ನಟ ಹಾಗೂ ತಮಿಳಗ ವೆಟ್ರಿ ಕಳಗಂ (ಟಿವಿಕೆ) ಪಕ್ಷದ ಅಧ್ಯಕ್ಷ ಸಿ. ಜೋಸೆಫ್ ವಿಜಯ್ ಅವರು ಭಾನುವಾರ ತಮಿಳುನಾಡಿನ ನೂತನ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಿದರು. ಚೆನ್ನೈನ ವಿಶಾಲವಾದ ಜವಾಹರಲಾಲ್ ನೆಹರೂ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಈ ಭವ್ಯ ಸಮಾರಂಭದಲ್ಲಿ ತಮಿಳುನಾಡು ರಾಜ್ಯಪಾಲ ರಾಜೇಂದ್ರ ಅರ್ಲೇಕರ್ ಅವರು ವಿಜಯ್ ಹಾಗೂ ಅವರ ನೂತನ ಸಚಿವಸಂಪುಟದ ಸದಸ್ಯರಿಗೆ ಪ್ರಮಾಣವಚನ ಬೋಧಿಸಿದರು.
ಈ ಕಾರ್ಯಕ್ರಮದಲ್ಲಿ ಕಾಂಗ್ರೆಸ್ ನಾಯಕ ಹಾಗೂ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ, ವಿಜಯ್ ಅವರ ತಂದೆ-ತಾಯಿ ಎಸ್.ಎ. ಚಂದ್ರಶೇಖರ್ ಮತ್ತು ಶೋಭಾ, ಹಾಗೂ ಪ್ರಮುಖ ನಟಿ ತ್ರಿಷಾ ಸೇರಿದಂತೆ ಹಲವು ಗಣ್ಯರು ಭಾಗವಹಿಸಿದ್ದರು.
ಮುಖ್ಯಮಂತ್ರಿಯಾಗಿ ಅಧಿಕಾರ ವಹಿಸಿಕೊಂಡ ಕೂಡಲೇ ವಿಜಯ್ ಅವರು ತಮ್ಮ ಚುನಾವಣಾ ಭರವಸೆಗಳನ್ನು ಈಡೇರಿಸಲು ಮುಂದಾಗಿದ್ದು, ಗೃಹಬಳಕೆಯ ಗ್ರಾಹಕರಿಗೆ 200 ಯೂನಿಟ್ ಉಚಿತ ವಿದ್ಯುತ್ ನೀಡುವುದು ಮತ್ತು ಮಹಿಳೆಯರ ರಕ್ಷಣೆಗಾಗಿ ವಿಶೇಷ ಪಡೆಯನ್ನು ರಚಿಸುವ ಆದೇಶಗಳು ಸೇರಿದಂತೆ ಮೂರು ಪ್ರಮುಖ ಕಡತಗಳಿಗೆ ಸಹಿ ಹಾಕಿದರು.
ವಿಜಯ್ ಅವರ ನೂತನ ಸಚಿವಸಂಪುಟದಲ್ಲಿ ವಿವಿಧ ಹಿನ್ನೆಲೆಯ ವ್ಯಕ್ತಿಗಳಿಗೆ ಸ್ಥಾನ ಕಲ್ಪಿಸಲಾಗಿದ್ದು, ಇದೊಂದು ವೈವಿಧ್ಯಮಯ ತಂಡವಾಗಿದೆ. ಟಿವಿಕ್ಯೆ ಪಕ್ಷದ ಪ್ರಧಾನ ಕಾರ್ಯದರ್ಶಿಯಾಗಿರುವ ಎನ್. ಆನಂದ್ (‘ಬುಸ್ಸಿ’ ಆನಂದ್) ಟಿ.ನಗರ್ ಕ್ಷೇತ್ರದಿಂದ ಶಾಸಕರಾಗಿ ಆಯ್ಕೆಯಾಗಿದ್ದು, ಪಕ್ಷದ ಬೆಳವಣಿಗೆಯಲ್ಲಿ ಇವರ ಪಾತ್ರ ಅತ್ಯಂತ ಪ್ರಮುಖವಾಗಿದೆ.
