ದೇಶಾದ್ಯಂತ ಸಾಮಾಜಿಕ ಜಾಲತಾಣಗಳಲ್ಲಿ ಸಂಚಲನ ಮೂಡಿಸಿರುವ ‘ಕಾಕ್ರೋಚ್ ಜನತಾ ಪಕ್ಷ’ (CJP) ಪ್ರೇರಿತ ಅನಾಮಧೇಯ ಯುವಕರ ಗುಂಪೊಂದು, ನಗರಸಭೆಯ ಬೇಜವಾಬ್ದಾರಿತನದ ವಿರುದ್ಧ ವಿನೂತನವಾಗಿ ಪ್ರತಿಭಟನೆ ನಡೆಸಿದೆ. ಮಾತ್ರವಲ್ಲದೆ, ಯಶಸ್ಸನ್ನೂ ಕಂಡಿದೆ. ರಸ್ತೆ ಮಧ್ಯದ ಅಪಾಯಕಾರಿ ಗುಂಡಿಯನ್ನು ಮುಚ್ಚದ ಅಧಿಕಾರಿಗಳಿಗೆ ಯುವಜನರು ವ್ಯಂಗ್ಯದ ಮೂಲಕ ಚುರುಕು ಮುಟ್ಟಿಸಿದ್ದು, ಎಚ್ಚೆತ್ತ ಅಧಿಕಾರಿಗಳು ಗುಂಡಿ ಮುಚ್ಚಿದ್ದಾರೆ.
ಈ ಘಟನೆ ಬಾಗಲಕೋಟೆ ಜಿಲ್ಲೆಯ ಇಳಕಲ್ ಪಟ್ಟಣದಲ್ಲಿ ನಡೆದಿದೆ. ಇಳಕಲ್ ನಗರಸಭೆಯ ಅಧಿಕಾರಿಗಳ ನಿರ್ಲಕ್ಷದ ವಿರುದ್ಧ ಯುವಜನರ ವಿನೂತನ ಪ್ರತಿಭಟನೆ ಗಮನ ಸೆಳದಿದೆ. ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಇಳಕಲ್ ನಗರದ 7ನೇ ವಾರ್ಡ್‌ನ ಸರ್ಕಾರಿ ಆಸ್ಪತ್ರೆ ಮತ್ತು ಅನ್ನಪೂರ್ಣ ಲಾಡ್ಜ್ ಹತ್ತಿರವಿರುವ ಕಿರು ಸೇತುವೆಯ ಕಾಂಕ್ರೀಟ್ ಕಿತ್ತುಹೋಗಿತ್ತು. ರಸ್ತೆ ಮಧ್ಯದಲ್ಲೇ ಕಬ್ಬಿಣದ ಸರಳುಗಳು ಬಾಯಿ ತೆರೆದು ನಿಂತಿದ್ದು, ವಾಹನ ಸವಾರರ ಪ್ರಾಣಕ್ಕೆ ಸಂಚಕಾರ ತರುವಂತಿತ್ತು. ಈ ಬಗ್ಗೆ ಸ್ಥಳೀಯ ನಿವಾಸಿಗಳು ನಗರಸಭೆಗೆ ಹಲವು ಬಾರಿ ಮನವಿ ಮಾಡಿದರೂ ಯಾವುದೇ ಪ್ರಯೋಜನವಾಗಿರಲಿಲ್ಲ.
ಇದರಿಂದ ಆಕ್ರೋಶಗೊಂಡ ಯುವಜನರು, ಗುಂಡಿಯಿಂದ ಮೇಲಕ್ಕೆದ್ದಿದ್ದ ಕಬ್ಬಿಣದ ಕಂಬಿಗೆ ಪೋಸ್ಟರ್ ಒಂದನ್ನು ತೂಗುಹಾಕಿದರು. ಅದರಲ್ಲಿ, “ನಾನು ಕಾಕ್ರೋಚ್ (ಜಿರಳೆ), ನಿಮಗೊಂದು ಆತಂಕದ ವಿಷಯ ಹೇಳಲು ಬಂದಿದ್ದೇನೆ. ದೊಡ್ಡದಾದ ಈ ಗುಂಡಿ ಮುಚ್ಚಿಸಲು ಆಳುವವರಿಗಾಗಲಿ, ಅಧಿಕಾರಿಗಳಿಗಾಗಲಿ ಪುರುಸೊತ್ತಿಲ್ಲ. ನಿರುದ್ಯೋಗಿ ಮತ್ತು ಸೋಮಾರಿಯಾದ ನನ್ನಿಂದಲೂ ಇದು ಆಗದ ಕೆಲಸ. ದಯವಿಟ್ಟು ವಾಹನ ಸವಾರರು ಎಚ್ಚರಿಕೆಯಿಂದ ಓಡಾಡಿ” ಎಂದು ಜಿರೆಳೆಯ ಹೆಸರಿನಲ್ಲಿ ವ್ಯವಸ್ಥೆಯನ್ನು ಅಣಕಿಸಲಾಗಿತ್ತು.
In a unique protest against pothole-ridden roads, civic-conscious residents in Ilkal town of Bagalkot district in north Karnataka put up warning posters near a damaged stretch of road to alert motorists and draw attention to the issue.
— Hate Detector 🔍 (@HateDetectors) May 22, 2026
The posters featured a quirky illustration… pic.twitter.com/8FOQvVUBA9
ಇದರ ವಿಡಿಯೋ ವೈರಲ್ ಆಗುತ್ತಿದ್ದಂತೆಯೇ, ನೆಟ್ಟಿಗರು ಸ್ಥಳೀಯ ಆಡಳಿತದ ವಿರುದ್ಧ ಆಕ್ರೋಶ ಹೊರಹಾಕಲಾರಂಭಿಸಿದ್ದರು. ಇದೀಗ, ಎಚ್ಚೆತ್ತ ನಗರಸಭೆ ಅಧಿಕಾರಿಗಳು, ಸದ್ದಿಲ್ಲದೆ ಇಡೀ ಗುಂಡಿಯನ್ನು ಮುಚ್ಚಿದ್ದಾರೆ. ಸಾರ್ವಜನಿಕರ ಸಂಚಾರಕ್ಕೆ ಅನುವು ಮಾಡಿಕೊಟ್ಟಿದ್ದಾರೆ.
