ಸಿಂಧನೂರು ಉಪವಿಭಾಗದ ಕಿರಿಯ ಅಭಿಯಂತರ ನಾಗರಾಜ ಪ್ರಭಾ ಅವರನ್ನು ₹10 ಕೋಟಿಗೂ ಅಧಿಕ ಮೊತ್ತದ ಅವ್ಯವಹಾರ ಹಾಗೂ ಅಧಿಕಾರ ದುರುಪಯೋಗದ ಆರೋಪದ ಹಿನ್ನೆಲೆಯಲ್ಲಿ ಜಿಲ್ಲಾ ಪಂಚಾಯಿತಿ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಅಮಾನತುಗೊಳಿಸಿ ಆದೇಶ ಹೊರಡಿಸಿದ್ದಾರೆ.
ಗ್ರಾಮೀಣ ಕುಡಿಯುವ ನೀರು ಮತ್ತು ನೈರ್ಮಲ್ಯ ಸಿಂಧನೂರು ಉಪವಿಭಾಗದ ಸಹಾಯಕ ಕಾರ್ಯಪಾಲಕ ಅಭಿಯಂತರ ಶ್ಯಾಮಸುಂದರ ಕಾಳೇಕರ್ ಅವರು 15 ದಿನಗಳ ರಜೆಯಲ್ಲಿದ್ದ ಸಂದರ್ಭದಲ್ಲಿ, ಅವರ ಸ್ಥಾನಕ್ಕೆ ಪ್ರಭಾರ ವಹಿಸಿಕೊಂಡಿದ್ದ ಕಿರಿಯ ಅಭಿಯಂತರ ನಾಗರಾಜ ಪ್ರಭಾ ಅವರು 18ಕ್ಕೂ ಹೆಚ್ಚು ಕಾಮಗಾರಿಗಳಿಗೆ ಸಂಬಂಧಿಸಿದಂತೆ ಹಲವು ಪತ್ರ ವ್ಯವಹಾರ ನಡೆಸಿದ್ದರು. ಈ ವೇಳೆ ಸುಮಾರು ₹10 ಕೋಟಿ ಮೊತ್ತದ ಅವ್ಯವಹಾರ ನಡೆದಿದೆ ಎಂಬ ಆರೋಪ ಕೇಳಿಬಂದಿತ್ತು.
ಈ ಕುರಿತು ನಡೆಸಿದ ತನಿಖೆಯಲ್ಲಿ ಅಧಿಕಾರ ದುರುಪಯೋಗ ಹಾಗೂ ಅವ್ಯವಹಾರ ನಡೆದಿರುವುದು ಕಂಡುಬಂದ ಹಿನ್ನೆಲೆಯಲ್ಲಿ ಸೆ.28ರಂದು ನಾಗರಾಜ ಪ್ರಭಾ ಅವರನ್ನು ಅಮಾನತುಗೊಳಿಸಿ ಜಿಲ್ಲಾ ಪಂಚಾಯಿತಿ ಸಿಇಒ ಆದೇಶ ಹೊರಡಿಸಿದ್ದಾರೆ.
ಪ್ರಕರಣದ ಹಿನ್ನೆಲೆ :ಸಹಾಯಕ ಕಾರ್ಯಪಾಲಕ ಅಭಿಯಂತರ ಶ್ಯಾಮಸುಂದರ ಕಾಳೇಕರ್ ಅವರು 2024ರ ಜೂನ್ 20ರಿಂದ ಜುಲೈ 5ರವರೆಗೆ ರಜೆಯಲ್ಲಿದ್ದ ಸಂದರ್ಭದಲ್ಲಿ ನಾಗರಾಜ ಪ್ರಭಾ ಅವರಿಗೆ 15 ದಿನಗಳ ಪ್ರಭಾರ ನೀಡಲಾಗಿತ್ತು. ಈ ವೇಳೆ ನಾಗರಾಜ ಪ್ರಭಾ ಅವರ ವಿರುದ್ಧ ಈಗಾಗಲೇ ಕಚೇರಿ ಮಟ್ಟದಲ್ಲಿ ಹಲವು ದೂರುಗಳು ಹಾಗೂ ವಿಚಾರಣೆಗಳು ಬಾಕಿ ಇದ್ದವು. ಸರ್ಕಾರದ ಹಂತದಲ್ಲಿಯೂ ಗಂಭೀರ ಸ್ವರೂಪದ ವಿಚಾರಣೆ ಬಾಕಿ ಇರುವಾಗಲೇ ಅವರಿಗೆ ಪ್ರಭಾರ ಜವಾಬ್ದಾರಿ ನೀಡಲಾಗಿದೆ ಎಂದು ಆರೋಪಿಸಲಾಗಿದೆ.