ಇದನ್ನು ಓದಿದ್ದೀರಾ?ತಮಿಳುನಾಡಿನ ನೂತನ ಮುಖ್ಯಮಂತ್ರಿಯಾಗಿ ಜೋಸೆಫ್ ವಿಜಯ್ ಪ್ರಮಾಣ ವಚನ ಸ್ವೀಕಾರ
ಶಿವಕಾಶಿ ಕ್ಷೇತ್ರದಿಂದ ಗೆದ್ದಿರುವ 29 ವರ್ಷದ ಎಸ್. ಕೀರ್ತನಾ, 7 ದಶಕಗಳ ಪುರುಷ ಪ್ರಾಬಲ್ಯವನ್ನು ಅಂತ್ಯಗೊಳಿಸಿದ ಮೊದಲ ಮಹಿಳಾ ಶಾಸಕಿಯಾಗಿದ್ದಾರೆ. ಬ್ಯಾಸ್ಕೆಟ್ಬಾಲ್ ಆಟಗಾರ ಮತ್ತು ಭಾರತ ಬ್ಯಾಸ್ಕೆಟ್ಬಾಲ್ ಒಕ್ಕೂಟದ ಅಧ್ಯಕ್ಷರಾಗಿರುವ ಆದವ್ ಅರ್ಜುನ ಅವರು ವಿಲ್ಲಿವಾಕ್ಕಂ ಕ್ಷೇತ್ರದಿಂದ ಆಯ್ಕೆಯಾಗಿದ್ದಾರೆ. ‘ಲಾಟರಿ ಕಿಂಗ್’ ಸ್ಯಾಂಟಿಯಾಗೊ ಮಾರ್ಟಿನ್ ಅವರ ಅಳಿಯನಾಗಿರುವ ಇವರು ಪಕ್ಷದ ರಾಜಕೀಯ ರಣತಂತ್ರಗಾರರಾಗಿ ಶ್ರಮಿಸಿದ್ದಾರೆ.
ಇನ್ನು, 46 ವರ್ಷದ ಮಾಜಿ ಐಆರ್ಎಸ್ ಅಧಿಕಾರಿ ಹಾಗೂ ವೈದ್ಯರಾಗಿರುವ (MBBS) ಕೆ.ಜಿ. ಅರುಣ್ರಾಜ್ ಅವರು ತಿರುಚೆಂಗೋಡ್ ಕ್ಷೇತ್ರದಿಂದ 79,500 ಮತಗಳನ್ನು ಪಡೆದು, ಎಐಎಡಿಎಂಕೆ ಅಭ್ಯರ್ಥಿ ಎಸ್.ಆರ್.ಎಂ.ಟಿ. ಶೇಖರ್ ಅವರನ್ನು 28,172 ಮತಗಳ ಅಂತರದಿಂದ ಸೋಲಿಸಿದ್ದಾರೆ.
ಟಿವಿಕೆಯ ಐಟಿ ಮತ್ತು ಸಾಮಾಜಿಕ ಜಾಲತಾಣ ವಿಭಾಗದ ಮುಖ್ಯಸ್ಥರಾಗಿದ್ದ ಎಂಜಿನಿಯರಿಂಗ್ ಮತ್ತು ಕಾನೂನು ಪದವೀಧರ ಆರ್. ನಿರ್ಮಲ್ ಕುಮಾರ್ ತಿರುಪ್ಪರಂಕುಂಡ್ರಂ ಕ್ಷೇತ್ರದಿಂದ ಗೆದ್ದಿದ್ದಾರೆ. ಎಡಪಂಥೀಯ ಪಕ್ಷಗಳ ಜೊತೆ ಮಾತುಕತೆ ನಡೆಸಿ ಬೆಂಬಲ ತರುವಲ್ಲಿ ಪ್ರಮುಖ ಪಾತ್ರ ವಹಿಸಿದ ಇವರು, ಈ ಹಿಂದೆ ಬಿಜೆಪಿ ಮತ್ತು ಎಐಎಡಿಎಂಕೆಯಲ್ಲಿ ಕೆಲಸ ಮಾಡಿದ್ದರು.
ನಟ, ಹಾಸ್ಯ ಕಲಾವಿದ ಹಾಗೂ ಟಿವಿ ನಿರೂಪಕರಾಗಿರುವ ಎ. ರಾಜ್ಮೋಹನ್ ಎಗ್ಮೋರ್ ಕ್ಷೇತ್ರದಿಂದ, ಹಾಗೂ ಪಕ್ಷದ ಕೋಶಾಧ್ಯಕ್ಷ ಮತ್ತು ವಕೀಲರಾಗಿರುವ ಪಿ. ವೆಂಕಟರಮಣನ್ (ಪಕ್ಷದ ಬ್ರಾಹ್ಮಣ ಮುಖ) ಮೈಲಾಪುರ ಕ್ಷೇತ್ರದಿಂದ ಗೆದ್ದು ಸಚಿವರಾಗಿದ್ದಾರೆ. ದಂತವೈದ್ಯರಾಗಿರುವ ಡಾ. ಕೆ.ಟಿ. ಪ್ರಭು ಅವರು ಕಾರೈಕುಡಿ ಕ್ಷೇತ್ರದಲ್ಲಿ ಎನ್ಟಿಕೆ ಸ್ಥಾಪಕ ಹಾಗೂ ನಿರ್ದೇಶಕ ಸೀಮಾನ್ ಅವರನ್ನು ಸೋಲಿಸಿ ಸಂಪುಟದಲ್ಲಿ ಸ್ಥಾನ ಪಡೆದಿದ್ದಾರೆ.
