ಆಟೋ ರಿಕ್ಷಾ, ಟ್ಯಾಕ್ಸಿ ಮತ್ತು ಕ್ಯಾಬ್ ಚಾಲಕರಿಗೆ ಕನಿಷ್ಠ ಮರಾಠಿ ಭಾಷಾ ಜ್ಞಾನವನ್ನು ಕಡ್ಡಾಯಗೊಳಿಸಿರುವ ಮಹಾರಾಷ್ಟ್ರ ಸರ್ಕಾರದ ಆದೇಶವನ್ನು ವಿರೋಧಿಸಿ ಮುಂಬೈನ ಆಟೋ ಚಾಲಕರು ಸೋಮವಾರದಿಂದ ಮೂರು ದಿನಗಳ ಮುಷ್ಕರವನ್ನು ಆರಂಭಿಸಿದ್ದಾರೆ.
ಈ ನಿಯಮವು ತಮ್ಮ ಮೇಲೆ ಹೆಚ್ಚುವರಿ ಆರ್ಥಿಕ ಹೊರೆ ಹೇರಲಿದೆ ಎಂದು ಮರಾಠಿಯೇತರ ಚಾಲಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಭಾಷಾ ಕಡ್ಡಾಯ ನಿಯಮವನ್ನು ವಿರೋಧಿಸಿ ಕಾಂದಿವ್ಲಿ ಲಿಂಕ್ ರಸ್ತೆಯಲ್ಲಿ ಚಾಲಕರು ರಸ್ತೆ ತಡೆ ನಡೆಸಿ ಪ್ರತಿಭಟಿಸಿದರು. ಬಹುತೇಕ ವಯಸ್ಸಾದ ಚಾಲಕರು ಯಾವುದೇ ಔಪಚಾರಿಕ ಶಿಕ್ಷಣ ಪಡೆದಿಲ್ಲ, ಹೀಗಾಗಿ ಅವರಿಗೆ ಹೊಸದಾಗಿ ಭಾಷೆ ಕಲಿಯುವುದು ಮತ್ತು ಈ ನಿಯಮವನ್ನು ಪಾಲಿಸುವುದು ಕಷ್ಟವಾಗುತ್ತಿದೆ ಎಂದು ಪ್ರತಿಭಟನಾಕಾರರು ತಮ್ಮ ಅಳಲು ತೋಡಿಕೊಂಡರು.
”ನಮಗೆ 55-60 ವರ್ಷ ವಯಸ್ಸಾಗಿದೆ. ನಾವು ಯಾವತ್ತೂ ಶಾಲೆಯ ಮೆಟ್ಟಿಲು ಹತ್ತಿದವರಲ್ಲ. ಈಗ ದಿಢೀರನೆ ನಾವು ಮರಾಠಿ ಮಾತನಾಡುವುದು ಹೇಗೆ? ನಾವೇನಾದರೂ ವಿದ್ಯಾವಂತರಾಗಿದ್ದರೆ ಯಾವುದಾದರೂ ಕಚೇರಿಯಲ್ಲಿ ಕುಳಿತು ಕೆಲಸ ಮಾಡುತ್ತಿದ್ದೆವು” ಎಂದು ಚಾಲಕರೊಬ್ಬರು ಅಸಹಾಯಕತೆ ವ್ಯಕ್ತಪಡಿಸಿದರು.
ಅನೇಕ ಚಾಲಕರು ಮುರಿದು ಮುರಿದು ಮರಾಠಿ ಮಾತನಾಡಲು ಪ್ರಯತ್ನಿಸುತ್ತಿದ್ದಾರೆ. ಆದರೆ, ಸರ್ಕಾರ ಭಾಷೆ ಕಲಿಯಲು ಸೂಕ್ತ ಸಮಯಾವಕಾಶ ನೀಡುವ ಬದಲು ದಂಡ ವಿಧಿಸುತ್ತಿದೆ ಎಂದು ಅವರು ಆರೋಪಿಸಿದರು. “ನಾವು 15,000 ದಿಂದ 20,000 ರೂಪಾಯಿಗಳಷ್ಟು ಭಾರಿ ದಂಡವನ್ನು ಕಟ್ಟಲು ಸಾಧ್ಯವೇ? ನಮಗೆ ನ್ಯಾಯ ಸಿಗುವವರೆಗೂ ಈ ಮುಷ್ಕರವನ್ನು ಮುಂದುವರಿಸುತ್ತೇವೆ” ಎಂದು ಚಾಲಕರು ಎಚ್ಚರಿಕೆ ನೀಡಿದ್ದಾರೆ.
ಭಾಷಾ ನಿಯಮದ ಬಗ್ಗೆ ಸಾರಿಗೆ ಕಾರ್ಮಿಕರ ಒಂದು ವರ್ಗದಲ್ಲಿ ತೀವ್ರ ವಿರೋಧ ವ್ಯಕ್ತವಾಗುತ್ತಿರುವ ಬೆನ್ನಲ್ಲೇ ಈ ಮುಷ್ಕರ ನಡೆದಿದೆ. ಭಾಷಾ ಕಡ್ಡಾಯ ನಿಯಮ ಹಾಗೂ ಅದಕ್ಕೆ ವಿಧಿಸುತ್ತಿರುವ ದಂಡದ ಬಗ್ಗೆ ಅಧಿಕಾರಿಗಳು ಮರುಪರಿಶೀಲನೆ ನಡೆಸಬೇಕು ಎಂದು ಚಾಲಕರು ಒತ್ತಾಯಿಸಿದ್ದಾರೆ. ಮುಂಬೈನಂತಹ ಮಹಾನಗರದಲ್ಲಿ ಆಟೋ ಚಾಲಕರಿಗೆ ಭಾಷಾ ಪ್ರಾವೀಣ್ಯತೆ ಕಡ್ಡಾಯವಾಗಿರಬೇಕೇ ಎಂಬ ಪ್ರಶ್ನೆ ಇದೀಗ ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.
