ಅಯೋಧ್ಯೆಯ ರಾಮಮಂದಿರ ನಿಧಿ ದುರುಪಯೋಗ ಪ್ರಕರಣಕ್ಕೆ ಸಂಬಂಧಿಸಿದಂತೆ ದಿನಕ್ಕೊಂದು ಹೊಸ ಸ್ಫೋಟಕ ಸತ್ಯಗಳು ಹೊರಬರುತ್ತಿವೆ. 2019ರಲ್ಲಿ ತಾವು ರಾಮಮಂದಿರಕ್ಕೆ ದೇಣಿಗೆಯಾಗಿ ನೀಡಿದ್ದ ವಾಷಿಂಗ್ ಮಷೀನ್‌ಗೆ ಹಲವು ಬಾರಿ ಮನವಿ ಮಾಡಿದರೂ ದೇವಸ್ಥಾನದ ಮಂಡಳಿಯಿಂದ ಯಾವುದೇ ರಶೀದಿ ಸಿಕ್ಕಿಲ್ಲ ಎಂದು ಅಯೋಧ್ಯೆಯ ಸ್ಥಳೀಯ ಉದ್ಯಮಿಯೊಬ್ಬರು ಗಂಭೀರ ಆರೋಪ ಮಾಡಿದ್ದಾರೆ.
ಅಯೋಧ್ಯೆಯ ಹನುಮಾನ್ ಗಢಿ ದೇವಸ್ಥಾನದ ಬಳಿ ಪ್ರಸಾದ ಹಾಗೂ ಚಿನ್ನದ ಅಂಗಡಿ ಇಟ್ಟುಕೊಂಡಿರುವ ರಾಕೇಶ್ ಕುಮಾರ್ ಗುಪ್ತಾ ಎಂಬುವರು ಈ ಗಂಭೀರ ಆರೋಪ ಮಾಡಿದ್ದಾರೆ. “ರಾಮಮಂದಿರ ಹಣ ಲೂಟಿ ಪ್ರಕರಣದಲ್ಲಿ ಬಂಧನಕ್ಕೊಳಗಾಗಿರುವ ಎಂಟು ಮಂದಿ ಆರೋಪಿಗಳಲ್ಲಿ ಒಬ್ಬನಾದ ರಾಮ್ ಶಂಕರ್ ಯಾದವ್ ಅಲಿಯಾಸ್ ಟಿನ್ನು ಯಾದವ್ ಎಂಬಾಯನ ಸಲಹೆಯಂತೆ ನಾನು ದೇಣಿಗೆ ನೀಡಿದ್ದೆ” ಎಂದು ಗುಪ್ತಾ ಹೇಳಿರುವುದಾಗಿ ‘ದಿ ವೈರ್’ ವರದಿ ಮಾಡಿದೆ.
“ಟಿನ್ನು ಯಾದವ್ ನನ್ನ ಮಗಳನ್ನು ಟೆಂಪೋದಲ್ಲಿ ಶಾಲೆಗೆ ಬಿಡುತ್ತಿದ್ದರಿಂದ ಆತ ನನಗೆ ಹಲವು ವರ್ಷಗಳಿಂದ ಪರಿಚಯವಿದ್ದ. ನಾನು ರಾಮಮಂದಿರಕ್ಕೆ ಏನಾದರೂ ಸೇವೆ ಮಾಡಬೇಕು ಎಂದು ಆತನ ಬಳಿ ಕೇಳಿಕೊಂಡಿದ್ದೆ. 2019ರಲ್ಲಿ ಸುಪ್ರೀಂ ಕೋರ್ಟ್ ತೀರ್ಪು ಬರುವುದಕ್ಕಿಂತ ಕೆಲವು ತಿಂಗಳುಗಳ ಮುಂಚೆ, ದೇವಸ್ಥಾನದಲ್ಲಿ ಮೂರ್ತಿಗಳ ಅಲಂಕಾರಕ್ಕೆ ಬಳಸುವ ಬಟ್ಟೆಗಳು ಹಾಗೂ ಬೆಡ್‌ಶೀಟ್‌ಗಳನ್ನು ಒಗೆಯಲು ವಾಷಿಂಗ್ ಮಷೀನ್ ಅಗತ್ಯವಿದೆ, ಅದನ್ನು ದೇಣಿಗೆಯಾಗಿ ನೀಡಿ ಎಂದು ಟಿನ್ನು ಯಾದವ್ ನನಗೆ ಸಲಹೆ ನೀಡಿದ್ದ” ಎಂದು ಗುಪ್ತಾ ವಿವರಿಸಿದ್ದಾರೆ.
