ವಾರಾಣಸಿಯ ಹಡಹಾ ಸಾರಾಯ್ ಪ್ರದೇಶದಲ್ಲಿರುವ ಭಾರತ ರತ್ನ, ಶಹನಾಯಿ ದಿಗ್ಗಜ ಉಸ್ತಾದ್ ಬಿಸ್ಮಿಲ್ಲಾ ಖಾನ್ ಅವರ ಮನೆಯನ್ನು ಅಧಿಕಾರಿಗಳು ಧ್ವಂಸಗೊಳಿಸಿದ್ದಾರೆ. ಆಡಳಿತದ ಈ ಕ್ರಮವು ರಾಜಕೀಯ ಮತ್ತು ಸಾಮಾಜಿಕ ವಲಯಗಳಲ್ಲಿ ತೀವ್ರ ವಿರೋಧಕ್ಕೆ ಗ್ರಾಸವಾಗಿದೆ.
ವಿರೋಧಗಳ ನಡುವೆಯೇ ಸ್ಪಷ್ಟನೆ ನೀಡಿರುವ ಅಧಿಕಾರಿಗಳು, “ಈ ಧ್ವಂಸ ಕ್ರಮವು ಯಾವುದೇ ಸರ್ಕಾರಿ ಕ್ರಮ ಅಥವಾ ಬುಲ್ಡೋಜರ್ ಕಾರ್ಯಾಚರಣೆಯಲ್ಲ. ಬದಲಿಗೆ, ಅತ್ಯಂತ ಶಿಥಿಲಾವಸ್ಥೆಯಲ್ಲಿದ್ದ ಆ ಕಟ್ಟಡವನ್ನು ನವೀಕರಿಸಲು ಮತ್ತು ಮರುನಿರ್ಮಾಣ ಮಾಡಲು ಕುಟುಂಬದ ಸದಸ್ಯರೇ ಸ್ವತಃ ಕೈಗೆತ್ತಿಕೊಂಡಿರುವ ಕಾರ್ಯ” ಎಂದಿದ್ದಾರೆ.
ಈ ಮನೆಯು ಬಹಳ ಹಳೆಯದಾಗಿದ್ದು, ತೀವ್ರ ಹಾನಿಗೊಳಗಾಗಿದ್ದರಿಂದ ಸುರಕ್ಷತೆಯ ದೃಷ್ಟಿಯಿಂದ ಕಟ್ಟಡದ ಅಪಾಯಕಾರಿ ಭಾಗಗಳನ್ನು ತೆರವುಗೊಳಿಸುವಂತೆ ವಾರಾಣಸಿ ನಗರ ಪಾಲಿಕೆ (VMC) ಹಿಂದೆ ನೋಟಿಸ್ ನೀಡಿತ್ತು ಎಂದು ತಿಳಿದುಬಂದಿದೆ.
ಉಸ್ತಾದ್ ಅವರ ಮೊಮ್ಮಗ ಮೊಹಮ್ಮದ್ ಸಿಬ್ಟೇನ್ ನೀಡಿರುವ ಮಾಹಿತಿಯಂತೆ, ಕುಟುಂಬದಲ್ಲಿ ಆರಂಭದಲ್ಲಿದ್ದ ಸಣ್ಣಪುಟ್ಟ ಭಿನ್ನಾಭಿಪ್ರಾಯಗಳನ್ನು ಬಗೆಹರಿಸಿಕೊಂಡ ನಂತರ, ಶಿಥಿಲಗೊಂಡಿದ್ದ ಮನೆಯ ಭಾಗಗಳನ್ನು ಕೆಡವಿ ಹೊಸ ಕಟ್ಟಡ ನಿರ್ಮಿಸಲು ಕುಟುಂಬವೇ ನಿರ್ಧರಿಸಿದೆ. ನಿರ್ಮಿಸಲಾಗುವ ಹೊಸ ಕಟ್ಟಡದ ನೆಲಮಹಡಿಯ ಒಂದು ಭಾಗವನ್ನು ಬಿಸ್ಮಿಲ್ಲಾ ಖಾನ್ ಅವರ ನೆನಪಿಗಾಗಿ ಆಡಿಯೋ ಮ್ಯೂಸಿಯಂ ಮಾಡಲು ನಗರ ಪಾಲಿಕೆಗೆ ಬಿಟ್ಟುಕೊಡಲು ಕುಟುಂಬ ಯೋಜಿಸಿದೆ.
ಆದಾಗ್ಯೂ, ಕಟ್ಟಡದ ಭಾಗಗಳನ್ನು ತೆರವುಗೊಳಿಸುತ್ತಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ರಾಜಕೀಯ ರಂಗದಲ್ಲಿ ತೀವ್ರ ವಿರೋಧ-ಚರ್ಚೆಗಳು ನಡೆದಿವೆ. ಸಮಾಜವಾದಿ ಪಕ್ಷದ ಅಧ್ಯಕ್ಷ ಅಖಿಲೇಶ್ ಯಾದವ್ ಅವರು ಧ್ವಂಸಗೊಂಡ ಮನೆಯ ಚಿತ್ರಗಳನ್ನು ಹಂಚಿಕೊಂಡು, “ಬಿಜೆಪಿ ಸರ್ಕಾರವು ಬಿಸ್ಮಿಲ್ಲಾ ಖಾನ್ ಅವರ ಸಾಂಸ್ಕೃತಿಕ ಪರಂಪರೆ ಮತ್ತು ದೇಶದ ಪರಂಪರೆಯನ್ನು ನಾಶಪಡಿಸುತ್ತಿದೆ” ಎಂದು ಗಂಭೀರ ಆರೋಪ ಮಾಡಿದ್ದರು.
ಅಖಿಲೇಶ್ ಯಾದವ್ ಅವರ ಆರೋಪಗಳಿಗೆ ತಕ್ಷಣವೇ ಸ್ಪಷ್ಟನೆ ನೀಡಿದ ವಾರಾಣಸಿ ನಗರ ಪಾಲಿಕೆ ಅಧಿಕಾರಿಗಳು ಮತ್ತು ಸ್ಥಳೀಯ ಚೌಕ್ ಪೊಲೀಸ್ ಠಾಣೆಯ ಹಿರಿಯ ಅಧಿಕಾರಿಗಳು, “ಈ ಧ್ವಂಸ ಕಾರ್ಯಾಚರಣೆಯಲ್ಲಿ ಆಡಳಿತ ಮಂಡಳಿ ಅಥವಾ ಸರ್ಕಾರದ ಯಾವುದೇ ಪಾತ್ರವಿಲ್ಲ.ಆಸ್ತಿಯ ಮಾಲೀಕರೇ ಖಾಸಗಿಯಾಗಿ ಪುನರ್ನಿರ್ಮಾಣ ಕಾರ್ಯಕ್ಕಾಗಿ ಹಳೆಯ ಭಾಗಗಳನ್ನು ತೆರವುಗೊಳಿಸುತ್ತಿದ್ದಾರೆ” ಎಂದು ಖಚಿತಪಡಿಸಿದ್ದಾರೆ.
