ಬೀದರ್ ನಗರದ ಪೂಜ್ಯ ಚನ್ನಬಸವ ಪಟ್ಟದೇವರು ರಂಗಮಂದಿರದಲ್ಲಿ ಕರ್ನಾಟಕ ಪಂಚಶೀಲ ಸಾಹಿತ್ಯ ಕಲಾ ಸಮಿತಿ, ಬೀದರ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಬೆಂಗಳೂರು ಇವರ ಸಂಯುಕ್ತಾಶ್ರಯದಲ್ಲಿ 2025-26ನೇ ಸಾಲಿನ ಸಾಮಾನ್ಯ ಸಂಘ-ಸಂಸ್ಥೆಗಳ ಧನಸಹಾಯ ಯೋಜನೆಯಡಿ ಜರುಗಿದ ಜಿಲ್ಲಾ ಮಟ್ಟದ ಸಂಗೀತೋತ್ಸವ, ಜಾನಪದ ಸಾಂಸ್ಕೃತಿಕ ಕಾರ್ಯಕ್ರಮ ಹಾಗೂ ಕಲಾವಿದರ ಸನ್ಮಾನ ಕಾರ್ಯಕ್ರಮ ಜರುಗಿತು.
ನ್ಯಾಯವಾದಿ ಖಾಜಾ ಕಲಿಂ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ, ʼಉಲ್ಲಾ ವೈವಿಧ್ಯ ಕಲೆ, ಸಂಸ್ಕೃತಿ, ಪರಂಪರೆಯ ಶ್ರೀಮಂತಿಕೆ ಹೊಂದಿರಲು ನಮ್ಮ ದೇಶದಲ್ಲಿರುವ ಹಳ್ಳಿಗಳೇ ಕಾರಣ. ಆದರೆ ಇಂದು ಅವಿಭಕ್ತ ಕುಟುಂಬಗಳು ವಿಭಕ್ತ ಕುಟುಂಬಗಳಾಗಿ ಸಂಸ್ಕೃತಿಯ ನಾಶವಾಗುತ್ತಿದ್ದು, ಸಂಬಂಧಗಳು ಒಡೆದು ಹೋಗುತ್ತಿವೆʼ ಎಂದು ಕಳವಳ ವ್ಯಕ್ತಪಡಿಸಿದರು.
ʼಆಧುನಿಕ ತಂತ್ರಜ್ಞಾನ ಬೆಳೆದಂತೆ ಸಮಾಜದಲ್ಲಿ ಸಂಬಂಧಗಳು ಬೆಲೆ ಕಳೆದುಕೊಳ್ಳುತ್ತಿವೆ. ದೇಶ ಎಷ್ಟೇ ಅಭಿವೃದ್ಧಿ ಹೊಂದಿದರೂ ಸಹೋದರತೆ, ಸಹಬಾಳ್ವೆ, ಪ್ರೀತಿ, ನೆಮ್ಮದಿ ಮುಖ್ಯವಾಗಿದೆ. ಹಣ, ಆಸ್ತಿ ಸಂಪಾದನೆಗಿಂತ ಮಾನವೀಯ ಮೌಲ್ಯಗಳ ಗಳಿಕೆ ಮುಖ್ಯವಾಗಿದೆʼ ಎಂದರು.
ಕರ್ನಾಟಕ ಗಡಿ ಪ್ರದೇಶ ಅಭಿವೃದ್ಧಿ ಪ್ರಾಧಿಕಾರದ ಸದಸ್ಯ ಸಂಜುಕುಮಾರ ಅತಿವಾಳೆ ಮಾತನಾಡಿ, ʼಸರ್ಕಾರ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯು ಸಂಘ-ಸಂಸ್ಥೆಗಳಿಗೆ ಧನಸಹಾಯ ನೀಡುವ ಮೂಲಕ ಕಲೆ, ಸಾಹಿತ್ಯ ಮತ್ತು ಸಂಸ್ಕೃತಿಯ ರಕ್ಷಣೆ ಹಾಗೂ ಬೆಳವಣಿಗೆಗೆ ಸಹಕಾರ ನೀಡುತ್ತಿದೆ. ಇದರಿಂದ ನಾಡಿನ ಸಂಸ್ಕೃತಿ ಪರಂಪರೆ ಜೀವಂತವಾಗಿದೆʼ ಎಂದರು.
ನ್ಯಾಯವಾದಿ ಬಿ. ಕೃಷ್ಣಪ್ಪ ಮಾತನಾಡಿ, ʼಸಂಘ ಸಂಸ್ಥೆಗಳ ಮುಖಾಂತರ ಸಂಸ್ಕೃತಿ, ಜಾನಪದ ಮತ್ತು ಜನಪದ ಕಲೆ ಸಾಹಿತ್ಯ ಉಳಿಸಿ ಬೆಳೆಸುವ ಕೆಲಸ ನಡೆಯುತ್ತಿದೆʼ ಎಂದರು.
