ಕೆರಿಬಿಯನ್‌ ದ್ವೀಪದ ಹೈಟಿಯ ರಾಷ್ಟ್ರದಲ್ಲಿ ಶನಿವಾರ ಸಂಭವಿಸಿದ ಕಾಲ್ತುಳಿತದಲ್ಲಿ ಕನಿಷ್ಠ 30 ಜನರು ಸಾವನ್ನಪ್ಪಿದ್ದಾರೆ. ಸಾವಿನ ಸಂಖ್ಯೆ ಇನ್ನೂ ಹೆಚ್ಚಾಗಬಹುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಹೈಟಿಯ ಉತ್ತರ ಭಾಗದಲ್ಲಿ ಇರುವ ಪ್ರಸಿದ್ಧ ಯುನೆಸ್ಕೋ ವಿಶ್ವ ಪ್ರಸಿದ್ಧ ಸ್ಥಳ ಲಾಫೆರ್ರಿಯರ್ ಕೋಟೆ (Citadelle Laferrière)ಯಲ್ಲಿ ಭೀಕರ ಕಾಲ್ತುಳಿತ ಸಂಭವಿಸಿದೆ. ಈ ಘಟನೆ ಕೋಟೆಯ ಪ್ರವೇಶದ್ವಾರದ ಬಳಿ ನಡೆದಿದೆ. ಕಾರ್ಯಕ್ರಮದಲ್ಲಿ ಅಧಿಕ ಯುವಕರು ಮತ್ತು ವಿದ್ಯಾರ್ಥಿಗಳು (ಅನೇಕರು 12 ವರ್ಷದಿಂದ ಮೇಲ್ಪಟ್ಟವರು) ಭಾಗವಹಿಸಿದ್ದರು ಎಂದು ವರದಿಯಾಗಿದೆ.
“Citadel Vibes 3.0” ಎಂಬ ಕಾರ್ಯಕ್ರಮವನ್ನು ಶನಿವಾರ ಆಯೋಜನೆ ಮಾಡಲಾಗಿತ್ತು. ಕಾರ್ಯಕ್ರಮ ಆರಂಭವಾಗುವಾಗ ಭಾರೀ ಮಳೆಯಿಂದಾಗಿ ಜನಸಂದಣಿ ಹೆಚ್ಚಾಗಿದೆ. ಜನರು ಆತಂಕಗೊಳ್ಳುತ್ತಿದ್ದಂತೆ ನೂಕುನುಗ್ಗಲು ಉಂಟಾಗಿ ಕಾಲ್ತುಳಿತ ಸಂಭವಿಸಿದೆ. ಅನೇಕರು ಜನಸಂದಣಿ ನಡುವೆ ಉಸಿರುಕಟ್ಟಿ (asphyxiation) ಮತ್ತು ಕಾಲ್ತುಳಿತದಿಂದ ಸಾವಿಗೀಡಾಗಿದ್ದಾರೆ. ನೂರಾಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ.
“ಸಂತ್ರಸ್ತ ಕುಟುಂಬಗಳಿಗೆ ಸಂತಾಪಗಳು. ಇಂತಹ ದುಃಖದ ಸಮಯದಲ್ಲಿ ಸಂತ್ರಸ್ತ ಕುಟುಂಬಕ್ಕೆ ಧೈರ್ಯ ತುಂಬುತ್ತೇನೆ” ಎಂದು ಪ್ರಧಾನಿ ಅಲಿಕ್ಸ್ ಡಿಡಿಯರ್ ಫಿಲ್ಸ್-ಐಮೆ ತಿಳಿಸಿದ್ದಾರೆ.
ಸ್ಥಳದ ಪ್ರವೇಶದ್ವಾರದಲ್ಲಿ ಕಾಲ್ತುಳಿತ ಸಂಭವಿಸಿದೆ ಮತ್ತು ಮಳೆಯಿಂದಾಗಿ ಕಾಲ್ತುಳಿತ ನಿಯಂತ್ರಣಕ್ಕೆ ಬರದಂತಾಗಿತ್ತು ಎಂದು ಹೈಟಿಯ ಸಿವಿಲ್‌ ಪ್ರೊಟೆಕ್ಷನ್ ಮುಖ್ಯಸ್ಥ ಜೀನ್ ಹೆನ್ರಿ ಪೆಟಿಟ್ ಹೇಳಿದರು.
