ಗುಜರಾತ್ನಲ್ಲಿ ನೋಂದಾಯಿತವಾಗಿದ್ದ, ಆದರೆ ಮಾನ್ಯತೆ ಪಡೆಯದ ಮೂರು ರಾಜಕೀಯ ಪಕ್ಷಗಳು ಆದಾಯ ತೆರಿಗೆ ಇಲಾಖೆಗೆ ವಂಚಿಸಿ, ಬೃಹತ್ ಮಟ್ಟದ ‘ನಕಲಿ ದೇಣಿಗೆ ದಂಧೆ’ ನಡೆಸಿರುವುದು ಬೆಳಕಿಗೆ ಬಂದಿದೆ. ಸುಮಾರು 1,870 ಕೋಟಿ ರೂಪಾಯಿ ನಕಲಿ ದೇಣಿಗೆಯನ್ನು ತೋರಿಸಿ, ಸರ್ಕಾರಕ್ಕೆ ಅಂದಾಜು 560 ಕೋಟಿ ರೂ.ಗೂ ಅಧಿಕ ತೆರಿಗೆ ನಷ್ಟ ಉಂಟುಮಾಡಿದ ಆರೋಪದ ಮೇಲೆ ಗುಜರಾತ್ ಪೊಲೀಸರು ಮೂರು ಪ್ರತ್ಯೇಕ ಎಫ್ಐಆರ್ಗಳನ್ನು ದಾಖಲಿಸಿದ್ದಾರೆ. ತನಿಖೆ ಆರಂಭಿಸಿದ್ದಾರೆ.
ಆದಾಯ ತೆರಿಗೆ (IT) ಇಲಾಖೆಯು ನೀಡಿರುವ ದೂರಿನ ಆಧಾರದ ಮೇಲೆ ಗಾಂಧಿನಗರ ವಲಯದ ಅಪರಾಧ ತನಿಖಾ ವಿಭಾಗ (CID) ಈ ಪ್ರಕರಣಗಳನ್ನು ದಾಖಲಿಸಿಕೊಂಡಿದೆ. ಭಾತೀಯ ರಾಷ್ಟ್ರೀಯ ಜನತಾ ದಳ (BNJD), ಸ್ವತಂತ್ರತಾ ಅಭಿವ್ಯಕ್ತಿ ಪಾರ್ಟಿ (SAP) ಹಾಗೂ ಗರೀಬ್ ಕಲ್ಯಾಣ್ ಪಾರ್ಟಿ (GKP) ಎಂಬ ಮೂರು ರಾಜಕೀಯ ಪಕ್ಷಗಳು ಹಾಗೂ ಇವುಗಳಿಗೆ ನೆರವಾದ ಆಡಿಟರ್ಗಳು (CA), ಪಕ್ಷದ ಪದಾಧಿಕಾರಿಗಳು ಸೇರಿದಂತೆ ಒಟ್ಟು 15ಕ್ಕೂ ಹೆಚ್ಚು ಜನರ ಹೆಸರುಗಳನ್ನು ಎಫ್ಐಆರ್ನಲ್ಲಿ ಉಲ್ಲೇಖಿಸಲಾಗಿದೆ.
ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 80GGC ಪ್ರಕಾರ, ನೋಂದಾಯಿತ ರಾಜಕೀಯ ಪಕ್ಷಗಳಿಗೆ ನೀಡುವ ದೇಣಿಗೆಗೆ 100%ರಷ್ಟು ತೆರಿಗೆ ವಿನಾಯಿತಿ ಸಿಗುತ್ತದೆ. ಈ ನಿಯಮವನ್ನು ದುರುಪಯೋಗಪಡಿಸಿಕೊಂಡ ಆರೋಪಿಗಳು, ಪ್ರಭಾವಿ ಉದ್ಯಮಿಗಳು ಮತ್ತು ತೆರಿಗೆ ಪಾವತಿದಾರರಿಂದ ಚೆಕ್ ಅಥವಾ ಬ್ಯಾಂಕ್ (RTGS) ಮೂಲಕ ದೇಣಿಗೆ ಹಣವನ್ನು ಪಡೆದುಕೊಳ್ಳುತ್ತಿದ್ದರು. ನಂತರ ನಕಲಿ/ಶೆಲ್ ಕಂಪನಿಗಳ ಜಾಲವನ್ನು ಬಳಸಿ, ಆಹಾರ ಧಾನ್ಯ ಖರೀದಿ ಮುಂತಾದ ನಕಲಿ ಬಿಲ್ಗಳನ್ನು ಸೃಷ್ಟಿಸುತ್ತಿದ್ದರು. ಕೊನೆಗೆ 2 ರಿಂದ 10%ರಷ್ಟು ಕಮಿಷನ್ ಹಣವನ್ನು ತಾವಿಟ್ಟುಕೊಂಡು, ಉಳಿದ ಹಣವನ್ನು ಅದೇ ದೇಣಿಗೆದಾರರಿಗೆ ನಗದುರೂಪದಲ್ಲಿ ವಾಪಸ್ ಕೊಡುತ್ತಿದ್ದರು. ಅಲ್ಲದೆ, ನಕಲಿ ಲೆಕ್ಕಪತ್ರಗಳನ್ನು ಸೃಷ್ಟಿಸಿ ಡಿಜಿಟಲ್ ಸಹಿಯೊಂದಿಗೆ ಚುನಾವಣಾ ಆಯೋಗಕ್ಕೂ ಸುಳ್ಳು ಮಾಹಿತಿ ಸಲ್ಲಿಸುತ್ತಿದ್ದರು ಎಂದು ಆರೋಪಿಸಲಾಗಿದೆ.
ಭಾರತೀಯ ರಾಷ್ಟ್ರೀಯ ಜನತಾ ದಳ (BNJD) ಪಕ್ಷವು ಪ್ರಕರಣದಲ್ಲೇ ಅತ್ಯಂತ ದೊಡ್ಡ ಪ್ರಮಾಣದ ವಂಚನೆ ನಡೆಸಿದೆ. ಇದು 56,238 ದೇಣಿಗೆದಾರರಿಂದ ಬರೋಬ್ಬರಿ 1,143.85 ಕೋಟಿ ರೂಪಾಯಿ ದೇಣಿಗೆ ಪಡೆದಿದ್ದು, ಸರ್ಕಾರಕ್ಕೆ ಸುಮಾರು 343 ಕೋಟಿ ರೂಪಾಯಿ ತೆರಿಗೆ ನಷ್ಟ ಉಂಟುಮಾಡಿದೆ. ಈ ಪಕ್ಷದ ಅಧ್ಯಕ್ಷ ಸುರೇಂದ್ರಕುಮಾರ್ ವಿಷ್ಣುಭಾಯಿ ಗಜೇರಾ ಎಂಬುವವರೇ ಈ ಸಂಪೂರ್ಣ ದಂಧೆಯ ಸೂತ್ರಧಾರಿಯಾಗಿದ್ದು, ಕಮಿಷನ್ ದರಗಳನ್ನು ಇವರೇ ನಿರ್ಧರಿಸುತ್ತಿದ್ದರು ಎನ್ನಲಾಗಿದೆ.
This video cannot be played in your browser. Open the video directly
ಅಂತೆಯೇ, ಸ್ವತಂತ್ರತಾ ಅಭಿವ್ಯಕ್ತಿ ಪಕ್ಷವು (SAP) ಸುಮಾರು 519 ಕೋಟಿ ರೂಪಾಯಿ ನಕಲಿ ದೇಣಿಗೆ ಸಂಗ್ರಹಿಸಿ, ಸರ್ಕಾರಕ್ಕೆ 155 ಕೋಟಿ ರೂಪಾಯಿ ತೆರಿಗೆ ವಂಚನೆ ಮಾಡಿದೆ. ಈ ಪಕ್ಷಕ್ಕೆ ಯಾವುದೇ ನೈಜ ರಾಜಕೀಯ ಚಟುವಟಿಕೆಗಳಿರಲಿಲ್ಲ, ಕೇವಲ ಕಮಿಷನ್ ದಂಧೆಗಾಗಿ ಇದನ್ನು ಬಳಿಸಿಕೊಳ್ಳಲಾಗಿತ್ತು ಎಂದು ತನಿಖೆಯಲ್ಲಿ ತಿಳಿದುಬಂದಿದೆ.
