ಕೃತಕ ಬುದ್ಧಿಮತ್ತೆ (AI) ಮತ್ತು ರೊಬೊಟಿಕ್ಸ್ ತಂತ್ರಜ್ಞಾನದ ಬೆಳವಣಿಗೆಯಿಂದಾಗಿ ಜಾಗತಿಕವಾಗಿ ಈಗಾಗಲೇ ಲಕ್ಷಾಂತರ ಮಂದಿ ಉದ್ಯೋಗ ಕಳೆದುಕೊಂಡಿದ್ದಾರೆ. ಮುಂದಿನ ದಿನಗಳಲ್ಲಿ ಈ ಉದ್ಯೋಗ ನಷ್ಟ ಮತ್ತಷ್ಟು ಹೆಚ್ಚಾಗಬಹುದು ಎಂಬ ಆತಂಕದ ನಡುವೆ, ಟೆಸ್ಲಾ ಸಿಇಒ ಎಲಾನ್ ಮಸ್ಕ್ ‘ಸಾರ್ವತ್ರಿಕ ಅಧಿಕ ಆದಾಯ’ (Universal High Income) ನೀಡುವ ವಿಶಿಷ್ಟ ಪರಿಹಾರವೊಂದನ್ನು ಕಂಡುಕೊಟ್ಟಿದ್ದಾರೆ. ಭವಿಷ್ಯದಲ್ಲಿ ಜಗತ್ತಿನಲ್ಲಿ ಬಡತನವೇ ಇರಲ್ಲ ಎಂದಿದ್ದಾರೆ. ಹಲವರು ಇದನ್ನು ನಿರುದ್ಯೋಗ ಬಿಕ್ಕಟ್ಟಿಗೆ ಮಾಸ್ಟರ್‌ ಪ್ಲ್ಯಾನ್‌ ಎಂದೇ ಬಣ್ಣಿಸುತ್ತಿದ್ದಾರೆ.
ಮಸ್ಕ್ ತಮ್ಮ ಸಾಮಾಜಿಕ ಜಾಲತಾಣ ‘X’ ನಲ್ಲಿ ಹೀಗೊಂದು ಪೋಸ್ಟ್ ಮಾಡಿದ್ದು, AI ಮತ್ತು ಆಟೊಮೇಷನ್ ಕಾರಣದಿಂದ ಉಂಟಾಗುವ ನಿರುದ್ಯೋಗ ಸಮಸ್ಯೆಯನ್ನು ನಿಭಾಯಿಸಲು ಫೆಡರಲ್ ಸರ್ಕಾರಗಳು ಜನರಿಗೆ ನೇರವಾಗಿ ಚೆಕ್ ಮೂಲಕ ಹಣ ಪಾವತಿಸುವ ‘ಸಾರ್ವತ್ರಿಕ ಅಧಿಕ ಆದಾಯ’ ಯೋಜನೆ ಜಾರಿಗೊಳಿಸಬೇಕು. ನಿರುದ್ಯೋಗಕ್ಕೆ ಇದು ಅತ್ಯುತ್ತಮ ಮಾರ್ಗ ಎಂದು ವಾದಿಸಿದ್ದಾರೆ.
Universal HIGH INCOME via checks issued by the Federal government is the best way to deal with unemployment caused by AI.
— Elon Musk (@elonmusk) April 17, 2026
AI/robotics will produce goods & services far in excess of the increase in the money supply, so there will not be inflation.
ಸಾಮಾನ್ಯವಾಗಿ ಸರ್ಕಾರ ಹಣವನ್ನು ಹೆಚ್ಚು ಹಂಚಿದರೆ ಹಣದುಬ್ಬರ (Inflation) ಹೆಚ್ಚಾಗುತ್ತದೆ ಎಂಬ ವಾದವಿದೆ. ಆದರೆ, ಮಸ್ಕ್ ಇದನ್ನು ನಿರಾಕರಿಸಿದ್ದಾರೆ. “AI ಮತ್ತು ರೊಬೊಟಿಕ್ಸ್ ವ್ಯವಸ್ಥೆಯು ಮಾರುಕಟ್ಟೆಯಲ್ಲಿ ಹಣದ ಪೂರೈಕೆಗಿಂತಲೂ ಹೆಚ್ಚಿನ ಪ್ರಮಾಣದಲ್ಲಿ ಸರಕು ಮತ್ತು ಸೇವೆಗಳನ್ನು ಉತ್ಪಾದಿಸುತ್ತದೆ. ಹೀಗಾಗಿ ಈ ಯೋಜನೆಯಿಂದ ಹಣದುಬ್ಬರ ಉಂಟಾಗುವುದಿಲ್ಲ” ಎಂದು ಅವರು ಸಮರ್ಥಿಸಿಕೊಂಡಿದ್ದಾರೆ.
