ಬಾಗಲಕೋಟೆ ಜಿಲ್ಲೆಯ ರನ್ನನ ನಾಡು ಮುಧೋಳದ ಸಂಗೊಳ್ಳಿ ರಾಯಣ್ಣ ವೃತ್ತದಲ್ಲಿ ದಿ. ರಮೇಶ್ ಗಡದನ್ನವರ ವೇದಿಕೆಯಲ್ಲಿ ನಡೆಯುತ್ತಿದ್ದ ಹೋರಾಟಕ್ಕೆ ಐತಿಹಾಸಿಕ ಮಹತ್ವದ ಜಯ ದೊರೆತಿದೆ. ಸತತವಾಗಿ 6 ದಿನಗಳ ನಿರಂತರ ಈ ಹೋರಾಟದ ಫಲವಾಗಿ ಬಾಗಲಕೋಟೆ ಜಿಲ್ಲೆಯ ಐದು ಸಕ್ಕರೆ ಕಾರ್ಖಾನೆಗಳು ಪ್ರತಿ ಟನ್ ಕಬ್ಬಿಗೆ ಮೊದಲನೇ ಕಂತಾಗಿ ₹3,800 ನೀಡುವುದಾಗಿ ಘೋಷಣೆ ಮಾಡಿವೆ.
ರೈತರ ಒಗ್ಗಟ್ಟು ಮತ್ತು ಸಂಘಟಿತ ಹೋರಾಟಕ್ಕೆ ಸಂದ ಜಯ ಇದಾಗಿದೆ. ಮುಧೋಳದ ಹೋರಾಟದ ವೇದಿಕೆ ಸುಮಾರು 50 ವರ್ಷಗಳಿಂದ ನಡೆದುಕೊಂಡು ಬಂದಿದ್ದು ಒಂದು ಜಿಲ್ಲೆಗೆ ನಮ್ಮ ಹೋರಾಟ ಸೀಮಿತವಾಗಿರದೆ ಇಡೀ ಕರ್ನಾಟಕಕ್ಕೆ ಏಕರೂಪದ ಬೆಲೆ ನಿಗದಿ ಮಾಡುವಲ್ಲಿ ರೈತ ಹೋರಾಟ ಯಶಸ್ಸು ಕಂಡಿತು.
6ನೇ ದಿನದ ಹೋರಾಟ ತೀವ್ರ ಸ್ವರೂಪ ಪಡೆದುಕೊಳ್ಳುವ ಹಂತದಲ್ಲೇ ಹಲವು ಕಾರ್ಖಾನೆ ಅಧಿಕಾರಿಗಳು ಪ್ರಥಮ ಹಂತಕ್ಕೆ 3800 ನೀಡುವದಾಗಿ ಒಪ್ಪಿಗೆ ನೀಡಿದರು. ಇದರಿಂದ ಬೆಳಗಾವಿ ಜಿಲ್ಲೆಯ ನಿಗದಿ ದರಕ್ಕಿಂತ 200 ರೂಪಾಯಿ ಹೆಚ್ಚಿಗೆ ಪಡೆಯುವಲ್ಲಿ ರೈತರು ಯಶಶ್ವಿಯಾಗಿದ್ದಾರೆ ಇದರಿಂದ ರಾಜ್ಯ ಮಟ್ಟದಲ್ಲಿಯೇ ಹೆಸರುವಾಸಿಯಾದ ರನ್ನ ನಾಡಿನ ಕಬ್ಬು ಬೆಳೆಗಾರರ ವೇದಿಕೆಗೆ ಮತ್ತೊಂದು ಐತಿಹಾಸಿಕ ಗೆಲುವು ಸಿಕ್ಕಂತಾಗಿದೆ.
ಈ ಕುರಿತಾಗಿ ಈದಿನ.ಕಾಮ್‌ ಜೊತೆಗೆ ಮಾತನಾಡಿದ ಕಬ್ಬು ಬೆಳೆಗಾರರ ಸಂಘದ ತಾಲೂಕು ಅಧ್ಯಕ್ಷ ದುಂಡಪ್ಪ ಯರಗಟ್ಟಿ ಮಾತನಾಡಿ, “ಯಥಾ ರಾಜಾ ತಥಾ ಪ್ರಜಾ ಎಂಬಂತೆ ನಮ್ಮ ರೈತ ಸಂಘದ ಹಿರಿಯರ ಮಾರ್ಗದರ್ಶನದಲ್ಲಿ ದಿ. ರಮೇಶ್ ಗಡದನ್ನವರ ವೇದಿಕೆ ಐತಿಹಾಸಿಕ ಹಿನ್ನಲೆ ಹೊಂದಿದ ಮುಧೋಳ ಹೋರಾಟ, ಸೊಟ್ಟಿಲ್ಲದ ಗಟ್ಟಿಯಾದ ಅನ್ನದಾತರ ಹೋರಾಟದ ಫಲಶ್ರುತಿಯಾಗಿ, 3800 ಬೆಲೆ ಪಡೆಯುವಲ್ಲಿ ಯಶಸ್ವಿಯಾಗಿದ್ದೇವೆ. ಈ ಬೆಲೆ ಕರ್ನಾಟಕ ರಾಜ್ಯದ್ಯಂತ ಏಕರೂಪತೆ ಪಡೆದುಕೊಳ್ಳಬೇಕು” ಎಂದಿದ್ದಾರೆ.
