ಅಲ್ಲಮ ತನ್ನ ವಚನಗಳಲ್ಲಿ ಬಳಸಿರುವ ವಿಶಿಷ್ಟವಾದ 101 ಪದಗಳನ್ನು ಗುರುತಿಸಿ, ಪ್ರತಿ ಪದದ ಬಗ್ಗೆ ಈ ಕೆಳಗಿನ ಮಾದರಿಯಲ್ಲಿ ವಿವರಿಸಲಾಗುವುದು. ಈದಿನ ಓದುಗರಿಗಾಗಿ ಅಲ್ಲಮನ ಅರಿವು…
ಲಿಂಗಸಾರಾಯ
ಹುಟ್ಟಿದ ನೆಲೆಯ ತೃಷ್ಣೆ ಬಿಡದವರಿಗೆ
ಲಿಂಗದ ಅನುಭಾವದ ಮಾತೇಕೊ?
ಮಾತಿನ ಮಾತಿನ ಮಹಂತರು ಹಿರಿಯರು!
ಗುಹೇಶ್ವರನೆಂಬ ಲಿಂಗಸಾರಾಯ
ಬಹುಮುಖಿಗಳಿಗೆ ತೋರದು, ತೋರದು!
ಪದಾರ್ಥ:
ತೃಷ್ಣೆ = ಲಾಲಸೆ
ಸಾರಾಯ = ಸತ್ವ
ಬಹುಮುಖಿ = ಚಂಚಲಚಿತ್ತ
ವಚನಾರ್ಥ:
ಈ ಜಗತ್ತಿನಲ್ಲಿ ಸಾಮಾನ್ಯವಾಗಿ ಎಲ್ಲರದೂ ಸಾಂಸಾರಿಕ ಮನಸ್ಸು. ಅವರು ಕಾಮ – ಮೋಹಗಳಿಂದ, ದೈಹಿಕ ಆಕರ್ಷಣೆಗಳಿಗೆ ಒಳಗಾಗಿರುತ್ತಾರೆ. ಇದನ್ನೇ ಅಲ್ಲಮ ಹುಟ್ಟಿದ ನೆಲೆಯ ತೃಷ್ಣೆ ಎಂದು ಕರೆದದ್ದು. ಹುಟ್ಟಿದ ನೆಲೆಯ ತೃಷ್ಣೆ ಬಿಡದವರಿಗೆ ಲಿಂಗಸಾಧನೆಯಾಗದು. ಲಿಂಗದ ಅನುಭಾವ ಸಾಧ್ಯವಾಗದು. ರಾಮಕೃಷ್ಣ ಪರಮಹಂಸರು ತಮ್ಮ ಸಂಸಾರಿ ಶಿಷ್ಯರನ್ನು ಉದ್ದೇಶಿಸಿ ಹೇಳುತ್ತಿದ್ದರು. “ನಿಮ್ಮ ಯೌವನದಲ್ಲಿ ವೈವಾಹಿಕ ಜೀವನ ನಡೆಸಿ ಮಕ್ಕಳಾದ ನಂತರ ದೈಹಿಕ ಆಕರ್ಷಣೆಗಳಿಂದ ದೂರಾಗಿ ದೈವ ಚಿಂತನೆಯೆಡೆಗೆ ಮುಖ ಮಾಡಿ” ಎಂದು. ಹಾಗೆ ಮಾಡದೇ ಬರೀ ಮಾತುಗಳಲ್ಲಿ ಅವರು ಯಥೇಚ್ಛವಾಗಿ ಲಿಂಗದ ಮಾತುಗಳನ್ನು ಆಡಬಹುದು. ಅಧ್ಯಾತ್ಮಾನುಭವದ ಸುಂದರ ವರ್ಣನೆಯನ್ನು ಮಾಡಬಹುದು. ಮಾತಿನಲ್ಲೇ ಮನೆ ಕಟ್ಟಬಹುದು. ಅವರು ಬರೀ ಮಾತಿನಲ್ಲಿ ಹಿರಿಯರು, ಮಾತಿನ ಮಹಂತರು, ಅಷ್ಟೆ. ಯಾರ ಮನಸ್ಸು ನಿಶ್ಚಲವೋ, ಚಂಚಲವಿಲ್ಲವೋ ಅವರಿಗೆ ಲಿಂಗಸಾರಾಯದ ದರ್ಶನವಾಗುತ್ತದೆ. ಬಹುಮುಖಿಗಳಿಗೆ ಅದು ಅಸಾಧ್ಯ.
ಪದ ಪ್ರಯೋಗಾರ್ಥ:
ಲಿಂಗಸಾರಾಯ ಎಂದರೆ ಲಿಂಗ ಸತ್ವ.
