ರೈತರು ಮಣ್ಣಿನ ಫಲವತ್ತತೆಯನ್ನು ಕಾಪಾಡುವ ಜೊತೆಗೆ ಸುಸ್ಥಿರ ಕೃಷಿ ಪದ್ಧತಿಗಳನ್ನು ಅಳವಡಿಸಿಕೊಂಡು ಸಾವಯವ ಕೃಷಿಗೆ ಆದ್ಯತೆ ನೀಡಬೇಕು ಎಂದು ಗ್ರೀನ್ ವಿನ್ ಅಗ್ರೋ ಸೊಲ್ಯೂಷನ್ಸ್ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಡಾ. ಶಿವಮೂರ್ತಿ ನಾಯಕ್ ಹೇಳಿದರು.
ವಿಜಯಪುರ ನಗರದ ಸಮರ್ಥನಗರದ ಶಿವಾಲಯ ಸಭಾಭವನದಲ್ಲಿ ರೈತರಿಗೆ ಥಾಯ್ ಹಲಸಿನ ಗಿಡಗಳ ಪರಿಚಯದ ಕುರಿತು ಆಯೋಜಿಸಿದ್ದ ವಿಚಾರ ಸಂಕಿರಣದಲ್ಲಿ ಮಾತನಾಡಿ, “ಪರಿಸರಕ್ಕೆ ಪೂರಕವಾಗಿರುವ ಹಾಗೂ ವಿವಿಧ ಮಣ್ಣು ಮತ್ತು ಹವಾಗುಣಕ್ಕೆ ಹೊಂದಿಕೊಂಡು ಬೆಳೆಯಬಲ್ಲ ಹಲಸಿನ ತಳಿಗಳನ್ನು ರೈತರು ಬೆಳೆಸಬೇಕು. ಸಂಸ್ಥೆಯ ವತಿಯಿಂದ ಹಲಸಿನ ಸಸಿಗಳನ್ನು ಪೂರೈಸುವುದರೊಂದಿಗೆ, ರೈತರು ಬೆಳೆದ ಹಣ್ಣುಗಳನ್ನು ಖರೀದಿಸುವ ಒಪ್ಪಂದ ಮಾಡಿಕೊಳ್ಳಲಾಗುವುದು. ಅಲ್ಲದೆ, ಸಸಿ ನಾಟಿಯಿಂದ ಕಟಾವಿನವರೆಗೆ ಅಗತ್ಯ ತಾಂತ್ರಿಕ ಮಾಹಿತಿ ಮತ್ತು ಮಾರ್ಗದರ್ಶನವನ್ನು ನೀಡಲಾಗುವುದು” ಎಂದು ತಿಳಿಸಿದರು.
ನಿವೃತ್ತ ಸಹ ವಿಸ್ತರಣಾ ನಿರ್ದೇಶಕ ಡಾ. ರವೀಂದ್ರ ಬೆಳ್ಳಿ, ಪರಿಕರ ಮಾರಾಟಗಾರ ಡಾ. ಬಾಳಾಸಾಹೇಬ್ ಉದಗಟ್ಟಿ, ಕೃಷಿ ಸಲಹೆಗಾರ ಸಿದ್ಧಾರ್ಥ ಕಾಂಬಳೆ ಮಾತನಾಡಿ, “ರೈತರು ಒಂದೇ ಬೆಳೆಯನ್ನು ಅವಲಂಬಿಸದೆ ಕೃಷಿಯೊಂದಿಗೆ ಹಣ್ಣಿನ ಬೆಳೆಗಳು ಹಾಗೂ ಅರಣ್ಯಕೃಷಿಗೂ ಆದ್ಯತೆ ನೀಡಬೇಕು. ಇದರಿಂದ ರೈತರು ಆರ್ಥಿಕವಾಗಿ ಸ್ವಾವಲಂಬಿಗಳಾಗಲು ಸಾಧ್ಯವಾಗುತ್ತದೆ. ಸಾವಯವ ಕೃಷಿ ಪರಿಕರಗಳನ್ನು ಬಳಸಿಕೊಂಡು ಬೆಳೆ ಬೆಳೆದರೆ ಮಾರುಕಟ್ಟೆಯಲ್ಲಿ ಹೆಚ್ಚಿನ ಲಾಭ ಪಡೆಯಬಹುದು” ಎಂದರು.
ಪರಶುರಾಮ ಬಂಡಿ ಹಾಗೂ ಮಲ್ಲಿಕಾರ್ಜುನ ಯಾದವ ಮಾತನಾಡಿ, “ಜಿಲ್ಲೆಯ ರೈತರಿಗೆ ಅಗತ್ಯವಿರುವ ಹಲಸಿನ ಸಸಿಗಳು ಹಾಗೂ ತಾಂತ್ರಿಕ ಮಾರ್ಗದರ್ಶನವನ್ನು ಸಂಸ್ಥೆಯ ವತಿಯಿಂದ ಒದಗಿಸಲಾಗುತ್ತಿದೆ. ರೈತರು ಇದರ ಸದುಪಯೋಗ ಪಡೆದುಕೊಳ್ಳಬೇಕು” ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಸೈನಿಕ ಯಲ್ಲಪ್ಪ ನವಬಾಗ ಹಾಗೂ ರೈತ ತಿಪ್ಪಾರಾಯ ಹತ್ತರಕಿ ಅವರನ್ನು ಸನ್ಮಾನಿಸಲಾಯಿತು. ಸಮಾರಂಭದಲ್ಲಿ ನಾಟಿ ವೈದ್ಯ ಶಿವರಾಜ ಹಳಿಂಗಳಿ, ಹರ್ಷಾ ನಾಯಕ್, ರಾಜಪಾಲ ಚವ್ಹಾಣ, ಕಂಬಪ್ಪ ಚಲವಾದಿ ಸೇರಿದಂತೆ ಜಿಲ್ಲೆಯ ವಿವಿಧ ಭಾಗಗಳ ಗ್ರೀನ್ ವಿನ್ ಸಂಸ್ಥೆಯ ಸಲಹೆಗಾರರು, ಪ್ರಗತಿಪರ ರೈತರು ಹಾಗೂ ರೈತ ಮಹಿಳೆಯರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡಿದ್ದರು.
