ಅಲ್ಲಮ ತನ್ನ ವಚನಗಳಲ್ಲಿ ಬಳಸಿರುವ ವಿಶಿಷ್ಟವಾದ 101 ಪದಗಳನ್ನು ಗುರುತಿಸಿ, ಪ್ರತಿ ಪದದ ಬಗ್ಗೆ ಈ ಕೆಳಗಿನ ಮಾದರಿಯಲ್ಲಿ ವಿವರಿಸಲಾಗುವುದು. ಈದಿನ ಓದುಗರಿಗಾಗಿ ಅಲ್ಲಮನ ಅರಿವು…
ಪರುಷ ಪುರುಷ
ಪರಿಪರಿಯ ಅವಲೋಹವ
ಪರುಷ ಮುಟ್ಟಲು
ಹೊನ್ನು ಪರಿವರ್ತನಕ್ಕೆ ಬಂದು
ಸಲುತ್ತಿರ್ದುದು ನೋಡಾ.
ಪರುಷವ ಮಾಡುವ ಪುರುಷರೆಲ್ಲರು
ಪರುಷ ಮುಟ್ಟಿದ ಹೊನ್ನಿನಂತಿದ್ದರು ನೋಡಾ. ಪರುಷ ತಾನಾಗಲು, ಹರಿಬ್ರಹ್ಮರಿಗಳವಲ್ಲ. ಸುರರು ಕಿನ್ನರರೆಲ್ಲರು ನಿಮ್ಮ ವರದಲ್ಲಿ ಸಿಲುಕಿದ್ದರು.
ಪರುಷದಂತಿದ್ದರು ನಮ್ಮ
ಗುಹೇಶ್ವರನ ಶರಣರು.
ಪದಾರ್ಥ:
ಅವಲೋಹ = ಇತರೆ ಲೋಹ
ಪರುಷ = ಸ್ಪರ್ಷಮಣಿ
ಪುರುಷ = ವ್ಯಕ್ತಿ, ಶರಣ
ವಚನಾರ್ಥ:
ಕಬ್ಬಿಣವು ಸೇರಿದಂತೆ ವಿವಿಧ ಬಗೆಯ ಲೋಹಗಳಿಗೆ ಪರುಷ ಮಣಿಯನ್ನು ಮುಟ್ಟಿಸಿದರೆ ಆ ಲೋಹಗಳು ಚಿನ್ನವಾಗಿ ಪರಿವರ್ತನೆಗೊಳ್ಳುತ್ತವೆ ಎಂಬುದು ವಚನದಲ್ಲಿ ಅಲ್ಲಮ ಬಳಸಿರುವ ದೃಷ್ಟಾಂತ. ಈ ದೃಷ್ಟಾಂತವನ್ನು ಆಧರಿಸಿ ವಚನ ವಿಸ್ತಾರಗೊಳ್ಳುತ್ತ ಹೋಗುತ್ತದೆ. ಇಲ್ಲಿ ಪರುಷ ಮತ್ತು ಪುರುಷ ಎಂಬ ಪದಗಳ ಚಮತ್ಕಾರಿಕ ಪ್ರಯೋಗವಿದೆ. ಪರುಷ ಅಂದರೆ ಗುರು. ಪುರುಷ ಅಂದರೆ ಶಿಷ್ಯ ಅಥವಾ ಶರಣ. ಸುಜ್ಞಾನವುಳ್ಳ ಗುರು ಮುಟ್ಟಿದ ಶಿಷ್ಯರೆಲ್ಲರೂ ಗುರುವಿನಂತೆಯೇ ಸುಜ್ಞಾನಿಗಳಾದರು. ಪರುಷ ಮುಟ್ಟಿದ ಲೋಹ ಹೊನ್ನಾಗಿ ಪರಿವರ್ತನೆಯಾದಂತೆ. ಆದರೆ ಯಾರಿಂದಲೂ ಮುಟ್ಟಿಸಿಕೊಳ್ಳದೆ ತಾವೇ ಸ್ವಯಂ ಪರುಷವಾಗಬೇಕು ಎಂಬ ಸ್ವಪ್ರತಿಷ್ಠೆಯ ಹಂಬಲದಿಂದ ಸೃಷ್ಟಿಕರ್ತನಲ್ಲಿ ಮೊರೆಹೋಗಿ ಬೇಡಿದ ಹರಿಬ್ರಹ್ಮರು, ಸುರರು, ಕಿನ್ನರರೆಲ್ಲರು ವರವನ್ನು ಬೇಡುವ ಬೇಗುದಿಯಲ್ಲಿ ಬಂಧಿಗಳಾದರೆ ಹೊರತು ಪರುಷವಾಗಲಿಲ್ಲ, ಲಿಂಗದೊಳಗೊಂದಾಗಲಿಲ್ಲ. ಶರಣರು ಎಂಬ ಪುರುಷರು ಗುರುವೆಂಬ ಪರುಷಮಣಿ ಮುಟ್ಟಿದ ಮಾತ್ರದಿಂದಲೇ ಪರುಷವಾದರು. ಲಿಂಗದೊಳಗೊಂದಾದರು.
