“ನಿನ್ನಂಥ ಸಾವಿರ ಗಂಡಂದಿರನ್ನು ನಾನು ಇಟ್ಟುಕೊಳ್ಳಬಲ್ಲೆ” ಎಂಬ ಪತ್ನಿಯ ಮಾತು ಕೊಲೆಗೆ ಪ್ರಚೋದನೆಯಾಗುತ್ತದೆ. ಈ ಮಾತು ಪತಿಯ ಘನತೆ ಮತ್ತು ಯೋಗ್ಯತೆಯ ಮೇಲಿನ ಪರೋಕ್ಷ ದಾಳಿ. ಈ ಹೇಳಿಕೆಯು ವ್ಯಕ್ತಿಯೊಬ್ಬ ತನ್ನ ನಿಯಂತ್ರಣವನ್ನು ಕಳೆದುಕೊಂಡು ಗಂಭೀರ ಪ್ರಚೋದನೆಗೆ ಒಳಗಾಗಲು ಕಾರಣವಾಗುತ್ತದೆ ಎಂದು ಮಧ್ಯಪ್ರದೇಶ ಹೈಕೋರ್ಟ್ ಹೇಳಿದೆ. ಹಾಗೆಯೇ ಪತ್ನಿಯನ್ನು ಕೊಲೆ ಮಾಡಿದ ಆರೋಪಿಗೆ ಈ ಹಿಂದೆ ವಿಚಾರಣಾ ನ್ಯಾಯಾಲಯ ವಿಧಿಸಿದ್ದ ಜೀವಾವಧಿ ಶಿಕ್ಷೆಯನ್ನು ಹೈಕೋರ್ಟ್ 7 ವರ್ಷಗಳ ಕಠಿಣ ಜೈಲು ಶಿಕ್ಷೆಗೆ ಕಡಿತಗೊಳಿಸಿದೆ.
ನ್ಯಾಯಮೂರ್ತಿಗಳಾದ ವಿವೇಕ್ ಅಗರ್ವಾಲ್ ಮತ್ತು ಅವನೀಂದ್ರ ಕುಮಾರ್ ಸಿಂಗ್ ಅವರಿದ್ದ ವಿಭಾಗೀಯ ಪೀಠವು ಈ ತೀರ್ಪು ನೀಡಿದೆ. ಪತ್ನಿಯ ಸಾವಿಗೆ ಪತಿಯೇ ಕಾರಣ ಎಂಬುದನ್ನು ನ್ಯಾಯಾಲಯ ಎತ್ತಿಹಿಡಿದಿದೆ. ಆದರೆ ಈ ಕೃತ್ಯವು ವ್ಯವಸ್ಥಿತವಾಗಿ ಯೋಜಿಸಿ ಮಾಡಿದ ಕೊಲೆಯಲ್ಲ, ಬದಲಿಗೆ ಹಠಾತ್ ಪ್ರಚೋದನೆಯಿಂದ ನಡೆದ ಘಟನೆ ಎಂದು ಅಭಿಪ್ರಾಯಿಸಿದೆ.
ಇದನ್ನೂ ಓದಿ: 2018ರ ಕಚನಾಥಂ ಜಾತಿ ಹತ್ಯೆ ಪ್ರಕರಣ: 26 ಅಪರಾಧಿಗಳಿಗೆ ಜೀವಾವಧಿ ಶಿಕ್ಷೆ
2021ರ ಜುಲೈನಲ್ಲಿ ಮಧ್ಯಪ್ರದೇಶದ ಛಿಂದ್ವಾರಾ ಜಿಲ್ಲೆಯಲ್ಲಿ ಏಳು ತಿಂಗಳ ಗರ್ಭಿಣಿಯನ್ನು ಆಕೆಯ ಪತಿ ವಾಗ್ವಾದದ ವೇಳೆ ಕೋಪಗೊಂಡು ಕೊಲೆ ಮಾಡಿದ್ದ. ಕೊಲೆ ಮಾಡಿದ ಬಳಿಕ ಆತನೇ ಪತ್ನಿಯ ಮನೆಯವರಿಗೂ, ಪೊಲೀಸರಿಗೂ ತಿಳಿಸಿದ್ದ. ವೈದ್ಯಕೀಯ ವರದಿಯ ಪ್ರಕಾರ, ಮಹಿಳೆಯ ಪಕ್ಕೆಲುಬು ಮತ್ತು ಎದೆಮೂಳೆ ಮುರಿತಕ್ಕೊಳಗಾಗಿ ತೀವ್ರ ಗಾಯಗಳಿಂದ ಸಾವು ಸಂಭವಿಸಿತ್ತು. ಅಂದರೆ ಅಷ್ಟೊಂದು ತೀವ್ರವಾಗಿ ಕಲ್ಲಿನಿಂದ ಹಲ್ಲೆ ಮಾಡಿ ಈತ ಕೊಂದಿದ್ದ.
ಈ ಪ್ರಕರಣದಲ್ಲಿ ವಿಚಾರಣಾ ನ್ಯಾಯಾಲಯವು ಜೀವಾವಧಿ ಶಿಕ್ಷೆ ವಿಧಿಸಿದ್ದು. ಈ ಆದೇಶವನ್ನು ಪ್ರಶ್ನಿಸಿ ಆರೋಪಿ ಹೈಕೋರ್ಟ್ ಮೆಟ್ಟಿಲೇರಿದ್ದ. ಅರ್ಜಿ ವಿಚಾರಣೆ ನಡೆಸಿದ ಹೈಕೋರ್ಟ್ ಜೀವಾವಧಿ ಶಿಕ್ಷೆಯನ್ನು 7 ವರ್ಷಕ್ಕೆ ಇಳಿಸಿದೆ.
ಹಾಗೆಯೇ “ಯಾವಾಗ ಪತ್ನಿಯು ತನ್ನ ಪತಿಯನ್ನು ಉದ್ದೇಶಿಸಿ ‘ನಿನ್ನಂಥ ಸಾವಿರ ಗಂಡಂದಿರನ್ನು ನಾನು ಇಟ್ಟುಕೊಳ್ಳಬಲ್ಲೆ’ ಎಂದು ಹೇಳುತ್ತಾಳೋ, ಅದು ಪತಿಯು ಒಬ್ಬ ಮನುಷ್ಯನಾಗಿ ಅಥವಾ ಪತಿಯಾಗಿ ಯಾವುದೇ ಮೌಲ್ಯವನ್ನು ಹೊಂದಿಲ್ಲ, ಆತ ನಾಲಾಯಕ್ ಎಂಬುದನ್ನು ಪರೋಕ್ಷವಾಗಿ ಸೂಚಿಸುತ್ತದೆ. ಆದ್ದರಿಂದ, ಇದನ್ನು ಹಠಾತ್ ಮತ್ತು ಗಂಭೀರ ಪ್ರಚೋದನೆ ಎಂದು ಪರಿಗಣಿಸಬಹುದು,” ಎಂದು ಹೇಳಿದೆ.
