ಮುಂಬೈನ ಜುಹು ಪ್ರದೇಶದಲ್ಲಿರುವ ‘ಜಲ್ಸಾ’ ನಿವಾಸದ ಹೊರಗೆ ಪ್ರತಿ ಭಾನುವಾರ ಜಮಾಯಿಸುವ ಅಭಿಮಾನಿಗಳತ್ತ ಹಸನ್ಮುಖಿಯಾಗಿ ಕೈಬೀಸುವ ಅಮಿತಾಭ್ ಬಚ್ಚನ್ ಅವರ ಆ ಹಳೆಯ ಚಿತ್ರಕ್ಕೂ, ಕಳೆದ ಭಾನುವಾರದ ಚಿತ್ರದ ನಡುವೆ ಬೃಹತ್ ಗಾಜಿನ ಗೋಡೆಯೊಂದು ಎದ್ದುನಿಂತಿದೆ. ಬಾಂಬ್ ಬೆದರಿಕೆಯ ಇಮೇಲ್‌ಗಳ ಬೆನ್ನಲ್ಲೇ ‘ಬಿಗ್ ಬಿ’, ಸಾರ್ವಜನಿಕವಾಗಿ ಕಾಣಿಸಿಕೊಳ್ಳಲು ಪಾರದರ್ಶಕ ‘ಬುಲೆಟ್ ಪ್ರೂಫ್’ ಗಾಜಿನ ತಡೆಗೋಡೆಯ ಆಸರೆ ಪಡೆಯಬೇಕಾಗಿ ಬಂತು.
ಅಭಿಮಾನಿಗಳಿಗೆ ಈ ದೃಶ್ಯ ಆತಂಕ ತಂದಿರಬಹುದು. ಆದರೆ, ದೇಶದ ರಾಜಕೀಯ ಮತ್ತು ಭದ್ರತಾ ಸ್ಥಿತಿಗತಿಯನ್ನು ಸೂಕ್ಷ್ಮವಾಗಿ ಗಮನಿಸುವವರಿಗೆ ಇದೊಂದು ಕೇವಲ ನಟನ ಸುರಕ್ಷತೆಯ ಪ್ರಶ್ನೆಯಾಗಿ ಉಳಿದಿಲ್ಲ, ಬದಲಿಗೆ ಕೇಂದ್ರ ಸರ್ಕಾರದ ಆಡಳಿತದ ಅಸಲಿ ವೈಫಲ್ಯದ ಸಂಕೇತವಾಗಿ ಕಾಣಿಸುತ್ತಿದೆ.
ಪ್ರಧಾನಿ ನರೇಂದ್ರ ಮೋದಿ ಮತ್ತು ಗೃಹ ಸಚಿವ ಅಮಿತ್ ಶಾ ನೇತೃತ್ವದ ಆಡಳಿತ ಯಂತ್ರವು ‘ಅಮೃತಕಾಲ’ದಲ್ಲಿ ದೇಶದ ಕಾನೂನು ಮತ್ತು ಸುವ್ಯವಸ್ಥೆ ಅತ್ಯಂತ ಭದ್ರವಾಗಿದೆ ಎಂದು ಪದೇಪದೇ ಪ್ರತಿಪಾದಿಸುತ್ತಲೇ ಬಂದಿದೆ. ನವ ಭಾರತದಲ್ಲಿ ಭಯೋತ್ಪಾದನೆ ಮತ್ತು ಬೆದರಿಕೆಗಳಿಗೆ ಜಾಗವಿಲ್ಲ ಎಂಬ ಮುಖಪುಟದ ಜಾಹೀರಾತುಗಳ ಅಬ್ಬರಕ್ಕೆ ಕೊರತೆಯಿಲ್ಲ.
ಆದರೆ, ಅದೇ ಸರ್ಕಾರದ ಆಡಳಿತಾವಧಿಯಲ್ಲಿ, ದೇಶದ ಅತ್ಯಂತ ಪ್ರಭಾವಿ ಮತ್ತು ವಿಐಪಿ ಸಾಲಿನಲ್ಲಿರುವ ಹಿರಿಯ ನಟರೊಬ್ಬರು ತಮಗೆ ಎದುರಾದ ಬೆದರಿಕೆಯಿಂದಾಗಿ ಸ್ವಂತ ಮನೆಯ ಅಂಗಳದಲ್ಲೇ ಗಾಜಿನ ಪಂಜರದೊಳಗೆ ನಿಂತು ಜನರನ್ನು ಭೇಟಿಯಾಗಬೇಕಾದ ಪರಿಸ್ಥಿತಿ ಬಂದಿರುವುದು ಅತ್ಯಂತ ವಿಪರ್ಯಾಸ. ಬಾಂದ್ರಾ-ಕುರ್ಲಾ ಕಾಂಪ್ಲೆಕ್ಸ್‌ನ ಶಾಲೆಯಿಂದ ಹಿಡಿದು ಅಮಿತಾಭ್ ನಿವಾಸದವರೆಗೆ ತಲುಪಿರುವ ಈ ಬೆದರಿಕೆ ಇಮೇಲ್‌ಗಳು, ದೇಶದ ಆರ್ಥಿಕ ರಾಜಧಾನಿಯ ಭದ್ರತಾ ವ್ಯವಸ್ಥೆಯನ್ನೇ ಪ್ರಶ್ನಿಸುವಂತೆ ಮಾಡಿವೆ.