ಪದ ಪ್ರಯೋಗಾರ್ಥ:
ಪರುಷ ಎಂಬುದು ಸ್ಪರ್ಶಮಣಿ ಅಥವಾ ಸ್ಪರ್ಶವೇದಿಯನ್ನು ಸೂಚಿಸುತ್ತದೆ. ಇದು ಪೌರಾಣಿಕ ರಸವಿದ್ಯೆಯ ಒಂದು ವಸ್ತುವಾಗಿದ್ದು, ಕಬ್ಬಿಣದಂಥ ಕ್ಷುದ್ರಲೋಹಗಳನ್ನು ಚಿನ್ನ ಅಥವಾ ಬೆಳ್ಳಿಯಾಗಿ ಪರಿವರ್ತಿಸುವ ಶಕ್ತಿಯನ್ನು ಹೊಂದಿದೆ ಎಂದು ನಂಬಿಕೆಯಿದೆ. ಪರುಷ ಮಣಿಯನ್ನು ಚಿರಯೌವನ, ಅಮರತ್ವ, ಶ್ರೇಷ್ಠತೆ, ಪರಿಪೂರ್ಣತೆ ಎಂದು ಕೂಡಾ ಅರ್ಥೈಸಲಾಗಿದೆ. ಹರಿಶ್ಚಂದ್ರನು ವಿಶ್ವಾಮಿತ್ರನ ಮಾತಿನಂತೆ ತನ್ನ ರಾಜ್ಯವನ್ನು ತೊರೆದು ಪತ್ನಿ ಮತ್ತು ಪುತ್ರನೊಂದಿಗೆ ತೆರಳುವ ಸನ್ನಿವೇಶದಲ್ಲಿ ಪುರಜನರು ವ್ಯಕ್ತಪಡಿಸುವ ಸಂಕಟದ ಪರಿಯನ್ನು ಕವಿ ರಾಘವಾಂಕ ತನ್ನ ಹರಿಶ್ಚಂದ್ರ ಕಾವ್ಯದಲ್ಲಿ “ಪುರದ ಪುಣ್ಯಂ ಪುರುಷ ರೂಪಿಂದೆ ಪೋಗುತಿದೆ” ಎಂದು ವರ್ಣಿಸಿದ್ದಾನೆ. ಕವಿ ರಾಘವಾಂಕನಿಗಿಂತ ಕೆಲವೇ ವರ್ಷಗಳು ಹಿರಿಯನಾದ ಅಲ್ಲಮ ಪರುಷ ಪುರುಷ ಎಂಬ ಪದಗಳನ್ನು ವಚನದಲ್ಲಿ ಬಳಸಿದ ರೀತಿಯನ್ನು ಗಮನಿಸಿದರೆ ಅಲ್ಲಮನು ಅನುಭಾವಿ ಮಾತ್ರವಲ್ಲದೆ ಆಗಿನ ಕಾಲದ ಅಪ್ರತಿಮ ಕನ್ನಡ ಕವಿ ಪುಂಗವನೇ ಎನ್ನಬಹುದು. ವಚನದಲ್ಲಿ ಮತ್ತೆ ಮತ್ತೆ ಹೈಲೈಟ್ ಆಗುವ ಪರುಷ ಪುರುಷ ಎಂಬ ಪ್ರಾಸಬದ್ದ ಪದಗಳು ಅತ್ಯಂತ ಪರಿಣಾಮಕಾರಿಯಾದ ಪದ ಪ್ರಯೋಗಗಳು.
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಕೀಲು ಮಡಗಿದಾತ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾದುದು ಮಾದುದಲ್ಲ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾಯದ ಮಂಜು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ದಳದುಳಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಬಯಲು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನಷ್ಟಸಂತಾನ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಅಗ್ನಿಸ್ತಂಭದ ರಕ್ಷೆ
ಹರಿಹರ ಶಿವಕುಮಾರ್
ಲೇಖಕ, ವೃತ್ತಿಯಿಂದ ಚಾರ್ಟರ್ಡ್ ಅಕೌಂಟೆಂಟ್. ಲೆಕ್ಕಪರಿಶೋಧನೆ ಮತ್ತು ತೆರಿಗೆ ವಿಚಾರಗಳಲ್ಲಿ ಪರಿಣತಿ. ಕನ್ನಡದಲ್ಲಿ ಕಂಪ್ಯೂಟರ್ ಬಳಕೆ ಇವರ ಹವ್ಯಾಸ. ಕನ್ನಡ ಭಾಷೆ ಮತ್ತು ಸಾಹಿತ್ಯದಲ್ಲಿ ಆಸಕ್ತರು. ಶಿವಮೊಗ್ಗ ಜಿಲ್ಲೆಯವರು, ಸದ್ಯ ಬೆಂಗಳೂರಿನಲ್ಲಿ ನೆಲೆ.