ಹೂಡಿಕೆದಾರ ರೇ ಡಾಲಿಯೊ ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿದ್ದ ಮಸ್ಕ್, “ಭವಿಷ್ಯದಲ್ಲಿ ಜಗತ್ತಿನಲ್ಲಿ ಬಡತನವೇ ಇರುವುದಿಲ್ಲ, ಹಾಗಾಗಿ ಹಣ ಉಳಿಸುವ ಅಗತ್ಯವೂ ಇರುವುದಿಲ್ಲ. ಎಲ್ಲರಿಗೂ ಸಾರ್ವತ್ರಿಕ ಅಧಿಕ ಆದಾಯ ಸಿಗಲಿದೆ” ಎಂದು ಭವಿಷ್ಯ ನುಡಿದಿದ್ದಾರೆ.
ಮಸ್ಕ್ ಅವರ ಈ ವಿಭಿನ್ನ ಆಲೋಚನೆಗೆ ಜಾಲತಾಣಗಳಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಜನರು ಸರ್ಕಾರದ ಹಣದ ಮೇಲೆ ಅವಲಂಬಿತರಾದರೆ, ಅದು ಅಧಿಕಾರಿಗಳಿಗೆ ಜನರ ಜೀವನದ ಮೇಲೆ ಹೆಚ್ಚಿನ ನಿಯಂತ್ರಣ ನೀಡುತ್ತದೆ. ನಮ್ಮ ಸರ್ಕಾರಗಳು ಈಗಾಗಲೇ ಅಧಿಕಾರ ದಾಹ ಹೊಂದಿದ್ದು, ಅವುಗಳನ್ನು ನಂಬಲು ಸಾಧ್ಯವಿಲ್ಲ ಎಂದು ಹಲವರು ವಾದಿಸಿದ್ದಾರೆ.
ಇದನ್ನೂ ಓದಿ: ಅದಾನಿ ಗ್ರೂಪ್‌ಗೆ ಕ್ಲೀನ್ ಚಿಟ್: ಸೋಲಾರ್ ಟೆಂಡರ್ ಅಕ್ರಮ ಆರೋಪದ ದೂರು ವಜಾಗೊಳಿಸಿದ CCI
ಹಣವೊಂದೇ ಎಲ್ಲವನ್ನೂ ಪರಿಹರಿಸುವುದಿಲ್ಲ. “ಬಹಳಷ್ಟು ಜನರು ಕೆಲಸಕ್ಕೆ ಹೋಗುವುದು ತಮಗೆ ಸಮಾಜದಲ್ಲಿ ಒಂದು ಬೆಲೆ ಇದೆ ಎನ್ನುವ ಭಾವನೆಗಾಗಿ. ಕೆಲಸವಿಲ್ಲದೆ ಕೇವಲ ಹಣ ನೀಡುವುದರಿಂದ ಮನುಷ್ಯನ ಜೀವನದ ಉದ್ದೇಶವೇ ಇಲ್ಲದಂತಾಗುತ್ತದೆ” ಎಂದು ಬಳಕೆದಾರರೊಬ್ಬರು ಕಳವಳ ವ್ಯಕ್ತಪಡಿಸಿದ್ದಾರೆ.
ಸಂಪತ್ತಿನ ಮರುಹಂಚಿಕೆ ಅಗತ್ಯವಿರಬಹುದು, ಆದರೆ ಅದರ ನಿಯಂತ್ರಣ ಕೇವಲ ಬಿಲಿಯನೇರ್‌ಗಳು ಅಥವಾ ರಾಜಕಾರಣಿಗಳ ಕೈಯಲ್ಲಿರಬಾರದು. ಅದು ಸಮುದಾಯಗಳಿಗೆ ನೇರವಾಗಿ ಹಂಚಿಕೆಯಾಗುವಂತಹ ಪಾರದರ್ಶಕ ವ್ಯವಸ್ಥೆ ಬೇಕು ಎಂಬ ಅಭಿಪ್ರಾಯವೂ ಕೇಳಿಬಂದಿದೆ.
ಒಟ್ಟಿನಲ್ಲಿ ಮಸ್ಕ್ ಅವರು ಭವಿಷ್ಯದ ಎಐ ಪ್ರಪಂಚದಲ್ಲಿ ಹಣಕಾಸಿನ ಭದ್ರತೆಗೆ ದಾರಿ ತೋರಿಸಿದ್ದಾರಾದರೂ, ಅದನ್ನು ಪ್ರಾಯೋಗಿಕವಾಗಿ ಜಾರಿಗೆ ತರುವುದು ಹೇಗೆ ಮತ್ತು ಅದರ ಸಾಮಾಜಿಕ ಪರಿಣಾಮಗಳೇನು ಎಂಬ ಬಗ್ಗೆ ಇನ್ನೂ ಸ್ಪಷ್ಟವಾಗಿ ತಿಳಿಸಿಲ್ಲ.