ಗರೀಬ್ ಕಲ್ಯಾಣ್ ಪಾರ್ಟಿಯು (GKP) 2022-23 ರಿಂದ 2025-26ರ ಹಣಕಾಸು ವರ್ಷಗಳ ನಡುವೆ ಈ ಪಕ್ಷವು 206.76 ಕೋಟಿ ರೂಪಾಯಿ ನಕಲಿ ದೇಣಿಗೆ ಪಡೆದು, ಸುಮಾರು 62 ಕೋಟಿ ರೂಪಾಯಿ ತೆರಿಗೆ ವಂಚಿಸಿದೆ. ಬ್ಯಾಂಕ್ ಖಾತೆಗಳ ಸರಿಯಾದ ಪರಿಶೀಲನೆ ನಡೆಸದೇ ನಕಲಿ ಆಡಿಟ್ ವರದಿ ನೀಡಲು ಚಾರ್ಟರ್ಡ್ ಅಕೌಂಟೆಂಟ್ಗಳು (CA) 50,000 ರೂಪಾಯಿ ಲಂಚ ಪಡೆದಿರುವುದು ಎಫ್ಐಆರ್ನಲ್ಲಿ ಉಲ್ಲೇಖವಾಗಿದೆ.
ಚುನಾವಣಾ ಆಯೋಗದ ಮಾಹಿತಿ ಪ್ರಕಾರ, ಈ ಮೂರೂ ಪಕ್ಷಗಳು 2017ರಿಂದ ಗುಜರಾತ್ ವಿಧಾನಸಭೆ ಮತ್ತು ಲೋಕಸಭಾ ಚುನಾವಣೆಗಳಲ್ಲಿ ಸ್ಪರ್ಧಿಸುತ್ತಿವೆ. ಆದರೆ, ಕೇವಲ ಕಾಗದದ ಮೇಲಷ್ಟೇ ರಾಜಕೀಯ ಪಕ್ಷಗಳಾಗಿದ್ದ ಇವುಗಳು, ನಿಯಮದಂತೆ ಪಡೆಯಬೇಕಿದ್ದ 16.67%ರಷ್ಟು ಕನಿಷ್ಠ ಮತಗಳನ್ನು ಪಡೆಯಲು ವಿಫಲವಾಗಿ, ಸ್ಪರ್ಧಿಸಿದ ಎಲ್ಲ ಕ್ಷೇತ್ರಗಳಲ್ಲೂ ಠೇವಣಿ ಕಳೆದುಕೊಂಡಿವೆ. 2017 ಮತ್ತು 2022ರ ಚುನಾವಣೆಯಲ್ಲಿ ಈ ಪಕ್ಷಗಳ ರಾಜ್ಯಮಟ್ಟದ ಮತಗಳ ಪ್ರಮಾಣ 0.01%ರಷ್ಟು ಮಾತ್ರವಿತ್ತು ಎಂದು ವರದಿಯಾಗಿದೆ.
ಪ್ರಸ್ತುತ, ಗುಜರಾತ್ ಪೊಲೀಸರು ವಂಚನೆ, ಕ್ರಿಮಿನಲ್ ಪಿತೂರಿ ಮತ್ತು ನಕಲಿ ದಾಖಲೆ ಸೃಷ್ಟಿ ಆರೋಪದಡಿ ಪ್ರಕರಣಗಳನ್ನು ದಾಖಲಿಸಿಕೊಂಡಿದ್ದಾರೆ. ಆರೋಪಿಗಳ ಬ್ಯಾಂಕ್ ಖಾತೆಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲು ಹಾಗೂ ಆಸ್ತಿಗಳನ್ನು ಜಪ್ತಿ ಮಾಡಲು ಕಾನೂನು ಕ್ರಮ ಕೈಗೊಳ್ಳುತ್ತಿದ್ದಾರೆ.
