ಮುಂಗಾರು ಕೊರತೆಯಿಂದ ಬರಗಾಲದ ಛಾಯೆ ಆವರಿಸಿದೆ. ಕಲಬುರಗಿ ಜಿಲ್ಲೆಯ ಕಾಳಗಿ ತಾಲೂಕಿನ ಕೆಲವು ಹೋಬಳಿಗಳಲ್ಲಿ ಬಿತ್ತನೆ ಮಾಡಲಾದ ಬೆಳೆಗಳು ತಾಪಮಾನದ ಹೆಚ್ಚಳದಿಂದ ಒಣಗುತ್ತಿದ್ದು, ರೈತರು ತೀವ್ರ ಸಂಕಷ್ಟಕ್ಕೆ ಒಳಗಾಗಿದ್ದಾರೆ. ಆದ್ದರಿಂದ ಬರಗಾಲ ಘೋಷಿಸಿ ರೈತರ ಸಾಲ ಮನ್ನಾ ಮಾಡುವಂತೆ ರಸ್ತೆ ತಡೆದು ಪ್ರತಿಭಟನೆ ನಡೆಸಲಾಯಿತು.
ಅಂತರ್ಜಲ ಮಟ್ಟವೂ ಕುಸಿತ ಕಂಡಿದ್ದು, ಕೊಳವೆ ಬಾವಿಗಳೂ ಬತ್ತಿವೆ. ಸಾಲ ಮಾಡಿ ಬಿತ್ತನೆ ಬೀಜ, ರಸಗೊಬ್ಬರ ಖರೀದಿಸಿದ್ದರಿಂದ ಆ ನಷ್ಟವೂ ಬೆನ್ನಿಗೆ ಬಿದ್ದಿದೆ. ಮೊಳಕೆ ಬಂದಿದ್ದ ಉದ್ದು, ತೊಗರಿ, ಸೋಯಾ ಬೆಳೆಗಳು ಪೂರ್ತಿ ನಾಶವಾಗಿವೆ. ಪರಿಸ್ಥಿತಿ ಹೀಗೆ ಮುಂದುವರೆದರೆ ರೈತ ಕುಟುಂಬಗಳು ಬದುಕು ಹೊರೆಯುವುದು ಕಷ್ಟವಾಗುತ್ತದೆ. ಕಾಳಗಿ ತಾಲೂಕನ್ನು ಬರಗಾಲ ಪೀಡಿತ ಪ್ರದೇಶವೆಂದು ಘೋಷಣೆ ಮಾಡಬೇಕು ಎಂದು ಕಾಳಗಿ ತಾಲೂಕು ರೈತ ಸಮಿತಿ ಒತ್ತಾಯಿಸಿದೆ.
ರೈತರ ಬೇಡಿಕೆಗಳು: “ಕಾಳಗಿ ತಾಲೂಕನ್ನು ಬರಗಾಲ ಪೀಡಿತ ಪ್ರದೇಶವೆಂದು ಘೋಷಿಸಬೇಕು. ದನಕರುಗಳಿಗೆ ಮೇವಿನ ಕೊರತೆ ಉಂಟಾಗಿದೆ. ಆದ್ದರಿಂದ ಕಣಿಕೆ ಗೋಶಾಲೆ ತೆರೆಯಬೇಕು. ರೈತರ ಸಂಪೂರ್ಣ ಸಾಲ ಮನ್ನಾ ಮಾಡಿ ಬದುಕಿಗೆ ನೆರವಾಗಬೇಕು. ಜೊತೆಗೆ ಮೋಡ ಬಿತ್ತನೆ ಮಾಡುವ ಕುರಿತು ಚಿಂತಿಸಬೇಕಿದೆ. ಬೆಳೆ ಕಟಾವು, ವಿಮಾ ಪರಿಹಾರವಾಗಿ ೩೦೦ ಕೋಟಿ ಹಣ ಬಿಡುಗಡೆ ಮಾಡಬೇಕು” ಎಂದು ರೈತ ಸಂಘ ಬೇಡಿಕೆ ಇಟ್ಟಿದೆ.
