ಉತ್ತರ ಪ್ರದೇಶ ಪೊಲೀಸರಿಂದ ‘ನಕಲಿ ಎನ್‌ಕೌಂಟರ್’ ನಡೆಯುವ ಭೀತಿಯಿಂದಾಗಿ, ಹರ್ಯಾಣದ ಗಾಯಕ ಅಂಕಿತ್ ಬಾಲಿಯಾನ್ ಹತ್ಯೆ ಪ್ರಕರಣದ ಇಬ್ಬರು ಆರೋಪಿಗಳು ತಮಗೆ ಕೈಕೋಳ ಹಾಗೂ ಕಾಲ್ಬೇಡಿ ತೊಡಿಸುವಂತೆ ನ್ಯಾಯಾಲಯಕ್ಕೆ ವಿಚಿತ್ರ ಮನವಿಯೊಂದನ್ನು ಸಲ್ಲಿಸಿದ್ದಾರೆ. ಶ್ಯಾಮ್ಲಿ ನ್ಯಾಯಾಲಯವು ಆರೋಪಿಗಳ ಈ ಮನವಿಯನ್ನು ಪುರಸ್ಕರಿಸಿದೆ.
ನವೆಂಬರ್ 3ರಂದು ಈ ಕುರಿತು ಆದೇಶ ಹೊರಡಿಸಿರುವ ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶರಾದ ಸೌರಭ್ ಪ್ರತಾಪ್ ಸಿಂಗ್ ಲಾಲೇರ್ ಅವರು, ಶ್ಯಾಮ್ಲಿಯ ಮುಖ್ಯ ಜ್ಯುಡಿಷಿಯಲ್ ಮ್ಯಾಜಿಸ್ಟ್ರೇಟ್ (CJM) ಎದುರು ಹಾಜರುಪಡಿಸುವಾಗ ತಮ್ಮ ಮೇಲೆ ಈ ನಿರ್ಬಂಧಗಳನ್ನು ಹೇರಬೇಕೆಂದು ವಿಚಾರಣಾಧೀನ ಕೈದಿಗಳಾದ ದೀಪಕ್ ಅಲಿಯಾಸ್ ತೀತರ್ ಮತ್ತು ಯೋಗೇಶ್ ಅಲಿಯಾಸ್ ತುಂಡಾ ಖುದ್ದಾಗಿ ಮನವಿ ಮಾಡಿದ್ದಾರೆ ಎಂಬುದನ್ನು ತಮ್ಮ ಆದೇಶದಲ್ಲಿ ಉಲ್ಲೇಖಿಸಿದ್ದಾರೆ.
ಆರೋಪಿಗಳ ಅರ್ಜಿಯನ್ನು ಮಾನ್ಯ ಮಾಡಿರುವ ನ್ಯಾಯಾಲಯವು, ಅವರನ್ನು ಶ್ಯಾಮ್ಲಿ ನ್ಯಾಯಾಲಯಕ್ಕೆ ಕರೆದೊಯ್ಯುವಾಗ ಮತ್ತು ಅಲ್ಲಿಂದ ವಾಪಸ್ ಕರೆತರುವಾಗ ಕೈಕೋಳ ಮತ್ತು ಕಾಲ್ಬೇಡಿಗಳನ್ನು ಕಡ್ಡಾಯವಾಗಿ ತೊಡಿಸಬೇಕು. ಅಲ್ಲದೆ, ಅವರಿಗೆ ಬುಲೆಟ್ ಪ್ರೂಫ್ ಜಾಕೆಟ್‌ಗಳನ್ನು ಧರಿಸಲು ನೀಡಬೇಕೆಂದು ತಿಹಾರ್ ಜೈಲು ಅಧಿಕಾರಿಗಳಿಗೆ ನಿರ್ದೇಶನ ನೀಡಿದೆ.
ಇದರ ಜೊತೆಗೆ, ಪ್ರಯಾಣದ ವೇಳೆ ಹಾಗೂ ನ್ಯಾಯಾಲಯದ ವಿಚಾರಣೆ ಸಂದರ್ಭದಲ್ಲಿ ಯಾವುದೇ ಅಹಿತಕರ ಘಟನೆಗಳು ನಡೆಯದಂತೆ ಎಚ್ಚರವಹಿಸಬೇಕು. ಆರೋಪಿಗಳಿಗೆ ‘ಸಂಪೂರ್ಣ ಭದ್ರತೆ’ ಒದಗಿಸಬೇಕು ಎಂದು ಜೈಲು ಅಧಿಕಾರಿಗಳು ಹಾಗೂ ನಾರ್ತ್ ಅವೆನ್ಯೂ ಡಿಸಿಪಿ (DCP-NAV) ಅವರಿಗೆ ನ್ಯಾಯಾಲಯವು ಕಟ್ಟುನಿಟ್ಟಿನ ಸೂಚನೆ ನೀಡಿದೆ.
