ನಾಯಕ ಲಿಯೋನೆಲ್ ಮೆಸ್ಸಿ ಅವರ ಅದ್ಭುತ ಆಟದ ನೆರವಿನಿಂದ ಹಾಲಿ ಚಾಂಪಿಯನ್ ಅರ್ಜೆಂಟೀನಾ ತಂಡವು 2026ರ ಫಿಫಾ ವಿಶ್ವಕಪ್ ಟೂರ್ನಿಯ ಸೆಮಿಫೈನಲ್ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ಧ 2-1 ಗೋಲುಗಳ ಅಂತರದ ರೋಚಕ ಜಯ ಸಾಧಿಸಿ ಫೈನಲ್ ಪ್ರವೇಶಿಸಿದೆ. ಈ ಗೆಲುವಿನೊಂದಿಗೆ ಸತತ ಎರಡನೇ ಬಾರಿ ವಿಶ್ವಕಪ್ ಟ್ರೋಫಿ ಮುಡಿಗೇರಿಸಿಕೊಳ್ಳುವ ಮೆಸ್ಸಿ ಪಡೆಯ ಕನಸು ಜೀವಂತವಾಗಿದೆ.
ಬುಧವಾರ ಇಲ್ಲಿನ ಅಟ್ಲಾಂಟಾ ಸ್ಟೇಡಿಯಂನಲ್ಲಿ 68,239 ಅಭಿಮಾನಿಗಳ ಸಮ್ಮುಖದಲ್ಲಿ ನಡೆದ ತೀವ್ರ ಪೈಪೋಟಿಯ ಪಂದ್ಯದಲ್ಲಿ, ಆರಂಭಿಕ ಹಿನ್ನಡೆಯ ನಡುವೆಯೂ ಅರ್ಜೆಂಟೀನಾ ತಿರುಗೇಟು ನೀಡುವಲ್ಲಿ ಯಶಸ್ವಿಯಾಯಿತು. ಭಾನುವಾರ ನ್ಯೂಯಾರ್ಕ್-ನ್ಯೂಜೆರ್ಸಿ ಸ್ಟೇಡಿಯಂನಲ್ಲಿ ನಡೆಯಲಿರುವ ಫೈನಲ್ ಹಣಾಹಣಿಯಲ್ಲಿ ಅರ್ಜೆಂಟೀನಾ ತಂಡವು ಯುರೋಪಿಯನ್ ಚಾಂಪಿಯನ್ ಸ್ಪೇನ್ ತಂಡವನ್ನು ಎದುರಿಸಲಿದೆ.
ಪಂದ್ಯದ ಮೊದಲಾರ್ಧದಲ್ಲಿ ಎರಡೂ ತಂಡಗಳಿಂದ ಯಾವುದೇ ಗೋಲು ದಾಖಲಾಗಲಿಲ್ಲ. ಆದರೆ, ದ್ವಿತೀಯಾರ್ಧದ 55ನೇ ನಿಮಿಷದಲ್ಲಿ ಇಂಗ್ಲೆಂಡ್‌ನ ಆ್ಯಂಟನಿ ಗಾರ್ಡನ್ ಅವರು ಆಕರ್ಷಕ ಗೋಲು ಬಾರಿಸುವ ಮೂಲಕ ತಂಡಕ್ಕೆ 1-0 ಮುನ್ನಡೆ ತಂದುಕೊಟ್ಟರು. ನಾಯಕ ಹ್ಯಾರಿ ಕೇನ್ ಮತ್ತು ಮೋರ್ಗನ್ ರೋಜರ್ಸ್ ಅವರ ಸಂಘಟಿತ ಆಟದ ನೆರವಿನಿಂದ ಈ ಗೋಲು ಮೂಡಿಬಂತು.