“ನಾನು ಅಯೋಧ್ಯೆಯ ಎಲ್‌ಜಿ ಏಜೆನ್ಸಿಗೆ ಹೋಗಿ ದೊಡ್ಡ ಗಾತ್ರದ ವಾಷಿಂಗ್ ಮಷೀನ್ ಖರೀದಿಸಿದೆ. ಅದರ ಮೇಲೆ ನನ್ನ ಪೂರ್ವಜರ ಹೆಸರನ್ನು ಬರೆಸಿ, ದೇವಸ್ಥಾನದ ಆವರಣದಲ್ಲಿದ್ದ ಮಾನಸ್ ಟ್ರಸ್ಟ್‌ನ ಕಚೇರಿಗೆ ತಲುಪಿಸಿದೆ. ಆಗ ಟ್ರಸ್ಟಿ ಆಗಿದ್ದ ಅನಿಲ್ ಮಿಶ್ರಾ ಅವರ ಸಮ್ಮುಖದಲ್ಲೇ ಅದನ್ನು ಹಸ್ತಾಂತರಿಸಿದ್ದೆ” ಎಂದು ಗುಪ್ತಾ ಹೇಳಿದ್ದಾರೆ. ಕಳೆದೆರಡು ದಿನಗಳ ಹಿಂದಷ್ಟೇ ಟ್ರಸ್ಟಿ ಸ್ಥಾನಕ್ಕೆ ರಾಜೀನಾಮೆ ನೀಡಿರುವ ಅನಿಲ್ ಮಿಶ್ರಾ, ಸದ್ಯ ನಿಧಿ ದುರುಪಯೋಗ ಪ್ರಕರಣದಲ್ಲಿ ವಿಶೇಷ ತನಿಖಾ ದಳದ (SIT) ವಿಚಾರಣೆ ಎದುರಿಸುತ್ತಿದ್ದಾರೆ.
“ಮಷೀನ್ ನೀಡಿದ ಬಳಿಕ ರಶೀದಿ ಕೊಡುವಂತೆ ಟಿನ್ನು ಯಾದವ್‌ಗೆ ಹಲವು ಬಾರಿ ನೆನಪಿಸಿದೆ. ಆದರೆ ಆತ ರಶೀದಿ ನೀಡಲೇ ಇಲ್ಲ. ಸುಸ್ತಾಗಿ ನಾನು ಸುಮ್ಮನಾದೆ. ಈಗ ಎಸ್‌ಐಟಿ ಮುಂದೆ ಹಾಜರಾಗಿ ನನ್ನ ಹೇಳಿಕೆ ದಾಖಲಿಸಲು ಬಯಸುತ್ತೇನೆ” ಎಂದು ಗುಪ್ತಾ ತಿಳಿಸಿದ್ದಾರೆ.
ಇಷ್ಟೇ ಅಲ್ಲದೆ, “ಅದೇ ವರ್ಷ (2019) ನಮ್ಮ ತಾಯಿ ಬಾಲರಾಮನ ಮೂರ್ತಿಗೆ ದೃಷ್ಟಿಯಾಗಬಾರದು ಎಂದು ಮನೆಯಲ್ಲೇ ಸಿದ್ಧಪಡಿಸಿದ್ದ ಕಾಡಿಗೆಯನ್ನು ಹಚ್ಚಲು ಬಯಸಿದ್ದರು. ಇದನ್ನು ಸುಮಾರು 1,000 ದಿಂದ 1,500 ರೂಪಾಯಿ ಮೌಲ್ಯದ ಬೆಳ್ಳಿಯ ‘ಕಜ್ರೋಟಾ’ದಲ್ಲಿ (ಕಾಡಿಗೆ ಇಡುವ ಪಾತ್ರೆ) ತುಂಬಿ ಟಿನ್ನು ಯಾದವ್ ಕೈಗೆ ಕೊಟ್ಟಿದ್ದರು. ಆದರೆ, ಆತ ಆ ಬೆಳ್ಳಿಯ ಪಾತ್ರೆಯನ್ನೂ ಮರಳಿ ನೀಡದೆ ವಂಚಿಸಿದ್ದಾನೆ” ಎಂದು ಉದ್ಯಮಿ ಗುಪ್ತಾ ಆಕ್ರೋಶ ಹೊರಹಾಕಿದ್ದಾರೆ.
1992 ರ ಬಾಬರಿ ಮಸೀದಿ ಧ್ವಂಸದ ಕರಸೇವೆಯಲ್ಲೂ ಭಾಗಿಯಾಗಿದ್ದ ತಮಗೆ, ರಾಮನ ಹೆಸರಿನಲ್ಲಿ ನಡೆದಿರುವ ಈ ನಿಧಿ ದುರುಪಯೋಗ ಭಾರಿ ಬೇಸರ ತರಿಸಿದೆ ಎಂದು ಗುಪ್ತಾ ಹೇಳಿದ್ದಾರೆ.
