ಸಂಸತ್ತಿನಲ್ಲಿ ಮಹಿಳಾ ಮೀಸಲಾತಿ ತಿದ್ದುಪಡಿ ಮಸೂದೆಗಳನ್ನು ಅಂಗೀಕರಿಸಲು ಅಗತ್ಯವಿರುವ ಮೂರನೇ ಎರಡರಷ್ಟು ಬಹುಮತದ ಕೊರತೆಯನ್ನು ಆಡಳಿತಾರೂಢ ಎನ್‌ಡಿಎ ಎದುರಿಸುತ್ತಿದೆ. ಸಂವಿಧಾನ ತಿದ್ದುಪಡಿಗೆ ಲೋಕಸಭೆ ಮತ್ತು ರಾಜ್ಯಸಭೆ ಎರಡರಲ್ಲೂ ‘ವಿಶೇಷ ಬಹುಮತ’ದ ಅಗತ್ಯವಿದ್ದು, ಇತರೆ ಪಕ್ಷಗಳ ಬೆಂಬಲವಿಲ್ಲದೆ ಅಥವಾ ಕೆಲವು ಪಕ್ಷಗಳು ಮತದಾನ ಪ್ರಕ್ರಿಯೆಯಿಂದ ಹೊರಗುಳಿಯದೆ ಮಸೂದೆ ಅಂಗೀಕಾರ ಕಷ್ಟಸಾಧ್ಯವಾಗಿದೆ.
ಸಂವಿಧಾನವನ್ನು ತಿದ್ದುಪಡಿ ಮಾಡಲು ಸದನದ ಒಟ್ಟು ಸದಸ್ಯ ಬಲದ ಬಹುಮತ (ಶೇ. 50ಕ್ಕಿಂತ ಹೆಚ್ಚು) ಮತ್ತು ಹಾಜರಿದ್ದು ಮತ ಚಲಾಯಿಸುವ ಸದಸ್ಯರ ಪೈಕಿ ಮೂರನೇ ಎರಡರಷ್ಟು (2/3) ಬೆಂಬಲದ ಅಗತ್ಯವಿರುತ್ತದೆ. ಪ್ರಸ್ತುತ ಲೋಕಸಭೆಯಲ್ಲಿರುವ ಎಲ್ಲಾ 540 ಸದಸ್ಯರು ಹಾಜರಿದ್ದು ಮತ ಚಲಾಯಿಸಿದರೆ, ಮಸೂದೆ ಅಂಗೀಕಾರಕ್ಕೆ 360 ಸಂಸದರ ಬೆಂಬಲ ಬೇಕಾಗುತ್ತದೆ. ಆದರೆ, ಲೋಕಸಭೆಯಲ್ಲಿ ಎನ್‌ಡಿಎ 293 ಸದಸ್ಯರ ಬೆಂಬಲವನ್ನು (ಸದನದ ಶೇ. 54ರಷ್ಟು) ಮಾತ್ರ ಹೊಂದಿದೆ.
ಇನ್ನೊಂದೆಡೆ, ವಿರೋಧ ಪಕ್ಷಗಳ ಬಳಿ 233 ಸಂಸದರ ಬಲವಿದೆ. 7 ಮಂದಿ ಪಕ್ಷೇತರ ಸಂಸದರಿದ್ದರೆ, ವೈಎಸ್‌ಆರ್‌ಸಿಪಿ (YSRCP), ಎಐಎಂಐಎಂ (AIMIM) ಮತ್ತು ಶಿರೋಮಣಿ ಅಕಾಲಿದಳದಂತಹ ಪಕ್ಷಗಳಿಗೆ ಸೇರಿದ 7 ಸಂಸದರು ಮಸೂದೆಗೆ ಇದುವರೆಗೂ ಬಹಿರಂಗವಾಗಿ ಬೆಂಬಲ ಸೂಚಿಸಿಲ್ಲ.
ಇದನ್ನು ಓದಿದ್ದೀರಾ? ಇರಾನ್‌: ಬಿತ್ತಿದ್ದನ್ನು ಬೆಳೆದ ಅಮೆರಿಕ, ಆಡಳಿತ ಬದಲಿಸುವ ಕೊಲೆಗಡುಕತನ ಕಡುಕಟ್ಟರ್ ವಾದವನ್ನು ಭುಗಿಲೆಬ್ಬಿಸಿತು!
ಲೋಕಸಭೆಯಲ್ಲಿ ಚರ್ಚೆಯಾಗುತ್ತಿರುವ ಈ ಮಸೂದೆ ಅಂಗೀಕಾರವಾಗಬೇಕಾದರೆ, ಪ್ರಮುಖ ವಿರೋಧ ಪಕ್ಷಗಳಾದ ಸಮಾಜವಾದಿ ಪಕ್ಷ (37 ಸಂಸದರು), ತೃಣಮೂಲ ಕಾಂಗ್ರೆಸ್ (28 ಸಂಸದರು) ಅಥವಾ ಡಿಎಂಕೆ (22 ಸಂಸದರು) – ಈ ಮೂರರ ಪೈಕಿ ಕನಿಷ್ಠ ಎರಡು ಪಕ್ಷಗಳಾದರೂ ಮತದಾನದಿಂದ ಹೊರಗುಳಿಯುವುದು ಅನಿವಾರ್ಯವಾಗಿದೆ. ಪ್ರಮುಖ ವಿರೋಧ ಪಕ್ಷವಾದ ಕಾಂಗ್ರೆಸ್ ಲೋಕಸಭೆಯಲ್ಲಿ 98 ಸಂಸದರನ್ನು ಹೊಂದಿದೆ.
ರಾಜ್ಯಸಭೆಯ ಪರಿಸ್ಥಿತಿ
ಮೇಲ್ಮನೆಯಾದ ರಾಜ್ಯಸಭೆಯಲ್ಲೂ ಸಹ ಮಸೂದೆಗೆ ಹಾದಿ ಸುಲಭವಾಗಿಲ್ಲ. ಬಿಆರ್‌ಎಸ್ (BRS), ವೈಎಸ್‌ಆರ್‌ಸಿಪಿ, ಬಿಜೆಡಿ, ಬಿಎಸ್‌ಪಿ ಮತ್ತು ಪಕ್ಷೇತರರು ಸೇರಿದಂತೆ ಒಟ್ಟು 20 ಸಂಸದರಿದ್ದು, ಇವರ ಮತಗಳು ನಿರ್ಣಾಯಕ ಪಾತ್ರ ವಹಿಸಲಿವೆ. ರಾಜ್ಯಸಭೆಯಲ್ಲಿ ಸಂವಿಧಾನ ತಿದ್ದುಪಡಿ ಮಸೂದೆಯು ಯಶಸ್ವಿಯಾಗಿ ಅಂಗೀಕಾರಗೊಳ್ಳಲು ಆಡಳಿತಾರೂಢ ಮೈತ್ರಿಕೂಟಕ್ಕೆ ಕನಿಷ್ಠ 163 ಸಂಸದರು ಹಾಜರಿದ್ದು ಮತ ಚಲಾಯಿಸುವ ಅಗತ್ಯವಿದೆ.
