ಅಕ್ರಮ ಮರಳು ದಂಧೆ ವಿರುದ್ಧ ದೂರು ನೀಡಿದ್ದ ಕರ್ನಾಟಕ ರಕ್ಷಣಾ ವೇದಿಕೆ (ಕರವೇ) ಜಿಲ್ಲಾಧ್ಯಕ್ಷ ಆನಂದ ಎಸ್. ದೊಡ್ಡಮನಿ ಅವರ ಮೇಲೆ ಹಲ್ಲೆಗೆ ಯತ್ನ ನಡೆಸಿ ಜೀವ ಬೆದರಿಕೆ ಹಾಕಿದ ಆರೋಪದಡಿ ಬ್ರಹ್ಮಪುರ ಪೊಲೀಸ್ ಠಾಣೆಯಲ್ಲಿ ಶನಿವಾರ ಪ್ರಕರಣ ದಾಖಲಾಗಿದೆ.
ದೂರಿನ್ವಯ, ಶಹಾಬಾದ್ ತಾಲೂಕಿನ ಕಡೆಹಳ್ಳಿ ಸಮೀಪ ಭೀಮಾ ನದಿಗೆ ನಿರ್ಮಿಸಲಾಗುತ್ತಿರುವ ಬ್ಯಾರೇಜ್ ಕಾಮಗಾರಿಯಲ್ಲಿ ಅಕ್ರಮವಾಗಿ ಬೋಟ್ ಬಳಸಿ ಮರಳು ಸಾಗಾಟ ಮತ್ತು ಬಳಕೆ ನಡೆಯುತ್ತಿದೆ ಎಂದು ಕರವೇ ವತಿಯಿಂದ ತಹಶೀಲ್ದಾರ್‌ಗೆ ದೂರು ಸಲ್ಲಿಸಲಾಗಿತ್ತು. ಅದರಂತೆ ಜು. 3ರಂದು ತಹಶೀಲ್ದಾರ್ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದರು.
ಈ ಬೆಳವಣಿಗೆಯಿಂದ ಅಕ್ರಮ ಮರಳು ದಂಧೆ ಬಯಲಾಗುವ ಭೀತಿಯಿಂದ ಅರುಣ್ ಭರಣಿ ಹಾಗೂ ಆತನ ಬೆಂಬಲಿಗರು ಜಗತ್ ವೃತ್ತದ ಸಮೀಪದ ಆಮಂತ್ರಣ ಹೋಟೆಲ್ ಬಳಿ ಆನಂದ ದೊಡ್ಡಮನಿ ಅವರನ್ನು ತಡೆದು ಬೆದರಿಕೆ ಹಾಕಿ ಹಲ್ಲೆಗೆ ಯತ್ನಿಸಿದ್ದಾರೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.
ಆರೋಪಿ ಅರುಣ್ ಭರಣಿ ತನ್ನೊಂದಿಗೆ ರೌಡಿಶೀಟರ್ ಸಾಗರ್ ಸೇರಿದಂತೆ 10ರಿಂದ 15 ಮಂದಿಯನ್ನು ಕರೆದುಕೊಂಡು ಬಂದು, “ಮರಳು ದಂಧೆ ವಿರುದ್ಧ ದೂರು ನೀಡಲು ನಿನಗೆಷ್ಟು ಧೈರ್ಯ? ಜೀವಂತ ಬಿಡುವುದಿಲ್ಲ” ಎಂದು ಬೆದರಿಕೆ ಹಾಕಿದ್ದಾರೆ. ಅಲ್ಲದೆ, ಹಲ್ಲೆಗೆ ಮುಂದಾಗಿದ್ದು, ಹೋಟೆಲ್‌ನ ಸಿಸಿಟಿವಿ ಕ್ಯಾಮೆರಾಗಳನ್ನು ಗಮನಿಸಿ ಅಲ್ಲಿಂದ ತೆರಳುವ ವೇಳೆ ಸುಪಾರಿ ಕೊಟ್ಟು ಕೊಲೆ ಮಾಡಿಸುವುದಾಗಿ ಜೀವ ಬೆದರಿಕೆ ಹಾಕಿದ್ದಾರೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ಇದನ್ನು ಓದಿದ್ದೀರಾ? ಯಾದಗಿರಿ | ಭೀಮಾ ನದಿ ಬ್ರಿಡ್ಜ್ ಬಳಿ ಅಪರಿಚಿತ ವ್ಯಕ್ತಿಯ ಶವ ಪತ್ತೆ ; ದೂರು ದಾಖಲು
ಈ ಸಂಬಂಧ ಬ್ರಹ್ಮಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.
