ಮುದ್ರಿತ ‘ಗರಿಷ್ಠ ಚಿಲ್ಲರೆ ಬೆಲೆ’ಗಿಂತ (MRP) 2 ರೂಪಾಯಿ ಹೆಚ್ಚುವರಿ ವಸೂಲಿ ಮಾಡಿದ ರೆಸ್ಟೋರೆಂಟ್ ಒಂದಕ್ಕೆ ಗ್ರಾಹಕ ನ್ಯಾಯಾಲಯವು ಬರೋಬ್ಬರಿ 1 ಲಕ್ಷ ರೂ. ದಂಡ ವಿಧಿಸಿರುವ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ.
ಉತ್ತರ ಪ್ರದೇಶದ ಹಥ್ರಾಸ್‌ನಲ್ಲಿರುವ ‘ಬಿಬಿಸಿಎನ್ ರಾಯಲ್ ರೆಸ್ಟೋರೆಂಟ್ ಅಂಡ್ ಪಾರ್ಟಿ ಹಾಲ್’ ಎಂಬ ಹೋಟೆಲ್‌ಗೆ ಅಲಿಗಢ ಜಿಲ್ಲಾ ಗ್ರಾಹಕ ಆಯೋಗವು ಭಾರೀ ದಂಡ ವಿಧಿಸಿದೆ. ಇದರ ಜೊತೆಗೆ, ದೂರುದಾರ ಗ್ರಾಹಕನಿಗೆ 1,000 ರೂಪಾಯಿ ನಷ್ಟ ಪರಿಹಾರ ಮತ್ತು ಆತನ ಕಾನೂನು ವೆಚ್ಚಕ್ಕಾಗಿ 5,000 ರೂಪಾಯಿ ನೀಡುವಂತೆ ಆದೇಶಿಸಿದೆ.
2026ರ ಮಾರ್ಚ್ 11ರಂದು ಅಲಿಗಢ ನಿವಾಸಿ ಅಂಕುರ್ ಅಗರ್ವಾಲ್ ಎಂಬುವವರು ಹಥ್ರಾಸ್‌ನಲ್ಲಿರುವ ಬಿಬಿಸಿಎನ್ ರಾಯಲ್ ರೆಸ್ಟೋರೆಂಟ್‌ಗೆ ಊಟಕ್ಕಾಗಿ ತೆರಳಿದ್ದರು. ಈ ವೇಳೆ, ಅವರು ಒಂದು ನೀರಿನ ಬಾಟಲಿಯನ್ನು ತರಿಸಿಕೊಂಡಿದ್ದರು. ಆ ನೀರಿನ ಬಾಟಲಿಯ ಮೇಲೆ ಮುದ್ರಿತವಾಗಿದ್ದ ಎಆರ್‌ಪಿ 18 ರೂಪಾಯಿ ಆಗಿತ್ತು. ಆದರೆ, ರೆಸ್ಟೋರೆಂಟ್‌ನವರು ಅವರ ಬಳಿ 20 ರೂ. (ಹೆಚ್ಚುವರಿ 2 ರೂ.) ವಸೂಲಿ ಮಾಡಿದ್ದರು.
ವಸೂಲಿ ಮಾಡಿದ ವ್ಯತ್ಯಾಸದ ಮೊತ್ತ ಕೇವಲ 2 ರೂಪಾಯಿ ಆಗಿದ್ದರೂ, ಎಂಆರ್‌ಪಿಗಿಂತ ಹೆಚ್ಚು ಹಣ ಪಡೆಯುವುದು ಕಾನೂನುಬಾಹಿರ ಎಂದು ಭಾವಿಸಿದ ಅಂಕುರ್ ಅಗರ್ವಾಲ್, ಹೋಟೆಲ್ ವಿರುದ್ಧ ಕಾನೂನು ಹೋರಾಟ ಮಾಡಲು ನಿರ್ಧರಿಸಿ ಅಲಿಗಢ ಜಿಲ್ಲಾ ಗ್ರಾಹಕ ಆಯೋಗದ ಮೆಟ್ಟಿಲೇರಿದ್ದರು.
ವಿಚಾರಣೆ ವೇಳೆ, ದೂರುದಾರ ಅಂಕುರ್ ಅಗರ್ವಾಲ್ ಅವರು ರೆಸ್ಟೋರೆಂಟ್ ನೀಡಿದ್ದ ಬಿಲ್ ಮತ್ತು ನೀರಿನ ಬಾಟಲಿಯ ಫೋಟೋವನ್ನು ಸಾಕ್ಷಿಯಾಗಿ ನ್ಯಾಯಾಲಯಕ್ಕೆ ಸಲ್ಲಿಸಿದರು. ಬಿಲ್‌ನಲ್ಲಿ ಬಾಟಲಿಗೆ 20 ರೂಪಾಯಿ ಪಡೆಯಲಾಗಿರುವುದು ಮತ್ತು ಬಾಟಲಿಯ ಮೇಲೆ ಎಂಆರ್‌ಪಿ 18 ರೂಪಾಯಿ ಇರುವುದು ಸ್ಪಷ್ಟವಾಗಿ ಸಾಬೀತಾಗಿತ್ತು. ಅಲ್ಲದೆ, ಈ ಬಗ್ಗೆ ತಮ್ಮ ವಾದ ಮಂಡಿಸಲು ರೆಸ್ಟೋರೆಂಟ್‌ಗೆ ಅವಕಾಶ ನೀಡಲಾಗಿತ್ತಾದರೂ, ಅವರ ಪರವಾಗಿ ಯಾರೂ ಆಯೋಗದ ಮುಂದೆ ಹಾಜರಾಗಲಿಲ್ಲ.
ಸಾಕ್ಷ್ಯಗಳನ್ನು ಪರಿಶೀಲಿಸಿದ ಜಿಲ್ಲಾ ಗ್ರಾಹಕ ಆಯೋಗವು, ಎಂಆರ್‌ಪಿಗಿಂತ ಹೆಚ್ಚಿನ ಬೆಲೆಗೆ ವಸ್ತುವನ್ನು ಮಾರುವುದು ಕಾನೂನುಬಾಹಿರ ವ್ಯಾಪಾರ ಎಂದು ಖಚಿತಪಡಿಸಿದೆ. ಆಯೋಗವು ಬಿಬಿಸಿಎನ್ ರಾಯಲ್ ರೆಸ್ಟೋರೆಂಟ್‌ಗೆ 1 ಲಕ್ಷ ರೂಪಾಯಿ ದಂಡ ವಿಧಿಸಿದ್ದು, ಈ ಮೊತ್ತವನ್ನು ‘ಗ್ರಾಹಕ ಕಲ್ಯಾಣ ನಿಧಿ’ಗೆ ಠೇವಣಿ ಮಾಡುವಂತೆ ಸೂಚಿಸಿದೆ. ಹಾಗೆಯೇ, ದೂರುದಾರ ಅಂಕುರ್ ಅವರಿಗೆ 1,000 ರೂ. ಪರಿಹಾರ ಮತ್ತು 5,000 ರೂ. ನ್ಯಾಯಾಲಯ ವೆಚ್ಚವನ್ನು ಪಾವತಿಸಲು 45 ದಿನಗಳ ಗಡುವು ನೀಡಿದೆ. ತಪ್ಪಿದ್ದಲ್ಲಿ ಮತ್ತಷ್ಟು ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕಾಗುತ್ತದೆ ಎಂದು ಎಚ್ಚರಿಸಿದೆ.
