ಚಿಕ್ಕಬಳ್ಳಾಪುರ ಲೋಕಸಭಾ ಕ್ಷೇತ್ರದಲ್ಲಿ ಶುಕ್ರವಾರ ಶೇ.72 ರಷ್ಟು ಮಂದಿ ಮತ ಚಲಾವಣೆ ಮಾಡಿದ್ದು, ಯಾವುದೇ ಅಹಿತಕರ ಘಟನೆಗಳು ನಡೆಯದ ಶಾಂತಿಯುತ ಮತದಾನಕ್ಕೆ ಕ್ಷೇತ್ರ ಸಾಕ್ಷಿಯಾಯಿತು.
ಬೆಳಿಗ್ಗೆ 7 ಗಂಟೆಯಿಂದ ಆರಂಭವಾದ ಮತದಾನ ಪ್ರಕ್ರಿಯೆಯಲ್ಲಿ ಕ್ಷೇತ್ರದ ಜನತೆ ಸಕ್ರಿಯವಾಗಿ ಪಾಲ್ಗೊಂಡು ಮತದಾನ ಮಾಡುವ ಮೂಲಕ ಹಕ್ಕು ಚಲಾಯಿಸಿದರು.
ಬಿಸಿಲಿನ ಕಾರಣ ಕೆಲವರು ಬೆಳಗ್ಗೆಯೇ ಬಂದು ಮತ ಚಲಾಯಿಸಿದರು. ಮಧ್ಯಾಹ್ನ 1 ಗಂಟೆ ವೇಳೆಗೆ ಶೇ.50ರಷ್ಟು ಮತದಾನ ಪೂರ್ಣಗೊಂಡಿತು. ಬಿಸಿಲಿನ ಕಾರಣ ಮಧ್ಯಾಹ್ನ 3 ಗಂಟೆವರೆಗೂ ಮತದಾನ ನಿಧಾನಗತಿಯಲ್ಲಿ ಸಾಗಿತು. 3 ಗಂಟೆ ಬಳಿಕ ಬಿಸಿಲಿನ ತಾಪಮಾನ ತುಸು ಕಡಿಮೆಯಾದ ಬಳಿಕ ಜನ ಹೊರಬಂದು ಮತದಾನಕ್ಕೆ ಮುಂದಾದರು. ಮಧ್ಯಾಹ್ನ 3 ಗಂಟೆ ವೇಳೆಗೆ ಶೇಕಡ 55.90ರಷ್ಟು ಮತದಾನ ಪೂರ್ಣಗೊಂಡಿತು.
5 ಗಂಟೆಗೆ ಬಿಸಿಲಿನ ಧಗೆ ಕಡಿಮೆಯಾದ ಹಿನ್ನೆಲೆ ಮತದಾನಕ್ಕೆ ಬರುವವರ ಸಂಖ್ಯೆ ಹೆಚ್ಚಾಯಿತು. ನಂತರ ಶೇಕಡ 55 ರಷ್ಟಿದ್ದ ಮತದಾನ, 5 ಗಂಟೆ ವೇಳೆಗೆ ಶೇಕಡ 70.97ಕ್ಕೆ ತಲುಪಿತು. ಕೆಲ ಮಂದಿ ಹೊರ ಜಿಲ್ಲೆ ಹಾಗೂ ದೂರದ ಊರುಗಳಿಂದ ಕೊನೆ ಕ್ಷಣದಲ್ಲಿ ಬಂದು ಮತದಾನಕ್ಕೆ ಮುಂದಾದರು. ಕೊನೆ ಕ್ಷಣದಲ್ಲಿ ಬಂದವರಿಗೂ ಮತಗಟ್ಟೆ ಅಧಿಕಾರಿಗಳು ಮತದಾನಕ್ಕೆ ಅವಕಾಶ ಮಾಡಿಕೊಟ್ಟರು. ಸಂಜೆ 6 ರ ಬಳಿಕ ಶೇಕಡ 71.85 ರಷ್ಟು ಮತದಾನವಾಗುವ ಮೂಲಕ ಮತದಾನ ಸುಖಾಂತ್ಯ ಕಂಡಿತು.