ಪೂಜ್ಯ ಭಂತೆ ಧಮ್ಮಕಿರ್ತಿ ಅವರು ಸಾನಿಧ್ಯ ವಹಿಸಿ ತ್ರೀಶರಣ ಪಂಚ ಶೀಲವನ್ನು ಬೋಧಿಸಿದರು. ಮುಖ್ಯ ಅತಿಥಿಗಳಾಗಿ ಕರ್ನಾಟಕ ರಾಜ್ಯ ದಲಿತ ಸಂಘರ್ಷ ಸಮಿತಿ ರಾಜ್ಯ ಸಂಘಟನಾ ಸಂಚಾಲಕ ಮಾರುತಿ ಬೌದ್ಧೆ, ಬಿ.ಎಸ್.ಐ ಜಿಲ್ಲಾಧ್ಯಕ್ಷ ರಾಜಪ್ಪಾ ಗೂನ್ನಳ್ಳಿಕರ್, ಆರ್.ಪಿ.ಐ (ಅಂಬೇಡ್ಕರ್) ರಾಜ್ಯ ಸಂಯೋಜಕ ಮಹೇಶ ಗೋರನಾಳಕರ್, ಪ್ರಾಧ್ಯಾಪಕ ರಾಜಕುಮಾರ ಅಲ್ಲೂರೆ ಹಾಗೂ ರೇಖಾ ಕಾಂಚೆ ಭಾಗವಹಿಸಿದ್ದರು.
ಈ ಸಂದರ್ಭದಲ್ಲಿ 30 ಜನ ಕಲಾವಿದರನ್ನು ಸನ್ಮಾನಿಸಿ ಗೌರವಿಸಲಾಯಿತು. ಸಿದ್ಧಾರ್ಥ ಕಾಂಚೆ ರಚಿಸಿದ “ಕೆ-ಸೆಟ್” ಪುಸ್ತಕವನ್ನು ಬಿಡುಗಡೆ ಮಾಡಲಾಯಿತು.
ಸುಮಾರು 10 ತಂಡಗಳು ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮಗಳು ಗಮನ ಸೆಳೆದವು. ಡಾ.ಬಿ.ಆರ್.ಅಂಬೇಡ್ಕರ್ ಭಜನೆ ಗೀತೆಗಳನ್ನು ಜೈಶೀಲಾ ಜ್ಯೋತಿ ವಾಲ್ದೋಡ್ಡಿ ಹಾಗೂ ಸಂಗಡಿಗರು, ಜಾನಪದ ಗೀತೆಗಳನ್ನು ಅಶೋಕ ಸಂಗುಳಗಿ ಹಾಗೂ ಸಂಗಡಿಗರು, ತತ್ವಪದಗಳನ್ನು ಶಂಕರರಾವ ಹಿಪ್ಪಳಗಾಂವ ಹಾಗೂ ಸಂಗಡಿಗರು, ಕ್ರಾಂತಿ ಗೀತೆಗಳನ್ನು ಶಿವಾಜಿ ಮಾನಕಾರೆ ಹಾಗೂ ಸಂಗಡಿಗರು, ಜೋಗುಳ ಪದಗಳನ್ನು ಶ್ರೀಮತಿ ಸರಸ್ವತಿ ಸಾಂಗಳೆ ಹಾಗೂ ಸಂಗಡಿಗರು, ಮೊಹರಂ, ಭುಲಾಯಿ ಪದಗಳನ್ನು ದಶರಥ ಚಾಂಬಾಳಕರ್ ಹಾಗೂ ಸಂಗಡಿಗರು, ಅಂಬೇಡ್ಕರ್ ಭಜನೆಗಳನ್ನು ದೀಲಿಪ್ ಸಿರ್ಸೆ ಹಾಗೂ ಸಂಗಡಿಗರು, ಶಿವ ಭಜನೆಗಳನ್ನು ಸಂತೋಷ ದೇಶಮುಖ ಗೋರನಾಳ ಹಾಗೂ ಸಂಗಡಿಗರು ಹಾಗೂ ಭೀಮ ಗೀತೆಗಳನ್ನು ಚಂದ್ರಮ್ಮಾ ನಾಗಂಪಲ್ಲಿ ಹಾಗೂ ಸಂಗಡಿಗರು ಪ್ರಸ್ತುತಪಡಿಸಿದರು.
ಇದನ್ನೂ ಓದಿ : ಬೀದರ್ | ಎಸ್ಐಆರ್, ಇವಿಎಂ ವಿರುದ್ದದ 21 ದಿನಗಳ ಏಕಾಂಗಿ ಉಪವಾಸ ಸತ್ಯಾಗ್ರಹ ಅಂತ್ಯ
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಲಕ್ಷ್ಮಣ ಕಾಂಚೆ ವಹಿಸಿದ್ದರು. ಸಮಿತಿಯ ಪ್ರಧಾನ ಕಾರ್ಯದರ್ಶಿ ಸೂರ್ಯಕಾಂತ ಬಡಿಗೇರ ಸ್ವಾಗತಿಸಿದರು. ಅಂಬಾದಾಸ್ ಗಾಯಕವಾಡ ನಿರೂಪಣೆ ನಡೆಸಿ, ಅರ್ಜುನ ಕಾಂಚೆ ವಂದಿಸಿದರು.