1966ರ ನಂತರ ಮೊದಲ ಬಾರಿಗೆ ವಿಶ್ವಕಪ್ ಫೈನಲ್ ಪ್ರವೇಶಿಸುವ ಇಂಗ್ಲೆಂಡ್‌ನ ಕನಸು ನನಸಾಗುವತ್ತ ಸಾಗುತ್ತಿರುವಾಗಲೇ, ಚಾಂಪಿಯನ್ ಅರ್ಜೆಂಟೀನಾ ತನ್ನ ನೈಜ ಆಟ ತೆರೆದಿಟ್ಟಿತು. ಪಂದ್ಯದ 85ನೇ ನಿಮಿಷದಲ್ಲಿ ಲಿಯೋನೆಲ್ ಮೆಸ್ಸಿ ನೀಡಿದ ಅತ್ಯುತ್ತಮ ಪಾಸ್ ಅನ್ನು ಎನ್ಜೊ ಫೆರ್ನಾಂಡಿಸ್ ಅವರು ಗೋಲಾಗಿ ಪರಿವರ್ತಿಸಿ 1-1ರ ಸಮಬಲ ಸಾಧಿಸಿದರು
ಬಳಿಕ ಪಂದ್ಯವು ಹೆಚ್ಚುವರಿ ಸಮಯದತ್ತ ಸಾಗುವ ನಿರೀಕ್ಷೆಯಿದ್ದಾಗ, ಇಂಜುರಿ ಟೈಮ್‌ನ 2ನೇ ನಿಮಿಷದಲ್ಲಿ (92ನೇ ನಿಮಿಷ) ಲಿಯೋನೆಲ್ ಮೆಸ್ಸಿ ಅವರು ನೀಡಿದ ಮತ್ತೊಂದು ಕರಾರುವಕ್ಕಾದ ಕ್ರಾಸ್ ಪಾಸ್ ಅನ್ನು ಬದಲಿ ಆಟಗಾರ ಲೌಟಾರೊ ಮಾರ್ಟಿನೆಜ್ ಅವರು ಹೆಡರ್ ಮೂಲಕ ಗೋಲಿನ ಬಲೆಗೆ ಸೇರಿಸಿದರು. ಈ ಮೂಲಕ ಅರ್ಜೆಂಟೀನಾ 2-1 ಅಂತರದ ಐತಿಹಾಸಿಕ ಜಯ ಒಲಿಸಿಕೊಂಡಿತು.
39 ವರ್ಷದ ಲಿಯೋನೆಲ್ ಮೆಸ್ಸಿ ಅವರು ತಮ್ಮ ವೃತ್ತಿಜೀವನದಲ್ಲಿ ಇದೇ ಮೊದಲ ಬಾರಿಗೆ ಇಂಗ್ಲೆಂಡ್ ವಿರುದ್ಧ ಸ್ಪರ್ಧಾತ್ಮಕ ಪಂದ್ಯವನ್ನಾಡಿದರು. ಈ ಪಂದ್ಯದ ಗೆಲುವಿನೊಂದಿಗೆ ಅವರು, ಬ್ರೆಜಿಲ್‌ನ ದಿಗ್ಗಜ ಆಟಗಾರ ಕಾಫು ಅವರ ನಂತರ ಮೂರು ವಿಶ್ವಕಪ್ ಫೈನಲ್‌ಗಳನ್ನು ಆಡಿದ ವಿಶ್ವದ ಕೇವಲ ಎರಡನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಲಿದ್ದಾರೆ. 1962ರಲ್ಲಿ ಬ್ರೆಜಿಲ್ ಸತತ ಎರಡು ಬಾರಿ ವಿಶ್ವಕಪ್ ಗೆದ್ದ ಬಳಿಕ ಬೇರೆ ಯಾವುದೇ ತಂಡ ಟ್ರೋಫಿ ಉಳಿಸಿಕೊಂಡಿಲ್ಲ, ಇದೀಗ ಆ ದಾಖಲೆ ಸರಿಗಟ್ಟುವ ಅವಕಾಶ ಅರ್ಜೆಂಟೀನಾ ಮುಂದಿದೆ.
ಥಾಮಸ್ ಟುಚೆಲ್ ಗರಡಿಯಲ್ಲಿ ಪಳಗಿದ್ದ ಇಂಗ್ಲೆಂಡ್ ತಂಡವು ಆರಂಭದಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದರೂ, ಅಂತಿಮ ಕ್ಷಣದ ಎಡವಟ್ಟಿನಿಂದಾಗಿ ಫೈನಲ್ಗೇರುವ ಅವಕಾಶದಿಂದ ವಂಚಿತವಾಯಿತು. ತಂಡದ ಪ್ರಮುಖ ಆಟಗಾರರಾದ ಜೂಡ್ ಬೆಲ್ಲಿಂಗ್‌ಹ್ಯಾಮ್ ಮತ್ತು ಹ್ಯಾರಿ ಕೇನ್ ಅವರು ನಿರೀಕ್ಷಿತ ಮಟ್ಟದಲ್ಲಿ ಮಿಂಚಲಿಲ್ಲ. ಶನಿವಾರ ಮಿಯಾಮಿಯಲ್ಲಿ ನಡೆಯಲಿರುವ ಮೂರನೇ ಸ್ಥಾನದ ಪ್ಲೇ-ಆಫ್ ಪಂದ್ಯದಲ್ಲಿ ಇಂಗ್ಲೆಂಡ್ ತಂಡವು ಫ್ರಾನ್ಸ್ ಅನ್ನು ಎದುರಿಸಲಿದೆ.