ಕರ್ನಾಟಕ ಸರಕಾರದ ವೋಟರ್ ಟರ್ನ್ ಔಟ್ ಆಪ್ ಅಂಕಿ ಅಂಶಗಳ ಪ್ರಕಾರ ಸಂಜೆ 6 ಗಂಟೆ ವೇಳೆಗೆ ಬಾಗೇಪಲ್ಲಿಯಲ್ಲಿ 74%, ಚಿಕ್ಕಬಳ್ಳಾಪುರದಲ್ಲಿ 79.25%, ದೇವನಹಳ್ಳಿಯಲ್ಲಿ 70.63%, ದೊಡ್ಡಬಳ್ಳಾಪುರದಲ್ಲಿ 74.50%, ಗೌರಿಬಿದನೂರಲ್ಲಿ 73.31%, ಹೊಸಕೋಟೆಯಲ್ಲಿ 81.02%, ನೆಲಮಂಗಲದಲ್ಲಿ 73.23%, ಯಲಹಂಕದಲ್ಲಿ 60.69% ಮತದಾನ ನಡೆದಿದೆ.
ಹೊಸಕೋಟೆಯಲ್ಲಿ ಹೆಚ್ಚು ಮತದಾನ : ಹೊಸಕೋಟೆ ವಿಧಾನಸಭಾ ಕ್ಷೇತ್ರದಲ್ಲಿ ಬೆಳಗ್ಗೆ ನಿಧಾನಗತಿಯಲ್ಲಿ ಸಾಗಿದ ಮತದಾನವು ಮಧ್ಯಾಹ್ನ 3 ಗಂಟೆ ಸುಮಾರಿಗೆ ಶೇಕಡ 63.84ಕ್ಕೆ ಏರಿಕೆಯಾಯಿತು. ಸಂಜೆ 6 ಗಂಟೆಗೆ ಶೇಕಡ 81.02ಕ್ಕೆ ತಲುಪುವ ಮೂಲಕ ಲೋಕಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ಅತೀ ಹೆಚ್ಚು ಮತದಾನವಾದ ಕ್ಷೇತ್ರ ಇದಾಯಿತು.
ಯಲಹಂಕದಲ್ಲಿ ಡಲ್ : ಬಿಜೆಪಿ ಶಾಸಕ ಎಸ್ ಆರ್.ವಿಶ್ವನಾಥ್ ಅವರ ಯಲಹಂಕ ವಿಧಾನಸಭಾ ಕ್ಷೇತ್ರದಲ್ಲಿ ಮಧ್ಯಾಹ್ನ 3 ಗಂಟೆಗೆ ಶೇಕಡ 46.18 ರಷ್ಟು ಮತದಾನ ಪೂರ್ಣಗೊಂಡಿದ್ದು, ಸಂಜೆ 5ರ ವೇಳೆಗೆ ಶೇಕಡ 58 ಮತದಾನವಾಯಿತು. ಬಳಿಕ 6 ಗಂಟೆಗೆ ಮತದಾನ ಪ್ರಕ್ರಿಯೆ ಮುಕ್ತಾಯಗೊಂಡಿದ್ದು, ಶೇಕಡ 60.69 ರಷ್ಟು ಮತದಾನ ನಡೆಯಿತು. ಇಡೀ ಲೋಕಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ಈ ಕ್ಷೇತ್ರದಲ್ಲಿ ಅತಿ ಕಡಿಮೆ ಮತದಾನವಾಗಿದ್ದು ಕಂಡುಬಂತು.
ಈ ಸುದ್ದಿ ಓದಿದ್ದೀರಾ? ಬೆಂಗಳೂರು | ಕಿವಿ ಕೇಳಿಸದ, ಮಾತು ಬಾರದ ಮಹಿಳೆಯ 8 ವರ್ಷದ ಬಾಲಕಿಯ ಮೇಲೆ ಲೈಂಗಿಕ ದೌರ್ಜನ್ಯ : ದೂರು ದಾಖಲು
ಒಟ್ಟಾರೆಯಾಗಿ ಅಬ್ಬರದ ಪ್ರಚಾರದ ನಡುವೆ ಚಿಕ್ಕಬಳ್ಳಾಪುರ ಲೋಕಸಭಾ ವ್ಯಾಪ್ತಿಯಲ್ಲಿ ಯಾವುದೇ ಅಹಿತಕರ ಘಟನೆಗಳು ಸಂಭವಿಸದೆ ಬಹುತೇಕ ಶಾಂತಿಯುತ ಮತದಾನ ನಡೆಯಿತು.
