ನನ್ನ ಸಿಟ್ಟು ಸಚಿವರ ವರ್ತನೆಯ ಮೇಲೆಯೇ ಹೊರತು ನಿಮ್ಮ ಬಗ್ಗೆಯಲ್ಲ” ಎಂದು ಸ್ಪಷ್ಟನೆ ನೀಡಬೇಕಾಯಿತು. ತಮ್ಮ ಉದ್ದೇಶದ ಬಗ್ಗೆ ಚುನಾವಣಾ ಆಯುಕ್ತರಿಗೆ ಅನುಮಾನವಿದೆ ಎಂದು ಭಾವಿಸುವುದು ಮನ್ಮೋಹನ್ ಸಿಂಗ್ ಅವರಿಗೆ ಅಸಹನೀಯವಾಗಿತ್ತು.
ಇದನ್ನೂ ಓದಿ: ತಮಿಳುನಾಡು | ಗೋಹತ್ಯೆ ನಿಷೇಧಿಸಲು ಮದ್ರಾಸ್ ಹೈಕೋರ್ಟ್ ನೀಡಿದ ಆದೇಶಕ್ಕೆ ಸುಪ್ರೀಂ ತಡೆ
“ಚುನಾವಣಾ ಆಯೋಗ ಪ್ರಜಾಪ್ರಭುತ್ವದ ಆತ್ಮ” ಈ ವೇಳೆ ಮನಮೋಹನ್ ಸಿಂಗ್ ಅವರು, “ಚುನಾವಣಾ ಆಯೋಗವು ಕೇವಲ ಭಾರತದ ಹೆಮ್ಮೆಯಲ್ಲ; ಅದು ನಮ್ಮ ಪ್ರಜಾಪ್ರಭುತ್ವದ ಆತ್ಮ. ನಾವು ಅದನ್ನು ಕಳೆದುಕೊಂಡರೆ ಎಲ್ಲವನ್ನೂ ಕಳೆದುಕೊಂಡಂತೆ” ಎಂದು ಹೇಳುವ ಮೂಲಕ ಆಯೋಗಕ್ಕೆ ನೀಡಿದ್ದ ಅಗಾಧ ಗೌರವವನ್ನು ವ್ಯಕ್ತಪಡಿಸಿದ್ದರು. ಈ ಸಭೆಯ ನಂತರ, ಚುನಾವಣಾ ಆಯೋಗದ ವಿರುದ್ಧ ಬರುತ್ತಿದ್ದ ಟೀಕೆಗಳು ತಕ್ಷಣವೇ ನಿಂತವು ಎಂದು ಖುರೇಷಿ ಸ್ಮರಿಸಿಕೊಂಡಿದ್ದಾರೆ. “ನಾನು ನನ್ನ ಜೀವನದಲ್ಲಿ ಅನೇಕ ಶಕ್ತಿಶಾಲಿ ವ್ಯಕ್ತಿಗಳನ್ನು ನೋಡಿದ್ದೇನೆ, ಆದರೆ ಅಧಿಕಾರವನ್ನು ಅಷ್ಟು ಹಗುರವಾಗಿ, ಅದೇ ಸಮಯದಲ್ಲಿ ಅದರ ತೂಕವನ್ನು ಅಷ್ಟೊಂದು ಗಂಭೀರವಾಗಿ ಅನುಭವಿಸುತ್ತಿದ್ದ ಕೆಲವೇ ವ್ಯಕ್ತಿಗಳಲ್ಲಿ ಡಾ. ಮನಮೋಹನ್ ಸಿಂಗ್ ಒಬ್ಬರು” ಎಂದು ಖುರೇಷಿ ತಮ್ಮ ಪುಸ್ತಕದಲ್ಲಿ ಬರೆದಿದ್ದಾರೆ
