ಇತ್ತೀಚೆಗಷ್ಟೇ, ಜಮ್ಮು-ಕಾಶ್ಮೀರದ ಇಬ್ಬರು ಯುವಕರನ್ನು ‘ಐಸಿಸ್’ ಜೊತೆ ನಂಟು ಹೊಂದಿದ್ದಾರೆಂಬ ಪ್ರಕರಣದಲ್ಲಿ ದೆಹಲಿ ನ್ಯಾಯಾಲಯವು ಖುಲಾಸೆಗೊಳಿಸಿ, ಬಿಡುಗಡೆ ಮಾಡಿದೆ. ಅವರಿಬ್ಬರೂ ‘ಭಯೋತ್ಪಾದಕ’ ಸಂಘಟನೆ ಜೊತೆ ಸಂಬಂಧ ಹೊಂದಿದ್ದಾರೆ ಎಂಬುದನ್ನು ಸಾಬೀತು ಮಾಡಲು ಯಾವುದೇ ಸಾಕ್ಷ್ಯ-ಪುರಾವೆಗಳಿಲ್ಲವೆಂದು ಹೇಳಿದ್ದ ನ್ಯಾಯಾಲಯ, ದೆಹಲಿ ಪೊಲೀಸರಿಗೆ ಛೀಮಾರಿಯನ್ನೂ ಹಾಕಿದೆ. ಇದೀಗ, ಅದೇ ದೆಹಲಿ ಪೊಲೀಸರು ಐಸಿಸ್ ಮತ್ತು ಅಲ್-ಖೈದಾ ಸಂಘಟನೆಗಳೊಂದಿಗೆ ಸಂಬಂಧ ಹೊಂದಿದ್ದಾರೆ ಎಂಬ ಆರೋಪದ ಮೇಲೆ 12 ಮಂದಿಯನ್ನು ಬಂಧಿಸಿದ್ದಾರೆ.
ದೆಹಲಿ ಪೊಲೀಸರು ಆಂಧ್ರಪ್ರದೇಶ ಪೊಲೀಸರ ಸಹಕಾರದೊಂದಿಗೆ ವಿವಿಧ ರಾಜ್ಯಗಳಲ್ಲಿ ಕಾರ್ಯಾಚರಣೆ ನಡೆಸಿದ್ದಾರೆ. ಆಂಧ್ರಪ್ರದೇಶದ ಮೊಹಮ್ಮದ್ ರಹ್ಮತುಲ್ಲಾ ಶರೀಫ್, ಮಿರ್ಜಾ ಸೊಹೈಲ್ ಬೇಗ್ ಹಾಗೂ ಮೊಹಮ್ಮದ್ ಡ್ಯಾನಿಶ್, ಬಿಹಾರದ ಶಾದ್ಮಾನ್ ದಿಲ್ಕುಶ್ ಮತ್ತು ಅಜ್ಮಾನುಲ್ಲಾ ಖಾನ್, ದೆಹಲಿಯ ರೋಹಿಣಿ ನಿವಾಸಿ ಲಕ್ಕಿ ಅಹ್ಮದ್, ಪಶ್ಚಿಮ ಬಂಗಾಳದ ಮೀರ್ ಆಸಿಫ್ ಅಲಿ, ರಾಜಸ್ಥಾನದ ಜೀಶನ್, ಕರ್ನಾಟಕದ ಅಬ್ದುಲ್ ಸಲಾಂ, ಮಹಾರಾಷ್ಟ್ರದ ಶಾ ರುಖ್ ಖಾನ್ ಮತ್ತು ಶಿಯಾಕ್ ಪಿಯಾಜ್ ಉರ್ ರೆಹಮಾನ್ ಹಾಗೂ ತೆಲಂಗಾಣದ ಸೈದಾ ಬೇಗಂ ಅವರನ್ನು ಬಂಧಿಸಲಾಗಿದೆ.
“ಈ 12 ಮಂದಿ ಯುವಕರು ಗೇಮಿಂಗ್ ಆ್ಯಪ್ ಮೂಲಕ ಅಲ್-ಖೈದಾ ಮತ್ತು ಐಸಿಸ್ ಸಂಘಟನೆಯವರನ್ನು ಸಂಪರ್ಕಿಸಿದರು, ಸಂಘಟನೆಗಳನ್ನು ಸೇರಿಕೊಂಡಿದ್ದರು. ಐಸಿಸ್ಗೆ ಸಂಬಂಧಿಸಿದ ಗುಂಪಾದ ‘ಬೆನೆಕ್ಸ್ ಕಾಮ್’ನೊಂದಿಗೆ ಸಂಪರ್ಕ ಹೊಂದಿದ್ದರು” ಎಂದು ಪೊಲೀಸರು ಆರೋಪಿಸಿದ್ದಾರೆ.
ಈ ಲೇಖನ ಓದಿದ್ದೀರಾ?: UAPA | ಪೂರ್ವಗ್ರಹೀತ ವರದಿ – ಸತ್ತ ಸತ್ಯ: ಖುಲಾಸೆಯಾದರೂ ಅಳಿಯದ ‘ಭಯೋತ್ಪಾದಕ’ ಕಳಂಕ
“ಬಂಧಿತರು ತಮ್ಮ ಸಾಮಾಜಿಕ ಮಾಧ್ಯಮದ ಪೋಸ್ಟ್ಗಳಲ್ಲಿ ರಾಷ್ಟ್ರಧ್ವಜದ ಬದಲಿಗೆ ಐಸಿಸ್ ಧ್ವಜವನ್ನು ಹಾಕಿದ್ದರು. ಅವರು ರಾಷ್ಟ್ರಧ್ವಜವನ್ನು ಸುಟ್ಟು ಹಾಕಿದ್ದರು ಮತ್ತು ಭಾರತವನ್ನು ಇಸ್ಲಾಮಿಕ್ ರಾಷ್ಟ್ರವನ್ನಾಗಿ ಪರಿವರ್ತಿಸುವ ಕುರಿತು ಪ್ರತಿಪಾದಿಸಿದ್ದರು. ಅವರು ರಾಷ್ಟ್ರಗೀತೆಯನ್ನು ಅಪಹಾಸ್ಯ ಮಾಡಿದ್ದರು” ಎಂದು ಅಧಿಕಾರಿಗಳು ದೂರಿದ್ದಾರೆ.
“ವಿಜಯವಾಡದ ನಿವಾಸಿಗಳಾದ ಮೊಹಮ್ಮದ್ ರಹ್ಮತುಲ್ಲಾ ಶರೀಫ್, ಮಿರ್ಜಾ ಸೊಹೈಲ್ ಬೇಗ್ ಹಾಗೂ ಮೊಹಮ್ಮದ್ ಡ್ಯಾನಿಶ್ ಎಂಬ ಮೂವರು ಆರೋಪಿಗಳು ಯುವಕರನ್ನು ಉಗ್ರಗಾಮಿಗಳನ್ನಾಗಿ ಮಾಡಲು ಮತ್ತು ಜಿಹಾದ್ಗೆ ಸಿದ್ಧಪಡಿಸಲು ‘ಅಲ್ ಮಲಿಕ್ ಇಸ್ಲಾಮಿಕ್ ಯೂತ್’ ಎಂಬ ಗುಂಪನ್ನು ರಚಿಸಿದ್ದರು” ಎಂದು ಪೊಲೀಸರು ಆರೋಪಿಸಿದ್ದಾರೆ.