ನರೇಂದ್ರ ಮೋದಿ ಗುಜರಾತ್ ಮುಖ್ಯಮಂತ್ರಿಯಾಗಿದ್ದ ದಿನಗಳಿಂದ ಹಿಡಿದು ಇಂದಿನವರೆಗೆ ಬಚ್ಚನ್ ಮತ್ತು ಮೋದಿಯವರ ಸಂಬಂಧ ರೇಷ್ಮೆಯಷ್ಟು ಮೃದು ಮತ್ತು ದಟ್ಟ. ‘ಖುಷ್ಬೂ ಗುಜರಾತ್ ಕೀ’ ಅಭಿಯಾನದಿಂದ ಹಿಡಿದು ಸರ್ಕಾರದ ಪ್ರತಿಯೊಂದು ಮಿಲಿಟರಿ ಕ್ರಮ, ಸ್ವಚ್ಛ ಭಾರತ ಆಂದೋಲನ ಹಾಗೂ ವಿದೇಶಾಂಗ ನೀತಿಯವರೆಗೆ ಪ್ರಧಾನಿ ಮೋದಿಯವರನ್ನು ಜಾಲತಾಣಗಳಲ್ಲಿ ಮುಕ್ತವಾಗಿ ಶ್ಲಾಘಿಸಿದವರು ಬಚ್ಚನ್. ಪ್ರತಿಯಾಗಿ ಮೋದಿಯವರೂ ಬಚ್ಚನ್ ಕುಟುಂಬದ ಸಾಹಿತ್ಯಿಕ ಹಿನ್ನೆಲೆಯನ್ನು ಹಾಡಿಹೊಗಳಿದ್ದರು.
ಆದರೆ, ಕೇವಲ ಸರ್ಕಾರವನ್ನು ಬೆಂಬಲಿಸುವುದು ಅಥವಾ ಅವರ ನೀತಿಗಳಿಗೆ ರಾಯಭಾರಿಯಾಗುವುದು ಒಬ್ಬ ನಾಗರಿಕನಿಗೆ ಭದ್ರತೆಯ ಭರವಸೆ ನೀಡಬಲ್ಲದೇ? ಪ್ರಧಾನಿ ಹಾಗೂ ಗೃಹ ಸಚಿವರ ನೀತಿಗಳನ್ನು ಕೊಂಡಾಡುವ ನಟನಿಗೆ, ಇವತ್ತು ಅದೇ ಗೃಹ ಸಚಿವಾಲಯದ ಅಡಿಯಲ್ಲಿರುವ ಅತ್ಯುನ್ನತ ಭದ್ರತಾ ಸಂಸ್ಥೆಗಳ ಹೊರತಾಗಿಯೂ ಬುಲೆಟ್ ಪ್ರೂಫ್ ಗಾಜುಗಳೇ ಕೊನೆಯ ಆಸರೆಯಾಗಬೇಕಾಯಿತು.