ಶ್ಯಾಮಸುಂದರ ಕಾಳೇಕರ್ ರಜೆಯಲ್ಲಿದ್ದ ಸಂದರ್ಭದಲ್ಲಿ ನಾಗರಾಜ ಪ್ರಭಾ ಅವರು ಸಿಇಒ ಅವರ ಲಿಖಿತ ಆದೇಶವಿಲ್ಲದೆ ತೊಟ್ಟಿ ಸಿಟಿಸಿ ಸೃಷ್ಟಿಸಿ ಪ್ರಭಾರ ವಹಿಸಿಕೊಂಡಿದ್ದರು ಎಂದು ಆರೋಪಿಸಲಾಗಿದೆ. ನಿಯಮಗಳ ಪ್ರಕಾರ ಶಿಸ್ತು ಕ್ರಮ ಅಥವಾ ವಿಚಾರಣೆ ಬಾಕಿ ಇರುವ ಅಧಿಕಾರಿಯನ್ನು ಹಣಕಾಸು ಹೊಣೆಗಾರಿಕೆ ಹೊಂದಿರುವ ಹುದ್ದೆಯಿಂದ ದೂರ ಇಲ್ಲಿ ಸಬೇಕಾಗುತ್ತದೆ. ಆದರೆ ನಾಗರಾಜ ಪ್ರಭಾ ಅವರ ವಿಚಾರದಲ್ಲಿ ಈ ನಿಯಮಗಳನ್ನು ಉಲ್ಲಂಘಿಸಲಾಗಿದೆ ಎಂದು ಆರೋಪಿಸಲಾಗಿದೆ.
ಸಹಾಯಕ ಕಾರ್ಯಪಾಲಕ ಅಭಿಯಂತರ ಲಭ್ಯವಿದ್ದ ಸಂದರ್ಭದಲ್ಲಿ ಕಿರಿಯ ಅಭಿಯಂತರರಿಗೆ ಪ್ರಭಾರ ನೀಡಲು ಅವಕಾಶವಿಲ್ಲದಿದ್ದರೂ ನಾಗರಾಜ ಪ್ರಭಾ ಅವರಿಗೆ ಜವಾಬ್ದಾರಿ ನೀಡಲಾಗಿದೆ ಎಂದು ಆರೋಪಿಸಲಾಗಿದ್ದು, ಇದೇ ಅವಕಾಶವನ್ನು ಬಳಸಿಕೊಂಡು 15 ದಿನಗಳ ಅವಧಿಯಲ್ಲಿ ಸುಮಾರು 10 ಕೋಟಿ ರೂ. ಮೊತ್ತದ ಬಿಲ್ಗಳಿಗೆ ಸಹಿ ಮಾಡಿ ಅವ್ಯವಹಾರ ನಡೆಸಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ.
ಪೂರ್ಣ ಪ್ರಮಾಣದ ಸಹಾಯಕ ಕಾರ್ಯಪಾಲಕ ಅಭಿಯಂತರ ಶ್ಯಾಮಸುಂದರ ಕಾಳೇಕರ್ ಅವರು ಎಸ್ಬಿಆರ್ನಲ್ಲಿ ಅಂಡರ್ಲೈನ್ ಮಾಡಿ ಸಹಿ ಮಾಡಿದ ನಂತರವೂ ನಾಗರಾಜ ಪ್ರಭಾ ಅವರು ಮತ್ತೆ ಸಹಾಯಕ ಕಾರ್ಯಪಾಲಕ ಅಭಿಯಂತರರ ಹೆಸರಿನಲ್ಲಿ ಸಹಿ ಮಾಡಿ ಹಣಕಾಸು ಅಧಿಕಾರ ಚಲಾಯಿಸಿದ್ದಾರೆ ಎಂದು ಆರೋಪಿಸಲಾಗಿದೆ.
ಈ ಸುದ್ದಿ ಓದಿದ್ದೀರಾ? ರಾಯಚೂರು | ಕಾಲೇಜಿನಲ್ಲಿ ಶೌಚಾಲಯವಿದೆ, ನೀರಿಲ್ಲ: 400 ಮಂದಿ ವಿದ್ಯಾರ್ಥಿನಿಯರ ಪರದಾಟ
ಕ್ರಿಮಿನಲ್ ಹಾಗೂ ಆರ್ಥಿಕ ಅವ್ಯವಹಾರದ ಆರೋಪಗಳ ಹಿನ್ನೆಲೆಯಲ್ಲಿ ನಾಗರಾಜ ಪ್ರಭಾ ಅವರನ್ನು ಅಮಾನತುಗೊಳಿಸಿರುವುದು ಕ್ರಮಬದ್ಧವಾಗಿದ್ದರೂ, ಈವರೆಗೆ ಕ್ರಿಮಿನಲ್ ಪ್ರಕರಣ ದಾಖಲಿಸದೆ ಕೇವಲ ಇಲಾಖಾ ವಿಚಾರಣೆಗೆ ಸೀಮಿತಗೊಳಿಸಿರುವುದು ಚರ್ಚೆ ಹಾಗೂ ಅನುಮಾನಗಳಿಗೆ ಕಾರಣವಾಗಿದೆ.
