ಅಮೆರಿಕ ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ದಂಪತಿಯ ಮಾರ್ಪಡಿಸಿದ ಚಿತ್ರವನ್ನು ಹಂಚಿಕೊಂಡಿರುವ ಹಾಲಿ ಅಧ್ಯಕ್ಷ ಟ್ರಂಪ್ ನೆಟ್ಟಿಗರ ಆಕ್ರೋಶಕ್ಕೆ ಗುರಿಯಾಗಿದ್ದಾರೆ. ಒಬಾಮ ದಂಪತಿ ವಿರುದ್ಧ ಟ್ರಂಪ್ ಜನಾಂಗೀಯ ನಿಂದನೆ ಮಾಡಿದ್ದಾರೆಂದು ವ್ಯಾಪಕ ಆಕ್ರೋಶ ವ್ಯಕ್ತವಾಗಿದೆ. ಅಲ್ಲದೆ, ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ಅವರ ಕುರಿತಾಗಿಯೂ ಟ್ರಂಪ್ ಲೇವಡಿ ಮಾಡಿದ್ದು, ಅದಕ್ಕೂ ತೀವ್ರ ಖಂಡನೆ ವ್ಯಕ್ತವಾಗಿದೆ.
ತಮ್ಮ ಟ್ರುತ್ ಸೋಷಿಯಲ್‌ನಲ್ಲಿ ಚಿತ್ರವೊಂದನ್ನ ಟ್ರಂಪ್ ಹಂಚಿಕೊಂಡಿದ್ದಾರೆ. ಆ ಎಡಿಟ್ ಮಾಡಲಾದ ಚಿತ್ರದಲ್ಲಿ; ಬರಾಕ್ ಮತ್ತು ಅವರ ಪತ್ನಿ ಮಿಶೆಲ್ ಒಬಾಮಾ ಅವರು ನಗುತ್ತಾ ಏರ್ ಫೋರ್ಸ್ ಒನ್ ವಿಮಾನವನ್ನು ಏರುತ್ತಿರುವುದು ಕಂಡುಬಂದಿದೆ. ಆದರೆ, ಆ ವಿಮಾನದ ಮೇಲೆ ‘Yes We Can’, ‘Obama’, ‘BLM’ (Black Lives Matter) ಎಂಬ ಬರಹಗಳ ಜೊತೆಗೆ ಅರೇಬಿಕ್ ಭಾಷೆಯಲ್ಲಿ “ಅಲ್‌ಹಮ್ದುಲಿಲ್ಲಾಹ್” (ದೇವರಿಗೆ ಧನ್ಯವಾದಗಳು) ಎಂಬ ಪದವನ್ನು ಬರೆಯಲಾಗಿದೆ.
ಈ ಪೋಸ್ಟ್ ಅಮೆರಿಕದಲ್ಲಿ ಭಾರಿ ರಾಜಕೀಯ ಬಿರುಗಾಳಿ ಎಬ್ಬಿಸಿದೆ. ರಾಜಕೀಯ ವಿಶ್ಲೇಷಕರು ಮತ್ತು ನಾಗರಿಕ ಹಕ್ಕುಗಳ ಹೋರಾಟಗಾರರು ಇದನ್ನು ಕಪ್ಪು ವರ್ಣೀಯರ ವಿರುದ್ಧದ ‘ಜನಾಂಗೀಯ ದ್ವೇಷ’ದ ಪ್ರಚಾರ ಎಂದು ಖಂಡಿಸಿದ್ದಾರೆ.
ಈ ಹಿಂದೆ ಫೆಬ್ರವರಿಯಲ್ಲೂ ಒಬಾಮಾ ದಂಪತಿಯನ್ನು ಮಂಗಗಳಿಗೆ ಹೋಲಿಸುವ ಪೋಸ್ಟ್ ಹಾಕಿ ಟ್ರಂಪ್ ವಿರೋಧ ಎದುರಿಸಿದ್ದರು. ಅಲ್ಲದೆ, ಚಿಕಾಗೋದ ಒಬಾಮಾ ಗ್ರಂಥಾಲಯದ ಚಿತ್ರವನ್ನು ಕಸದ ರಾಶಿಯಂತೆ ಬಿಂಬಿಸಿ, “ಇದು ಅಮೆರಿಕ ದ್ವೇಷಿಗಳ ಮೆಕ್ಕಾ ಆಗಲಿದೆ” ಎಂದು ಟ್ರಂಪ್ ಟ್ವೀಟ್ ಮಾಡಿದ್ದರು.
ಇಟಲಿ ಪ್ರಧಾನಿ ಮೆಲೋನಿಗೂ ಅಪಮಾನ!
ಒಬಾಮಾ ದಂಪತಿ ಮಾತ್ರವಲ್ಲದೆ ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ಅವರ ಹಳೆಯ ಫೋಟೋ ಒಂದನ್ನು ಹಂಚಿಕೊಂಡಿರುವ ಟ್ರಂಪ್, ಅದರ ಮೇಲೆ “RESTRAINING ORDER NEEDED” (ನಿರ್ಬಂಧಕಾಜ್ಞೆಯ ಅಗತ್ಯವಿದೆ) ಎಂದು ಬರೆದುಕೊಂಡಿದ್ದಾರೆ. ಈ ಪೋಸ್ಟ್ ಹೊಸ ರಾಜತಾಂತ್ರಿಕ ಸಂಘರ್ಷಕ್ಕೆ ನಾಂದಿ ಹಾಡುವ ಸಾಧ್ಯತೆ ದಟ್ಟವಾಗಿದೆ.
ಹಿಂದಿನ ಜಿ-7 ಶೃಂಗಸಭೆಯಲ್ಲಿ ಮೆಲೋನಿ ತಮ್ಮೊಂದಿಗೆ ಫೋಟೋ ತೆಗೆಸಿಕೊಳ್ಳಲು ಬೇಡಿಕೊಂಡಿದ್ದರು ಎಂದು ಟ್ರಂಪ್ ಆರೋಪಿಸಿದ್ದರು. ಇದಕ್ಕೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದ ಮೆಲೋನಿ, “ನಾನು ಅಥವಾ ಇಟಲಿ ಯಾರ ಮುಂದೆಯೂ ಬೇಡುವುದಿಲ್ಲ, ಅದು ಶುದ್ಧ ಸುಳ್ಳು” ಎಂದು ಛೀಮಾರಿ ಹಾಕಿದ್ದರು.
ಈ ವಿವಾದದ ಬೆನ್ನಲ್ಲೇ ಇಟಲಿಯ ವಿದೇಶಾಂಗ ಸಚಿವರು ತಮ್ಮ ಅಮೆರಿಕ ಪ್ರವಾಸವನ್ನೂ ರದ್ದುಗೊಳಿಸಿದ್ದರು.
ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಟ್ರಂಪ್ ನಡೆಗೆ ತೀವ್ರ ವಿರೋಧ ವ್ಯಕ್ತವಾಗುತ್ತಿದ್ದರೂ, ಈ ಕುರಿತು ಶ್ವೇತಭವನವಾಗಲಿ ಅಥವಾ ಬರಾಕ್ ಒಬಾಮಾ ಅವರ ಕಚೇರಿಯಾಗಲಿ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ.