ಕೇವಲ ಅಮಿತಾಭ್ ಬಚ್ಚನ್ ಅವರೊಬ್ಬರ ಮೇಲಷ್ಟೇ ಅಲ್ಲ, ಬಾಲಿವುಡ್‌ನ ತಾರೆಯರಾದ ಟೈಗರ್ ಶ್ರಾಫ್ ಮೇಲೆ ಇತ್ತೀಚೆಗೆ ನಡೆದ ದೈಹಿಕ ಹಲ್ಲೆ ಹಾಗೂ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಅವರ ಮನೆ ಮೇಲಿನ ಗುಂಡಿನ ದಾಳಿಯಂತಹ ಘಟನೆಗಳು ಮುಂಬೈ ನಗರದಲ್ಲಿ ಗಣ್ಯರ ಸುರಕ್ಷತೆ ಎಷ್ಟು ಹಳ್ಳಹಿಡಿದಿದೆ ಎಂಬುದನ್ನು ಸಾಬೀತುಪಡಿಸುತ್ತವೆ. ʻಅಮೃತಕಾಲʼದ ಅಡಿಯಲ್ಲಿ ದೇಶದ ಅತಿ ಸುರಕ್ಷಿತ ಮಹಾನಗರಗಳೆಂದು ಬಿಂಬಿಸಿಕೊಳ್ಳುವ ಮಹಾನಗರಗಳಲ್ಲೇ ಬಾಲಿವುಡ್‌ನ ಘಟಾನುಘಟಿ ನಟರು ನಿರಂತರವಾಗಿ ಜೀವ ಬೆದರಿಕೆಗಳು ಮತ್ತು ಪ್ರಾಣಾಪಾಯಗಳನ್ನು ಎದುರಿಸುತ್ತಿರುವುದು, ದೇಶದ ಗುಪ್ತಚರ ಮತ್ತು ಪೊಲೀಸ್ ಆಡಳಿತದ ದಿವಾಳಿತನವನ್ನು ಬಟಾಬಯಲು ಮಾಡಿದೆ. ತಾರೆಯರ ರಕ್ಷಣೆಗಾಗಿ ಪೊಲೀಸ್ ಭದ್ರತೆಯನ್ನು ಹೆಚ್ಚಿಸುತ್ತೇವೆ ಎನ್ನುವ ಆಡಳಿತಗಾರರು, ಗ್ಯಾಂಗ್‌ಸ್ಟರ್‌ಗಳ ಬೆದರಿಕೆಗಳನ್ನು ಮಟ್ಟಹಾಕುವಲ್ಲಿ ವಿಫಲರಾಗಿರುವುದು ಇಲ್ಲಿ ಎದ್ದು ಕಾಣುತ್ತಿದೆ.
ಬಿಗಿಯಾದ ಕಾನೂನು ಸುವ್ಯವಸ್ಥೆ ಎಂದರೆ ಕೇವಲ ವೇದಿಕೆಗಳ ಮೇಲಿನ ಭಾಷಣಗಳಲ್ಲ. ದೇಶದ ಪ್ರಮುಖ ನಗರದಲ್ಲಿ, ಹೈ-ಪ್ರೊಫೈಲ್ ವ್ಯಕ್ತಿಯೊಬ್ಬರು ಸಾರ್ವಜನಿಕವಾಗಿ ಕಾಣಿಸಿಕೊಳ್ಳಲು ಇಷ್ಟೊಂದು ಭಯಪಡುವ ವಾತಾವರಣ ನಿರ್ಮಾಣವಾಗಿದೆ ಎಂದರೆ, ಅಮಿತ್ ಶಾ ಅವರ ಗೃಹ ಸಚಿವಾಲಯ ಮತ್ತು ಸ್ಥಳೀಯ ಪೋಲಿಸ್ ಯಂತ್ರ ಎಲ್ಲೋ ಎಡವುತ್ತಿದೆ ಎಂದೇ ಅರ್ಥ.
ವಿದೇಶಗಳಲ್ಲಿ ಭಾರತದ ವರ್ಚಸ್ಸು ಹೆಚ್ಚಿದೆ, ದೇಶದ ಒಳಗೆ ಅಪರಾಧಿಗಳ ಎದೆಯಲ್ಲಿ ನಡುಕ ಹುಟ್ಟಿಸಿದ್ದೇವೆ ಎಂದು ಸರ್ಕಾರ ಹೇಳಿಕೊಳ್ಳುವ ಮಾತುಗಳಿಗೂ, ಜಲ್ಸಾ ನಿವಾಸದ ಮುಂದೆ ನೆಟ್ಟಿರುವ ಆ ಬುಲೆಟ್ ಪ್ರೂಫ್ ಗಾಜಿಗೂ ನಡುವೆ ಯೋಜನಾಬದ್ಧ ‘ಪ್ರಚಾರ’ ಮತ್ತು ‘ವಾಸ್ತವ’ದ ಅಂತರ ಎದ್ದು ಕಾಣುತ್ತಿದೆ. ಅಮೃತಕಾಲದ ಭ್ರಮೆಯಲ್ಲಿ ಹಾಡನ್ನು ಹಾಡುತ್ತಿದ್ದವರಿಗೆ, ಬಚ್ಚನ್ ಅವರ ಈ ಗಾಜಿನ ಕವಚ ಭದ್ರತೆಯ ಸ್ಥಿತಿಗೆ ಕನ್ನಡಿ ಹಿಡಿದಂತಿದೆ.
