ಬೀದರ್ ನಗರ ಸೇರಿದಂತೆ ಜಿಲ್ಲಾದ್ಯಂತ ಹಲವೆಡೆ ಮಂಗಳವಾರ ತಡರಾತ್ರಿ ಎರಡು ಗಂಟೆಯಿಂದ ಶುರುವಾದ ಜೋರು ಮಳೆ ಬೆಳಿಗ್ಗೆವರೆಗೆ ಮುಂದುರೆಯಿತು.
ಬಿರುಗಾಳಿ, ಗುಡುಗು ಸಹಿತ ಆರಂಭವಾದ ಮಳೆ ರಭಸವಾಗಿ ಸುರಿಯಿತು. ಕೆಲವಡೆ ಬುಧವಾರ ಬೆಳಿಗ್ಗೆ ಎಂಟು ಗಂಟೆವರೆಗೂ ಉತ್ತಮ ಮಳೆಯಾಯಿತು.
ಭಾರೀ ಮಳೆಗೆ ಬೀದರ್ ನಗರದ ಪ್ರಮುಖ ರಸ್ತೆಗಳು ಜಲಾವೃತಗೊಂಡವು, ಬ್ಯಾಂಕ್‌ ಬಡಾವಣೆ ಸೇರಿ ಕೆಲ ಕಡೆ ನೀರು ಸರಾಗವಾಗಿ ಹರಿದು ಹೋಗಲು ಸೂಕ್ತ ಚರಂಡಿ ವ್ಯವಸ್ಥೆ ಇಲ್ಲದೆ ಮನೆಗಳ ಸುತ್ತಲೂ ಮಳೆನೀರು ಸಂಗ್ರಹಗೊಂಡು ನಿವಾಸಿಗಳು ಪರದಾಡಿದರು.
ದಿನವಿಡೀ ರಣಬಿಸಿಲಿನಿಂದ ಕಾವೇರಿದ್ದ ವಾತಾವರಣವು ಮಳೆಯಿಂದಾಗಿ ತಂಪಾಯಿತು. ಬಿಸಿಲಿನ ತೀವ್ರತೆಯಿಂದ ತತ್ತರಿಸಿದ್ದವರಿಗೆ ಸಂಪೂರ್ಣ ಮಳೆಗಾಲದ ಹಿತಾನುವಭ ಆಯಿತು.
ಜಿಲ್ಲೆಯಲ್ಲಿ ಕೆಲದಿನಗಳಿಂದ ಮುಂಗಾರು ಪೂರ್ವ ಮಳೆ ಶುರುವಾಗಿದ್ದು, ರೈತರು ಮುಂಗಾರು ಬಿತ್ತನೆಗೆ ಸಕಲ ಸಿದ್ಧತೆಯಲ್ಲಿ ತೊಡಗಿದ್ದಾರೆ. ಗ್ರಾಮೀಣ ಭಾಗದಲ್ಲಿ ರೈತರು ಇನ್ನಷ್ಟು ಮಳೆರಾಯನ ಆಗಮನದ ನಿರೀಕ್ಷೆಯಲ್ಲಿದ್ದಾರೆ.
ಹುಮನಾಬಾದ್‌ ತಾಲೂಕಿನ ಮೊಳಕೇರಾ ಗ್ರಾಮದಲ್ಲಿ ಸುರಿದ ಭಾರೀ ಮಳೆ ಮತ್ತು ಗಾಳಿಯಿಂದ ಲಕ್ಷ್ಮಿ ಮಂದಿರದ ಎದುರು ನಿಲ್ಲಿಸಿದ ಕಾರಿನ ಮೇಲೆ ಬೇವಿನ ಮರ ಮುರಿದು ಬಿತ್ತಿ ಕಾರಿನ ಗ್ಲಾಸ್ ಒಡೆದು ಹೋಗಿದೆ. ಇನ್ನು ಜಿಲ್ಲೆಯ ಕೆಲವೆಡೆ ಬಿರುಗಾಳಿ ಮಳೆಗೆ ಮನೆ ಮೇಲಿನ ಪತ್ರಾಸ್‌ ಹಾರಿ ಹೋಗಿರುವುದು ತಿಳಿದುಬಂದಿದೆ.
ಇದನ್ನೂ ಓದಿ : ಬೀದರ್ | ಮನೆ ಮೇಲಿಂದ ಕಲ್ಲು ಬಿದ್ದು ಬಾಲಕಿ ಸಾವು : ಈಶ್ವರ ಖಂಡ್ರೆ ಕಂಬನಿ, ಪರಿಹಾರಕ್ಕೆ ಸೂಚನೆ
–ನಿಮ್ಮ ಊರು, ನಗರ, ಪಟ್ಟಣದ ಕುಂದು ಕೊರತೆಗಳ ಪೋಟೋ, ವಿಡಿಯೋ ಮಾಹಿತಿಯನ್ನು
ಈದಿನ.ಕಾಮ್ ನ್ಯೂಸ್ ಬೀದರ್ ಸಹಾಯವಾಣಿ 9035053805 ವಾಟ್ಸಪ್ ನಂಬರ್‌ಗೆ ಕಳುಹಿಸಿ.