ಗುಹೇಶ್ವರನೆಂಬ ಲಿಂಗದ ಸತ್ವ ಎಲ್ಲರಿಗೂ ಸುಲಭವಾಗಿ ಗೋಚರಿಸುವುದಿಲ್ಲ ಎಂದು ಹೇಳುವಲ್ಲಿ ಬಳಸಿರುವ ಪದವೇ ಲಿಂಗಸಾರಾಯ. ಸಾರಾಯ ಎಂಬ ಪದಕ್ಕೆ ಸತ್ವ, ತತ್ವ, ಸಾರ, ತಿರುಳು, ಅಮೂಲ್ಯವಾದದ್ದು ಎಂಬ ವಿವಿಧ ಅರ್ಥಗಳಿವೆ. ಹಾಗೆಯೇ ಮದ್ಯ, ಸಾರಾಯಿ ಎಂಬ ಅರ್ಥವೂ ಇದೆ. ಅದು ಇಲ್ಲಿ ಪ್ರಸ್ತುತವಲ್ಲ. ಸಾರಾಯ ಎಂಬ ಪದ ಅಲ್ಲಮನಿಗೆ ಪ್ರಿಯವಾದದ್ದು ಅನಿಸುತ್ತದೆ. ಅಲ್ಲಮನ ಬೇರೆ ವಚನಗಳಲ್ಲೂ “ಸಾರಾಯ” ಧಾರಾಳವಾಗಿ ಪ್ರಯೋಗವಾಗಿದೆ. ಉದಾಹರಣೆಗೆ:
ಮಣ್ಣಿನ ಸಾರಾಯದಿಂದ ಮರನುತ್ಪತ್ಯ. ಮರದ ಸಾರಾಯದಿಂದ ಎಲೆಯುತ್ಪತ್ಯ. ಎಲೆಯ ಸಾರಾಯದಿಂದ ಹೂವ ಉತ್ಪತ್ಯ. ಹೂವ ಸಾರಾಯದಿಂದ ಕಾಯಿ ಉತ್ಪತ್ಯ. ಕಾಯ ಸಾರಾಯದಿಂದ ಹಣ್ಣು ಉತ್ಪತ್ಯ. ಹಣ್ಣಿನ ಸಾರಾಯದಿಂದ ರುಚಿ ಉತ್ಪತ್ಯ ಎಂಬ ಅಲ್ಲಮ ವಚನವಿದೆ. ಸತ್ವ ಎಂಬ ಅರ್ಥದಲ್ಲಿ ಪದ ಬಳಸಬೇಕಾದ ಸಂದರ್ಭದಲ್ಲಿ ಸತ್ವ ಎಂದು ಹೇಳದೆ ಸಾರಾಯ ಎಂದಿರುವುದು ಅನನ್ಯ ಪದ ಪ್ರಯೋಗ. ಲಿಂಗಸಾರಾಯ ಎಂಬ ಪದ ಜೋಡಣೆ ಅಂತಹ ಅನನ್ಯತೆಯನ್ನು ಇಮ್ಮಡಿಗೊಳಿಸಿದೆ.
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಸಾಯದ ಸಂಚು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಅನುಪಮಸುಖಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನೀರಲಾದ ನಿರ್ಮಿತಂಗಳು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಹೊದಕುಳಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಅನುಪಮಸುಖಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಆಶಾಪಾಶ ವಿರಹಿತರು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಡದಿಯರ ಒಲುಮೆ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಬಗೆದು ಬಿತ್ತಿದ ಬ್ರಹ್ಮಬೀಜ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ತಾನಿದ್ದಲ್ಲಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನಿದ್ರೆಯೆಂಬ ಕಾಳೋರಗ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಕೀಲು ಮಡಗಿದಾತ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾದುದು ಮಾದುದಲ್ಲ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾಯದ ಮಂಜು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ದಳದುಳಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಬಯಲು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನಷ್ಟಸಂತಾನ
ಹರಿಹರ ಶಿವಕುಮಾರ್
ಲೇಖಕ, ವೃತ್ತಿಯಿಂದ ಚಾರ್ಟರ್ಡ್ ಅಕೌಂಟೆಂಟ್. ಲೆಕ್ಕಪರಿಶೋಧನೆ ಮತ್ತು ತೆರಿಗೆ ವಿಚಾರಗಳಲ್ಲಿ ಪರಿಣತಿ. ಕನ್ನಡದಲ್ಲಿ ಕಂಪ್ಯೂಟರ್ ಬಳಕೆ ಇವರ ಹವ್ಯಾಸ. ಕನ್ನಡ ಭಾಷೆ ಮತ್ತು ಸಾಹಿತ್ಯದಲ್ಲಿ ಆಸಕ್ತರು. ಶಿವಮೊಗ್ಗ ಜಿಲ್ಲೆಯವರು, ಸದ್ಯ ಬೆಂಗಳೂರಿನಲ್ಲಿ ನೆಲೆ.
